ILUẸMHIN 28
Rẹman Ghe Emhin Nin Jehova bi Jesu Lu Nin Uwẹ Ti Uwẹ Bhọ
Be ọ dia uwẹ bhi egbe yẹ sade ọmọẹ ẹ re emhin nọn mhọn-ose rẹ lu ẹsele nin uwẹ? Edandan iribhọ ghe ọ dẹ ti uwẹ bho. Uwẹ ki ha guanọ emhin nin uwẹ ha rẹ rẹman ọmọẹ ẹ ghe, ọne ẹsele ti uwẹ bhọ. Ẹsele nin Jehova bi Jesu lu nin mhan, ọle ki sẹ kpọnọ nẹ bhi ẹsele nin mhan ha sabọ miẹn. Be ele rẹ lu ẹsele nin mhan? Be imhan ha rẹ rẹman yẹ ghe, ọne ẹsele ti mhan bhọ?
1. Be hi uwedẹ ọkpa nin mhan ha rẹ rẹman ghe ẹsele nin Jehova bi Jesu lu nin mhan ti mhan bhọ?
Baibo yọle ghe ‘ọrebhe ne mhọn urẹọbhọ da iJesu dẹ nyẹn bhi ighegheghe.’ (John 3:16) Be imhan ha rẹ rẹman yẹ ghe, mhan mhọn urẹọbhọ da iJesu? Ọkhẹke nin mhan re ọne urẹọbhọ nan man bhi uwedẹ nin mhan rẹ nyẹnlẹn bi emhanmhan nesẹmhan. (James 2:17) Ahamiẹn mhan rẹman ghe mhan mhọn urẹọbhọ da iJesu bhi ọta nin mhan ta bi emhin nin lu, ọ ki rẹkpa mhan rẹ ziẹn ikolu nin mhan deba iJesu bi Jehova nin Aba ọle mhọnlẹn.—Tie John 14:21.
2. Be hi iluemhin kpataki nọn rẹkpa mhan rẹ rẹman ghe emhin nin Jehova bi Jesu lu nin mhan ti mhan bhọ?
Bhi ọne asọn ọkuẹsẹ Jesu yu, ọle da taman edibo nesọle emhin ọbhebhe nin ele ha lu nin ele rẹ rẹman ghe, izọese nọnsọle ti ele bhọ. Ọle da si ele koko rẹ lu iluemhin nin Baibo tiọle “Ebale Emuan ọsi Ebeanlẹn Mhan.” Ọne iluemhin nan a sẹyẹ tiọle Ayere ọsi uyumhin nọnsi Jesu. (1 Corinthians 11:20) Bezẹle nin Jesu da mun ọne iluemhin nan gbọ? Ranmhude ọle guanọ nin edibo nesọle rebhe rẹ ọle ha ye uyumhin nọnsọle re. Bhiriọ, Jesu da taman ene rẹkhan ọlẹn yọle: “Bha ha lu ọnan rẹ ha ye mẹn re.” (Luke 22:19) Uwedẹ ọkpa nin uwẹ ha rẹ rẹman ghe oyẹẹ nin Jehova bi Jesu mhọn da uwẹ ti uwẹ bhọ, ọle hi nin uwẹ rẹ yo Ayere ọsi uyumhin nọnsi Jesu.
MANMAN LẸN OTỌLE NỌNSẸN
Luẹ emhin ebhebhe nin uwẹ ha lu, nin uwẹ rẹ rẹman ghe emhin nin Jehova bi Jesu lu nin uwẹ ti uwẹ bhọ. Uwẹ ha sẹyẹ luẹ ebezẹle nin Ayere ọsi uyumhin nọnsi Jesu da yi iluemhin kpataki.
3. Rẹman ghe emhin nin Jehova bi Jesu lu ti uwẹ bhọ
Ji a man yọle ghe, ọria hinmhin uwẹ bhi emhin nọn rẹ khian gbe uwẹ uhọnmhon. Uwẹ dẹ wo rẹ ẹjẹje yele a emhin nin ọne ọria lu nin uwẹ? La uwẹ dẹ guanọ uwedẹ nin uwẹ ha rẹ rẹman ọne ọria ghe, emhin nin ọle lu nin uwẹ ti uwẹ bho?
Jehova hi ọnọn hinmhin mhan. Tie 1 John 4:8-10, bha ha zilo nyan ene inọnta nan:
-
Bezẹle nin izọese nọnsi Jesu da yi ẹsele nọn manman lu uhọnmhọn-emhin?
-
Be uwẹ ghe emhin nin Jehova bi Jesu lu nin uwẹ yẹ?
Be imhan ha rẹ rẹman yẹ ghe, emhin nin Jehova bi Jesu lu nin mhan ti mhan bhọ? Tie 2 Corinthians 5:15 bi 1 John 4:11; 5:3. Bha ha tie ene iBaibo fo, re ọne inọnta nan rẹ zilo nyan ene iBaibo kẹkẹ:
-
Bhi eji mhan tiele nan, be imhan ha rẹ rẹman yẹ ghe, ẹsele nin Jehova bi Jesu lu nin mhan ti mhan bhọ?
