ILUẸMHIN 17

Unan Ọria Nela Jesu Khin?

Khue

Beji mhan rẹ ha luẹ ẹmhọn Jesu bi emhin nin ọle lu ẹghe nin ọle rẹ ha ribhi ọne otọ nan, mhan dọ kere ghe, ọle mhọn ikpẹ esili ne ha sabọ rẹ mhan sikẹ ọle bi Aba ọle nin Jehova. Be hi ikpẹ esili eso nin Jesu mhọnlẹn? Be imhan ha rẹ sabọ re egbe khọkhọ iJesu yẹ?

1. Uwedẹ nela Jesu rẹ diabe Aba ọle?

Bhi ikpe ne bunbun nin Jesu rẹ deba Aba ọle ha ribhi okhun, ọle wo luẹ emhin ne bunbun bhi obọ Aba ọle. Ranmhude ọnan, ọle da wo ha ria eria, yẹ lu emhin bọsi Aba ọle. (Tie John 5:19.) Ranmhude uwedẹ nin Jesu rẹ re egbe khọkhọ Aba ọle, ọle zẹle nin ọle da sabọ yọle, “ọria nọn hi ki rẹ khin nọn miẹn mẹn yẹ miẹn Aba mẹn.” (John 14:9) Beji uwẹ ha rẹ ha luẹ ẹmhọn ikpẹ esili nesi Jesu, uwẹ ki manman dọ lẹn iJehova nọnsẹn. Bhi ọsi ijiẹmhin, uwedẹ nin Jesu rẹ ha re ẹkẹ-ẹjẹjẹ man wo rẹman ghe, Jehova wo manman hoẹmhọn mhan.

2. Be iJesu rẹ rẹman yẹ ghe, ọle hoẹmhọn Aba ọle nin Jehova?

Jesu da yọle: “Beji Aba mẹn taman mẹn tee, iriọ mẹn lu, nin ọne agbọn nan da lẹn ghe mẹn hoẹmhọn Aba mẹn.” (John 14:31) Ẹghe nin Jesu rẹ ha ribhi ọne otọ nan, ọle da wo rẹman ghe, ọle wo manman hoẹmhọn Aba ọle bhi uwedẹ nin ọle rẹ ha hẹnmhọn nanlẹn arẹmiẹn ghe ọ bha lẹkhẹ nanlẹn. Rẹ deba ọnin, Jesu da sẹyẹ wo ha tẹmhọn Aba ọle man ẹbho, nin ele da sabọ kiẹn imọẹ iJehova.—John 14:23.

3. Be iJesu rẹ reman yẹ ghe ọle hoẹmhọn ẹbho?

Baibo yọle ghe, ‘ẹmhọn eria manman ti Jesu bhọ.’ (Proverbs 8:31) Jesu wo re ọne oyẹẹ nan man bhi uwedẹ nin ọle rẹ ha rẹkpa ẹbho yẹ re izebhudu nin ele. Arẹmiẹn ghe emhin ọhan-ilo nin ọle lu rẹman ghe ọle mhọn ahu, oyẹẹ nin ọle mhọn da ẹbho, ọle re ọle lu ene emhin ọhan-ilo. (Mark 1:40-42) Ọle da ha re ifuẹkẹ rẹ ne ẹbho lu emhin yẹ re obọ esili mun ọrebhe. Ẹmhọn nin ọle ta da wo ha re ikoudure bi ikhuaẹloghe nin ọrebhe. Jesu da muegbe nin ọle rẹ loya yẹ yu ranmhude oyẹẹ nin ọle mhọn da ọrebhe. Ọrẹyiriọ, ẹbho ne re obọ rẹkhan iman-emhin nesọle, ele ọle hoẹmhọnlẹn nẹ.—Tie John 15:13, 14.

MANMAN LẸN OTỌLE NỌNSẸN

Manman luẹ ẹmhọn unan ọria nin Jesu khin. Yẹ luẹ ebi uwẹ ha rẹ ha ze emhin bhi obọ, bi ebi uwẹ ha rẹ ha re oyẹẹ man yẹ bọsi Jesu.

4. Jesu wo hoẹmhọn Aba ọle

Ijiẹmhin nọnsi Jesu rẹkpa mhan rẹ lẹn ebi mhan ha rẹ rẹman yẹ ghe mhan hoẹmhọn Osẹnobulua. Tie Luke 6:12 bi John 15:10; 17:26. Bha ha tie ene iBaibo fo, re ọne inọnta nan rẹ zilo nyan ene iBaibo kẹkẹ:

Be imhan ha rẹ rẹman yẹ ghe mhan hoẹmhọn iJehova beji Jesu rẹ hoẹmhọn ọlẹn?

Jesu hoẹmhọn Jehova nin Aba ọle, ọle da sẹyẹ ha nan erọnmhọn ji ọle ẹghe rebhe

5. Jesu wo ha rẹkpa ẹbho

Jesu wo ha mhọn ẹkẹ-ẹjẹjẹ da ẹbho. Ẹmhọn ẹbho ọle mun kalo gbera ọsi egbe ọle. Egbe ha rẹ lọ ọle, ọle ki yẹ dọnmhegbe noo ẹghe bi ahu nọnsọle rẹ rẹkpa ẹbho. Tie Mark 6:30-44, bha ha zilo nyan ene inọnta nan:

Bhi eji mhan tiele nan, be iJesu rẹ rẹman yẹ ghe, ẹmhọn ẹbho rẹtẹ ọle?—Fẹ ulọnlẹn 31, 34, 41, bi 42 ghe.
Be bhọ re iJesu ha rẹkpa ẹbho?—Fẹ ulọnlẹn 34 ghe.
Beji a miẹn ghe Jehova, ọle Jesu re egbe khọkhọ, be ọnan man uwẹ le reji Jehova?
Be hi uwedẹ eso nin mhan ha rẹ rẹman ghe ẹmhọn ẹbho rẹtẹ mhan beji ọ rẹ rẹtẹ iJesu?

6. Jesu wo ha ze emhin bhi obọ

Arẹmiẹn Jesu bha fe, ọle wo ha ze emhin bhi obọ. Ọle da yẹ taman mhan nin mhan ha ze emhin bhi obọ. Tie Acts 20:35, bha ha zilo nyan ọne inọnta nan:

Beji Jesu tale, be ha sabọ rẹ mhan ha ghọnghọn?

Ghe ọne IVIDIO, bha ha zilo nyan ọne inọnta nan:

VIDIO: Eghọnghọn Nabhọre Sade A Re Emhin Sibhi Obọ Re—Ukpọkhere (4:00)

Be hi uwedẹ eso nin mhan ha rẹ sabọ ha ze emhin bhi obọ aharẹmiẹn mhan bha fe?

Uwẹ be rẹ lẹn?

Baibo yọle ghe, nin mhan ha re elin nọnsi Jesu rẹ nan erọnmhọn. (Tie John 16:23, 24.) Ahamiẹn mhan nan erọnmhọn bhi elin nọnsi Jesu, mhan ki rẹman ghe emhin nin ọle lu, nin ọle rẹ rẹkpa mhan kiẹn imọẹ iJehova manman ti mhan bhọ.

ẸBHO ESO SABỌ YỌLE: “Ẹmhọn mhan bha rẹtẹ Osẹnobulua hiehie.”