ILUẸMHIN 35

Ebi Mhan Ha Rẹ Ha Zẹ Emhin Ne Mhẹn Yẹ

Khue

Imhan rebhe mhọn emhin kẹkẹ nin mhan guanọ nin mhan lu. Ene bunbun bhi ene emhin nan sabọ ha yi emhin ne ha manman rẹso iẹnlẹn nọnsẹmhan bi ikolu nin mhan bi Jehova ko mhọnlẹn. Bhi ọsi ijiẹmhin, mhan dẹ zẹ eji mhan ho nin mhan da ha nyẹnlẹn, iwẹnna nin mhan ho nin mhan lu, bi, si mhan dẹ re okhuo la bọ ọdọ. Ahamiẹn mhan zẹ emhin ne mhẹn, mhan ki ha ghọnghọn. Mhan ki yẹ re iJehova ha ghọnghọn.

1. Be iBaibo ha rẹ rẹkpa mhan rẹ ha zẹ emhin ne mhẹn yẹ?

Ọkuẹsẹ mhan zẹ emhin nin mhan ha lu, ọkhẹke nin mhan bhii Jehova nin ọle rẹkpa mhan. Ọ yẹ khẹke nin mhan fẹ Baibo ghe, beji mhan ha da lẹn ẹlo nin Jehova rẹ ghe ọne ẹmhọn. (Tie Proverbs 2:3-6.) Bhi ẹmhọn eso, Jehova wo gbe uhi nin mhan, nin ọle guanọ nin mhan re obọ rẹkhan. Ahamiẹn iriọ nọn, emhin nọn mhẹn nẹ hi, nin mhan rẹ re obọ rẹkhan ọne uhi.

Ahakimiẹn uhi soso iribhi Baibo nọn ha wo taman uwẹ ebi uwẹ ha lu tee? Jehova dẹ sẹyẹ rẹkpa uwẹ rẹ lẹn ‘uwedẹ nin uwẹ ha rẹkhan.’ (Isaiah 48:17) Adia ne ribhi Baibo dẹ rẹkpa uwẹ. Ene adia nan rẹkpa mhan rẹ lẹn ebi emhin dia iJehova bhi egbe yẹ, bi ẹlo nin ọle rẹ ghe emhin eso. Bhi ọsi ijiẹmhin, mhan ha tie okha eso bhi Baibo, mhan ki sabọ lẹn ẹlo nin Jehova rẹ ghe emhin eso. Ọne ilẹnmhin nan ki rẹkpa mhan rẹ zẹ emhin ne ha ti ọle bhọ.

2. Emhin nela ọkhẹke nin uwẹ ria ẹmhọn ọlẹn ọkuẹsẹ uwẹ zẹ emhin nin uwẹ ha lu?

Baibo yọle ghe “ọnọn mhọn ẹwanlẹn ria eria nyan emhin rebhe.” (Proverbs 14:15) Ọnan rẹman ghe ọkuẹsẹ mhan zẹ emhin nin mhan ha lu, ọkhẹke nin mhan ka re ẹghe ọbhi otọ rẹ ria eria nyan ọlẹn. Beji uwẹ ha rẹ ha ria eria nyan emhin kẹkẹ nin uwẹ mhọn bhi ọkhọle, nọọn egbe ẹ ene inọnta nan: ‘Adia nela bhi Baibo rẹtẹ ọne ẹmhọn nan? Emhin nela mẹn ha lu nọn ha re ọkhọle mẹn fure? Be ọne emhin ha rẹ rẹso eria ebhebhe yẹ? Be ọ ha rẹ rẹso iJehova yẹ? Ọ dẹ be re ọle ha ghọnghọn?’—Deuteronomy 32:29.

Jehova hi ọnọn khẹke nọn ha taman mhan ebi mhan ha lu bi ebi mhan ha rẹban. Mhan ha dọnmhegbe rẹ lẹn uhi nesọle yẹ ha re obọ rẹkhan ele, mhan ki ha mhọn ọkhọle umueria nọn mhẹn. Ọkhọle umueria hi ọkhọle nọn taman mhan si emhin nin mhan ho nin mhan lu mhẹnmhin la ọ imhẹn. (Romans 2:14, 15) Mhan ha dia ọkhọle umueria nọnsẹmhan nọnsẹn, ọ ki rẹkpa mhan rẹ ha zẹ emhin ne mhẹn.

