ILUẸMHIN 32
Agbejele Nọnsi Osẹnobulua Munhẹn Ha Gbẹloghe!
Ukpe 1914, ọle Agbejele nọnsi Osẹnobulua munhẹn ha gbẹloghe bhi okhun. Ọne ukpe nin, ọle ẹghe ọkike ọsi ọne agbọn nan yẹ rẹ munhẹn. Be imhan rẹ lẹn yẹ? Ji mhan fẹ ọta akhasẹ nin Baibo tale rẹji ọne ukpe nin ghe. Mhan ki yẹ fẹ ebi emhin ki diayẹ bhi agbọn, bi uwedẹ nin ẹbho rẹ ha lu emhin, rẹ na bhi ukpe 1914 ha vade.
1. Be ọta akhasẹ nọn ribhi Baibo rẹkpa mhan rẹ lẹn?
Ọta akhasẹ nọn ribhi ebe nọnsi Daniel da rẹkpa mhan rẹ lẹn ghe, Agbejele nọnsi Osẹnobulua dẹ munhẹn ha gbẹloghe sade “ẹghe ihinlọn” sotọ. (Daniel 4:16, 17) Ẹghe nin Jesu rẹ ha ribhi ọne otọ nan, ọle da tẹmhọn ọne “ẹghe ihinlọn.” Ọle da tiọle “ẹghe nan rẹyi nin ene agbaẹbho.” Ẹmhọn nin ọle tale da rẹman ghe ọne ẹghe bha sẹ gba. (Luke 21:24) Beji mhan ha luẹ kere bhi odalo, ukpe 1914, ọle ọne ẹghe ihinlọn rẹ gba.
2. Be emhin ne sunu bhi ọne agbọn nan, bi uwedẹ nin ẹbho rẹ lu emhin rẹ fidenọ yẹ rẹ na bhi ukpe 1914 ha vade?
Ẹghe nin Jesu rẹ ha ribhi ọne otọ nan, edibo nesọle da nọọn ọlẹn yọle: “Be bhọ iyaman nọn da rẹman ghe uwẹ vae, bi iyaman nan da rẹ lẹn ghe ọkike ọsi ọne agbọn nan a ki ye?” (Matthew 24:3) Jesu da ki taman ele emhin kẹkẹ ne da ha sunu, ne ha rẹman ghe ọle munhẹn ha gbẹloghe bhi Agbejele nọnsi Osẹnobulua. Eso bhi ene emhin nan hi, okhọn, ukhunmhun, bi otọ umunvẹa. (Tie Matthew 24:7.) Baibo da yẹ taman mhan ghe, uwedẹ nin ẹbho ha rẹ ha lu emhin bhi “ẹghe ọkike” dẹ si “ọkakale nọn bha lẹkhẹ nan rẹ khọn.” (2 Timothy 3:1-5) Rẹ na bhi ukpe 1914 ha vade, ọle emhin ne imhẹn ne sunu bhi agbọn bi uwedẹ nin ẹbho rẹ lu emhin rẹ wo kie ha khọ bhọ.
3. Bezẹle nin ọne agbọn nan da wo kie ha khọ bhọ rẹ na bhi ẹghe nin Agbejele nọnsi Osẹnobulua rẹ munhẹn ha gbẹloghe bhi okhun?
Ọ bha sẹ bue gbe nin Jesu kiẹn Ojie ọsi Agbejele nọnsi Osẹnobulua, ọle da ne Esu bi ẹlinmhin ebe nesọle khọnlẹn. Ọle da khọn ele miotọ bhi okhun. Baibo taman mhan ghe, Jesu da ‘sua Esu vae bhi otọ yẹ sua ene ẹhi nesọle fia rẹkhan ọlẹn.’ (Revelation 12:9, 10, 12) Ẹkẹ wo manman ha khọ Esu, ranmhude, ọle lẹnmhin ghe Osẹnobulua dẹ kẹ gbe ọle khuelo. Bhiriọ, ọle wo ha si ọbalọ bi iloya ji ẹbho bhi ọne otọ nan. Ọnan zẹle nin emhin da wo ha khọ bhọ bhi ọne agbọn nan. Ọrẹyiriọ, Agbejele nọnsi Osẹnobulua dẹ kẹ hẹnhẹn emhin nin Esu riia.
