ILUẸMHIN 06
Be Iẹnlẹn Rẹ Munhẹn Yẹ?
‘Obọ nọnsi Osẹnobulua iẹnlẹn na vae.’ (Psalm 36:9) Uwẹ be rẹọ bhi ọne ẹmhọn nan? Ẹbho eso tale ghe aman iribhọ nọn man emhin, ghe iẹnlẹn tobọle zegbere. Ahamiẹn ẹmhọanta ọne ẹmhọn nan khin, ọnin rẹman ghe ọsi iguaguako, ọle mhan rẹ zegbere. Sokpan, ahamiẹn Osẹnobulua man emhin ne nyẹnlẹn, ọle dẹ ha mhọn ebezẹle nin ọle da man ele, ọ ibe yi iriọ? a Fẹghe ebi Baibo tale rẹji ebi iẹnlẹn rẹ munhẹn yẹ, uwẹ ha yẹ daghe emhin ne zẹle nin mhan ha da sabọ rẹọbhọ ghe ẹmhọanta, ọle iBaibo tale.
1. Be ọne agbọn nan rẹ munhẹn yẹ?
Baibo da yọle: “Bhi ẹghe umunhẹn, Osẹnobulua da man otọ bi okhun.” (Genesis 1:1) Ekhẹn azemhinre ne bunbun rẹọbhọ ghe, ọne agbọn nan mhọn umunhẹn. Be Osẹnobulua rẹ man ọne agbọn nan yẹ? Ẹlinmhin nọn khiale ọle noolo rẹ man emhin rebhe ne ribhi ọne agbọn nan, rẹ dọ sẹbhi ene ahiẹnhiẹn bi emhin nekẹle ne ribhi okhun.—Genesis 1:2.
2. Bezẹle nin Osẹnobulua da man ọne otọ nan?
Jehova ‘bha man ọne otọ nan bhi ihoho, sokpan, ọle man ọlẹn nan ha nyẹnlẹn bhọ.’ (Isaiah 45:18) Ẹghe nin ọle rẹ man ọne otọ nan, ọle da man emhin rebhe ọbhọ, beji eria ha da sabọ ha nyẹnlẹn bhọ rẹ sẹbhi ighegheghe. (Tie Isaiah 40:28; 42:5.) Ekhẹn azemhinre tale ghe, a muegbe man ọne otọ nan beji eria ha da sabọ nyẹnlẹn bhọ. Ele da yẹ tale ghe, ele bha miẹn ije ebhebhe nin eria ha da sabọ nyẹnlẹn gbera ọne otọ nan.
3. Be re eria dikẹ bhi elanmhẹn?
Osẹnobulua ki man ọne otọ nan fo, ọle da man emhin ne nyẹnlẹn ọbhọ. Eran, bi elanmhẹn, ele emhin ne nyẹnlẹn nin Osẹnobulua ka man bhi ọne otọ nan. Ọle ki man ene emhin nin fo, ‘ọle da man okpea bhi arẹkhọkhọ nọnsọle.’ (Tie Genesis 1:27.) Be rẹ imhan dikẹ bhi emhin nekẹle nin Osẹnobulua manlẹn? Ranmhude arẹkhọkhọ nọnsi Osẹnobulua a rẹ man mhan, mhan sabọ re egbe khọkhọ ikpẹ esili nesọle, bọsi oyẹẹ, bi ibhohiẹn nọn gbale. Sẹyẹ, ọle man mhan nin mhan sabọ ha luẹ urolo, ha re illo nan so sọnyẹnmhẹn, yẹ ha ji emhin ne mhọn-ose ti mhan bhọ. Rẹ deba ọnin, eria ọkpa sabọ ga Osẹnobulua bhi ẹwẹ emhin rebhe nin ọle manlẹn.
MANMAN LẸN OTỌLE NỌNSẸN
Fẹ emhin ne rẹman ghe aman ribhọ nọn man emhin ne nyẹnlẹn, bi ebezẹle nin mhan ha da sabọ rẹọ bhi ebi Baibo tale rẹji ebi ọne agbọn nan rẹ munhẹn yẹ. Yẹ luẹ ebi ikpẹ esili nin mhan mhọnlẹn man mhan lẹ rẹji Osẹnobulua.
4. Aman ribhọ nọn man emhin ne nyẹnlẹn
Ahamiẹn mhan gẹn eria ne man emhin bhi arẹkhọkhọ ọsi emhin ne nyẹnlẹn, ọria nọn man ene emhin ne nyẹnlẹn kii? Ọ bha be khẹke nin mhan re ogẹn ji ọle? Ghe ọne IVIDIO, bha ha zilo nyan ene inọnta nan:
-
Be bhọ hi emhin eso nin eria manlẹn ranmhude emhin nin ele ghe bhi egbe emhin ne nyẹnlẹn?
Uwa nọn hi ki rẹ khin nin uwẹ daghe, ọria bọn ọlẹn. Ọ ibe yi iriọ? Ọkpakinọn, họ bhọ man ọne otọ nan bi emhin ne ribhọ? Tie Hebrews 3:4, bha ha zilo nyan ene inọnta nan:
-
Be hi emhin eso ne manman ti uwẹ bhọ bhi ẹwẹ emhin nin Osẹnobulua manlẹn?
-
Emhin ẹwanlẹn be nọn nin mhan rẹ rẹọbhọ ghe aman ribhọ nọn man ọne agbọn nan bi emhin rebhe ne ribhọ? Bezẹle?
Uwẹ be rẹ lẹn?
Bhi jw.org, uwẹ dẹ miẹn ebe bi vidio ne talọ ọbhi ọne ẹmhọn nan. Diọbhi obọ ọle natiọle “A Be Man Ọlẹn” bi “Ebi Ẹbho Eso Rẹọ i Rẹji Ebi Iẹnlẹn Rẹ Munhẹn Yẹ.”
