Ọria nọnsẹmhan ha yu, ọ manman wo ba mhan bhi egbe. Ọnan zẹle nin Baibo da tie uu oghian mhan. (1 Corinthians 15:26) Bhi iluẹmhin nọnzi 27, mhan da luẹ ghe, Jehova dẹ re ọkpẹnlẹn ọbhi uu. Sokpan, ẹbho ne yu fo kii? Be ọle ha lu nin ele? Bhi ọne uhọnmhọn-ọta nan, uwẹ dẹ luẹ ive nin Jehova vele nin ọle rẹ riọ ẹbhọ ne bunbun kpanọ bhi uu, nin ele dọ ha nyẹn bhi ighegheghe. Emhin nọn sẹ iriọ dẹ gene sabọ sunu? Ejela eria nan riọkpanọ ha da ha nyẹnlẹn? Bhi okhun, la bhi ọne otọ nan?

1. Be iJehova guanọ nin ọle lu nin eria nesẹmhan ne yu?

Jehova guanọ nin ọle riọ ẹbhọ ne yu kpanọ bhi uu. Okpea ọkpa natiọle Job, nọn nyẹnlẹn bhi ẹghe ẹdẹlẹ da rẹọbhọ ghe Osẹnobulua dẹ riọ ọle kpanọ bhi uu sade ọle yu. Ọle da taman Osẹnobulua yọle: ‘Uwẹ dẹ sotie mẹn, imẹn ki na bhi ẹkẹ idin wanniẹn uwẹ.’​—Tie Job 14:13-15.

2. Be imhan rẹ lẹn yẹ ghe, Osẹnobulua dẹ sabọ riọ ene yu kpanọ bhi uu?

Ẹghe nin Jesu rẹ ha ribhi ọne otọ nan, Osẹnobulua da re ahu nanlẹn rẹ riọ ẹbhọ ne yu kpanọ bhi uu. Jesu da riọ ọmanmhẹn ọkpa nọn yi ikpe igbeva kpanọ bhi uu. Ọle da yẹ riọ ọmọn ọsi okhuọ nọn iyẹ mhọn ọdọ kpanọ bhi uu. (Mark 5:41, 42; Luke 7:12-15) Akizẹbue, ọmọẹ iJesu natiọle Lazarus da yu. Jesu da riọ ọle kpanọ, arẹmiẹn ọ ki sẹbhi ikpẹdẹ enẹn nin Lazarus yu. Be ọle rẹ lu ọle yẹ? Jesu ki nan erọnmhọn ji Osẹnobulua fo, ọle da reso yọle: “Lazarus, dagbare!” Ẹghenin, “ọne okpea nọn rẹ yu da dagbare.” (John 11:43, 44) Edandan iribhọ ghe, ọnan dẹ wo re ibhio Lazarus bi imọẹ ọle ha ghọnghọn.

3. Iruduba nela uwẹ ha sabọ ha mhọnlẹn rẹji eria nesẹ ne yu?

Baibo yọle ghe “ariọkpanọ bhi uu dẹ ha ribhọ.” (Acts 24:15) Ẹbho ne yu nin Jesu riọkpanọ bhi uu bha ha ribhi okhun. (John 3:13) Ẹghe nin Jesu rẹ riọ ele kpanọ, nin ele kie do ha nyẹnlẹn bhi ọne otọ nan, ele da wo ha ghọnghọn. Bhi ẹghe nọn bha yẹ ree gbe, Jesu dẹ riọ ẹbho ne bunbun kpanọ nin ele dọ ha nyẹnlẹn bhi ighegheghe bhi ọne otọ nan. Jesu da yọle ghe ‘ọrebhe ne ribhi ayere nọnsi Osẹnobulua dẹ họn ukpuru nọnsọle, yẹ dagbare.’​—John 5:28, 29.

 MANMAN LẸN OTỌLE NỌNSẸN

4. Jesu rẹman ghe ọle dẹ sabọ riọ ene yu kpanọ

Luẹ ebi Jesu rẹ riọ Lazarus nin ọmọẹ ọle kpanọ yẹ. Tie John 11:14, 38-44, bha ha zilo nyan ene inọnta nan:

• Be imhan rẹ lẹn yẹ ghe Lazarus gene yu?​—Fẹ ulọnlẹn 39 ghe.

• Sade okhun Lazarus ha khian ẹghe nin ọle rẹ yu fo, uwẹ be riale Jesu dẹ riọ ọle kpanọ nin ọle kie dọ ha nyẹnlẹn bhi ọne otọ nan?

Ghe ọne IVIDIO.

5. Jesu dẹ riọ ẹbho ne bunbun kpanọ bhi uu!

Tie Psalm 37:29, Bha ha zilo nyan ọne inọnta nan:

• Ijela eria ne bunbun nan ha riọ kpanọ ha da nyẹnlẹn?

Ọ iyi ẹbho ne ga iJehova ọkpa Jesu ha riọ kpanọ bhi uu. Tie Acts 24:15, bha ha zilo nyan ọne inọnta nan:

• Ẹghe nan ha rẹ riọ ene yu kpanọ, họla uwẹ guanọ nin uwẹ miẹn?

• Be ive ọsi ariọkpanọ bhi uu rẹ re ikoudure nin ene biẹ iPhelicity yẹ?

 EBI MHAN LUẸLE

Baibo taman mhan ghe, ẹbho ne bunbun ne yu dẹ kie dọ ha nyẹnlẹn. Jehova guanọ nin ele kie dọ ha nyẹnlẹn, bhiriọ, ọle dẹ re ahu nin Jesu nọn rẹ riọ ele kpanọ.

Uwẹ Be Yẹ Yere?

• Be ọ dia iJehova bi Jesu yẹ bhi egbe nin ele rẹ riọ eria ne yu kpanọ?

• Ejela eria ne bunbun nan ha riọkpanọ ha da ha nyẹnlẹn​—okhun la bhi ọne otọ nan? Bezẹle nin uwẹ da ta iriọ?

• Be rẹ uwẹ rẹọbhọ ghe, eria nẹsẹ ne yu dẹ riọ kpanọ?