MANMAN LẸN OTỌLE NỌNSẸN
Luẹ emhin ne rẹ mhan lẹn ghe ukpe 1914, ọle Osẹnobulua mun Agbejele nọnsọle gbọ. Ye luẹ ebi ọkhẹke nin ọne ilẹnmhin nan rẹ rẹso mhan yẹ.
4. Ọta akhasẹ nọn ribhi Baibo rẹkpa mhan rẹ lẹn ghe ukpe 1914, ọle Osẹnobulua mun Agbejele nọnsọle gbọ
Ikpe ne bunbun ne gbera, Nebuchadnezzar nin Ojie ọsi Babylon bhi ẹghe ẹdẹlẹ da bhohiẹ. Bhi ọne ebhohiẹ, Osẹnobulua da rẹman ọlẹn emhin ne ha sunu bhi ẹghe odalo. Ọne ebhohiẹ bi ebi ọne ebhohiẹ mundia nan ribhi ebe nọnsi Daniel bhi ẹkẹ Baibo. Ọne ebhohiẹ da rẹman emhin nọn ha sunu ji ugbẹloghe ọsi Nebuchadnezzar. Ọkpakinọn, ọ da yẹ rẹman ebi Agbejele nọnsi Osẹnobulua ha rẹ munhẹn yẹ.—Tie Daniel 4:17. a
Tie Daniel 4:20-26, bha ha re ẹmhọn ne ribhi ẹkpẹti rẹ wanniẹn ene inọnta nan:
-
(A) Be iNebuchadnezzar miẹn bhi ebhohiẹ nin ọle bhohiẹ?—Fẹ ulọnlẹn 20 bi 21 ghe.
-
(B) Be ha sunu ji ọne okporan?—Fẹ ulọnlẹn 23 ghe.
-
(C) Be ha sunu sade “ẹghe ihinlọn” ki gba?—Fẹ ulọnlẹn 26 ghe.
Ebi ọne Ebhohiẹ Rẹ Rẹtẹ Agbejele Nọnsi Osẹnobulua Yẹ
ỌNE ỌTA AKHASẸ (Daniel 4:20-36)
Ugbẹloghe
(A) Okporan nọn khua
Ugbẹloghe sotọ
(B) “Hian ọne oran fia,” yẹ ji “ẹghe ihinlọn gbera”
A kie mun ugbẹloghe gbọ
(C) “Ejele nọnsẹ dẹ kie ha yi ọsi uwẹ”
Bhi ẹghe ọhẹnhẹn nin ọne ọta akhasẹ rẹ munsẹ, . . .
-
(D) Họla ọne okporan mundia nan?—Fẹ ulọnlẹn 22 ghe.
-
(E) Be ugbẹloghe nọnsọle rẹ sotọ yẹ?—Tie Daniel 4:29-33.
-
(F) Be sunu ji Nebuchadnezzar beji ọne “ẹghe ihinlọn” ki sotọ?—Tie Daniel 4:34-36.
ẸGHE NIN ỌNE ỌTA AKHASẸ KA RẸ MUNSẸ
Ugbẹloghe
(D) Nebuchadnezzar nin ojie ọsi Babylon
Ugbẹloghe sotọ
(E) Ukpe 606 B.C.E. ki gbera, Nebuchadnezzar da ha mhẹnmhẹn. Bhi ikpe ihinlọn, ọle bha yẹ sabọ gbẹloghe
A kie mun ugbẹloghe gbọ
(F) Egbe da daan Nebuchadnezzar. Ọle da kie munhẹn ha gbẹloghe
Bhi ẹghe nin ọne ọta akhasẹ rẹ kie munsẹ, . . .
