Agbejele nọnsi Osẹnobulua munhẹn ha gbẹloghe fo. Bhi ẹghe nọn bha yẹ ree gbe, ọ dẹ fi emhin denọ bhi ọne otọ nan. Ji mhan zilo nyan emhin esili eso nin mhan ha miẹn bhi odotọ ọne ugbẹloghe.

1. Be Agbejele nọnsi Osẹnobulua ha rẹ mun ọfure bi ibhohiẹn nọn gbale re yẹ bhi ọne otọ nan?

Bhi okhọn ọsi Armageddon, Jesu nin ojie ọsi Agbejele nọnsi Osẹnobulua dẹ fuẹn eria ne imhẹn an, yẹ re ọkpẹnlẹn ọbhi ugbẹloghe ọsi eria. (Revelation 16:14, 16) Ẹghenin, ọne ive nan nọn ribhi Baibo dẹ munsẹ, nọn yọle: “Bhi ẹghe nọn bha yẹ ree gbe, ọluemhin-ebe ida yẹ ha ribhọ.” (Psalm 37:10) Jesu dẹ re ugbẹloghe nọnsọle rẹ mun ọfure bi ibhohiẹn nọn gbale re bhi ọne otọ nan rebhe.​—Tie Isaiah 11:4.

2. Be bhọ iẹnlẹn ha diayẹ bhi ẹghe nin iho nọnsi Osẹnobulua ha rẹ munsẹ bhi ọne otọ nan?

Bhi odotọ Agbejele nọnsi Osẹnobulua, “ene khiale dẹ nyẹnlẹn bhi ọne otọ nan, ele dẹ nyẹnlẹn bhọ bhi ighegheghe.” (Psalm 37:29) Riale ebi ọne agbọn nan ha diayẹ sade eria ne khiale ọkpa ki nyẹnlẹn bhọ​—eria ne hoẹmhọn iJehova yẹ hoẹmhọn ibo ele. Bhi ẹghenin, ọria soso iyẹ da ha khọnmhọn. Ọrebhe ki ha nyẹnlẹn khian bhi ighegheghe.

3. Be bhọ Agbejele nọnsi Osẹnobulua ha lu sade iJesu fuẹn eria ne imhẹn an fo?

Jesu ha fuẹn eria ne imhẹn an fo, ọle ki sẹyẹ ha gbẹloghe rẹ na bhi ikpe 1,000. Bhi ẹkẹ ene ikpe 1,000, ọle bi itue 144,000 ne ha deba ọle gbẹloghe ki rẹkpa eria ne ribhi ọne otọ nan rẹ kiẹn eria ne gbale. Ẹghe nin ọne ikpe uli ha ki rẹ sotọ, ọne otọ nan ki ha yi otọ ọfubhegbe nọn manman mhọn-ose. Ọrebhe ne nyẹnlẹn bhọ ki ha ghọnghọn, ranmhude ele miẹn elele nọn nabhọre sade ọria re obọ rẹkhan uhi nesi Jehova. Ọne ẹghe nan Jesu ha rẹ mun ọne Agbejele fikie nin Aba ọle nin Jehova. ‘Elin nọnsi Jehova ki dọ kpe khia.’ (Matthew 6:9, 10) Ọ ki wo khia bhi ẹlo ọsi ọrebhe ghe, Jehova hi Ojie nọn mhẹn ne, nọn khẹke nọn ha gbẹloghe mhan. Ẹghenin, Jehova ki fuẹn Esu bi ene ẹlinmhin ne imhẹn an. Ọle ki yẹ fuẹn eria ne bha re obọ rẹkhan uhi nesọle a. (Revelation 20:7-10) Emhin esili nin mhan ha miẹn bhi Agbejele nọnsi Osẹnobulua dẹ tọ rẹ sẹbhi ighegheghe.

 MANMAN LẸN OTỌLE NỌNSẸN

4. Agbejele nọnsi Osẹnobulua dẹ re ọkpẹnlẹn ọbhi ugbẹloghe ọsi eria

“Eria denyẹnyẹn ibo ele yẹ si ikuan-egbe ji ele.” (Ecclesiastes 8:9) Jehova dẹ noo Agbejele nọnsọle rẹ re ọkpẹnlẹn ọbhi ibhohiẹn eku nọn ribhi ọne agbọn nan.

Tie Daniel 2:44 bi 2 Thessalonians 1:6-8, bha ha zilo nyan ene inọnta nan:

• Be bhọ iJehova bi Jesu nin Ọmọn nọnsọle ha khian ugbẹloghe ọsi ọne agbọn nan bi ene re obọ ba ọle yẹ?

• Be emhin nin uwẹ sẹ luẹ rẹji Jehova bi Jesu rẹ rẹkpa uwẹ rẹ lẹn yẹ ghe, ele dẹ bhohiẹn nọn gbale?

5. Jesu hi Ojie nọn mhẹn ne

Ẹghe nin Jesu ha rẹ ha gbẹloghe ọne otọ nan, ọle dẹ lu emhin esili ne bunbun nin ebhọ ne ribhi odotọ ugbẹloghe nọnsọle. Ghe ọne IVIDIO nin uwẹ daghe ebi Jesu rẹ rẹman yẹ ghe, ọle guanọ nin ọle rẹkpa ẹbho, bi ebi ọle rẹ rẹman yẹ ghe, ọle mhọn ọne ahu nin ọle ha rẹ lu ọle.

Ẹghe nin Jesu rẹ ha ribhi ọne otọ nan, ọle da lu emhin esili ne bunbun nin ẹbho. Emhin nin ọle lu da ha yi ukpọkhere bhi emhin esili nin ọle ha lu nin eria bhi Agbejele nọnsi Osẹnobulua. Ọnela yẹẹ uwẹ nẹ, bhi ẹwẹ emhin esili nan gbẹn rẹkhan ọne uduọle nan? Tie Baibo nan gbẹn rẹkhan ele, nin uwẹ rẹ manman luẹ ẹmhọn ene emhin esili.

6. Agbejele nọnsi Osẹnobulua dẹ re ọne otọ nan kiẹn otọ ọfubhegbe

 EBI MHAN LUẸLE

Agbejele nọnsi Osẹnobulua dẹ mun iho nọnsi Osẹnobulua sẹ. Ọ dẹ re ọne otọ nan kiẹn otọ ọfubhegbe. Eria ne mhẹn ọkpa da ha nyẹnlẹn bhọ. Ele ki ha ga iJehova rẹ sẹbhi ighegheghe.

Uwẹ Be Yẹ Yere?

• Be Agbejele nọnsi Osẹnobulua ha rẹ kpe elin nọnsi Jehova khia yẹ?

• Be rẹ mhan rẹọbhọ ghe, ive rebhe ne ribhi ẹkẹ Baibo dẹ munsẹ bhi Agbejele nọnsi Osẹnobulua?

• Ọnela uwẹ manman khuaẹloghe, bhi ẹwẹ emhin esili rebhe nin ọne Agbejele ha lu?