ILUẸMHIN 11

Be Ha Rẹkpa Uwẹ Rẹ Manman Miẹn Elele bhi Baibo Nan Luẹ?

Khue

A be sẹ ka mun udede ẹsọn nin uwẹ khẹ nọn re ofẹn ha mun uwẹ? Uwẹ da rẹ ha riale ghe ọne ẹsọn ida fo uwẹ. Ọkpakinọn, uwẹ da mhanmhan ọne ẹsọn khere-khere beji uwẹ ha da sabọ miẹn ọlẹn fo. Bhiriọ, uwẹ da sabọ miẹn ọlẹn fo. Iriọ ọ yẹ dia sade ọria guanọ nin ọle munhẹn ha tie iBaibo. Ọle sabọ ha nọọn egbe ọle, ‘Be ọnan ha rẹ fo mẹn yẹ?’ Bhi ọne uhọnmhọn-ọta nan, mhan dẹ zilo nyan emhin eso nin uwẹ ha lu, ne ha re iBaibo nan tie ha ti uwẹ bhọ.

1. Bezẹle nọn da khẹke nin mhan ha tie iBaibo ẹghe rebhe?

Ọria nọn tie “uhi nọnsi Jehova” ẹghe rebhe dẹ ha ghọnghọn. Emhin rebhe nin ọle lu ki ha kiọnlẹn. (Tie Psalm 1:1-3.) Bhi ọsi ọhẹnhẹn nin uwẹ ha rẹ munhẹn ha tie iBaibo, uwẹ sabọ rẹ ha re obhi ẹghe khere tie bhọ. Beji uwẹ ha rẹ ha luẹ emhin bhọ ukpẹdẹ-ukpẹdẹ, iriọ ọ ha rẹ ha ti uwẹ bhọ rẹ ha tie ọle.

2. Be ha rẹkpa uwẹ rẹ manman miẹn elele bhi Baibo nin uwẹ tie?

Nin mhan rẹ manman miẹn elele bhi Baibo nin mhan luẹ, ọ iyi utiemhin ọkpa mhan da wo ha tie ọle, ọ yẹ khẹke nin mhan re ẹghe ọbhi otọ rẹ ha “ria eria nyan” emhin nin mhan tiele. (Joshua 1:8) Beji uwẹ ha rẹ ha tie iBaibo, ha nọọn egbe ẹ ene inọnta nan: ‘Be emhin nin mẹn tiele man mẹn le rẹji Jehova? Be imẹn ha rẹ noo ọle yẹ bhi iẹnlẹn nọnsẹmhẹn? Be imẹn ha rẹ re ọle rẹkpa ẹbho ebhebhe yẹ?’

3. Be uwẹ ha lu nin uwẹ da miẹn ẹghe rẹ ha tie iBaibo?

Ọ be nọghọ uwẹ rẹ miẹn ẹghe rẹ ha tie iBaibo? Ọ nọghọ ẹbho ne bunbun. Ọkpakinọn, ọkhẹke nin mhan dọnmhegbe rẹ ha ‘noo ẹghe nọnsẹmhan nọnsẹn.’ (Ephesians 5:16) Mhan dẹ sabọ lu ọnan sade mhan mhanmhan ẹghe ọbhi otọ ukpẹdẹ-ukpẹdẹ nin mhan ha rẹ ha tie iBaibo. Ọsewewiẹ, ọle ẹbho eso zẹle nin ele rẹ ha tie iBaibo. Ọ yẹẹ eso rẹ tie ọle bhi ọsodanmhẹn. Ẹbho eso yẹ ribhọ ne tie ọle bhi ọsemuan ọkuẹsẹ ele nowẹ. Ẹghela uwẹ ha rẹ sabọ ha tie ọsi uwẹ?

MANMAN LẸN OTỌLE NỌNSẸN

Luẹ ebi uwẹ ha lu nin Baibo nan tie da manman ha ti uwẹ bhọ. Sẹyẹ luẹ ebi uwẹ ha rẹ ha muegbe ọbhi otọ yẹ, beji uwẹ ha da manman ha miẹn elele bhi Baibo nin uwẹ luẹ.

Beji ebale nọn bha ka rẹ ha yẹẹ mhan, rẹ dọ ha yẹẹ mhan sade mhan dọnmhegbe rẹ ha le ọle, iriọ ẹmhọn iBaibo nan tie yẹ dia

4. Dọnmhegbe nin Baibo nan tie ha ti uwẹ bhọ

Asabọmiẹn ọ ida lẹkhẹ nin uwẹ rẹ munhẹn ha tie iBaibo. Ọkpakinọn, Baibo nan tie dẹ sabọ ha “ghọn” uwẹ, beji ebale nin ọria ika le khẹ rẹ dọ ha ghọn ọlẹn, sade ọle dọnmhegbe rẹ ha le ọle. Tie 1 Peter 2:2, bha ha zilo nyan ọne inọnta nan:

Uwẹ be riale ghe Baibo dẹ kiẹn ebe nọn yẹẹ uwẹ rẹ ha tie sade uwẹ dọnmhegbe rẹ ha tie ọle ukpẹdẹ-ukpẹdẹ?

Ghe ọne IVIDIO nan, nin uwẹ daghe emhin nin ẹbho eso lu nọn da ha ti ele bhọ rẹ ha tie iBaibo. Bha ha ghe ọle fo, bha zilo nyan inọnta ne rẹkhan ọlẹn.

