Ria ẹmhọn okhuo nọn mun ọmọn nọnsọle egbe nọn rẹ ha khian isiku. Ọle ki khọ ọne ọmọn an yẹ ne ukpọn ne mhọn-ose yọ ọle. Uwedẹ nin ọle rẹ mun ọne ọmọn egbe dẹ gbega ọne ọmọn bhi emianmhẹn. Ọ ki yẹ rẹman ghe, ene biẹ ọle gbẹloghe ọle nọnsẹn. Iriọ yẹ nọn, Jehova nin Aba mhan yẹ guanọ nin mhan khiakhia. Ọle guanọ nin mhan ha kpe egbe mhan khia. Ọle yẹ guanọ nin mhan khia bhi uwedẹ nin mhan rẹ ria eria, uwedẹ nin mhan rẹ talọ, bi uwedẹ nin mhan rẹ lu emhin. Mhan ha khia, mhan dẹ miẹn elele bhọ. Mhan ki yẹ re ogẹn ji Jehova.

1. Be ọria ha rẹ rẹman yẹ ghe ọle iyi ọria itọn?

Jehova yọle: “Ọkhẹke nin bha khia.” (1 Peter 1:16) Ọria nọn khiale dẹ ha kpe egbe nọnsọle khia. Ọle ki yẹ ha nyẹn iẹnlẹn nọn khiakhia. Mhan dẹ sabọ rẹman ghe mhan iyi ọria itọn sade mhan khọa ẹghe-ẹghe, họ ukpọn nesẹmhan, kpe imoto nọnsẹmhan, yẹ hẹnhẹn uwa nọnsẹmhan. Ọ yẹ khẹke nin mhan deba ha gbọnọ iKindọn Họọ. Ahamiẹn mhan kpe egbe nọnsẹmhan bi emhin nesẹmhan khia, mhan ki re ọle re ogẹn ji Jehova.​—2 Corinthians 6:3, 4. 

2. Be imhan ha rẹban nin mhan da sabọ ha yi eria ne khiakhia?

Baibo yọle nin “mhan kpe egbe mhan khia bhi emhin rebhe ne re itọn ọbhi efun bi oriọn.” (2 Corinthians 7:1) Bhiriọ, ọkhẹke nin mhan rẹban emhin nọn hi ki rẹ khin nọn ha sabọ kuan mhan, la rẹ mhan ha ria eria ne bha gba. Ọ khẹke nin emhin nin mhan ria bhi ọkhọle ẹghe rebhe ha yi emhin ne ti Jehova bhọ. Bhiriọ, mhan ida ji iria-eria ne bha gba na mhan bhi ọkhọle. (Psalm 104:34) Mhan ki yẹ dọnmhegbe nin mhan rẹ ha ta ọta ne gbale.​—Tie Colossians 3:8.

Emhin ebhebhe nela ha sabọ rẹ mhan kiẹn eria ne bha khia? Emhin nọn ha sabọ kuan mhan sade mhan le ọle la sin ọlẹn. Emhin bọsi siga la itaba-ẹlinmhin, la ikhunmhun nan noo bhi uwedẹ nọn bha khẹke. Mhan ha rẹban ene emhin nan, mhan ida khọnmhọn emianmhẹn nin ele si re. Mhan ki yẹ rẹman ghe, iẹnlẹn ti mhan bhọ. Ọ yẹ khẹke nin mhan khia bhi iria-eria nọnsẹmhan bi emhin nin mhan lu. Ọ iyi emhin nọn gbale nin mhan rẹ ha ghe ifotọ la ividio ọsi eria ne banọnre, la ha re obọ so egbe mhan bhi uwedẹ nọn bha gba. (Psalm 119:37; Ephesians 5:5) Ene emhin nan ha guẹ ọria bhi egbe fo, ọnọghọmhin nan rẹ re obọ sibhọre. Ọkpakinọn, Jehova dẹ sabọ rẹkpa mhan.​—Tie Isaiah 41:13.

 MANMAN LẸN OTỌLE NỌNSẸN

3. Mhan re ọle re ogẹn ji Jehova sade mhan khiakhia

Mhan ha fẹ uhi nin Jehova gbe nin ibhokhan Izrẹl ghe, mhan ki kere ghe, Jehova manman guanọ nin ẹbho nesọle ha yi eria ne khiale. Tie Exodus 19:10 bi 30:17-19, bha ha zilo nyan ene inọnta nan:

• Be ene ulọnlẹn nan rẹkpa mhan rẹ lẹn rẹji ebi Jehova guanọ nin mhan rẹ ha kpe egbe nọnsẹmhan khia yẹ?

• Be hi emhin eso ne khẹke nin mhan ha lu ẹghe rebhe nin mhan da sabọ ha yi eria ne khiakhia?

