ILUẸMHIN 01

Be IBaibo Ha Rẹ Sabọ Rẹkpa Uwẹ Yẹ bhi Iẹnlẹn?

Khue

Imhan rebhe mhọn inọnta rẹji ẹmhọn iẹnlẹn, iloya, uu, bi ebi ẹghe odalo ha diayẹ. Mhan yẹ ria ẹmhọn ebi mhan ha rẹ miẹn igho yẹ rẹ ha gbẹloghe egbe. Iriọ mhan yẹ rẹ guanọ nin mhan lẹn emhin ne ha sabọ re eghọnghọn re bhi azagba-uwa nọnsẹmhan. Ẹbho ne bunbun dọ kere ghe, ewanniẹn ne gbale rẹji inọnta nin ele mhọn ribhi ẹkẹ iBaibo. Ele sẹyẹ dọ kere ghe, adia ribhi Baibo nọn ha sabọ ha rẹkpa ele bhi iẹnlẹn ukpẹdẹ-ukpẹdẹ. Uwẹ be rẹọbhọ ghe Baibo dẹ sabọ rẹkpa uwẹ?

1. Be hi inọnta eso nin Baibo re ewanniẹn ọi?

Eso bhi inọnta kpataki nin Baibo re ewanniẹn ọi hi: Be iẹnlẹn rẹ munhẹn yẹ? Bezẹle nin mhan da ribhi agbọn? Bezẹle nin ẹbho da loya? Be sunu ji ọria nọn yu? Bezẹle nin okhọn bi ugbele da vuọn ọne agbọn nan? Be ha sunu ji ọne otọ nan bhi ẹghe odalo? Emhin esili nọn nin mhan rẹ guanọ ewanniẹn rẹji ene inọnta nan. Ẹbho ne bunbun dọ kere ghe ewanniẹn nin Baibo re ọbhi ene inọnta nan wo manman gba.

2. Be iBaibo ha rẹ sabọ rẹkpa mhan yẹ bhi iẹnlẹn ukpẹdẹ-ukpẹdẹ?

Ibhude nọn gbale wo ribhi Baibo. Bhi ọsi ijiẹmhin, adia ribhi Baibo nọn ha sabọ rẹkpa azagba-uwa rẹ ha ghọnghọn. Baibo rẹkpa mhan rẹ lẹn ebi mhan ha lu sade mhan ribhi ọnọghọ. Ọ da yẹ taman mhan ebi mhan ha rẹ sabọ ha sọnyẹnmhẹn bhi iwẹnna nọnsẹmhan yẹ. Beji uwẹ ha rẹ ha luẹ ọne ebe nan, uwẹ dẹ dọ luẹ ebi Baibo tale rẹji ene ẹmhọn nan bi emhin ebhebhe. Uwẹ ki dọ kere ghe “ẹmhọn rebhe ne ribhi ẹkẹ Ebenọnkhiale . . . mhẹnmhin.”—2 Timothy 3:16.

Ọne ebe nan iyi Baibo. Ọkpakinọn, uwẹ dẹ sabọ re ọle lẹn otọ ẹmhọn nọn ribhi ẹkẹ iBaibo. Bhiriọ, ọkhẹke nin uwẹ dọnmhegbe rẹ tie ene iBaibo nan gbẹn rẹkhan ene iluẹmhin kẹkẹ, uwẹ ha re ele fẹ ebi uwẹ luẹ ghe si ẹmhọanta nọn.

MANMAN LẸN OTỌLE NỌNSẸN

Luẹ ebi Baibo sẹ rẹ rẹkpa ẹbho yẹ, ebi Baibo nan tie ha rẹ sabọ ha ti uwẹ bhọ yẹ, bi ebezẹle nọn da mhẹn nin ọria rẹkpa uwẹ rẹ lẹn otọ iBaibo.

3. Baibo dẹ sabọ dia mhan

Inian Baibo diabe ukpa nọn manman bhaa, nọn rẹkpa ọria rẹ daghe eji ọle khian. Baibo dẹ sabọ rẹkpa mhan rẹ lẹn emhin ne mhẹn nin mhan ha lu. Ọ dẹ yẹ sabọ rẹkpa mhan rẹ lẹn ebi ẹghe odalo ha diayẹ.