VIDIO: Ebi Elasẹre Eso Rẹ Dọ Hoẹmhọn Ọta Nọnsi Osẹnobulua Yẹ (5:33)

Ọnọghọ nela ene elasẹre nan rẹman bhi ọne ividio ha mhọnlẹn?
Be rẹkpa ele rẹ ha re obọ rẹkhan emhanmhan nin ele rẹ tie iBaibo
Be ele lu nọn da ha yẹẹ ele rẹ ha tie iBaibo?

Emhin ne ha sabọ rẹkpa uwẹ:

Guanọ iBaibo nin ẹmhọn ne ribhi ẹkẹ ọle gbale, nan yẹ re urolo nọn lẹkhẹ gbẹn. Ahamiẹn Baibo natiọle New World Translation ribhi urolo nin uwẹ sabọ tie, uwẹ sabọ rẹ noo ọle.
Ka re obọ nọn manman yẹẹ uwẹ rẹ munhẹn. Nin uwẹ rẹ lẹn obọ nọn ha yẹẹ uwẹ nẹ, fẹ ọne ẹkpẹti nọn yọle “Ha Tie IBaibo Ukpẹdẹ-ukpẹdẹ.”
Ha re iyaman ọbhi eji uwẹ sẹ tie sẹ. Noo ẹkpẹti nọn yọle “Lẹn Eji Uwẹ Sẹ Tie Sẹ,” nọn ribhi ọne ebe nan.
Noo JW Library^®app. Uwẹ dẹ sabọ re ọle rẹ tie iBaibo, la kaehọ irẹkọdi ọsi Baibo bhi foni la tablẹti nọnsẹ.
Noo eji a tiọle Appendix bhi Baibo natiọle New World Translation. Bhi enin, uwẹ dẹ miẹn emhin kẹkẹ bọsi mapu bi ikpọta eso nan re otọle man nọnsẹn. Ene emhin nan dẹ re iBaibo nan tie ha ti uwẹ bhọ.

5. Ha muegbe ọbhi otọ khẹ iluẹmhin Baibo nọnsẹ

Tie Psalm 119:34, bha ha zilo nyan ọne inọnta nan:

Bezẹle nọn da khẹke nin uwẹ ha nan erọnmhọn uwẹ kuẹ munhẹn ha tie iBaibo, la muegbe iluẹmhin Baibo nọnsẹ?

Be uwẹ ha lu nin uwẹ da manman ha miẹn elele bhi Baibo nin uwẹ luẹ? Dọnmhegbe ha lu ene emhin ea nan sade uwẹ muegbe iluẹmhin Baibo:

Tie ene uduọle ne ribhi obọ ọhẹnhẹn ọsi ọne iluẹmhin.
Tie ene iBaibo ne ribhi ene uduọle, uwẹ ha dọnmhegbe nin uwẹ rẹ daghe ebi ele rẹ diẹn mun ẹmhọn ne ribhi ene uduọle yẹ.
Re iyaman ọbhi ene ikpọta ne wanniẹn ene inọnta kẹkẹ. Ọnan dẹ rẹkpa uwẹ rẹ deba ọria nọn man uwẹ iBaibo rẹ zilo nyan ọne iluẹmhin nọnsẹn.

Uwẹ be rẹ lẹn?

Esali Jehova noo iBaibo nin ẹbho kẹkẹ zedu ọle. Ọkpakinọn, ọ manman yẹẹ ele rẹ ha noo Baibo natiọle New World Translation of the Holy Scriptures ranmhude uwedẹ nin ẹmhọn ne ribhi ẹkẹ ọle rẹ gba, uwedẹ nọn rẹ lẹkhẹ nan rẹ lẹn otọle, bi uwedẹ nan rẹ noo elin nọnsi Osẹnobulua bhi ẹkẹ ọle.—Fẹ ọne ebe nan ghe bhi jw.org: “Esali Jehova Be Mhọn IBaibo Nọnsele?”

ẸBHO ESO SABỌ YỌLE: “Ọ iyi emhin nọn lẹkhẹ nan rẹ lue iBaibo. Mẹn imhọn ọne ẹghe la ahu nin mẹn ha rẹ ha luẹ iBaibo.”

Be uwẹ riale yẹ?

EBI MHAN LUẸLE

Nin uwẹ rẹ manman miẹn elele bhi Baibo, guanọ ẹghe rẹ ha tie ọle ẹghe rebhe. Ha nan erọnmhọn ji Osẹnobulua nọn rẹkpa uwẹ rẹ lẹn otọ emhin nin uwẹ luẹ. Yẹ ha muegbe ọbhi otọ khẹ iluẹmhin Baibo nọnsẹ.

Uwẹ Be Yẹ Yere?

Be ha rẹkpa uwẹ rẹ manman miẹn elele bhi Baibo nan luẹ?
Ẹghela uwẹ ha sabọ rẹ ha tie iBaibo?
Bezẹle nọn da yi uhọnmhọn-emhin nin uwẹ rẹ ha muegbe iluẹmhin Baibo nọnsẹ ọbhi otọ?

Gbẹn ẹdẹ nin uwẹ luẹ ọne iluẹmhin nan fo ọbhi enan:

Lu Ọnan

Muegbe iluẹmhin nọn ki sẹ ọle bhi egbe ọbhi otọ. Lu ọle rẹkhan uwedẹ nan zilo ọle bhi ọne iluẹmhin nan..

Ọbhebhe:

Your other goal