ILUẸMHIN 26

Bezẹle Nin Iloya bi Emhin Ebe Da Vuọn Ọne Agbọn Nan?

Khue

Emhin ebe ha sunu, inọnta nin ẹbho kẹ nọọn hi, ‘Bezẹle nin emhin ebe da sunu?’ Ọ ti mhan bhọ rẹ lẹn ghe ewanniẹn rẹji ọne inọnta nin ribhi ẹkẹ Baibo!

1. Be bhọ hi emhin nin Esu lu nọn si iloya re bhi agbọn?

Esu guanọ nin ẹbho ha ga ọle. Ranmhude ọnan, ọle da sọtẹ da Osẹnobulua. Ọle da bha ohoghe rẹ hiẹ Adam bi Eve nin okpea bi okhuo nin ọhẹnhẹn. Adam bi Eve da deba ibo ọsi Esu. (Genesis 3:1-5) Esu da tẹmhọn nọn re Eve ha riale ghe Jehova iguanọ ọmhẹn nọnsọle. Ọle da re ẹmhọn nin ọle taman Eve rẹ yọle ghe, ahamiẹn eria bha hẹnmhọn nin Osẹnobulua, ọle ele ha da ha ghọnghọn nẹ. Esu hi ọnọn bha ohoghe nin ọhẹnhẹn, ọle da taman Eve ghe, Eve ida yu. Ọnan zẹle nin Baibo da tie Esu ‘ọbhahoghe bi aba ọsi ene bha ohoghe.’—John 8:44.

2. Be Adam bi Eve ki lu yẹ?

Jehova wo lu emhin esili ne bunbun nin Adam bi Eve. Bhi ẹwẹ eran rebhe ne ribhi ogba ọsi Eden, ukpọkpa ọkpa ọle yọle nin ele hẹi le. (Genesis 2:15-17) Ọrẹyiriọ, Adam bi Eve da dọ le bhi eran nin Jehova yọle nin ele hẹi le. Eve “da re bhi ikpẹ ọsi ọne oran ha le ọle.” Akizẹbue, Adam nin “ọdọ ọle da yẹ ha le ọle.” (Genesis 3:6) Ele veva da mhọn akan-ehọ da Osẹnobulua. Ranmhude eria nọn gba nan Adam bi Eve khin, ọ inọghọ ele rẹ lu emhin ne mhẹn. Bhiriọ, ẹghe nin ele rẹ mhọn akan-ehọ da Osẹnobulua, ele wo taan elo a lu ọle, yẹ re ọle taman Osẹnobulua ghe, ele bha guanọ nọn ha taman ele ebi ele ha lu. Emhin nin ele lu da si iloya nọn khua ji ele.—Genesis 3:16-19.

3. Be emhin nin Adam bi Eve lu rẹ rẹso mhan yẹ?

Ẹghe nin Adam bi Eve rẹ gbobọrauhi nọnsi Osẹnobulua, ele da dọ kiẹn eria nọn bha yẹ gba nan. Imọn rebhe nin ele biẹ da kiẹn eria olukhọ. Rẹji Adam, Baibo yọle: ‘Rẹ na bhi obọ okpea ọkpa, ọle olukhọ na vae bhi ọne agbọn nan. Iriọ uu rẹ na bhi obọ olukhọ vae. Iriọ uu ki rẹ gba ọrebhe bhi obọ.’—Romans 5:12.

Emhin kẹkẹ zẹle nin ẹbho da loya ẹlẹnan. Ẹgheso, mhan loya ranmhude emhin nọn imhẹn nin mhan zẹ nin mhan rẹ lu. Emhin nọn imhẹn nin ẹbho ebhebhe lu sabọ yẹ si iloya ji mhan. Deba ọnin, emhin idunmhuri nọn sunu sabọ yẹ si iloya ji mhan.—Tie Ecclesiastes 9:11.

MANMAN LẸN OTỌLE NỌNSẸN

Luẹ ebe rẹ mhan rẹọbhọ ghe, ọ iyi Osẹnobulua mhọn obọ bhi iloya nọn ribhi ọne agbọn nan ẹlẹnan. Yẹ luẹ ebi ọ dia Osẹnobulua bhi egbe yẹ sade ọle daghe mhan loya.

