ILUẸMHIN 14
Be Ha Re Oga Nọnsẹmhan Ha Yẹẹ Osẹnobulua?
Beji mhan luẹle bhi iluẹmhin nọnzi 13, ọ iyi oga rebhe Osẹnobulua miẹn ọbhi egbe. Ọrẹyiriọ, mhan dẹ sabọ ga Osẹnobulua bhi uwedẹ nọn ha re ọle ha ghọnghọn. Uwedẹ oga nela khọnin? (James 1:27) Fẹ ebi Baibo tayẹ.
1. Iman-emhin nela ọkhẹke nin mhan rẹọ i?
Ahamiẹn mhan guanọ nin oga nọnsẹmhan ha ti Jehova bhọ, ọkhẹke nin emhin nin mhan rẹọ i ha yi iman-emhin ne ribhi ẹkẹ iBaibo. Jesu da taman Osẹnobulua bhi erọnmhọn yọle: “Ẹmhọanta ọta nọnsẹ khin.” (John 17:17) Oga ne bunbun iman ẹbho ẹmhọanta ne ribhi ẹkẹ iBaibo. Iman-emhin ọsi eria, ọle ele man. Ẹmhọn ẹbho ne ‘fikeke gbe uhi nọnsọle’ iti Jehova bhọ. (Tie Mark 7:9.) Bhi obọ nọnkẹle, ọ re ọle ghọnghọn sade mhan re obọ rẹkhan uhi nesọle ne ribhi ẹkẹ iBaibo.
2. Uwedẹ nela ọkhẹke nin mhan rẹ ha ga iJehova?
Jehova man mhan. Ranmhude ọnan, ọle ọkpa ọkhẹke nin mhan hoẹmhọnlẹn yẹ ha ga. (Revelation 4:11) Mhan ida ha ga ẹbọ la noo amanzẹ soso rẹ ga ọle.—Tie Isaiah 42:8.
Ọkhẹke nin oga nọnsẹmhan ha yi “oga nọn khiale” nin Jehova ha miẹn ọbhi egbe. (Romans 12:1) Ọnan rẹman ghe mhan dẹ ha nyẹnlẹn rẹkhan uhi nesọle. Bhi ọsi ijiẹmhin, ẹbho ne hoẹmhọn iJehova re obọ rẹkhan uhi nin ọle gbe bhi ẹmhọn ibọdọ bi ireokhuo. Ele yẹ rẹban emhin ne ha sabọ si ikuan-egbe ji ele, emhin bọsi nan rẹ ha sin itaba, nan rẹ ha noo ikhunmhun bhi uwedẹ nọn imhẹn, bi nan rẹ ha da anyọn gbe egbe. a
3. Bezẹle nọn da khẹke nin mhan deba ẹbho nesi Jehova ha ga ọle?
Ikolo oga nin mhan yo uzana-uzana, re isẹhoa nin mhan rẹ ha “gẹn iJehova . . . bhi ẹkẹ agbotu.” (Psalm 111:1, 2) Uwedẹ ọkpa nin mhan rẹ gẹn ọlẹn hi, illo nin mhan so bhi ene ikolo nan. (Tie Psalm 104:33.) Jehova hoẹmhọn mhan. Ọle lẹnmhin ghe ikolo oga dẹ sabọ rẹkpa mhan rẹ miẹn iẹnlẹn ọsi ighegheghe. Ọnan zẹle nin ọle da yọle nin mhan ha yo ikolo oga. Mhan ha deba ẹbho nesi Jehova ha sikoko, mhan ki sabọ ha re izebhudu nin egbe.
MANMAN LẸN OTỌLE NỌNSẸN
Luẹ ebezẹle nin Jehova bha da re obọ bhọ nin mhan ha noo amanzẹ bhi oga nọnsọle. Yẹ luẹ uwedẹ kẹkẹ nin mhan ha rẹ sabọ ha gẹn Osẹnobulua.
4. Ọ bha khẹke nin mhan ha noo amanzẹ bhi oga nọnsi Jehova
Be imhan rẹ lẹn yẹ ghe ọ dẹ ha khọ iJehova bhi ẹkẹ sade mhan noo amanzẹ? Ghe ọne IVIDIO, bha ha zilo nyan ọne inọnta nan:
-
Be ọ dia iJehova yẹ bhi egbe ẹghe nin ibhokhan Izrẹl rẹ ha noo amanzẹ bhi oga?
Ẹbho eso riale ghe ele ha noo amanzẹ, sade ele nan erọnmhọn la ele ga Osẹnobulua, ọ dẹ re ele manman sikẹ Osẹnobulua. Ọkpakinọn, emhin nọn sẹ iriọ bhọ dẹ re Osẹnobulua ha khọẹkẹ ele. Tie Exodus 20:4-6 bi Psalm 106:35, 36, bha ha zilo nyan ene inọnta nan:
-
Be hi amanzẹ eso nin ẹbho noo bhi oga?