MANMAN LẸN OTỌLE NỌNSẸN

Luẹ ebi adia ne ribhi Baibo bi ọkhọle umueria nọnsẹmhan ha rẹ sabọ rẹkpa mhan ha zẹ emhin ne mhẹn yẹ.

3. Ji Baibo ha dia uwẹ

Be adia ne ribhi Baibo ha rẹ rẹkpa mhan yẹ sade mhan ho nin mhan zẹ emhin nin mhan ha lu? Ghe ọne IVIDIO, bha ha zilo nyan inọnta ne rẹkhan ọlẹn.

VIDIO: Ji Adia Ne Ribhi Baibo Ha Dia Uwẹ (5:54)

Be hi isẹhoa nin Jehova re nin mhan?
Bezẹle nin Jehova da re ọne isẹhoa nan nin mhan?
Emhin nela ọle ne nin mhan ne ha rẹkpa mhan rẹ ha zẹ emhin ne mhẹn bhi iẹnlẹn?

Nin uwẹ rẹ daghe ọkpa bhi adia ne ribhi Baibo, tie Ephesians 5:15, 16. Bha ha tie ọle fo, bha zilo nyan ebi uwẹ ha rẹ ha ‘noo ẹghe nọnsẹ nọnsẹn’ yẹ rẹ . . .

tie iBaibo ukpẹdẹ-ukpẹdẹ.
lu nọnsẹn bhi ihe nin uwẹ ye bhi azagba-uwa.
yo ikolo oga ẹghe rebhe.

4. Dia ọkhọle umueria nọnsẹ, nọn rẹkpa ẹ ha zẹ emhin ne mhẹn

Ahamiẹn uhi ribhi Baibo nọn rẹtẹ ebi mhan ho nin mhan lu, ọ sabọ lẹkhẹ nin mhan rẹ zẹ ebi mhan ha lu. Ahakimiẹn uhi nọn sẹriọ iribhọ? Ghe ọne IVIDIO nan, bha ha zilo nyan inọnta ne rẹkhan ọlẹn.

VIDIO: Zẹ Emhin Nọn Ha Re Ọkhọle Nọnsẹ Fure (5:13)

Be ọne obhio mhan nin okhuo lu, nin ọle rẹ dia ọkhọle umueria nọnsọle, beji ọle ha da sabọ zẹ emhin nọn ha yẹẹ iJehova?

Bezẹle nọn bha da khẹke nin mhan ha guanọ ọria nọn ha taman mhan ebi mhan ha lu bhi ẹmhọn nin mhan ha da tobọmhan zẹ? Tie Hebrews 5:14, bha ha zilo nyan ene inọnta nan:

Ọ sabọ lẹkhẹ nin mhan rẹ taman ọria ọbhebhe nọn rẹkpa mhan zẹ emhin nin mhan ha lu, ọkpakinọn, be ọne iBaibo nan yọle ghe ọkhẹke nin mhan tobọmhan lẹn?
Emhin nela mhan mhọnlẹn, nọn ha rẹkpa mhan rẹ dia ọkhọle umueria nọnsẹmhan, yẹ ha zẹ emhin ne mhẹn?

Ọkhọle umueria nọnsẹmhan diabe imapu nọn rẹkpa mhan rẹ lẹn eji mhan khian

5. Ji ọkhọle umueria ọsi eria ebhebhe rẹtẹ uwẹ

Emhin kẹkẹ, ọle yẹẹ ẹbho kẹkẹ rẹ lu. Be imhan ha rẹ rẹman yẹ ghe ẹmhọn ọkhọle umueria ọsi eria ebhebhe rẹtẹ mhan? Ji mhan fẹ ijiẹmhin eva ghe:

Ijiẹmhin nin 1: Ji a man yọle ghe obhio mhan nin okhuo, nọn manman re emhin na ẹlo, diọbhi agbotu nin ibhio mhan nin ikhuo ne bunbun ida re ẹlo esili ghe emhin nọn sẹriọ.

