ILUẸMHIN 37
Ebi Baibo Tale Rẹji Iwẹnna bi Igho
A sẹ ka miẹn khẹ ghe ẹmhọn iwẹnna la ẹmhọn igho re uwẹ ha kpokpo egbe? Ọ iyi emhin nọn lẹkhẹ nin mhan rẹ miẹn ebi mhan ha rẹ gbẹloghe egbe. Ọnan sabọ re ọle ha nọghọ imhan rẹ ha ga iJehova bhi uwedẹ nọn khẹke. Adia nọn ha sabọ rẹkpa mhan ribhi ẹkẹ iBaibo.
1. Be iBaibo tale rẹji iwẹnna?
Jehova guanọ nin mhan ha sọnyẹnmhẹn bhi iwẹnna nọnsẹmhan. Baibo yọle ghe “emhin iribhọ nọn mhẹn gbera nin ọria rẹ . . . sọnyẹnmhẹn bhi ẹsọn nin ọle miẹn.” (Ecclesiastes 2:24) Jehova tobọle wẹnna kaka. Mhan ha re egbe khọkhọ ọle yẹ ha wẹnna kaka, mhan ki ha ghọnghọn. Imhan bhọ ki yẹ re ọle ha ghọnghọn.
Emhin kpataki, ọle iwẹnna khin. Ọrẹyiriọ, ọ bha khẹke nin mhan mun ọlẹn kalo gbera oga nọnsi Jehova. (John 6:27) Jehova vele ghe mhan ha mun oga nọnsọle kalo bhi iẹnlẹn nọnsẹmhan, ọle dẹ gbẹloghe mhan.
2. Ẹlo nela ọkhẹke nin mhan rẹ ha ghe igho?
Baibo yọle ghe ‘igho sabọ gbega ọria.’ Ọkpakinọn, ọ da yẹ yọle ghe igho ida sabọ re eghọnghọn nin mhan. (Ecclesiastes 7:12) Ọnan zẹle nin Baibo da yọle nin mhan hẹi hoẹmhọn igho, nin mhan ‘ji emhin nin mhan mhọn ha khọn mhan.’ (Tie Hebrews 13:5.) Mhan ha ji emhin nin mhan mhọn ha khọn mhan, mhan ida ha khu ẹfe. Mhan ida yẹ de ọbhi osa ranmhude mhan re obọ ọbhi eji obọ mhan bha sẹ. (Proverbs 22:7) Mhan ki yẹ sabọ rẹban okhẹnan nọn ribhi onolo nan fi, bi uwedẹ kẹkẹ nin ẹbho rẹ guanọ ẹfe ọsi ẹjẹje.
3. Be iJehova guanọ nin mhan rẹ ha noo igho yẹ?
Osẹnobulua nọn zẹ emhin bhi obọ, ọle iJehova khin. Mhan dẹ sabọ re egbe khọkhọ ọle sade mhan yẹ “zẹ emhin bhi obọ.” (1 Timothy 6:18) Mhan dẹ sabọ re igho nọnsẹmhan rẹ robọkpa bhi iwẹnna oga. Mhan dẹ yẹ sabọ re ọle rẹkpa eria, manman nọn, ibhio mhan nin mhan ko ga. Ọkhọle nin mhan rẹ re emhin re, ọle iJehova ghe, ọ iyi eka nin mhan sabọ re re. Mhan ha re ọkhọle rebhe zẹ emhin bhi obọ, mhan ki ha ghọnghọn. Mhan ki yẹ re iJehova ha ghọnghọn.—Tie Acts 20:35.
MANMAN LẸN OTỌLE NỌNSẸN
Luẹ elele nin mhan ha miẹn bhọ sade mhan re ẹlo nọn khẹke ha ghe iwẹnna, bi sade mhan ji emhin nin mhan mhọn ha khọn mhan.
4. Ji uwedẹ nin uwẹ rẹ wẹnna ha re ogẹn ji Jehova
Ọkhẹke nin uwedẹ nin mhan rẹ wẹnna rẹman ghe imọẹ iJehova mhan khin. Ghe ọne IVIDIO, bha ha zilo nyan ene inọnta nan:
-
Be re uwedẹ nin Jason rẹ ha wẹnna, bi ẹlo nin ọle rẹ ha ghe iwẹnna nọnsọle ti uwẹ bhọ?
-
Be ọle lu nin ọle da sabọ mun ẹmhọn iwẹnna ọbhi oleghe?
Tie Colossians 3:23, 24, bha ha zilo nyan ọne inọnta nan:
-
Bezẹle nin ẹlo nin mhan rẹ ghe iwẹnna da yi uhọnmhọn-emhin?
Emhin kpataki, ọle iwẹnna khin. Ọrẹyiriọ, ọ bha khẹke nin mhan mun ọlẹn kalo gbera oga nọnsi Jehova
5. Elele nabhọre sade mhan ji ebi mhan mhọn khọn mhan
Ẹbho ne bunbun wo dọnmhegbe nin ele rẹ fe. Bhi obọ nọnkẹle, Baibo da taman mhan emhin nọn khẹke nin mhan ha lu. Tie 1 Timothy 6:6-8, bha ha zilo nyan ọne inọnta nan:
-
Ibhude nela iBaibo re nin mhan?
