ILUẸMHIN 31
Be Bhọ Hi Agbejele Nọnsi Osẹnobulua?
Agbejele nọnsi Osẹnobulua, ọle hi uhọnmhọn-ọta nan tẹmhọnlẹn nẹ bhi ẹkẹ iBaibo. Ọne Agbejele, ọle iJehova ha noo rẹ re ọne otọ nan kiẹn otọ ọfubhegbe. Be ọne Agbejele khin? Be imhan rẹ lẹn yẹ ghe ọne Agbejele munhẹn ha gbẹloghe? Be ọne Agbejele sẹ lu? Be ọ da yẹ lu bhi ẹghe odalo? Bhi ọne iluẹmhin nan bi iluẹmhin eva ne rẹkhan ọlẹn, a dẹ re ewanniẹn ọbhi ene inọnta nan.
1. Be bhọ hi Agbejele nọnsi Osẹnobulua? Họla Ojie ọsi ọne Agbejele?
Ugbẹloghe nin Jehova tobọle mun gbọ, ọle Agbejele nọnsi Osẹnobulua khin. Jesu hi ojie ọsi ọne Agbejele. Ẹgua-okhun ojukhuo nọnsọle ye. (Matthew 4:17; John 18:36) Baibo taman mhan ghe, Jesu dẹ ‘ha yi ojie rẹ sẹbhi ighegheghe.’ (Luke 1:32, 33) Ọle dẹ gbẹloghe ọrebhe bhi ọne otọ nan.
2. He bhọ ha deba iJesu ha gbẹloghe?
Ọ iyi Jesu ọkpa ha gbẹloghe bhi ọne Agbejele. Baibo yọle ghe ẹbho ne na bhi ‘ulin uwa rebhe, urolo rebhe, ẹbho rebhe, bi agbaẹbho rebhe vae dẹ gbẹloghe ọne otọ nan bọsi ijie.’ (Revelation 5:9, 10) Eka ẹbho ha deba iJesu ha gbẹloghe? Rẹ na bhi ẹghe nin Jesu rẹ vae bhi ọne otọ nan, ẹbho ne bunbun, ele sẹ deba otu iKristiẹn ọsaje. Ọkpakinọn, itue 144,000 bhi ẹwẹ ele, ele ọkpa ha deba iJesu gbẹloghe bhi okhun. (Tie Revelation 14:1-4.) Kristiẹn nekẹle rebhe dẹ nyẹnlẹn bhi ọne otọ nan bhi odotọ ọne ugbẹloghe.—Psalm 37:29.
3. Bezẹle nin Agbejele nọnsi Osẹnobulua da mhẹn gbera ugbẹloghe ọsi eria?
Aharẹmiẹn ghe eria ne gbẹloghe mhọn ọlẹn bhi ọkhọle nin ele rẹ lu emhin esili nin ẹbho, ele imhọn ọne ahu nin ele rẹ lu emhin rebhe nin ele guanọ. Sẹyẹ, ele ha sibhi ihe re, asabọmiẹn ọria nọn ha nabhi ihe nọnsele ida ha mhọn ọkhọle nin ele ha mhọnlẹn. Agbejele nọnsi Osẹnobulua bha dia iriọ. Jesu dẹ ha yi ojie rẹ sẹbhi ighegheghe. Baibo taman mhan ghe “ejele nan ida sabọ fuẹn an ghee,” ọle Osẹnobulua mun gbọ. (Daniel 2:44) Jesu dẹ gbẹloghe ọne otọ nan rebhe. Ọle dẹ ha re obọ ọkpa mun ẹbho rebhe. Ọle mhọn ifuẹkẹ bi ahoẹmhọn-egbe. Ọle ibhohiẹn eku. Ọle dẹ man ẹbho rebhe ebi ele ha rẹ ha re ene ikpẹ esili nan man yẹ.—Tie Isaiah 11:9.
MANMAN LẸN OTỌLE NỌNSẸN
Luẹ ebezẹle nin Agbejele nọnsi Osẹnobulua da mhẹn gbera ugbẹloghe ọsi eria.
4. Agbejele nọnsi Osẹnobulua dẹ gbẹloghe ọne otọ nan rebhe
Jesu Kristi mhọn ahu gbera ijie rebhe bhi ọne otọ nan. Tie Matthew 28:18, bha ha zilo nyan ọne inọnta nan:
-
Uwedẹ nela iJesu rẹ mhọn ahu gbera ojie nọn ki rẹ khin bhi ọne otọ nan?
Ẹghe-ẹghe, ọle ugbẹloghe ọsi eria rẹ fidenọ. Sẹyẹ, ijie kẹkẹ, ele gbẹloghe agbaẹbho kẹkẹ. Agbejele nọnsi Osẹnobulua kii? Tie Daniel 7:14, bha ha zilo nyan ene inọnta nan:
-
Bezẹle nọn da yi emhin esili ghe, a ida sabọ fuẹn Agbejele nọnsi Osẹnobulua a?
-
Bezẹle nọn da yi emhin esili ghe, ọne Agbejele dẹ gbẹloghe ọne otọ nan rebhe?
5. Ọkhẹke nan re ugbẹloghe ọsi eria kie bhi ọne agbọn nan
Bezẹle nọn da khẹke nin Agbejele nọnsi Osẹnobulua re ugbẹloghe ọsi eria kie? Ghe ọne IVIDIO, bha ha zilo nyan inọnta nọn rẹkhan ọlẹn.
