ILUẸMHIN 07

Unan Ọria Nela Jehova Khin?

Khue

Uwẹ ha ria ẹmhọn Osẹnobulua nin Jehova, be ọkhọle nọnsẹ taman uwẹ? Ẹlo nela uwẹ rẹ ghe ọle? Uwẹ be riale uwẹ ida sabọ sikẹ ọle, ranmhude ihe nọn khua nin ọle ye? La, ahu nọn khua nọnsọle ọkpa uwẹ ghe ọle mun? Unan ọria nela Jehova gene khin? Baibo rẹkpa mhan rẹ lẹn ikpẹ esili nesi Jehova. Ọ da yẹ rẹkpa mhan rẹ lẹn ghe, ẹmhọn mhan rẹtẹ ọle.

1. Bezẹle mhan isabọ daghe Osẹnobulua?

“Ẹlinmhin Osẹnobulua khin.” (John 4:24) Ọle imhọn egbe bọsi mhan. Okhun-ẹlinmhin ọle da nyẹnlẹn. Mhan isabọ daghe okhun-ẹlinmhin.

2. Be hi ikpẹ esili eso nin Jehova mhọnlẹn?

Ẹmhọanta nọn ghe mhan isabọ daghe Jehova, Ọkpakinọn, beji mhan ha rẹ ha lẹn ọlẹn, iriọ mhan ha rẹ dọ ha hoẹmhọn ọlẹn, ranmhude Osẹnobulua nọn mhọn ikpẹ esili ọle khin. Baibo da yọle: “Jehova hoẹmhọn ibhohiẹn nọn gbale.” (Psalm 37:28) Ọle ida fikeke gbe ene sun rẹkhan ọlẹn. “Jehova yẹ wo re ẹkẹ-ẹjẹjẹ bi itohan man,” manman nọn, bhi egbe ẹbho ne ribhi ọnọghọ. (James 5:11) “Jehova sikẹ ẹbho nin udu nọnsele wanọ a; ẹbho nin emhin gbe ele ahu sotọ, ọle miẹn ele fan.” (Psalm 34:18) Uwẹ be lẹn ghe uwedẹ nin mhan rẹ lu emhin dẹ sabọ ha ba Jehova bhi egbe, la re ọle ha ghọnghọn? Ọ ba Jehova bhi egbe sade ọle daghe ọria lu emhin ọbe. (Psalm 78:40, 41) Bhi obọ nọnkẹle, ọ re ọle ghọnghọn sade ọle daghe ọria lu emhin nọn mhẹn.—Tie Proverbs 27:11.

3. Be iJehova rẹ rẹman yẹ ghe, ọle hoẹmhọn mhan?

Ahoẹmhọn-egbe hi ikpẹ nọn ke okhun nẹ bhi ikpẹ esili nin Jehova mhọnlẹn. Bhi ọsi ẹmhọanta, Baibo da yọle: “Osẹnobulua hi ahoẹmhọn-egbe.” (1 John 4:8) Ẹmhọn nọn ribhi Baibo rẹkpa mhan rẹ lẹn ghe, Jehova manman mhọn oyẹẹ. Rẹ deba ọnin, emhin nin ọle manlẹn da rẹman ghe Osẹnobulua nọn mhọn oyẹẹ ọle khin. (Tie Acts 14:17.) Bhi ọsi ijiẹmhin, ria eria nyan uwedẹ nin ọle rẹ man eria. Ọle man mhan bhi uwedẹ nin mhan ha da sabọ ha daghe emhin ne mhọn-ose, kaehọ illo ne mhẹn bhi ehọ, yẹ ha sọnyẹnmhẹn bhi ebale nọn mhẹn bhi unun. Ọle guanọ nin mhan ha sọnyẹnmhẹn bhi iẹnlẹn.

MANMAN LẸN OTỌLE NỌNSẸN

Luẹ ebi Jehova noo rẹ lu emhin ọhan-ilo nin ọle lu. Uwẹ ha yẹ luẹ ebi Jehova rẹ re ikpẹ esili nesọle man yẹ.

4. Ẹlinmhin nọn khiale hi ahu nin Osẹnobulua rẹ lu emhin

Beji mhan rẹ re obọ nọnsẹmhan lu emhin, iriọ Jehova rẹ re ẹlinmhin nọn khiale nọnsọle rẹ lu emhin kẹkẹ. Baibo rẹkpa mhan rẹ lẹn ghe ẹlinmhin nọn khiale iyi Osẹnobulua. Ahu nin Osẹnobulua rẹ lu emhin nọn. Tie Luke 11:13 bi Acts 2:17, bha ha zilo nyan ene inọnta nan:

Emhin nin Osẹnobulua ha sabọ ‘biri nyan’ ọria, ọle ẹlinmhin nọn khiale khin. Bhiriọ, uwẹ be riale Osẹnobulua tobọle hi ọne ẹlinmhin, la ahu nin ọle rẹ wẹnna? Bezẹle nin uwẹ da ta iriọ?

Jehova sẹ re ẹlinmhin nọn khiale nọnsọle rẹ lu emhin ọhan-ilo ne bunbun. Tie Psalm 33:6 bi 2 Peter 1:20, 21, bha ha zilo nyan ọne inọnta nan:

Be hi emhin eso nin Jehova sẹ re ẹlinmhin nọn khiale nọnsọle rẹ lu?

5. Jehova mhọn ikpẹ esili

Ọria nọn ha ga Osẹnobulua nọnsẹn, ọle Moses ha khin. Sọkpan, ọle da sẹyẹ ha guanọ nin ọle manman lẹn Osẹnobulua nọnsẹn. Bhiriọ, ọle da taman Osẹnobulua yọle: “Rẹkpa mẹn rẹ lẹn uwedẹ nesẹ, beji mẹn ha da sabọ lẹn uwe.” (Exodus 33:13) Jehova da re ewanniẹn nin Moses. Ọle da taman ọlẹn eso bhi ikpẹ esili nesọle. Tie Exodus 34:4-6, bha ha zilo nyan ene inọnta nan:

Ikpẹ esili nela Jehova taman iMoses ghe ọle mhọnlẹn?
Ọnela ti uwẹ bhọ nẹ bhi ikpẹ esili nesi Jehova?

6. Ẹmhọn mhan rẹtẹ iJehova

Ẹghe nin ibhokhan Izrẹl rẹ ha ribhi otọ Egypt, ibhokhan Egypt da re ele ha lu igbọn. Be oya nin ele ha le rẹ rẹso iJehova yẹ? Khue ọne IRẸKỌDI, la tie Exodus 3:1-10, bha ha yẹ zilo nyan inọnta ne ribhi otọle.

IRẸKỌDI: Oya Nin Ele Ha Le Da Ha Ba IJehova bhi Egbe (2:45)

Beji mhan tiele bhi ene ulọnlẹn nan, be ọ dia iJehova bhi egbe yẹ sade mhan loya?—Fẹ ulọnlẹn nọnzi 7 bi 8 ghe.
Uwẹ be riale Jehova gene guanọ nin ọle rẹkpa mhan? Uwẹ be riale ọle dẹ sabọ lu ọle? Bezẹle nin uwẹ da ta iriọ?

7. Emhin nin Jehova manlẹn rẹkpa mhan rẹ lẹn ikpẹ esili nesọle

Jehova re ikpẹ esili nesọle man mhan bhi egbe emhin nin ọle manlẹn. Ghe ọne IVIDIO. Tie Romans 1:20, bha ha zilo nyan inọnta nọn ribhi otọle.