4. Ha re egbe khọkhọ iJesu
Uwedẹ ọbhebhe nin mhan ha rẹ rẹman ghe, emhin nin Jehova bi Jesu lu nin mhan ti mhan bhọ, ọle hi nin mhan rẹ ha re egbe khọkhọ iJesu. Tie 1 Peter 2:21, bha ha zilo nyan ọne inọnta nan:
-
Be uwẹ ha rẹ rẹman yẹ ghe, uwẹ rẹkhan ukpoẹ nin Jesu zẹle?
Jesu họẹmhọn ọta nọnsi Osẹnobulua, ọle da wewe ẹmhọn Agbejele, yẹ ha rẹkpa ẹbho
5. Ha yo Ayere ọsi uyumhin nọnsi Jesu
Nin uwẹ rẹ lẹn ebe sunu bhi ẹghe nin Jesu rẹ mun Ayere ọsi uyumhin nọnsọle gbọ, tie Luke 22:14, 19, 20. Bha yẹ zilo nyan ene inọnta nan:
-
Be iJesu rẹ mun iluemhin ọsi Ayere ọsi uyumhin nọnsọle gbọ yẹ?
-
Be ọne eka bi ọne anyọn mundia nan?—Fẹ ulọnlẹn 19 bi 20 ghe.
Ukpe-ukpe, bhi ukpẹdẹ nọn de fiọbhi ukpẹdẹ nin ọle yu, ọle Jesu guanọ nin edibo nesọle rẹ ha lu Ayere ọsi uyumhin nọnsọle. Ọnan zẹle nin Esali Jehova da si egbe koko ukpe-ukpe nin ele rẹ ye uyumhin nọnsi Jesu re, beji Jesu tale. Nin uwẹ rẹ manman luẹ ẹmhọn ọne iluemhin nan, ghe ọne IVIDIO, bha ha zilo nyan ọne inọnta nan:
-
Be a lu bhi Ayere ọsi uyumhin nọnsi Jesu?
Ọne eka bi ọne anyọn mhọn ebi ele mundia nan. Ọne eka mundia nin egbe nọn gbale nin Jesu rẹ zọese nin mhan. Ọne anyọn da mundia nin aranlẹn nọnsi Jesu
ẸBHO ESO SABỌ YỌLE: “Ọria ha tale ghe ọle rẹọ bhi Jesu, ọ ki miẹn umiẹnfan.”
-
Be uwẹ ha rẹ re John 3:16 bi James 2:17 rẹ rẹman ọne ọria yẹ ghe, emhin ọbhebhe ribhọ nọn khẹke nin ọle lu nin ọle da miẹn umiẹnfan?
EBI MHAN LUẸLE
Nin mhan rẹ rẹman ghe, emhin nin Jesu lu nin mhan ti mhan bhọ, ọkhẹke nin mhan mhọn urẹọbhọ da ọle, yẹ ha yo Ayere ọsi uyumhin nọnsọle.
Uwẹ Be Yẹ Yere?
-
Be a rẹ ọle ta nan rẹ ha mhọn urẹọbhọ da iJesu?
-
Be uwẹ ha lu nin uwẹ rẹ rẹman ghe, emhin nin Jehova bi Jesu lu nin uwẹ ti uwẹ bhọ?
-
Bezẹle nọn da khẹke nin mhan ha yo Ayere ọsi uyumhin nọnsi Jesu?
FẸ ENE EMHIN NAN GHE
Be uyumhin nọnsi Jesu ha sabọ rẹ mhan lu?
Manman luẹ ebi urẹọbhọ khin bi ebi uwẹ ha rẹ sabọ rẹ ọle man yẹ.
“Mhọn Urẹọbhọ Da Ive Nesi Jehova” (The Watchtower, October 2016)
Fẹ ebi iẹnlẹn ọsi okhuo ọkpa rẹ fidenọ yẹ, ẹghe nin ọle rẹ luẹ elele nin ọle ha sabọ miẹn bhi izọese nọnsi Jesu.
“Ẹmhọanta Nọn Ribhi Baibo Fi Iẹnlẹn ọsi Eria Denọ” (The Watchtower, August 1, 2011)
Luẹ ebezẹle nan da miẹn ghe, ikpeta ẹbho ọkpa le bhi eka yẹ da bhi anyọn nan rẹ lu Ayere ọsi uyumhin nọnsi Jesu.
Emhin Ebhebhe Ne Ha Yẹ Ti Uwẹ Bhọ
INỌNTA NIN ẸBHO KẸ NỌỌN
Bebhọ Iluẹmhin IBaibo?
Min ewanniẹn rẹji inọnta rẹji iluẹmhin iBaibo nin man nẹn ẹbho luẹ ọsọhẹ.
