Jesu da yọle ghe ọkheke nin edibo nesọle rebhe mianmẹn. (Tie Matthew 28:19, 20.) Be ọkhẹke nan rẹ ha mianmẹn yẹ? Be ọria ha lu ọkuẹsẹ ọle sabọ mianmẹn?

1. Be a rẹ mianmẹn yẹ?

Ebi a re ikpọta iGreek nan zedu ọle diọbhi “imianmẹn” ta hi “nan rẹ gbe ọria ruẹ bhi amẹn.” Ẹghe nin Jesu rẹ mianmẹn, a da gbe ọle ruẹ bhi ẹdẹ iJordan, yẹ mun ọlẹn “dagbare bhi ẹkẹ ọne amẹn.” (Mark 1:9, 10) Bọsi Jesu, ahamiẹn iKristiẹn ọsaje ho nin ọle mianmẹn, a ki gbe ọle ruẹ bhi ẹkẹ amẹn.

2. Be imianmẹn rẹman?

Ọria ha mianmẹn, ọle re ọle rẹman ghe ọle re egbe ọle guẹ nin Jehova. Be ọria rẹ re egbe guẹ nin Jehova yẹ? Ọkuẹsẹ ọle mianmẹn, ọle ki taman iJehova bhi erọnmhọn ghe, ọle guanọ nin ọle rẹ ẹdagbọn nọnsọle rebhe rẹ ha ga ọle. Ọle ki ve nin Jehova ghe, Jehova ọkpa ọle da ga. Sẹyẹ, iho nọnsi Jehova ọle ha mun kalo bhi iẹnlẹn. Ọle ki zẹ nin ọle rẹ “he egbe nọnsọle . . . yẹ ha rẹkhan” ijiẹmhin nọnsi Jesu bi iman-emhin nesọle. (Matthew 16:24) Ọria ha re egbe guẹ nin Jehova yẹ mianmẹn, ọle bi Jehova ki dọ ha mhọn ikolu nọn deziẹn. Ọle ki yẹ dọ manman sikẹ ẹbho nekẹle ne ga iJehova.

3. Be ọria ha lu ọkuẹsẹ ọle sabọ mianmẹn?

Ọkuẹsẹ uwẹ sabọ mianmẹn, ọkhẹke nin uwẹ luẹ ẹmhọn iJehova yẹ ziẹn urẹọbhọ nin uwẹ mhọn da ọle. (Tie Hebrews 11:6.) Beji uwẹ ha rẹ manman ha lẹn iJehova yẹ ziẹn urẹọbhọ nọnsẹ, iriọ oyẹẹ nin uwẹ mhọn da ọle ha rẹ ha tuẹn okhun. Ọ ki ha yẹẹ uwẹ rẹ ha tẹmhọn ọlẹn man ẹbho, yẹ ha re obọ rẹkhan uhi nesọle. (2 Timothy 4:2; 1 John 5:3) Ọria ha ki sabọ ha khian ‘bhi uwedẹ nọn gbale nọnsi Jehova, yẹ ha lu ebe yẹẹ ọle,’ ọne ọria ki sabọ zẹ nin ọle rẹ re egbe guẹ nin Jehova yẹ mianmẹn.​—Colossians 1:9, 10. a

 MANMAN LẸN OTỌLE NỌNSẸN

4. Mhan dẹ sabọ miẹn emhin luẹ bhi uwedẹ nin Jesu rẹ mianmẹn

Tie Matthew 3:13-17 nin uwẹ rẹ manman luẹ ebi Jesu rẹ mianmẹn yẹ. Bha ha tie ọle fo, zilo nyan ene inọnta nan:

• Ọmobọ Jesu be ha khin bhi ẹghe nin ọle rẹ mianmẹn?

• Be iJesu rẹ mianmẹn yẹ? A be gheghe fianmhẹn amẹn ọle bhi uhọnmhọn?

Ẹghe nin Jesu rẹ mianmẹn fo, ọle da munhẹn ha lu iwẹnna kpataki nin Jehova mun nanlẹn. Tie Luke 3:21-23 bi John 6:38, bha ha zilo nyan ọne inọnta nan:

• Ẹghe nin Jesu rẹ mianmẹn fo, iwẹnna nela ọle mun kalo bhi iẹnlẹn?

5. Uwẹ dẹ sabọ khu ọbhọ nin uwẹ rẹ mianmẹn

Bhi ọsi ọhẹnhẹn, uwẹ sabọ ha riale ghe ọ ida fo uwẹ rẹ re egbe guẹ nin Jehova yẹ mianmẹn. Ọkpakinọn, beji uwẹ ha rẹ ha lu re alo bhi Baibo nin uwẹ lue, uwẹ ki dọ kere ghe emhin nin uwẹ ha sabọ lu nọn. Nin uwẹ rẹ daghe ẹbho eso ne sabọ lu ọle, ghe ọne IVIDIO.

Tie John 17:3 bi James 1:5, bha ha zilo nyan ọne inọnta nan:

• Be ha rẹkpa ọria rẹ sẹ ọnọn ha sabọ mianmẹn?

1. Ahamiẹn uwẹ guanọ nin uwẹ re egbe guẹ nin Jehova, uwẹ ki taman ọlẹn bhi erọnmhọn ghe ọle ọkpa uwẹ ha ga rẹ sẹbhi ighegheghe

2. Uwẹ ha mianmẹn, uwẹ ki re ọle rẹman ọrebhe ghe uwẹ re egbe guẹ nin Jehova

 6. Ọria ha mianmẹn, ọle ki dọ ha yi ọkpa bhi ene ribhi azagba-uwa nọnsi Jehova

Ọria ha mianmẹn, ọle ki dọ deba agbotu nọnsi Jehova. Ọne agbotu nan manman mhọn okugbe bọsi azagba-uwa. Arẹmiẹn ghe eje kẹkẹ mhan na vae, emhin ọkpa mhan rebhe rẹọ i. Imhan rebhe yẹ dọnmhegbe nin mhan rẹ re obọ rẹkhan uhi nesi Jehova. Tie Psalm 25:14 bi 1 Peter 2:17, bha ha zilo nyan ọne inọnta nan:

• Be imianmẹn rẹ rẹkpa mhan rẹ sikẹ iJehova bi ẹbho nesọle yẹ?

 EBI MHAN LUẸLE

Jesu yọle ghe, ọkhẹke nin ọrebhe ne rẹkhan ọlẹn mianmẹn. Ọkuẹsẹ ọria sabọ mianmẹn, ọle dẹ ha mhọn urẹọbhọ nọn ziẹnlẹn da iJehova, ọle dẹ ha re obọ rẹkhan uhi nesọle, ọle dẹ yẹ re egbe guẹ nanlẹn.

Uwẹ Be Yẹ Yere?

• Bezẹle nọn da khẹke nin Kristiẹn ha mianmẹn? Be a rẹ lu ọle yẹ?

• Be iregbeguẹ rẹ diẹn mun imianmẹn yẹ?

• Be ọkhẹke nin ọria lu ọkuẹsẹ ọle sabọ re egbe guẹ nin Jehova yẹ mianmẹn?