ILUẸMHIN 09

Erọnmhọn Dẹ Sabọ Rekpa Uwẹ Sikẹ Osẹnobulua

Khue

Uwẹ be guanọ adia, la ewanniẹn rẹji inọnta kpataki eso? Uwẹ be guanọ ikoudure? Uwẹ be guanọ nin uwẹ manman sikẹ Jehova? Erọnmhọn dẹ sabọ rẹkpa uwẹ bhi ene emhin nan. Ọkpakinọn, be ọkhẹke nin uwẹ rẹ ha nan erọnmhọn yẹ? Erọnmhọn rebhe Osẹnobulua be kaehọ ọle? Be uwẹ ha lu nin Osẹnobulua da ha họn erọnmhọn nọnsẹ? Ji mhan fẹ ọle ghe.

1. Họla ọkhẹke nan ha nan erọnmhọn je? Be uwẹ ha sabọ taman ọlẹn?

Jesu taman mhan ghe, Jehova ọkpa ọkhẹke nan ha nan erọnmhọn je. Jehova, ọle iJesu yẹ ha nan erọnmhọn je. Jesu da yọle: “Inian bha ha rẹ ha nan erọnmhọn: ‘Aba mhan nọn ribhi okhun . . . ’ ” (Matthew 6:9) Ahamiẹn mhan nan erọnmhọn ji Jehova, ikolu nin mhan bi ọle ko mhọnlẹn ki ha ziẹn bhọ.

Mhan dẹ sabọ nan erọnmhọn rẹ taman iJehova emhin nọn ki rẹ khin. Sokpan, ọkhẹke nin erọnmhọn nọnsẹmhan diẹn mun iho nọnsọle. Baibo da yọle: “Emhin nọn hi ki rẹ khin nin mhan bhii, nọn diẹn mun iho nọnsọle, ọle dẹ họnmhin.” (1 John 5:14) Jesu da rẹkpa mhan rẹ lẹn emhin ne khẹke nin mhan ha bhii Osẹnobulua le. (Tie Matthew 6:9-13.) Ọ iyi ẹmhọn egbe mhan ọkpa ọkhẹke nin mhan ha taman iJehova bhi erọnmhọn. Ọ yẹ khẹke nin mhan ha khuẹnmhẹn iJehova, yẹ ha bhii ji ẹbho ebhebhe.

2. Be ọkhẹke nin mhan rẹ ha nan erọnmhọn yẹ?

Baibo da taman mhan yọle: ‘Bha ha taan ọkhọle a man Osẹnobulua.’ (Psalm 62:8) Bhiriọ, ọkhẹke nin mhan ha taman Osẹnobulua ebe re imhan bhi ọkhọle. Mhan dẹ sabọ nan erọnmhọn dagbare, la mhan nan ọlẹn bhi ẹkẹ ọkhọle. Mhan dẹ yẹ sabọ nan ọlẹn bhi uwedẹ nọn hi ki rẹ khin nọn ha rẹman ghe mhan mun ekpẹn nin Jehova, aharẹmiẹn mhan bha diguẹ.

3. Be Osẹnobulua rẹ re ewanniẹn bhi erọnmhọn nọnsẹmhan yẹ?

Uwedẹ kẹkẹ Osẹnobulua rẹ re ewanniẹn bhi erọnmhọn nọnsẹmhan. Uwedẹ ọkpa hi Ọta nọnsọle nọn ribhi ẹkẹ iBaibo. Ewanniẹn rẹji inọnta ne bunbun nin mhan mhọnlẹn ribhi ẹkẹ ọle. Mhan dẹ sabọ ha “mhọn ẹwanlẹn” sade mhan tie iBaibo ẹghe rebhe. (Psalm 19:7; tie James 1:5.) Jehova dẹ yẹ rẹ ọkhọle nọn fure nin mhan rẹ sabọ ziẹngbe ọnọghọ. Ọ dẹ yẹ sabọ rẹ eguọmhandia nesọle rẹ rẹkpa mhan sade mhan ribhi ọnọghọ.

MANMAN LẸN OTỌLE NỌNSẸN

Luẹ ebi uwẹ ha rẹ sabọ ha nan erọnmhọn yẹ bhi uwedẹ nọn ha ti Jehova bhọ, bi ebi erọnmhọn ha rẹ sabọ rẹkpa uwẹ yẹ.

4. Ebe ha re iJehova họn erọnmhọn nọnsẹmhan

Be hi emhin nọn ha re Osẹnobulua họn erọnmhọn nọnsẹmhan? Ghe ọne IVIDIO.

VIDIO: Erọnmhọn Rebhe Osẹnobulua Be Kaehọ Ọle?—Ukpọkhere (2:42)

Jehova guanọ nin mhan ha nan erọnmhọn ji ọle. Tie Psalm 65:2, bha ha zilo nyan ene inọnta nan:

Uwẹ be riale ghe, Jehova nin Osẹnobulua nọn họn erọnmhọn guanọ nin uwẹ ha nan erọnmhọn ji ọle? Bezẹle nin uwẹ da ta iriọ?

