ILUẸMHIN 34

Be Imhan Ha Rẹ Rẹman Yẹ Ghe Mhan Hoẹmhọn IJehova?

Khue

Rẹ na bhi ẹghe nin uwẹ rẹ munhẹn ha luẹ iBaibo rẹ dọ sẹbhi ọne ẹghe nan, uwẹ ki be sikẹ iJehova gbera ọnikhẹ? Ọ dẹ be yẹẹ uwẹ rẹ sẹyẹ ha ziẹn ikolu nin uwẹ bi ọle ko mhọnlẹn? Lẹn sẹbhọ ghe, beji Jehova ha rẹ ha daghe ọle ghe oyẹẹ nin uwẹ mhọn da ọle tuẹn okhun, iriọ ọle ha rẹ manman ha hoẹmhọn ẹn yẹ gbẹloghe ẹ. Be uwẹ ha rẹ rẹman yẹ ghe uwẹ hoẹmhọn ọlẹn?

1. Be imhan ha rẹ rẹman iJehova yẹ ghe mhan hoẹmhọn ọlẹn?

Mhan dẹ sabọ rẹman ghe mhan hoẹmhọn iJehova sade mhan hẹnmhọn nanlẹn. (Tie 1 John 5:3.) Jehova isua mhan bhọ nin mhan rẹ hẹnmhọn nanlẹn. Ọle re otọ nin mhan rẹ tobọmhan zẹ si mhan dẹ hẹnmhọn nanlẹn. Bezẹle nin ọle da re ọne isẹhoa nan nin mhan? Ranmhude ọle guanọ nin mhan ‘re ọkhọle mhan zẹ nin mhan rẹ ha re obọ rẹkhan’ uhi nesọle. (Romans 6:17) Ọle guanọ nin mhan ha hẹnmhọn nanlẹn ranmhude mhan hoẹmhọn ọlẹn. Obọ nọnzi 3 bi 4 bhi ọne ebe nan dẹ rẹkpa uwẹ rẹ lẹn ebi uwẹ ha rẹ rẹman yẹ ghe uwẹ hoẹmhọn iJehova. Bhi ene obọ veva, a dẹ zilo nyan emhin nin uwẹ ha lu nin uwẹ rẹ re iJehova ha ghọnghọn, bi emhin ne sọnnọn ọlẹn nin uwẹ ha rẹban.

2. Bezẹle nọn da nọghọ ẹgheso nin mhan rẹ rẹman ghe mhan hoẹmhọn iJehova?

Baibo yọle ghe “ọnọghọ nin ọria nọn khiale miẹn wo bun.” (Psalm 34:19) Ranmhude ọ bha gba nin mhan fo, ọ nọghọ mhan nin mhan rẹ ha lu emhin nọn mhẹn ẹghe rebhe. Mhan sẹyẹ miẹn ọnọghọ kẹkẹ bhi egbe. Bhi ọsi ijiẹmhin, asabọmiẹn mhan bha miẹn rẹ lu, la a bhohiẹn eku gbe mhan. Ahamiẹn mhan ribhi ọkakale, ọ sabọ ha nọghọ, nin mhan rẹ lu emhin nin Jehova guanọ. Mhan sabọ ha riale ghe, emhin dẹ lẹkhẹ nin mhan sade mhan lu emhin nin Jehova yọle nin mhan hẹi lu. Ọkpakinọn, mhan ha dọnmhegbe rẹ lu emhin nin Jehova guanọ, mhan ki rẹman ghe ọle mhan hoẹmhọnlẹn gbera emhin nọn ki rẹ ha khin. Mhan ki yẹ rẹman ghe, mhan muegbe nin mhan rẹ sun rẹkhan ọlẹn. Bhiriọ, ọle ki yẹ sun rẹkhan mhan. Ọle ida zẹ mhan obọ ghẹdẹ.—Tie Psalm 4:3.

