ILUẸMHIN 08

Uwẹ Dẹ Sabọ Ha Yi Ọmọẹ IJehova

Khue

Jehova guanọ nin uwẹ manman dọ lẹn ọlẹn nọnsẹn. Bezẹle? Ranmhude, ọle lẹnmhin ghe, beji uwẹ ha rẹ ha lẹn ọlẹn, iriọ uwẹ ha rẹ ha daghe ikpẹ esili nesọle, uwedẹ nin ọle rẹ lu emhin, bi emhanmhan nin ọle mhọn da eria. Bhiriọ, ọ ki ha ti uwẹ bhọ rẹ ha yi ọmọẹ nọnsọle. Uwẹ dẹ gene sabọ ha yi ọmọẹ iJehova? (Tie Psalm 25:14.) Be uwẹ ha sabọ lu nin uwẹ da kiẹn ọmọẹ ọle? Baibo re ewanniẹn ọbhi ene inọnta nin. Sẹyẹ, Baibo ji mhan lẹn ebezẹle nin ikolu nin mhan bi Jehova ko mhọnlẹn da yi emhin nọn lu uhọnmhọn-emhin nẹ bhi ọne agbọn nan.

1. Be iJehova tie uwẹ nin uwẹ dọ lu?

“Sikẹ Osẹnobulua, ọle ki yẹ sikẹ ẹ.” (James 4:8) Be ọnan rẹman? Ọnan rẹman ghe, Jehova guanọ nin uwẹ dọ kiẹn ọmọẹ ọle. Eria eso riale ghe ele ida sabọ deba Osẹnobulua lu ọmọẹ ranmhude ele idaghe ọle. Ọkpakinọn, bhi ẹkẹ iBaibo, Jehova rẹkpa mhan rẹ lẹn unan ọria nin ọle khin, bi ikpẹ esili nin ọle mhọnlẹn. Beji mhan ha rẹ ha luẹ ẹmhọn Osẹnobulua bhi ẹkẹ iBaibo, iriọ ikolu nin mhan bi ọle ko mhọnlẹn ha rẹ ha ziẹn ọbhọ arẹmiẹn mhan isabọ daghe ọle.

2. Bezẹle nin Jehova da yi ọmọẹ nọn mhẹn nẹ nin uwẹ ha sabọ ha mhọnlẹn?

Jehova hoẹmhọn uwẹ nẹ bhi ọne agbọn nan. Ọle guanọ nin uwẹ ha ghọnghọn. Ọle yẹ guanọ nin uwẹ ha bu ọle re sade uwẹ guanọ urẹkpa. Uwẹ dẹ sabọ ‘zẹ ekpokpo nesẹ rebhe obọ nanlẹn, ranmhude ẹmhọn uwẹ rẹtẹ ọle.’ (1 Peter 5:7) Jehova wo muegbe nin ọle rẹ rẹkpa imọẹ ọle, ko ele udu re, yẹ ka ele ehọ.—Tie Psalm 94:18, 19.

3. Be iJehova guanọ bhi obọ ọsi imọẹ ọle?

Ẹmhọanta nọn ghe Jehova hoẹmhọn ọrebhe, ọkpakinọn, “ọria nọn khiale ọle deba lu ọmọẹ.” (Proverbs 3:32) Jehova guanọ nin imọẹ ọle ha lu ebe yẹẹ ọle, yẹ he emhin ne sọnọn ọlẹn. Ẹbho eso sabọ ha riale ghe ele ida sabọ lu emhin rebhe nin Jehova guanọ bhi obọ ele. Ọkpakinọn, Jehova manman mhọn itohan. Ọria nọn hi rẹ khin nọn hoẹmhọn ọlẹn, yẹ ha dọnmhegbe rẹ lu iho nọnsọle, Ọle dẹ miẹn ọlẹn ọbhi egbe.—Psalm 147:11; Acts 10:34, 35.

MANMAN LẸN OTỌLE NỌNSẸN

Manman luẹ ebi uwẹ ha rẹ sabọ ha yi ọmọẹ iJehova yẹ, bi ebezẹle nin ọle da yi ọmọẹ nọn mhẹn nẹ nin uwẹ ha sabọ ha mhọnlẹn.

4. Ọmọẹ iJehova Abraham ha khin

Okha nọnsi Abraham (nan yẹ tiọle Abram) bhi Baibo, rẹkpa mhan rẹ lẹn ebi a re ọle ta na rẹ ha yi ọmọẹ nọnsi Osẹnobulua. Tie okha nọnsọle bhi Genesis 12:1-4, bha ha zilo nyan ene inọnta nan:

Be iJehova taman Abraham nin ọle lu?
Be iJehova ve nanlẹn?
Be Abraham lu yẹ?

5. Be iJehova guanọ bhi obọ ọsi imọẹ ọle?

Mhan rebhe mhọn emhin kẹkẹ nin mhan guanọ bhi obọ ọsi imọẹ mhan.

Be hi emhin eso nin uwẹ guanọ bhi obọ ọsi imọẹ ẹ?

Tie 1 John 5:3, bha ha zilo nyan ọne inọnta nan:

Be iJehova guanọ bhi obọ ọsi imọẹ ọle?

Nin mhan rẹ sabọ lu emhin ne ti Jehova bhọ, mhan dẹ fi uwedẹ ne imhẹn nin mhan rẹ lu emhin denọ. Tie Isaiah 48:17, 18, bha ha zilo nyan ọne inọnta nan: