Osẹnobulua nọn man mhan mhọn ẹwanlẹn nẹ mhan. Bii Aba nọn hoẹmhọn imọn nesọle, iriọ ọle rẹ gbẹloghe mhan. Ọle bha man mhan nin mhan ha dia egbe mhan. (Jeremiah 10:23) Beji imọn rẹ guanọ adia ọsi ene biẹ ele, iriọ mhan rẹ guanọ adia nọnsi Osẹnobulua. (Isaiah 48:17, 18) Uhi ne ribhi Baibo, ẹseọhẹ nọn, nin Osẹnobulua rẹ dia mhan.—Tie 2 Timothy 3:16.

Uhi nesi Jehova man mhan uwedẹ iẹnlẹn nọn mhẹn nẹ. Ọle yẹ man mhan ebi mhan arẹ miẹn aribhọ yẹ ẹghe odalo. Ranmhude ọle man mhan, ọkhẹke nin mhan re eghọnghọn miẹn adia nọnsọle bhegbe.—Tie Psalm 19:7, 11; Revelation 4:11.

Ibhude eso bhi Baibo rẹsui idia kẹkẹ bhi iẹnlẹn sẹ mhan. Osẹnobulua yẹ gbe uhi kpataki bhi emhin eso. (Deuteronomy 22:8) Ọkhẹke nin mhan ria eria dinmhin rẹ lẹn ebi mhan arẹ noo ẹmhọn-ata nọn ribhi Baibo yẹ. (Proverbs 2:10-12) Bhọsi ijiẹmhin, Baibo i taman mhan ghe ẹseọhẹ nọn nin obọ Osẹnobulua vae, ọle iẹnlẹn nọnsẹ mhan khin. Ọnin ẹmhọn-ata nin, ọle dia mhan rẹ gbogba ga iẹnlẹn mhan.—Tie Acts 17:28.

Uhi eva Jesu yọle ọkokhun nẹ. Ọhẹnhẹn nọn ribhọ rẹman ebezẹle nin Osẹnobulua da man mhan. Ọ man mhan nin mhan lẹn ọle, hoẹmhọn lẹn, yẹ ga le. Ọkhẹke nin mhan zilo nyan ọnin uhi nan bhi ebi mhan ho nin mhan lu rebhe. (Proverbs 3:6) Ene re obọ rekhan ọnin uhi nan, dẹ min eghọnghọn ọsi ẹmhọn-ata bi aribhọ ọsi ighegheghe. Ele ki yẹ kiẹn imọẹ Osẹnobulua.—Tie Matthew 22:36-38.

 Uhi nọzeva dẹ sabọ rẹkpa mhan rẹ nẹ ẹbho nyẹn bhọsi ọfure. (1 Corinthians 13:4-7) Nin mhan rẹ rẹkhan ọnin uhi nan, ọkhẹke nin mhan regbe khọkhọ uwedẹ nin Osẹnobulua rẹ nin ẹbho lu emhin.—Tie Matthew 7:12; 22:39, 40.

Uhi nesi Osẹnobulua man azagba-uwa ebi ele arẹ hoẹmhọn egbe yẹ, ne sabọ kugbe. (Colossians 3:12-14) IBaibo yẹ man azagba-uwa ẹmhọn-ata kpataki nọn gbogba ga azagba-uwa. Ọle hi ghe, ibọdọ bi iriokhuo ọiyi ọsi obhi ẹghe khere, rẹsi ukpẹdẹ uu nọn.—Tie Genesis 2:24.

Mhan ha rẹkhan ebi Baibo ta, mhan ki sabọ gbogba ga egbe mhan, bi ebi mhan mhọn. Bhọsi ijiẹmhin, ene wẹnna nọnsẹn, nei do ẹki oyi, ele aguanọ bhi iwẹnna. (Proverbs 10:4, 26; Hebrews 13:18) Baibo taman mhan nin mhan ji emhin iẹnlẹn ne khẹke, nin mhan mhọn, khọn mhan. Ọyẹ taman mhan nin mhan hoẹmhọn Osẹnobulua gbera ebi mhan mhọn rebhe.—Tie Matthew 6:24, 25, 33; 1 Timothy 6:8-10.

Mhan ha re obọ rẹkhan uhi nọnsi Osẹnobulua, ọdẹ rẹkpa mhan rẹ ha mhọn egbe nọn daanlẹn. (Proverbs 14:30; 22:24, 25) Bhọsi ijiẹmhin, uhi nọnsi Osẹnobulua yọle nin mhan hẹi da anyọn gbe egbe. Man ha re obọ rẹkhan ọnin uhi nin, emianmhẹn ọbe bi ikuan-egbe nọn sire ida sẹ mhan bhegbe. (Proverbs 23:20) Jehova bha yọle nin mhan hẹi da anyọn. Ọkpakinọ, ọyọle nin mhan hẹi dale gbe egbe. (Psalm 104:15; 1 Corinthians 6:10) Ọiyi ebi mhan lu ọkpa uhi nọnsi Osẹnobulua da rẹkpa mhan, ọyẹ gbogba ga umueria nọnsẹ mhan. (Psalm 119:97-100) Ọrẹ yiriọ, ọiyi ranmhude elele nọn ribhọ ọkpa zẹle nin mhan da rẹkhan uhi nesi Osẹnobulua. Mhan rẹkhan enin uhi, nin mhan rẹ muekpẹn nin Jehova.—Tie Matthew 5:14-16.