Ahamiẹn mhan guanọ nin Osẹnobulua họn erọnmhọn nọnsẹmhan, ọkhẹke nin mhan ha re obọ rẹkhan uhi nesọle. Tie Micah 3:4 bi 1 Peter 3:12, bha ha zilo nyan ọne inọnta nan:

Be imhan ha lu nin Jehova da ha họn erọnmhọn nọnsẹmhan?

Bhi ẹghe okhọnlẹn, ibo veva ne ne egbe suan sabọ rẹ ha nan erọnmhọn ji Osẹnobulua nọn rẹkpa ele khọn miotọ. Ọkpakinọn, uwẹ riale ghe Osẹnobulua dẹ re ewanniẹn ọbhi erọnmhọn ne sẹ inian?

5. Taman iJehova emhin ne ri uwẹ bhi ọkhọle

Ahamiẹn ẹbho eso nan erọnmhọn, emhin nin ele ka ta ele yẹ wo ta. Ọkpakinọn, iriọ Osẹnobulua be guanọ nin mhan rẹ ha nan erọnmhọn ji ọle? Tie Matthew 6:7, bha ha zilo nyan ọne inọnta nan:

Be uwẹ ha lu nin uwẹ hẹi ha ta ‘ebi uwẹ ka ta’ sade uwẹ nan erọnmhọn?

Ukpẹde-ukpẹde, ria ẹmhọn emhin ọkpa nin Jehova lu nin uwẹ, uwẹ ha khuẹnmhẹn ọlẹn. Uwẹ ha lu iriọ bhi ẹkẹ uzana ọkpa, uwẹ ki kere ghe emhin kẹkẹ uwẹ miẹn taman iJehova bhi erọnmhọn, uwẹ bha ha ta ebi uwẹ ka ta.

Beji aba rẹ guanọ nin ọmọn nọnsọle ha taman ọlẹn ebi emhin dia ọle bhi egbe yẹ, iriọ Jehova rẹ guanọ nin mhan ha taman ọlẹn ebe ri mhan bhi ọkhọle

6. Isẹhoa nin Osẹnobulua re nin mhan rẹ ha nan erọnmhọn ji ọle, ẹsele nọn

Be erọnmhọn ha rẹ sabọ rẹkpa mhan yẹ, manman nọn sade mhan ribhi ọnọghọ? Ghe ọne IVIDIO.

VIDIO: Erọnmhọn Rẹkpa Mhan Rẹ Ziẹngbe Ọnọghọ (1:32)

Baibo taman mhan ghe erọnmhọn dẹ sabọ re ọkhọle nọnsẹmhan lọre. Tie Philippians 4:6, 7, bha ha zilo nyan ene inọnta nan:

Be erọnmhọn nin mhan nan ha rẹ sabọ rẹkpa mhan yẹ aharẹmiẹn ọnọghọ nin mhan ye bha sẹ si egbe kie?
Be hi emhin eso nin uwẹ guanọ nin uwẹ taman Osẹnobulua bhi erọnmhọn?

Uwẹ be rẹ lẹn?

Ebi a re isẹ ta hi “nọn ha ye irio” la “nọn munsẹ beji a tale.” Rẹ na bhi ẹghe nan rẹ gbẹn iBaibo ha vade, ẹbho ha nan erọnmhọn fo ele da gbe “isẹ” bhọ.—1 Chronicles 16:36.

7. Ha re ẹghe ọbhi otọ rẹ nan erọnmhọn

Ẹsọn ne bunbun nin mhan mhọn bhi obọ sabọ rẹ mhan yelea rẹ nan erọnmhọn ẹghe eso. Emhin kpataki erọnmhọn wo ha khin rẹji Jesu. Tie Matthew 14:23 bi Mark 1:35, bha ha zilo nyan ene inọnta nan:

Be iJesu lu nin ọle da sabọ miẹn ẹghe rẹ ha nan erọnmhọn?
Ẹghela uwẹ ha sabọ rẹ ha nan erọnmhọn?

ẸBHO ESO SABỌ YỌLE: “Ẹghe ọria gheghe riia sade ọle nan erọnmhọn, ranmhude, ọria soso iribhọ nọn kaehọ.”

Be uwẹ ha rẹ wanniẹn ele yẹ?

EBI MHAN LUẸLE

Erọnmhọn nan rẹ ẹkẹ-ata nan dẹ sabọ rẹ mhan sikẹ Osẹnobulua, ọ dẹ sabọ re ọkhọle nọnsẹmhan lọre, yẹ rẹ ahu nin mhan rẹ lu ebe ti Jehova bhọ.

Uwẹ Be Yẹ Yere?

Họla ọkhẹke nin mhan ha nan erọnmhọn je?
Be ọkhẹke nin mhan rẹ ha nan erọnmhọn yẹ?
Be hi uwedẹ eso nin erọnmhọn rẹ rẹkpa mhan?

Gbẹn ẹdẹ nin uwẹ luẹ ọne iluẹmhin nan fo ọbhi enan:

Lu Ọnan

Nan erọnmhọn rẹ taman iJehova emhin nọn kpokpo uwẹ bhi ọkhọle, yẹ khuẹnmhẹn ọlẹn bhi emhin nin ọle lu nin uwẹ, uwẹ ha yẹ taman ọlẹn emhin nin uwẹ ho nin ọle lu nin ọria ọbhebhe.

Ọbhebhe:

Your other goal