Tie Romans 15:1 bi 1 Corinthians 10:23, 24, bha ha zilo nyan ene inọnta nan:

Be ẹmhọn ne ribhi ene iBaibo nan ha rẹ rẹkpa ọne obhio mhan yẹ rẹ lẹn ebi ọle ha lu? Be uwẹ ha lu yẹ sade uwẹ ribhi ẹwẹ ẹbho ne bha re ẹlo esili ghe emhin nin uwẹ lu, ranmhude ọkhọle umuẹria nọnsele riale ghe ọne emhin bha gba?

Ijiẹmhin nọnzi 2: Ji a man yọle ghe obhio mhan nin okpea lẹnmhin ghe Baibo yọle ghe, mhan dẹ sabọ da anyọn ọbhi oleghe. Ọkpakinọn, ọle da zẹ nin ọle rẹ rẹban ọlẹn sẹsẹsẹ. Ẹghe nin ọle ki rẹ deba ibhio mhan ebhebhe ha re egbe re ahoho, ọle da daghe ele ghe ele da anyọn.

Tie Ecclesiastes 7:16 bi Romans 14:1, 10, bha ha zilo nyan ene inọnta nan:

Be ẹmhọn ne ribhi ene iBaibo nan ha rẹ rẹkpa ọne obhio mhan yẹ? Be uwẹ ha lu yẹ sade uwẹ daghe ọria ọbhebhe lu emhin nin uwẹ ilu, ranmhude ọkhọle umueria nọnsẹ taman uwẹ ghe ọne emhin bha gba?

Ebe ha rẹkpa uwẹ ha zẹ emhin ne mhẹn

1. Bhii Jehova nọn rẹkpa uwẹ zẹ nọnsẹn.—James 1:5.

2. Guanọ otọ ọne ẹmhọn bhi Baibo bi ebe nesẹmhan nin uwẹ rẹ miẹn adia ne ha sabọ rẹkpa uwẹ. Uwẹ sabọ yẹ guanọ ibhude bhi obọ ibhio mhan ne wanre bhi oga.

3. Ria ẹmhọn ebi emhin nin uwẹ ho nin uwẹ lu ha rẹ rẹso ọkhọle umueria nọnsẹ bi ọsi eria ebhebhe yẹ.

ẸBHO ESO SABỌ YỌLE: “Mẹn dẹ sabọ lu emhin nọn ki rẹ khin nọn ghọn mẹn, ọ bha rẹtẹ ọria soso.”

Bezẹle nọn da khẹke nin mhan ria ẹmhọn ebi emhin nin mhan lu rẹ rẹso iJehova bi eria ebhebhe yẹ?

EBI MHAN LUẸLE

Mhan dẹ sabọ ha zẹ emhin ne mhẹn, sade mhan fẹghe ebi Jehova ghe ọne emhin ye, bi sade mhan ria ẹmhọn ebi ọne emhin ha rẹ rẹso eria ebhebhe yẹ.

Uwẹ Be Yẹ Yere?

Be uwẹ ha rẹ sabọ zẹ ebe ha yẹẹ iJehova yẹ?
Be uwẹ ha rẹ sabọ ha dia ọkhọle umueria nọnsẹ yẹ?
Be uwẹ ha rẹ rẹman yẹ ghe ẹmhọn ọkhọle umueria ọsi eria ebhebhe rẹtẹ uwẹ?

Gbẹn ẹdẹ nin uwẹ luẹ ọne iluẹmhin nan fo ọbhi enan:

Lu Ọnan

Ria ẹmhọn emhanmhan ọkpa nin uwẹ mhọn bhi ọkhọle, uwẹ ha lu ene emhin ea nan tẹmhọnlẹn bhi ẹkpẹti nọn yọle “ Ebe Ha Rẹkpa Uwẹ Ha Zẹ Emhin Ne Mhẹn,” rẹ lẹn si emhanmhan nọn mhẹn nọn.”

Ọbhebhe:

Your other goal