ILUẸMHIN 13

Ebi Oga Ohoghe Rẹ Riia Elin Nọnsi Osẹnobulua A Yẹ

Khue

Baibo taman mhan ghe, Osẹnobulua, ọle hi ahoẹmhọn-egbe. Ahamiẹn iriọ, bezẹle nin otu oga ne bunbun ne yọle ghe Osẹnobulua ele ga, ki da mhọn obọ bhi emhin ebe kẹkẹ ne sunu? Ọ iyi Osẹnobulua ele gene ga. Oga ohoghe ele khin. Be ele rẹ re ọnan man yẹ? Ẹlo nela Osẹnobulua rẹ ghe emhin nin ele lu? Be ọle da khian ele yẹ?

1. Be oga ohoghe rẹ re iman-emhin nesele riia Osẹnobulua elin an yẹ?

Oga ohoghe “re ẹmhọanta nọnsi Osẹnobulua kiẹn ohoghe.” (Romans 1:25) Bhi ọsi ijiẹmhin, Baibo yọle ghe ọkhẹke nin mhan ha noo elin nọnsi Osẹnobulua. Ọkpakinọn, oga ne bunbun iman ẹbho elin nọnsi Osẹnobulua. (Romans 10:13, 14) Sẹyẹ, emhin ọbe ha sunu, eso bhi ene mun ọkalo bhi oga ki yọle ghe iho nọnsi Osẹnobulua nọn. Ohoghe khọnin. Osẹnobulua imhọn obọ bhi emhin ebe soso ne sunu. (Tie James 1:13.) Ọ ba bhi egbe a ghe ene ohoghe nan re ẹbho ne bunbun ha khọẹkẹ Osẹnobulua.

2. Be oga ohoghe rẹ re emhin nin ele lu riia elin nọnsi Osẹnobulua a yẹ?

Jehova lu ẹbho nọnsẹn. Bhi obọ nọnkẹle, oga ohoghe ilu ẹbho nọnsẹn. Ẹghe nin Baibo rẹ ha tẹmhọn oga ohoghe, ọ da yọle ghe “olukhọ nesọle yo sẹbhi okhun.” (Revelation 18:5) Rẹ na bhi otọ ha de, ọle oga ohoghe rẹ ne obọ ọbhi ilọnmhọn efinẹfi. Ele yẹ mhọn obọ bhi okhọn. A ika eka ẹbho ne sẹ yu bhi okhọn nin ele deba. Eso bhi ene mun ọkalo bhi otuẹ ki ha re ene rẹkhan ele khuan igho, yẹ ha noo ọne igho beji ọ ghọn ele. Ene emhin nan nin ele lu rẹman ghe ele bha lẹn Osẹnobulua. Bhiriọ, ele ida sabọ yọle ghe Osẹnobulua ele ga.—Tie 1 John 4:8.

3. Ẹlo nela Osẹnobulua rẹ ghe oga ohoghe?

Emhin nin oga ohoghe lu bha be ha re ẹkẹ khọ uwẹ? Ahamiẹn iriọ nọn, be uwẹ riale ọ dia iJehova bhi egbe yẹ? Jehova hoẹmhọn ẹbho. Bhiriọ, ọ re ẹkẹ khọ ọle sade ọle daghe ene mun ọkalo bhi oga riia ọle elin an, yẹ re obọ oya mun ẹbho. Ọle yọle ghe ọle dẹ gbe oga ohoghe khuelo. “A iyẹ da miẹn ọlẹn ghẹdẹ.” (Revelation 18:21) Bhi ẹghe nọn bha yẹ ree gbe, Osẹnobulua dẹ re ọkpẹnlẹn ọbhi oga ohoghe rebhe.—Revelation 18:8.

MANMAN LẸN OTỌLE NỌNSẸN

Zilo nyan ẹlo nin Jehova rẹ ghe oga ohoghe. Fẹ emhin eso nin oga ohoghe sẹ lu. Uwẹ ha yẹ luẹ ebezẹle nọn bha da khẹke nin emhin nin ele lu re uwẹ zobọ bhọ rẹ ha luẹ ẹmhọn iJehova.

4. Ọ iyi oga rebhe Osẹnobulua miẹn ọbhi egbe

Ẹbho ne bunbun riale ghe oga rebhe Osẹnobulua miẹn ọbhi egbe. Sokpan, ọnin iyi ẹmhọanta. Tie Matthew 7:13, 14, bha ha zilo nyan ọne inọnta nan:

Be iBaibo tale rẹji uwedẹ nọn ha re ọria sẹbhi iẹnlẹn ighegheghe?

Ghe ọne IVIDIO, bha ha zilo nyan inọnta nọn rẹkhan ọlẹn.

VIDIO: Oga Rebhe Osẹnobulua Be Miẹn Ọbhi Egbe?—Ukpọkhere (3:22)

Baibo be yọle ghe oga rebhe Osẹnobulua miẹn ọbhi egbe?

5. Oga ohoghe ire ahoẹmhọn-egbe ọsaje man

Oga ohoghe wo riia elin nọnsi Osẹnobulua a bhi uwedẹ ne bunbun. Okhọn nin ele deba, ọle hi uwedẹ ọkpa nin ele sẹ rẹ manman lu ọnan. Nin uwẹ rẹ daghe ọkpa bhi ene okhọn nin ele sẹ deba, ghe ọne IVIDIO, bha ha zilo nyan inọnta ne rẹkhan ọlẹn.

VIDIO: Ebi Otuẹ Kẹkẹ Rẹ Deba bhi Okhọn IHitler Yẹ (2:22)

Be otuẹ ne bunbun lu yẹ bhi ẹghe nan rẹ ha khọn okhọn iHitler?
Be emhin nin ele lu dia uwẹ yẹ bhi egbe?

Tie John 13:34, 35 bi 17:16, bha ha zilo nyan ene inọnta nan:

Be uwẹ riale ọ dia iJehova bhi egbe yẹ sade ọle daghe ẹbho ne yọle ele ga ọle deba bhi okhọn?
Oga ohoghe wo ha lu emhin ebe ne bunbun. Emhin ebe nela uwẹ sẹ daghe ele lu?

Emhin nin oga ohoghe lu bha rẹman ghe Osẹnobulua nọn mhọn oyẹẹ ele ga

6. Osẹnobulua guanọ nin ọle rẹkpa ẹbho sibhi oga ohoghe re

Tie Revelation 18:4, a bha ha zilo nyan ọne inọnta nan:

Be ọ dia uwẹ bhi egbe yẹ, nin uwẹ rẹ lẹn ghe Osẹnobulua guanọ nin ọle rẹkpa ẹbho nin oga ohoghe hiẹle?

7. Sẹyẹ ha luẹ ẹmhọn Osẹnobulua

Ọ be khẹke nin mhan ha ghe Osẹnobulua bii ọria nọn imhẹn ranmhude emhin ebe nin oga ohoghe lu? Bhi ọsi ijiẹmhin, ji a man yọle ghe okpea ọkpa mhọn ọmọn nọn wo bhi ehọ. Ọne aba rẹ ha re adia nin ọne ọmọn, ọne ọmọn bha ka ọle ehọ. Ọ da sibhi uwa re dọ ha nyẹn iẹnlẹn okan. Ọne aba bha re obọ bhi emhin nin ọne ọmọn lu. Mhan dẹ be ha re ẹlo ọbe rẹ ghe ọne aba ranmhude uwedẹ nin ọmọn nọnsọle rẹ ha nyẹnlẹn?