-
Ẹlo nela iJehova rẹ ghe oga nọn sẹ iriọ?
-
Uwẹ be riale emhin esili nọn nan rẹ ha noo amanzẹ bhi oga nọnsi Jehova?
5. Ahamiẹn iJehova ọkpa mhan ga, ọria ida sabọ rẹ iman-emhin ohoghe hiẹ mhan
Nin uwẹ rẹ daghe ebi oga ẹmhọanta rẹ miẹn mhan fan yẹ bhi obọ iman-emhin ohoghe, ghe ọne IVIDIO.
Tie Psalm 91:14, bha ha zilo nyan ọne inọnta nan:
-
Be iJehova yọle ghe ọle dẹ lu nin mhan sade mhan hoẹmhọn ọlẹn yẹ ha ga ọle ọkpa?
6. Mhan kugbe ga iJehova bhi ikolo oga
Mhan ha deba so illo yẹ re ewanniẹn ọbhi inọnta bhi ikolo oga, mhan re ọle gẹn iJehova. Mhan yẹ re ọle re izebhudu nin ibhio mhan nin mhan ko ga. Tie Psalm 22:22, bha ha zilo nyan ene inọnta nan:
-
Ọ be yẹẹ uwẹ rẹ họn ewanniẹn nin ẹbho re ọbhi inọnta bhi ikolo oga?
-
Ọ dẹ be yẹẹ uwẹ rẹ re ewanniẹn ọbhi inọnta bhi ikolo oga?
7. Ọ manman ti Jehova bhọ sade mhan taman ẹbho emhin nin mhan luẹ bhi Baibo
Uwedẹ ne bunbun ribhọ nin mhan ha rẹ sabọ ha taman ẹbho emhin nin mhan luẹ bhi Baibo. Tie Psalms 9:1 bi 34:1, bha ha zilo nyan ọne inọnta nan:
-
Be hi emhin ọkpa nin uwẹ sẹ luẹ bhi Baibo nin uwẹ guanọ nin uwẹ taman ọria?
ẸBHO ESO SABỌ YỌLE: “Uwedẹ nọn ki rẹ khin nin mhan rẹ ha ga Osẹnobulua, ọle dẹ miẹn ọlẹn bhi egbe, ranmhude ọkhọle nọnsẹmhan Osẹnobulua ghe.”
-
Be uwẹ bhọ riale yẹ?
EBI MHAN LUẸLE
Mhan re iJehova ghọnghọn sade mhan ga ọle ọkpa, sade mhan gẹn ọlẹn bhi ikolo oga, bi sade mhan taman ẹbho ebhebhe ebi mhan luẹ.
Uwẹ Be Yẹ Yere?
-
Be imhan ha rẹ sabọ lẹn ebi Jehova guanọ nin mhan rẹ ga ọle yẹ?
-
Bezẹle nọn da khẹke nin mhan ha ga iJehova ọkpa?
-
Bezẹle nọn da khẹke nin mhan deba ẹbho ne ga Osẹnobulua bhi uwedẹ ẹmhọanta ha ga ọle?
FẸ ENE EMHIN NAN GHE
Tie okha nọn mhọn uhọnmhọn-ọta nọn yọle “Mẹn Iyẹ Ga Ẹbọ,” nin uwẹ daghe ebi okhuo ọkpa rẹ re egbe nẹ bhi iga-ẹbọ yẹ.
“Ẹmhọanta Nọn Ribhi Baibo Fi Iẹnlẹn ọsi Eria Denọ” (The Watchtower, July 1, 2011)
Luẹ ebe ha sabọ rẹkpa uwẹ rẹ ha re ewanniẹn ọbhi inọnta bhi ikolo oga.
Fẹ ebi usẹn-obhokhan ọkpa rẹ miẹn elele bhi ikolo oga yẹ, arẹmiẹn ọ bha lẹkhẹ nanlẹn rẹ ha yo.
Ẹbho ne bunbun riale ghe ikrọsi a rẹ lẹn ẹbho ne yi Kristiẹn. Ọ be khẹke nin Kristiẹn ha noo ikrọsi bhi oga?
“Bezẹle Nin Esali Jehova Ida Noo Ikrọsi bhi Oga?” (Ebe nọn ribhi jw.org)
a A dẹ zilo nyan ene uhọnmhọn-ọta nan bhi iluẹmhin ne ribhi odalo.
Emhin Ebhebhe Ne Ha Yẹ Ti Uwẹ Bhọ
INỌNTA NIN ẸBHO KẸ NỌỌN
Bebhọ Iluẹmhin IBaibo?
Min ewanniẹn rẹji inọnta rẹji iluẹmhin iBaibo nin man nẹn ẹbho luẹ ọsọhẹ.