Mhan dẹ yẹ sabọ ha ghọnghọn aharẹmiẹn mhan bha fe. Ghe ọne IVIDIO, bha ha zilo nyan inọnta nọn rẹkhan ọlẹn.
-
Bezẹle nin ene azagba-uwa nan rẹman bhi ọne ividio da ghọnghọn, arẹmiẹn ghe ele imanman mhọn igho?
Ahakimiẹn ghe mhan ka mhọn igho, ọkpakinọn, mhan sẹyẹ guanọ nọn ha bun ọbhọ? Jesu gbe okha ọkpa bhi ẹkẹ iBaibo nọn rẹkpa mhan rẹ lẹn okhẹnan nọn ribhi emhin nọn sẹriọ. Tie Luke 12:15-21, bha ha zilo nyan ọne inọnta nan:
-
Be uwẹ miẹn luẹ bhi ọne okha nan nin Jesu gbe?—Fẹ ulọnlẹn 15 ghe.
Tie Proverbs 10:22 bi 1 Timothy 6:10. Fẹ ẹmhọn ne ribhi ene Baibo veva nan ghe nọnsẹn, bha ha zilo nyan ene inọnta nan:
-
Ọnela uwẹ riale ọ lu uhọnmhọn-emhin nẹ? Nin ọria rẹ deba iJehova ha mhọn ikolu, la nin ọria rẹ manman fe? Bezẹle nin uwẹ da ta iriọ?
-
Ọbalọ nela ha sabọ nabhọre sade ọria khu ẹfe?
6. Jehova dẹ gbẹloghe mhan
Ẹmhọn igho bi ẹmhọn iwẹnna dẹ sabọ dọnmhẹn urẹọbhọ nin mhan mhọn da iJehova. Ghe ọne IVIDIO nin uwẹ rẹ daghe ebi mhan ha rẹ sabọ khọn edọnmhẹn ne sẹriọ yẹ. Bha ha ghe ọle fo, zilo nyan inọnta ne rẹkhan ọlẹn.
-
Ọnọghọ nela ọne obhio mhan bhi ọne ividio ha mhọnlẹn?
-
Be bhọ ọle lu nọn rẹkpa ọle rẹ khọn ọne ọnọghọ?
Tie Matthew 6:25-34, bha ha zilo nyan ọne inọnta nan:
-
Be iJehova yọle ọle dẹ lu nin ẹbho ne mun oga nọnsọle kalo bhi iẹnlẹn nọnsele?
ẸBHO ESO SABỌ YỌLE: “Mẹn ida miẹn ẹghe rẹ ha yo ikolo oga ẹghe rebhe. Ọkhẹke nin mẹn wẹnna kaka nin mẹn rẹ gbẹloghe azagba-uwa nọnsẹmhẹn.”
-
Ejela bhi Baibo re uwẹ rẹọbhọ ghe, nan rẹ mun oga nọnsi Jehova kalo, ọle hi emhin nọn mhẹn nẹ?
EBI MHAN LUẸLE
Emhin kpataki, ọle iwẹnna bi igho khin. Ọkpakinọn, ọ bha khẹke nin mhan mun ele kalo gbera oga nọnsi Jehova.
Uwẹ Be Yẹ Yere?
-
Be ha rẹkpa uwẹ rẹ ha re ẹlo nọn khẹke ghe iwẹnna?
-
Elele nela uwẹ ha miẹn bhọ sade uwẹ ji emhin nin uwẹ mhọn khọn uwẹ?
-
Be uwẹ ha rẹ rẹman yẹ uwẹ mun udu nyan iJehova ghe ọle dẹ gbẹloghe ẹ?
FẸ ENE EMHIN NAN GHE
Fẹghe si Baibo be gene yọle igho imhẹn.
“Igho Be Si Emhin Ebe Re bhi ọne Agbon Nan” (Ebe nọn ribhi jw.org)
Luẹ ebi mhan ha rẹ ha noo igho yẹ bhi uwedẹ nọn yẹẹ iJehova.
“Be IBaibo Tale bhi Ẹmhọn Ẹsele Nan Lu Nin Ẹbho?” (Ebe nọn ribhi jw.org)
Okhẹnan be gene ribhi onolo nan fi?
Okpea ọkpa nọn rẹ ha fi onolo yẹ ra, da fi iẹnlẹn nọnsọle denọ. Fẹghe ebe rẹkpa ọle.
“Ẹmhọn Igemu Nan Da Re Akasi Runẹ Wo Ha Ti Mẹn Bhọ” (The Watchtower, November 1, 2011)
Emhin Ebhebhe Ne Ha Yẹ Ti Uwẹ Bhọ
INỌNTA NIN ẸBHO KẸ NỌỌN
Bebhọ Iluẹmhin IBaibo?
Min ewanniẹn rẹji inọnta rẹji iluẹmhin iBaibo nin man nẹn ẹbho luẹ ọsọhẹ.