Ọ dẹ re mhan ẹghe bi ahu nin mhan rẹ ha kpe egbe nọnsẹmhan bi emhin nesẹmhan khia ẹghe rebhe. Ọkpakinọn, eji ọ ki rẹ khin nin mhan da nyẹnlẹn, mhan dẹ sabọ lu ọle, aharẹmiẹn mhan fe la mhan bha fe. Ghe ọne IVIDIO, bha ha zilo nyan inọnta nọn rẹkhan ọlẹn.

• Bezẹle nin uwedẹ nin mhan rẹ kpe egbe mhan bi emhin nesẹmhan khia ha da re ọle ha yẹẹ ẹbho rẹ luẹ ẹmhọn iJehova?

4. Re obọ sibhi emhin ne imhẹn nin uwẹ guẹle re

Ọ iyi emhin nọn lẹkhẹ, nin ọria nọn sin isiga la nọn noo ikhunmhun bhi uwedẹ nọn bha khẹke rẹ re obọ sibhọre. Ahamiẹn ọria nọn sẹriọ uwẹ khin, be ha sabọ rẹkpa uwẹ? Ria ẹmhọn ikuan-egbe nin ọne emhin si ji uwẹ. Tie Matthew 22:37-39, bha ha zilo nyan ebi isiga nan sin, la ikhunmhun ne bha khẹke nin ọria noo ha rẹ rẹso . . .

• ikolu nin ọle bi Jehova ko mhọnlẹn yẹ.

• azagba-uwa nọnsọle bi eria ebhebhe ne nẹga ọle ye.

Mhanmhan ebi uwẹ ha lu nin uwẹ da sabọ re obọ sibhi emhin ne imhẹn nin uwẹ guẹle re. a Ghe ọne IVIDIO.

Tie Philippians 4:13, bha ha zilo nyan ọne inọnta nan:

• Be erọnmhọn nan nan ẹghe rebhe, Baibo nan luẹ ẹghe rebhe, bi ikolo oga nan yo ẹghe rebhe, ha rẹ rẹkpa ọria rẹ khọn emhin ne imhẹn nin ọle guẹle yẹ?

 5. Dọnmhegbe nin uwẹ rẹ rẹban iria-eria ne sankaan bi ilọnmhọn ne bha gba

Tie Colossians 3:5, bha ha zilo nyan ene inọnta nan:

• Be imhan rẹ lẹn yẹ ghe, emhin bọsi nan rẹ ha ghe ifotọ ọsi eria ne banọnre, nan rẹ ha re ifoni gbẹnẹn emhin ne sankaan ji ọria ọbhebhe, bi nin ọria rẹ ha re obọ so egbe nọnsọle bhi uwedẹ nọn bha gba bha khia bhi ẹlo nọnsi Jehova?

• Uwẹ be riale emhin ẹwanlẹn nọn, nin Jehova rẹ yọle nin mhan rẹban emhin ne sankaan? Bezẹle?

Fẹghe ebi uwẹ ha lu nin uwẹ da sabọ rẹban iria-eria ne bha gba. Ghe ọne IVIDIO.

Jesu da noo ijiẹmhin rẹ rẹman ghe, ọkhẹke nin mhan manman dọnmhegbe rẹ lu emhin rebhe nọn khẹke nin mhan lu beji mhan ha da sabọ rẹban iria-eria ne bha gba. Tie Matthew 5:29, 30, bha ha zilo nyan ọne inọnta nan:

• Ẹmhọn nin Jesu tale bha rẹman ghe, mhan dẹ gene zọ ẹlo nọnsẹmhan re fia, la mhan dẹ hian obọ nọnsẹmhan mun fia. Ebi ọle ha ta hi, nin mhan lu emhin nọn hi ki rẹ khin nọn khẹke, nin mhan rẹ rẹban emhin nọn bha gba. Be hi emhin eso nin ọria ha sabọ lu nin ọle rẹ rẹban iria-eria ne bha gba? b

Ahamiẹn uwẹ dọnmhegbe nin uwẹ rẹ re ọkhọle sibhi emhin ne bha gba re, ọ manman ti Jehova bhọ. Tie Psalm 103:13, 14, bha ha zilo nyan ọne inọnta nan:

• Ahamiẹn ghe, ọ nọghọ uwẹ rẹ re obọ sibhi emhin ebe nin uwẹ guẹle re, be ẹmhọn nọn ribhi ọne Baibo nan ha rẹ sabọ rẹkpa uwẹ yẹ nin egbe hẹi lọ uwẹ?

 EBI MHAN LUẸLE

Ọ manman ti Jehova bhọ sade mhan kpe egbe nọnsẹmhan khia. Ọ yẹ ti ọle bhọ sade mhan ria eria ne gbale yẹ lu emhin ne khiale.

Uwẹ Be Yẹ Yere?

• Bezẹle nọn da manman khẹke nin mhan ha yi eria ne khiale?

• Be ọria ha rẹ rẹman yẹ ghe ọle iyi ọria itọn?

• Be uwẹ ha lu, beji a ha da miẹn ghe, emhin nin uwẹ ria bhi ọkhọle bi emhin nin uwẹ lu ki ha yi emhin ne khiale?