Tie Psalm 119:105, bha ha yẹ zilo nyan ene inọnta nan:

Ẹlo nela ọria nọn gbẹn ọne ẹmhọn nan bhi ebe nọnsi Psalm rẹ ha ghe iBaibo?
Ẹlo nela uwẹ rẹ ghe iBaibo?

4. Baibo dẹ sabọ re ewanniẹn ọbhi inọnta ne kpokpo mhan bhi ọkhọle

Okhuo ọkpa da dọ kere ghe ewanniẹn rẹji inọnta ne ha kpokpo ọle bhi ọkhọle bhi ikpe ne bunbun ribhi ẹkẹ iBaibo. Ghe ọne IVIDIO, bha ha yẹ zilo nyan ene inọnta nan:

VIDIO: Hẹi Ji Egbe Iẹnlẹn Lọ Uwẹ! (1:48)

Inọnta nela ọne okhuo nan rẹman bhi ọne ividio ha mhọnlẹn?
Be iBaibo nin ọle dọ luẹ rẹ rẹkpa ọle yẹ?

Baibo ji mhan lẹn ghe, emhin nọn mhẹn nọn nin mhan rẹ ha nọọn ọta. Tie Matthew 7:7, bha ha yẹ zilo nyan ọne inọnta nan:

Inọnta nela uwẹ mhọn nin uwẹ guanọ ewanniẹn ọlẹn?

5. Ọ dẹ sabọ ha yẹẹ uwẹ rẹ ha tie iBaibo

Ọ ti ẹbho ne bunbun bhọ rẹ ha tie iBaibo. Ele yẹ wo miẹn elele bhọ. Ghe ọne IVIDIO, bha ha zilo nyan ene inọnta nan:

VIDIO: Baibo Nan Tie (2:05)

Be ene elasẹre nan rẹman bhi ọne ividio tale rẹji ebe nan tie?
Arẹmiẹn ebe nan tie iyẹẹ ele, bezẹle nin Baibo da yẹẹ ele rẹ tie?

Baibo dẹ sabọ re adia, ikoudure bi ikhuaẹloghe nin mhan. Tie Romans 15:4, bha ha zilo nyan ọne inọnta nan:

Ọ dẹ be yẹẹ uwẹ rẹ miẹn ọne ikhuaẹloghe bi ikoudure nin eji mhan tiele bhi Baibo tẹmhọnlẹn?

6. Mhan dẹ sabọ lẹn otọ iBaibo sade ọria deba mhan zilo nyan ọlẹn

Eria ne bunbun ne tobele luẹ iBaibo dọ kere ghe, ele ha deba ọria ọbhebhe zilo ọle, ọle ele da lẹn otọle nẹ. Tie Acts 8:26-31, bha ha zilo nyan ọne inọnta nan:

Be ha rẹkpa mhan rẹ sabọ lẹn otọ iBaibo nọnsẹn?—Fẹ ulọnlẹn 30 bi 31 ghe.

Ọkhaẹmhọn ọkpa nin obhiẹ Ethiopia da ha guanọ ọria nọn ha rẹkpa ọle lẹn otọ ẹmhọn nin ọle ha tie bhi Baibo. Ẹbho ne bunbun yẹ dọ kere ghe ọria ha deba ele zilo nyan ẹmhọn nọn ribhi Baibo, ọle ele da lẹn otọle nẹ

ẸBHO ESO SABỌ YỌLE: “Ẹghe ọria gheghe riia sade ọle luẹ iBaibo.”

Be uwẹ ha taman ele yẹ? Bezẹle nin uwẹ ha da ta iriọ man ele?

EBI MHAN LUẸLE

Baibo dẹ sabọ re adia nin mhan, nọn ha rẹkpa mhan bhi iẹnlẹn. Ọ dẹ sabọ wanniẹn inọnta kpataki nin mhan mhọnlẹn. Ọ dẹ yẹ sabọ re ikoudure bi ikhuaẹloghe nin mhan.