Osẹ nọn lu emhin rẹkhan emhanmhan, ọle iJehova khin. Ọle iguanọ ozughu. (1 Corinthians 14:33) Bhiriọ, ene ga ọle dẹ yẹ ha lu emhin rẹkhan emhanmhan. Be a rẹ re emhin khian yẹ bhi agbotu nọnsi Jehova? Be bhọ mhan ha lu nin mhan rẹ re obọ ba ọne emhanmhan nan?

1. Họla re ọne agbotu khian?

‘Jesu Kristi hi uhọnmhọn ọsi ọne agbotu.’ (Ephesians 5:23) Okhun bhi ẹlinmhin ọle ye. Enin ọle na sun iwẹnna ọsi Esali Jehova bhi otọ agbọn rebhe. Jesu zẹ ewanlẹn eso bhi ẹkẹ agbotu, nin ele ha yi “ọguọmhandia nan gbaẹkẹ ọle.” Ene ikpea nan, ele a yẹ tiọle Otu Nọn Sun Oga. (Tie Matthew 24:45-47.) Ele Jesu rẹ sun iwẹnna ọsi Esali Jehova bhi ọne otọ nan. Beji ene etuegbe bi ene ewanlẹn bhi Jerusalem rẹ ha re adia nin agbotu ọsi Kristiẹn bhi ore nin ọhẹnhẹn, iriọ Otu Nọn Sun Oga yẹ rẹ re adia nin agbotu nọnsi Jehova ẹlẹnan. (Acts 15:2) Ọrẹyiriọ, ọ iyi ene ikpea nan nyan ọne agbotu nan. Adia nin Jehova bi Jesu re nin ele bhi ẹkẹ iBaibo, ọle ele re obọ rẹkhan.

2. Be hi iwẹnna ọsi ene ewanlẹn bhi agbotu?

Ikpea ne sẹ ga iJehova bhi ikpe ne bunbun, ele a ne ọbhi ihe ọsi ewanlẹn bhi ẹkẹ agbotu. Ele re iBaibo man emhin bhi ẹkẹ agbotu. Ele rẹkpa ibhio ele, yẹ re izebhudu nin ele. A iha ele osa bhi ẹsọn nin ele miẹn. ‘Ọkhọle rebhe ele rẹ lu ọle nin Osẹnobulua. Ọ iyi ranmhude ele guanọ elele bhọ. Ọtibhọ ele rẹ lu ọle.’ (1 Peter 5:1, 2) Ene zẹ sikẹ ewanlẹn, ele hi ikpea ne rẹkpa ene ewanlẹn. Ọ ha ki zẹbue, ele ki yẹ sabọ ha ga bhi ihe ọsi ewanlẹn.

Otu Nọn Sun Oga yẹ zẹ ewanlẹn eso ne ha ga bhi ihe ọsi ọfẹotughe. Ene ọfẹotughe nan rẹnẹ ji agbotu kẹkẹ dọ ha re adia bi izebhudu nin ele. Ele hi ene zẹ ikpea ne ha sabọ ga bhi ihe ọsi ewanlẹn bi ene zẹ sikẹ ele. Baibo ele rẹ fẹghe si ene ikpea nan sẹle.​—1 Timothy 3:1-10, 12; Titus 1:5-9.

3. Ẹsọn nela ọdeọde bhi ẹwẹ Esali Jehova miẹn?

Ọrebhe bhi ẹkẹ agbotu “gẹn elin nọnsi Jehova.” Ele lu ọnan bhi uwedẹ nin ele rẹ deba bhi ikolo oga, bi uwedẹ nin ele rẹ deba bhi itẹmhọn Osẹnobulua beji ahu nọnsele sẹle.​—Tie Psalm 148:12, 13.

 MANMAN LẸN OTỌLE NỌNSẸN

4. Ifuẹkẹ Jesu rẹ ne ẹbho lu emhin

Jesu tie mhan rebhe nin mhan bu ọle re. Tie Matthew 11:28-30, bha ha zilo nyan ene inọnta nan:

• Be iJesu rẹ re ẹbho nin ọle gbẹloghe khian yẹ? Be ọle guanọ nin egbe dia mhan yẹ bhi odotọ ugbẹloghe nọnsọle?

5. Ene ewanlẹn re ijiẹmhin esili man

1. Ene ewanlẹn wẹnna kaka nin ele rẹ ziẹn ikolu nin ele bi Jehova ko mhọnlẹn. Iriọ ele yẹ rẹ rẹkpa azagba-uwa nọnsele

2. Ene ewanlẹn gbẹloghe ọrebhe bhi ẹkẹ agbotu

3.   Ene ewanlẹn tẹmhọn Osẹnobulua ẹghe rebhe

4. Ene ewanlẹn man emhin bhi ẹkẹ agbotu. Ele yẹ deba gbọnọ iKindọn Họọ, yẹ deba miẹnsọn ebhebhe

6. Ọkhẹke nin mhan ha rẹkhan adia ọsi ene ewanlẹn

Baibo taman mhan emhin kpataki ọkpa nọn zẹle nin mhan ha da ha re obọ rẹkhan adia ọsi ene ewanlẹn. Tie Hebrews 13:17, bha ha zilo nyan ene inọnta nan:

• Bezẹle nin Baibo da yọle nin mhan re ọkhọle rebhe ha hẹnmhọn nin ene rẹ mhan khian? Be uwẹ ghe ebi Baibo tale yẹ?

Tie Luke 16:10, bha ha zilo nyan ọne inọnta nan:

• Bezẹle nọn da khẹke nin mhan ha hẹnmhọn nin ene ewanlẹn, aharẹmiẹn ẹmhọn nin ele da re adia nin mhan bha sẹ emhin soso bhi ẹlo mhan?

 EBI MHAN LUẸLE

Jesu hi ọnọn re emhin khian bhi ẹkẹ agbotu. Ifuẹkẹ ene ewanlẹn ne wẹnna rẹkhan ọlẹn rẹ ne mhan lu emhin. Ele yẹ re ijiẹmhin esili man mhan. Ọnan zẹle nọn da ti mhan bhọ rẹ hẹnmhọn nin ele.

Uwẹ Be Yẹ Yere?

• Họla re agbotu khian?

• Be hi iwẹnna ọsi ene ewanlẹn bhi agbotu?

• Be hi iwẹnna ọsi ọdeọde bhi agbotu?