Ẹbho eso riale ghe, ahamiẹn ọria bha bọ ọdọ la re okhuo, ọne ọria ida sabọ ha ghọnghọn. Ọkpakinọn, ọ iyi ẹbho rebhe ne bọ ọdọ la re okhuo wo ghọnghọn. Ẹbho eso yẹ ribhọ ne bha bọ ọdọ la re okhuo ne yẹ wo ghọnghọn. Beji Baibo rẹ yọle ghe emhin esili ibọdọ bi ireokhuo khin, iriọ ọ yẹ rẹ yọle ghe emhin esili nọn sade ọria bha bọ ọdọ la re okhuo.

1. Elele nela ribhọ sade ọria bha bọ ọdọ la re okhuo?

Baibo yọle: “Ọria nọn re okhuo, la bọ ọdọ, ọ lu nọnsẹn, sokpan, ọria nọn bha re okhuo, la bọ ọdọ, ọle lu nọnsẹn nẹ.” (Tie 1 Corinthians 7:32, 33, 38.) Uwedẹ nela ọria nọn bha bọ ọdọ la re okhuo ha rẹ lu nọnsẹn gbera ọria nọn bọ ọdọ la re okhuo? Ọria nọn bha bọ ọdọ la re okhuo imhọn ọdọ la amhẹn nọn ha re ọle ha kpokpo egbe. Bhiriọ, ele manman miẹn isẹhoa rẹ lu emhin ne bunbun. Bhi ọsi ijiẹmhin, ele sabọ lu gbera eka nin ele lu khẹ bhi iwẹnna oga. Ele sabọ diọbhi agbaẹbho ọbhebhe dọ ha lu iwẹnna itẹmhọn Osẹnobulua. Ọne idia nan yẹ re isẹhoa nin ele rẹ manman sikẹ iJehova.

2. Elele nela ribhọ sade okpea bi okhuo bọ egbe bhi uwedẹ nọn khẹke?

Eria ne bọ ọdọ la re okhuo yẹ mhọn elele nin ele miẹn bhi ibọdọ bi ireokhuo. Baibo yọle: “Itue eva mhẹn nẹ otuọnkpa.” (Ecclesiastes 4:9) Eria ne re obọ rẹkhan adia ne ribhi Baibo bhi iẹnlẹn ibọdọ bi ireokhuo nọnsele, gene wo dọ kere ghe, ẹmhọanta ọnan khin. Okpea bi okhuo ha bọ egbe bhi uwedẹ nọn khẹke, ele ki ve nin egbe ele ghe, ele dẹ hoẹmhọn egbe yẹ ha mun ekpẹn nin egbe. Ikolu nọnsele ki deziẹn gbera ọsi okpea bi okhuo ne gheghe ko ha nyẹnlẹn kugbe. Ele ki yẹ sabọ kuobọgbe bẹẹ imọn nesele nọnsẹn.

3. Ẹlo nela Jehova rẹ ghe ibọdọ bi ireokhuo?

Ẹghe nin Jehova rẹ ku okpea bi okhuo nin ọhẹnhẹn kugbe, nin ele ha yi ọdọ bi amhẹn, ọle da yọle: “Okpea ki zẹ aba ọle bi inẹn ọlẹn obọ, ọle ki sun rẹkhan amhẹn ọlẹn.” (Genesis 2:24) Jehova guanọ nin okhuo bi ọdọ hoẹmhọn egbe yẹ sun rẹkhan egbe rẹ sẹbhi ukpẹdẹ uu. Ọkpa bhi ẹwẹ ele ha gboghẹ, ọle ọkpa ele ha da sabọ sọebea. Jehova re otọ nin ọnọn bha gboghẹ bhi ẹwẹ ele rẹ zẹ si ọle dẹ sọebea la ọle ida sọebea. a (Matthew 19:9) Okhuo ọkpa la ọdọ ọkpa, ọle Jehova guanọ nin ẹbho ne ga ọle ha mhọnlẹn.​—1 Timothy 3:2.

 MANMAN LẸN OTỌLE NỌNSẸN

5. Re ẹwanlẹn zẹ ọdọ nin uwẹ ha bọ la okhuo nin uwẹ ha re

Uhọnmhọn-emhin kpataki ibọdọ bi ireokhuo khin. Bhiriọ, ọ iyi emhin nọn lẹkhẹ nin ọria rẹ zẹ okhuo nin ọle ha re la ọdọ nin ọle ha bọ. Tie Matthew 19:4-6, 9, bha ha zilo nyan ọne inọnta nan:

• Bezẹle nọn bha da khẹke nin Kristiẹn tua nabhi ibọdọ bi ireokhuo?

Adia ne ribhi Baibo de rẹkpa uwẹ rẹ lẹn ebi uwẹ ha guanọ bhi egbe okpea nin uwẹ ho nin uwẹ bọ, la okhuo nin uwẹ ho nin uwẹ re. Emhin nọn lu uhọnmhọn-emhin nẹ hi, nin ọne ọria rẹ hoẹmhọn iJehova. b Tie 1 Corinthians 7:39 bi 2 Corinthians 6:14, bha ha zilo nyan ene inọnta nan:

• Bezẹle nọn da khẹke nin mhan bọ ọdọ la re okhuo bhi ẹwẹ ibhio mhan nin mhan ko ga iJehova?

• Be uwẹ riale ọ dẹ dia iJehova bhi egbe yẹ sade mhan dọ re okhuo la bọ ọdọ bhi ẹwẹ eria ne iga ọle?

 6. Ha ghe ibọdọ bi ireokhuo beji Jehova rẹ ghe ọle

Bhi agbaẹbho ọsi Izrẹl bhi ẹghe ẹdẹlẹ, ikpea eso da ha khu ikhuo ele fia ranmhude emhin ne bha sẹ emhin soso. Tie Malachi 2:13, 14, 16, bha ha zilo nyan ọne inọnta nan:

• Bezẹle nọn da khọ iJehova bhi ẹkẹ sade mhan sọebea bhi uwedẹ nin Baibo bha re obọ i?

Ghe ọne IVIDIO, bha ha zilo nyan inọnta nọn rẹkhan ọlẹn.

• Ahamiẹn okhuo ẹ la ọdọ ẹ iga Jehova, be uwẹ ha lu nin uwẹ da ha mhọn eghọnghọn bhi ibọdọ bi ireokhuo nọnsẹ?

7. Re obọ rẹkhan uhi nin Jehova gbele bhi ẹmhọn ibọdọ bi ireokhuo

 EBI MHAN LUẸLE

Beji ibọdọ bi ireokhuo rẹ yi emhin esili nọn na bhi obọ iJehova vae, iriọ idia ọsi ọria nọn bha bọ ọdọ la re okhuo yẹ khin. Idia nin mhan ki rẹ ha ye, mhan dẹ sabọ ha ghọnghọn sade mhan re obọ rẹkhan uhi nesi Jehova.

Uwẹ Be Yẹ Yere?

• Be ọria nọn bha sẹ bọ ọdọ la re okhuo ha rẹ sabọ noo isẹhoa nin ọle mhọn nọnsẹn yẹ?

• Bezẹle nin Baibo da yọle ghe, ọria nin mhan ko ga ọkpa mhan ha lọnmhẹn?

• Be hi emhin ọkpa sẹsẹ nin Baibo yọle ghe ọ dẹ sabọ re okhuo bi ọdọ sọebea?