-
(G) He bhọ ọne okporan mundia nan?—Tie 1 Chronicles 29:23.
-
(H) Be ugbẹloghe nọnsele rẹ sotọ yẹ? Be imhan rẹ lẹn yẹ ghe ele bha yẹ ha gbẹloghe bhi ẹghe nin Jesu rẹ ha ribhi ọne otọ nan?—Tie Luke 21:24.
-
(I) Ẹghela a rẹ kie mun ọne ugbẹloghe nan gbọ? Ejela a da mun ọlẹn gbọ?
ẸGHE NIN ỌNE ỌTA AKHASẸ RẸ KIE MUNSẸ
Ugbẹloghe
(G) Ijie bhi otọ Izrẹl. Ugbẹloghe nọnsele da mundia nin ugbẹloghe nọnsi Osẹnobulua
Ugbẹloghe sotọ
(H) Ẹghe nan rẹ dunmhun iJerusalem an, ugbẹloghe ọsi ijie bhi otọ Izrẹl da sotọ. Bhi ikpe 2,520, ele bha yẹ ha mhọn ojie
A kie mun ugbẹloghe gbọ
(I) Jesu munhẹn ha gbẹloghe Agbejele nọnsi Osẹnobulua bhi okhun
Be ọne ẹghe ihinlọn tan sẹ yẹ?
Obọ eso bhi Baibo, ele rẹkpa mhan rẹ lẹn ebi a tẹmhọnlẹn bhi obọ nekẹle. Bhi ọsi ijiẹmhin, ebe nọnsi Revelation rẹkpa mhan rẹ lẹn ghe, ikpẹdẹ 1,260, ọle hi ẹghe ea bi ukhiọnmhẹn. (Revelation 12:6, 14) Beji a miẹn ghe ẹghe ea bi ukhiọnmhẹn bhi ijanlẹn eva, ọle hi ẹghe ihinlọn, ẹghe ihinlọn da ki ha yi ikpẹdẹ 2,520. Bhi ọta akhasẹ eso bhi ẹkẹ iBaibo, ukpẹdẹ ọkpa mundia nin ukpe ọkpa. (Ezekiel 4:6) Bhiriọ, ene ẹghe ihinlọn nan tẹmhọnlẹn bhi ebe ọsi Daniel mundia nin ikpe 2,520.
5. Emhin wo fidenọ bhi ọne agbọn nan rẹ na bhi ukpe 1914 ha vade
Jesu ka tale ọbhi otọ ebi emhin ha diayẹ bhi ọne agbọn nan sade ọle munhẹn ha gbẹloghe. Tie Luke 21:9-11, bha ha zilo nyan ọne inọnta nan:
-
Bhi ẹwẹ ene emhin nan sounun ọlẹn bhi enan, enela uwẹ sẹ hẹnmhọnlẹn la re ẹlo uwẹ daghe?
Paul nin odibo da yẹ tẹmhọn ebi ẹbho da rẹ ha lu emhin yẹ bhi ẹghe ọkike ọsi ọne agbọn nan. Tie 2 Timothy 3:1-5, bha ha zilo nyan ọne inọnta nan:
-
Enela bhi ene ikpẹ nan uwẹ sẹ daghe bhi egbe ọsi ẹbho ẹlẹnan?
6. Be imhan ha re ọhubhudu ha lu, beji a miẹn ghe Agbejele nọnsi Osẹnobulua munhẹn ha gbẹloghe bhi okhun?
Tie Matthew 24:3, 14, bha ha zilo nyan ene inọnta nan:
-
Be hi iwẹnna kpataki nọn rẹman ghe Agbejele nọnsi Osẹnobulua gbẹloghe nian?
-
Be uwẹ ha lu nin uwẹ da sabọ deba bhi ọne iwẹnna nan?