MANMAN LẸN OTỌLE NỌNSẸN

Luẹ ebezẹle nọn da re iJehova ghọnghọn sade uwẹ hẹnmhọn nanlẹn, bi ebe ha rẹkpa uwẹ rẹ ha hẹnmhọn nanlẹn.

3. Orẹsin nin Esu rẹ sin ọrebhe

Ebe nọnsi Job bhi Baibo ji mhan lẹn ghe orẹsin ribhọ nin Esu rẹ sin Job bi ẹbho rebhe ne guanọ nin ele ga iJehova. Tie Job 1:1, 6–2:10, bha ha zilo nyan ene inọnta nan:

Emhin nela Esu yọle ghe ọ re iJob ha ga iJehova?—Fẹ Job 1:9-11 ghe.
Orẹsin nela Esu rẹ sin ẹbho rebhe rẹ sẹbhi uwẹ?—Fẹ Job 2:4 ghe.

Tie Job 27:5b, bha ha zilo nyan ọne inọnta nan:

Be iJob rẹ rẹman yẹ ghe ọle gene hoẹmhọn iJehova?

Uwedẹ nin Job rẹ sun rẹkhan iJehova da rẹman ghe ọle hoẹmhọn iJehova

Mhan ha sun rẹkhan iJehova, mhan ki rẹman ghe mhan hoẹmhọn ọlẹn

4. Re ọkhọle nọnsi Jehova ha ghọnghọn

Tie Proverbs 27:11, bha ha zilo nyan ene inọnta nan:

Be ọ dia iJehova bhi egbe yẹ sade mhan hẹnmhọn nanlẹn yẹ rẹman ọlẹn ghe mhan wanlan? Bezẹle?

5. Uwẹ dẹ sabọ sun rẹkhan iJehova

Oyẹẹ nin mhan mhọn da iJehova, ọle zẹle nin mhan da tẹmhọn ọlẹn man ẹbho. Asun-rẹkhan nin mhan mhọn da ọle, ọle rẹkpa mhan rẹ sẹyẹ ha tẹmhọn ọlẹn aharẹmiẹn ọ bha lẹkhẹ nin mhan. Ghe ọne IVIDIO, bha ha zilo nyan ene inọnta nan:

VIDIO: Sẹyẹ Ha Tẹmhọn Osẹnobulua Aharẹmiẹn Ọ Bha Yẹẹ Ẹbho Eso (5:09)

Ọ be nọghọ uwẹ ẹgheso nin uwẹ rẹ tẹmhọn iJehova man ẹbho?
Beji a rẹman bhi ọne ividio, be bhọ rẹkpa Grayson rẹ ha mhọn izebhudu?

Ahamiẹn mhan hoẹmhọn emhin nin Jehova hoẹmhọnlẹn, yẹ he emhin nin ọle hele, ọ ida nọghọ mhan gbe nin mhan rẹ sun rẹkhan ọlẹn. Tie Psalm 97:10, bha ha zilo nyan ene inọnta nan:

Be hi emhin eso ne yẹẹ iJehova? Be hi emhin eso nin ọle hele?
Be uwẹ ha lu nin uwẹ da sabọ hoẹmhọn emhin ne mhẹn, yẹ he emhin ne imhẹn?

6. Mhan miẹn elele bhọ sade mhan hẹnmhọn nin Jehova

Mhan ha re obọ rẹkhan uhi nesi Jehova, ọle elele ye nẹ. Tie Isaiah 48:17, 18, bha ha zilo nyan ene inọnta nan:

Uwẹ be rẹọbhọ ghe Jehova hi ọnọn lẹn ebe ha mhẹn mhan bhi egbe nẹ? Bezẹle?
Elele nela uwẹ sẹ miẹn bhọ nin uwẹ rẹ munhẹn ha luẹ ẹmhọn iJehova bhi ẹkẹ iBaibo?

ẸBHO ESO SABỌ YỌLE: “Emhin nin mẹn lu ida sabọ ba Osẹnobulua bhi egbe, la re ọle ha ghọnghọn.”