4. Ọria nọn zẹle mhan loya

Ẹbho ne bunbun riale ghe, Osẹnobulua re ọne agbọn nan khian. Ẹmhọanta ọnin be khin? Ghe ọne IVIDIO.

VIDIO: Họla Re Ọne Agbọn Nan Khian? (1:24)

Tie James 1:13 bi 1 John 5:19, bha ha zilo nyan ọne inọnta nan:

Osẹnobulua be mhọn obọ bhi iloya bi ọkhọlọ nọn vuọn ọne agbọn nan?

5. Be emhin diayẹ bhi agbọn rẹ na bhi ẹghe nin Esu rẹ munhẹn ha gbẹloghe?

Ghe ọne IVIDIO.

VIDIO: Bezẹle Nin Osẹnobulua Da Ji Iloya Ha Ribhọ?—Ukpọkhere (3:07)

Tie Genesis 3:1-6, bha ha zilo nyan ene inọnta nan:

Ohoghe nela Esu bhale?—Fẹ ulọnlẹn 4 bi 5 ghe.
Be Esu rẹ tale yẹ ghe, Jehova iguanọ ọmhẹn nọnsẹmhan?
Be Esu rẹ tale yẹ ghe, ọ bha khẹke nin Jehova rẹ mhan khian nin mhan da sabọ ha ghọnghọn?

Tie Ecclesiastes 8:9, bha ha zilo nyan ọne inọnta nan:

Be emhin ki diayẹ bhi agbọn rẹ na bhi ẹghe nin Jehova rẹ re otọ nin Esu rẹ ha re ọne agbọn nan khian?

Adam bi Eve bha ha mhọn olukhọ soso bhi egbe. Ogba ọfubhegbe ele da ha nyẹnlẹn. Ọkpakinọn, ele da ka Esu ehọ, yẹ mhọn akan-ehọ da iJehova
Ranmhude akan-ehọ nin Adam bi Eve mhọn da iJehova, iloya, uu, bi olukhọ da dọ vuọn ọne agbọn nan
Jehova dẹ re ọkpẹnlẹn ọbhi olukhọ, uu bi iloya. Ẹghenin, ọle ki re olukhọ si eria bhi egbe re. Ọrebhe ki ha nyẹnlẹn bhi agbọn ọfubhegbe

6. Oya nin mhan le ba iJehova bhi egbe

Be ọ dia Osẹnobulua bhi egbe yẹ, sade ọle daghe mhan loya? Ọle zẹwẹ fi ehọ bhọ? Fẹ ẹmhọn nin David nin ojie bi Peter nin odibo tale. Tie Psalm 31:7 bi 1 Peter 5:7, bha ha zilo nyan ọne inọnta nan:

Be ọ dia uwẹ bhi egbe yẹ rẹ lẹn ghe oya nin mhan le ba iJehova bhi egbe?

7. Osẹnobulua dẹ re ọkpẹnlẹn ọbhi iloya rebhe

Tie Isaiah 65:17 bi Revelation 21:3, 4, bha ha zilo nyan ọne inọnta nan:

Bezẹle nọn da ti mhan bhọ rẹ lẹn ghe Jehova dẹ hẹnhẹn emhin rebhe ne riia bhi ọne agbọn nan ranmhude ugbẹloghe ọsi Esu?

Uwẹ be rẹ lẹn?

Ẹghe nin Esu rẹ bha ohoghe nin ọhẹnhẹn, ọle da re okan rẹ sin elin nọnsi Jehova. Ọle da re ẹbho ha riale ghe, ojie nọn imhẹn, ọle iJehova khin. Bhi ẹghe nọn bha yẹ ree gbe, Jehova dẹ hẹnhẹn emhin rebhe nin Esu riia. Ẹghenin, Ọle ki kpe elin nọnsọle khia. Ọle ki rẹman ghe, ugbẹloghe nọnsọle mhẹn nẹ. Ebi Jehova ha rẹ kpe elin nọnsọle khia yẹ, ọle hi ẹmhọn nọn lu uhọnmhọn-emhin nẹ bhi otọ bi okhun.—Matthew 6:9, 10.

ẸBHO ESO SABỌ YỌLE: “Iho nọnsi Osẹnobulua nọn nin mhan rẹ ha loya.”