Agbejele nọnsi Osẹnobulua munhẹn ha gbẹloghe bhi okhun. Ọne ugbẹloghe dẹ kẹ sẹ ọne otọ nan. Ọne ẹghe bha yẹ ree hiehie. Tie Hebrews 10:24, 25, bha ha zilo nyan ọne inọnta nan:
-
Be ọkhẹke nin ọdeọde bhi ẹwẹ mhan ha lu beji mhan “rẹ ha daghe ọle ghe, ọne ukpẹdẹ sire”?
Be uwẹ ha lu yẹ sade uwẹ luẹ emhin esili nọn ha rẹkpa eria ebhebhe yẹ miẹn ele fan?
ỌRIA SABỌ NỌỌN UWẸ YỌLE: “Bezẹle nin Esali Jehova da manman tẹmhọn ukpe 1914?”
-
Be uwẹ ha rẹ wanniẹn ọlẹn yẹ?
EBI MHAN LUẸLE
Ọta akhasẹ ne ribhi Baibo bi emhin ne sunu bhi agbọn rẹkpa mhan rẹ lẹn ghe, Agbejele nọnsi Osẹnobulua munhẹn ha gbẹloghe bhi okhun. Nin mhan rẹ rẹman ghe mhan rẹọ bhi ọnan, ọkhẹke nin mhan ha tẹmhọn ọne Agbejele yẹ ha yo ikolo oga ẹghe rebhe.
Uwẹ Be Yẹ Yere?
-
Be bhọ sunu bhi ẹghe nin “ẹghe ihinlọn” nan tẹmhọnlẹn bhi ebe nọnsi Daniel rẹ gba?
-
Be re uwẹ rẹọbhọ ghe, Agbejele nọnsi Osẹnobulua munhẹn ha gbẹloghe bhi ukpe 1914?
-
Be uwẹ ha rẹ rẹman yẹ ghe, uwẹ rẹọbhọ ọne Agbejele gbẹloghe nian?
FẸ ENE EMHIN NAN GHE
Fẹghe ebi ẹbho ne gbẹn okha tale rẹji ebi emhin rẹ fidenọ yẹ bhi ọne agbọn nan, rẹ na bhi ukpe 1914 ha vade.
“Ẹghe Nin Uwedẹ Nin Ẹbho Rẹ Lu Emhin Rẹ Munhẹn Ha Khọ Bhọ” (Awake!, April 2007)
Tie okha ọsi ọne okpea nan nin uwẹ daghe ebi ọta akhasẹ nọn ribhi Matthew 24:14 rẹ rẹso iẹnlẹn nọnsọle yẹ.
“A Bha Miẹn Emhin Nin Mẹn Hoẹmhọnlẹn Gbera Igemu Natiọle Bezbọ!” (The Watchtower No. 3 2017)
Be imhan rẹ lẹn yẹ ghe ọta akhasẹ nọn ribhi uhọnmhọnlẹn nọnzi 4 bhi ebe nọnsi Daniel rẹtẹ Agbejele nọnsi Osẹnobulua?
“Ẹghela Agbejele Nọnsi Osẹnobulua Rẹ Munhẹn Ha Gbẹloghe? (Obọ 1)” (The Watchtower, October 1, 2014)
Be imhan rẹ lẹn yẹ ghe, ukpe 1914, ọle “ẹghe ihinlọn” nan tẹmhọnlẹn bhi uhọnmhọnlẹn nọnzi 4 bhi ebe nọnsi Daniel rẹ gba?
“Ẹghela Agbejele Nọnsi Osẹnobulua Rẹ Munhẹn Ha Gbẹloghe? (Obọ 2)” (The Watchtower, November 1, 2014)
a Tie uhọnmhọn-ọta eva ne kike bhi obọ natiọle “Fẹ Ene Emhin Nan Ghe.”
Emhin Ebhebhe Ne Ha Yẹ Ti Uwẹ Bhọ
INỌNTA NIN ẸBHO KẸ NỌỌN
Bebhọ Iluẹmhin IBaibo?
Min ewanniẹn rẹji inọnta rẹji iluẹmhin iBaibo nin man nẹn ẹbho luẹ ọsọhẹ.
