Ọrebhe Osẹnobulua tie ne sikẹ ọle bhi erọnmhọn. (Psalm 65:2) Ọrẹ yiriọ, ọiyi erọnmhọn rebhe ọle ka ehọ le. Bhọsi ijiẹmhin, iJehova ika ehọ erọnmhọn ọsi okpea nọn re oya nin okhuo ọle. (1 Peter 3:7) Osẹnobulua bha yẹ ka ehọ erọnmhọn ọsi ibhokhan Izrẹl ẹghe nele rẹ manman ha lu olukhọ. Bhọsi ẹmhọn-ata, ekpẹn Jehova rẹ mun mhan nọn rẹ yọ nin mhan ha nan erọnmhọn jọle. Ọrẹ yiriọ, Osẹnobulua dẹ ka ehọ erọnmhọn ọsi ene lu olukhọ sade ele fidenọ.—Tie Isaiah 1:15; 55:7.

Ghe ọne ividio Erọnmhọn rebhe Osẹnobulua ka ehọ le?

Erọnmhọn nan nan, oga nọn. Ọnan zẹle Osẹnobulua nin Jehova nọn man mhan, ọle ọkhẹke nin mhan ha nan erọnmhọn je. (Matthew 4:10; 6:9) Ọyẹ khẹke nin mhan nan erọnmhọn bhi elin nọnsi Jesu, nọn yu mhan, ranmhude ọbha gba mhan. (John 14:6) Jehova guanọ nin mhan nanbhi otọ ẹkẹ mhan nan erọnmhọn jọle, ọiyi enan gbẹn bhi ebe.—Tie Matthew 6:7; Philippians 4:6, 7.

Arẹmiẹn ẹkẹ ọkhọle mhan rẹ nan erọnmhọn, mhan bha rẹ tale dagbare, Jehova dẹ họnmhin. (1 Samuel 1:12, 13) Ọle taman mhan nin mhan ha nan erọnmhọn jọle ẹghe rebhe. Ọkhẹke nin mhan ha nan erọnmhọn ọsewewiẹ, si mhan rio bhi owe, mhan kuẹ nowẹ ọsemuan, ọkuẹsẹ mhan le ebale, bi mhan ha ribhi ọnọghọ.—Tie Psalm 55:22; Matthew 15:36.

Ọiyi emhin nọn lẹkhẹ nan rẹ sike Osẹnobulua bhi ọnan agbọn nan. Ranmhude, ẹwẹ ẹbho ne bha rẹọbhi Osẹnobulua mhan da nyẹn. Otọ ọfubhegbe nin Osẹnobulua rẹ vive, ele ghọle emhin ojẹ. (2 Timothy 3:1, 4; 2 Peter 3:3, 13) Ọnan zẹle nọn da khẹke nin mhan deba enin mhan ko mhọn urẹọbhọ ọkpa ha mun obọ. Iriọ mhan da sabọ ha re izebhudu nin egbe.—Tie Hebrews 10:24, 25.

 Mhan ha nin ene hoẹmhọn Osẹnobulua mun obọ, ọdẹ rẹkpa mhan rẹ sikẹ Osẹnobulua. Bhi ikolo oga ọsi Esali Jehova, uwẹ dẹ miẹn ene mhọn urẹọbhọ. Ele dẹ rẹkpa ẹ rẹ mun urẹọbhọ nọnsẹ zeze.—Tie Romans 1:11, 12.

Uwẹa ria eria nyan ebuwẹ luẹ bhi Baibo, uwẹ ki sabọ ha sikẹ Osẹnobulua. Ria eria nyan emhin nọnle lu, ibhude nesọle bi ive nọnle vele. Mhan ha nan erọnmhọn, yẹ ria eria nyan ebi mhan luẹ, ọdẹ rẹkpa mhan rẹ lẹn ebi ẹwanlẹn bi ahoẹmhọn-egbe nọnsi Osẹnobulua khin rẹji mhan.—Tie Joshua 1:8; Psalm 1:1-3.

Uwẹ ha mhọn urẹọbhọ, nuwẹ yẹ mun udu nyan Osẹnobulua, ọle ọkpa uwẹ ada sabọ sikẹ ọle. Ọkpa kinọn, urẹobhọ ọdiabi emhin nọn nyẹnlẹn, nan bẹẹ wanre. Ọkhẹke nin mhan ha ria eria nyan ebezẹle mhan mhọn urẹọbhọ. Iriọ mhan rẹ ha bun urẹọbhọ nọnsẹ mhan okhun.—Tie Matthew 4:4; Hebrews 11:1, 6.

Jehova gbẹloghe ene hoẹmhọn lẹn. Ọle dẹ sabọ gbogba ga ele nerẹ sabọ mun urẹọbhọ nọnsele mhọn. Ọle ida ji emhin soso rẹsui iruduba ọsi aribhọ ọsi ighegheghe nele mhọnlẹn. (Psalm 91:1, 2, 7-10) Ọle taman mhan ebi mhan ha rẹban, nin mhan da sabọ ha mhọn egbe nọn daanlẹn bi eghọnghọn. Jehova man mhan uwedẹ iẹnlẹn nọn mhẹn nẹ.—Tie Psalm 73:27, 28; James 4:4, 8.