-
Be ugbẹloghe ọsi eria sẹ sire?
Tie Ecclesiastes 8:9, bha ha zilo nyan ene inọnta nan:
-
Uwẹ be riale emhin esili nọn, nin Agbejele nọnsi Osẹnobulua rẹ dọ re ugbẹloghe ọsi eria kie? Bezẹle?
6. Ene ha gbẹloghe bhi Agbejele nọnsi Osẹnobulua lẹn ebi emhin dia mhan yẹ bhi egbe
Jesu nin ojie ọsi Agbejele nọnsi Osẹnobulua “lẹn ebi emhin dia mhan bhi egbe yẹ,” ranmhude ọle ka nyẹnlẹn bhi ọne otọ nan. (Hebrews 4:15) Ene itue 144,000 ne ha deba ọle gbẹloghe yẹ lẹn ebi emhin dia mhan yẹ, ranmhude, bhi ẹwẹ ‘ulin uwa rebhe, urolo rebhe, bi agbaẹbho rebhe,’ ọle iJehova da hannọn ele.—Revelation 5:9.
-
Ọ be ti uwẹ bhọ rẹ lẹn ghe, Jesu bi ene ha deba ọle gbẹloghe lẹn ebi emhin dia mhan yẹ bhi egbe? Bezẹle nọn da ti uwẹ bhọ?
Ẹbho ne na bhi eje kẹkẹ vae, ele iJehova zẹle ne deba iJesu gbẹloghe
7. Uhi nesi Osẹnobulua mhẹn gbera uhi ọsi eria
Ene gbẹloghe mhọn uhi kẹkẹ nin ele gbe nin ẹbho ne ribhi odotọ ugbẹloghe nọnsele. Ele rẹọbhọ ghe ene uhi nan dẹ sabọ rẹkpa ẹbho. Uhi kẹkẹ yẹ ribhọ nin Osẹnobulua guanọ nin ẹbho ne ribhi odotọ ugbẹloghe nọnsọle re obọ rẹkhan. Tie 1 Corinthians 6:9-11, bha ha zilo nyan ene inọnta nan:
-
Be uwẹ riale emhin dẹ diayẹ bhi ọne agbọn nan, sade ẹbho rebhe re obọ rẹkhan uhi nesi Osẹnobulua? a
-
Uwẹ be riale ghe, emhin nọn khẹke nọn, nin Jehova rẹ yọle nin mhan ha re obọ rẹkhan uhi nesọle? Bezẹle nin uwẹ da ta irio?
-
Be rẹman mhan ghe ẹbho ne lu emhin ebe dẹ sabọ fidenọ?—Fẹ ulọnlẹn nọnzi 11 ghe.
Ene gbẹloghe gbe uhi kẹkẹ nin ele rẹ gbega ẹbho nesele yẹ rẹkpa ele. Uhi nin Jehova gbe nin ẹbho ne ribhi odotọ ugbẹloghe nọnsọle mhẹn gbera uhi ọsi eria. Ene uhi nan dẹ sabọ gbega mhan yẹ rẹkpa mhan
ỌRIA SABỌ NỌỌN UWẸ YỌLE: “Be bhọ hi Agbejele nọnsi Osẹnobulua?”
-
Be uwẹ ha rẹ wanniẹn ọlẹn yẹ?
EBI MHAN LUẸLE
Ugbẹloghe nọn ha na bhi okhun ha gbẹloghe ọne otọ nan rebhe, ọle hi Agbejele nọnsi Osẹnobulua.
Uwẹ Be Yẹ Yere?
-
Hela ha gbẹloghe bhi Agbejele nọnsi Osẹnobulua?
-
Be Agbejele nọnsi Osẹnobulua rẹ mhẹn gbera ugbẹloghe ọsi eria yẹ?
-
Be hi emhin eso nin Jehova guanọ bhi obọ eria ne ha nyẹnlẹn bhi odotọ Agbejele nọnsọle?
FẸ ENE EMHIN NAN GHE
Fẹghe ebi Jesu tale nọn rẹ mhan lẹn eji ọne Agbejele da ha ye.
“Ẹkẹ Ọkhọle Agbejele Nọnsi Osẹnobulua Be Ye?” (Ebe nọn ribhi jw.org)
Bezẹle nan da miẹn ghe, Agbejele nọnsi Osẹnobulua, ọle Esali Jehova re obọ ba, ọ iyi ugbẹloghe ọsi eria?
Luẹ ebi Baibo tale rẹji ene itue 144,000 nin Jehova zẹle ne deba iJesu gbẹloghe.
Be re okhuo ọkpa nọn ha ribhi ighan reọbhọ ghe Osẹnobulua ọkpa ha sabọ mun ibhohiẹn nọn gbale re bhi ọne agbọn nan?
“Mẹn Da Dọ Luẹ Kere Ghe Osẹnobulua Ọkpa Ha Sabọ Re Ọkpẹnlẹn Ọbhi Ohiẹn-eku” (Awake!, November 2011)
a A dẹ zilo nyan eso bhi ene uhi nan bhi Obọ Nọnzi 3 bhi ọne ebe nan.
Emhin Ebhebhe Ne Ha Yẹ Ti Uwẹ Bhọ
INỌNTA NIN ẸBHO KẸ NỌỌN
Bebhọ Iluẹmhin IBaibo?
Min ewanniẹn rẹji inọnta rẹji iluẹmhin iBaibo nin man nẹn ẹbho luẹ ọsọhẹ.