“Gene-gene, uwa nọn hi ki rẹ khin, ọria bọn ọlẹn, sokpan, Osẹnobulua hi ọnọn man emhin rebhe”
5. Mhan dẹ sabọ rẹọ bhi ebi Baibo tale rẹji ebi a rẹ man ọne agbọn nan yẹ
Bhi Genesis uhọnmhọnlẹn 1, Baibo da taman mhan ebi ọne agbọn nan bi emhin ne ribhọ rẹ zegbere yẹ. Uwẹ dẹ be sabọ mun udu nyan ebi Baibo tale, la okha ohoghe gheghe nọn? Ghe ọne IVIDIO, bha ha zilo nyan ene inọnta nan:
-
Baibo be yọle ghe ikpẹdẹ ehan khọnkhan Osẹnobulua rẹ man ọne otọ nan bi emhin rebhe ne ribhọ?
-
Uwẹ be rẹọbhọ ghe ẹwanlẹn ribhi ebi Baibo tale rẹji ebi Osẹnobulua rẹ man ọne agbọn nan yẹ? Bezẹle nin uwẹ da ta iriọ?
Tie Genesis 1:1, bha ha zilo nyan ọne inọnta nan:
-
Ekhẹn azemhinre yọle ghe, ọne agbọn nan mhọn umunhẹn. Be emhin nin ele tale rẹ diẹn mun ebi mhan tiele bhi Baibo yẹ?
Ẹbho eso riale ghe, ukpemhin ọkpa nọn nyẹnlẹn nin Osẹnobulua manlẹn, ọle emhin nekẹle ne nyẹnlẹn rebhe da zegbere. Tie Genesis 1:21, 25, 27, bha ha zilo nyan ene inọnta nan:
-
Baibo be re obọ ba ọne iman-emhin ghe, emhin ọkpa nọn nyẹnlẹn nin Osẹnobulua man, ọle fẹkẹ fi egbe denọ dọ kiẹn ehẹn, elanmhẹn, bi eria? La Baibo be rẹman ghe, unan emhin ne nyẹnlẹn “kẹkẹ” Osẹnobulua man? b
6. Uwedẹ ikẹ, ọle Osẹnobulua rẹ man eria
Ọ iyi uwedẹ nin Jehova rẹ man ene elanmhẹn ọle rẹ man mhan. Tie Genesis 1:26, bha ha zilo nyan ọne inọnta nan:
-
Ranmhude arẹkhọkhọ nọnsi Osẹnobulua, ọle a rẹ man mhan, mhan sabọ re oyẹẹ bi ẹkẹ-ẹjẹjẹ man. Be ọnan rẹman rẹji unan ọria nin Osẹnobulua khin?
ẸBHO ESO SABỌ YỌLE: “Ebi Baibo tale rẹji uwedẹ nin Osẹnobulua rẹ man emhin, okha gheghe nọn.”
-
Be uwẹ riale yẹ? Bezẹle nin uwẹ da riale iriọ?
EBI MHAN LUẸLE
Jehova man otọ bi okhun bi emhin ne nyẹnlẹn rebhe.
Uwẹ Be Yẹ Yere?
-
Be iBaibo tale rẹji ebi ọne agbọn nan rẹ munhẹn yẹ?
-
Ukpemhin ọkpa nin Osẹnobulua manlẹn be kiẹn emhin nekẹle rebhe ne nyẹnlẹn? La unan emhin ne nyẹnlẹn rebhe kẹkẹ ọle manlẹn?
-
Be rẹ imhan nin eria dikẹ bhi ẹwẹ emhin nekẹle rebhe nin Osẹnobulua manlẹn?
FẸ ENE EMHIN NAN GHE
Fẹ ijiẹmhin eso ne rẹman ghe aman ribhọ nọn man emhin ne nyẹnlẹn.
“Be Imhan Ha Sabọ Miẹn Luẹ bhi Emhin Nan Manlẹn?” (Awake!, September 2006)
Ghe ebi aba ọkpa rẹ gbe okha ọsi ebi Osẹnobulua rẹ man emhin man ọmọn nọnsọle yẹ.
Emhin ọkpa nin Osẹnobulua manlẹn be kiẹn emhin nekẹle rebhe ne nyẹnlẹn? Fẹ ebi Baibo tale ghe.
“Emhin Ọkpa Nin Osẹnobulua Manlẹn Be Kiẹn Emhin Nekẹle Rebhe Ne Nyẹnlẹn?” (Ebe nọn ribhi jw.org)
Fẹghe si iguẹ ọsi eria bi elanmhẹn ne nyẹnlẹn bhi ẹghe ẹdẹlẹ be rẹman ghe iẹnlẹn tobọle zegbere.
Ebi Iẹnlẹn Rẹ Munhẹn Yẹ—Inọnta Isẹn Ne Khẹke Nin Mhan Nọọn (brokiọ)
a Iluẹmhin nọnzi 25 bhi ọne ebe nan, dẹ zilo nyan emhanmhan nọnsi Osẹnobulua rẹji eria.
b Ene ‘unan emhin kẹkẹ’ nin Baibo tẹmhọn ọlẹn, mhọn agba ele kẹkẹ.
Emhin Ebhebhe Ne Ha Yẹ Ti Uwẹ Bhọ
INỌNTA NIN ẸBHO KẸ NỌỌN
Bebhọ Iluẹmhin IBaibo?
Min ewanniẹn rẹji inọnta rẹji iluẹmhin iBaibo nin man nẹn ẹbho luẹ ọsọhẹ.
