ILUẸMHIN 44

DIluemhin Rebhe Be Yẹẹ Osẹnobulua?

Khue

Jehova guanọ nin mhan ha sọnyẹnmhẹn bhi iẹnlẹn. Ọle bhọ guanọ nin mhan ha lu iluemhin ẹgheso. Ọkpakinọn, ọ iyi iluemhin rebhe ti ọle bhọ. Be imhan ha rẹ rẹman yẹ ghe, mhan hoẹmhọn iJehova bhi iluemhin nin mhan zẹ nin mhan rẹ lu?

1. Bezẹle nin iluemhin ne bunbun da sọnnọn iJehova?

Ọ sabọ han uwẹ ilo rẹ lẹn ghe, iluemhin ne bunbun nin ẹbho lu ẹlẹnan, bha diẹn mun iman-emhin ne ribhi Baibo. Oga ohoghe mun ene bunbun bhi ene iluemhin nan gbọ. Ene iluemhin sabọ yẹ diẹn mun ilọnmhọn ikpẹbo. Ele sabọ ha yi iluemhin nin ẹbho lu ranmhude ele rẹọbhọ ghe, ọria nọn yu mhọn ẹlinmhin nọn sẹyẹ nyẹnlẹn. Iluemhin eso yẹ ribhọ nin ẹbho riale ghe ọkhẹke nin ele lu, beji ẹhi ele ha da mhẹn. (Isaiah 65:11) Jehova sekha nin ẹbho ne ga ọle yọle: “Bha hẹi yẹ re obọ so emhin ne bha khia.”—2 Corinthians 6:17. a

2. Ẹlo nela Jehova rẹ ghe iluemhin nin ẹbho rẹ re ogẹn nọn bha khẹke ji eria?

Jehova sekha nin mhan ghe, nin mhan hẹi “mun udu nyan eria khọnkhan.” (Tie Jeremiah 17:5.) Iluemhin eso ribhọ nin ẹbho rẹ re ogẹn ji eyokhọnlẹn la ene gbẹloghe. Iluemhin eso yẹ ribhọ nin ẹbho lu nin ele rẹ re ogẹn ji agbaẹbho nọnsele. (1 John 5:21) Eso yẹ ribhọ nin ẹbho lu nin ele rẹ re ogẹn ji otu efinẹfi la otu ebhebhe. Be uwẹ riale ọ dẹ dia iJehova bhi egbe yẹ, sade mhan re ogẹn nọn bha khẹke ji ọria la agbotu, manman nọn, ọria la agbotu nọn lu emhin nọn bha diẹn mun iho nọnsọle?

3. Be hi emhin eso nin ẹbho lu bhi ẹghe iluemhin, nọn re ene iluemhin sọnnọn iJehova?

Baibo bha re obọ bhọ nin mhan rẹ ha ‘da anyọn gbe egbe, bi nin mhan rẹ ha dujie bhi uwedẹ nọn bha gba, la, da anyọn nọn manman bun.’ (1 Peter 4:3) Ahamiẹn ẹbho lu iluemhin eso, ele ki wo ha lu emhin beji ọ ghọn ele, yẹ lu emhin nin Jehova bha re obọ i. Ahamiẹn mhan guanọ nin mhan sẹyẹ ha yi imọẹ iJehova, ọkhẹke nin mhan rẹban emhin ne sẹriọ.

MANMAN LẸN OTỌLE NỌNSẸN

Luẹ ebi uwẹ ha rẹ sabọ zẹ iluemhin ne yẹẹ iJehova yẹ.

4. Rẹban iluemhin ne sọnnọn iJehova

Tie Ephesians 5:10, bha ha zilo nyan ene inọnta nan:

Emhin nela ọkhẹke nin mhan dọnmhegbe rẹ lẹn ọkuẹsẹ mhan zẹ nin mhan rẹ deba bhi iluemhin?
Be hi iluemhin eso nin ẹbho lu bhi eji uwẹ da nyẹnlẹn?
Uwẹ be riale ene iluemhin nan yẹẹ iJehova?

Bhi ọsi ijiẹmhin, ẹlo nela Jehova rẹ ghe iluemhin ọsi ukpẹdẹ nan rẹ biẹ ọria, natiọle ibẹde? Eje soso iribhọ nin Baibo da tẹmhọn ọguọmhandia nọnsi Jehova nọn lu ibẹde. Itue eva ne bha ha ga iJehova, ele lu ibẹde nan tẹmhonlẹn bhi Baibo. Tie Genesis 40:20-22 bi Matthew 14:6-10, bha ha zilo nyan ene inọnta nan:

Be hi emhin ọkpa nọn sunu bhi ene ibẹde nan veva?
Be ene okha nan bhi Baibo rẹkpa uwẹ rẹ lẹn rẹji ẹlo nin Jehova rẹ ghe iluemhin ọsi bẹde?

Sẹyẹ, uwẹ sabọ ha riale, Jehova dẹ be gene ghe ọle bii emhin ebe sade mẹn deba bhi iluemhin ọsi bẹde la iluemhin ọbhebhe nọn bha diẹn mun iman-emhin nọn ribhi Baibo? Tie Exodus 32:1-8, bha ha yẹ ghe ọne IVIDIO. Bha ha ghe ọle fo, bha zilo nyan ene inọnta nan:

VIDIO: Iluemhin Ne Sọnnọn Osẹnobulua (5:07)

Bezẹle nọn da khẹke nin mhan dọnmhegbe rẹ lẹn ebe ha ti Jehova bhọ?
Be imhan ha rẹ sabọ lu iriọ yẹ?

Ebi mhan ha rẹ lẹn iluemhin ne sọnnọn iJehova yẹ

Ọne iluemhin be diẹn mun iman-emhin ne ribhi Baibo? Nin uwẹ rẹ lẹn, gua otọ ebi ọne iluemhin rẹ munhẹn yẹ.
Iluemhin nan be rẹ re ogẹn ji eria, agbotu la agbaẹbho be nọn? Jehova mhan re ogẹn nọn ke okhun nẹ je. Mhan mun udu nyan ọlẹn ghe, ọle ọkpa ha sabọ re ọkpẹnlẹn ọbhi ọnọghọ nọn ribhi ọne agbọn nan.
Uwedẹ nin ẹbho rẹ lu emhin sade ele lu ọne iluemhin be diẹn mun uwedẹ nin Baibo yọle nin Kristiẹn rẹ ha lu emhin? Ọkhẹke nin mhan ha nyẹnlẹn unyẹnmhin nọn khiakhia.

5. Rẹkpa eria ebhebhe rẹ lẹn ebi uwẹ rẹọ i

Ahamiẹn ẹbho sua uwẹ bhọ nin uwẹ rẹ deba bhi iluemhin ne sọnnọn iJehova, ọ sabọ ha nọghọ uwẹ rẹ taman ele ghe, uwẹ ida deba ele. Ọkpakinọn, uwẹ dẹ sabọ re ekpẹn-ekpẹn taman ele emhin nin uwẹ rẹọ i. Nin uwẹ rẹ daghe ebi uwẹ ha rẹ lu ọnan yẹ, ghe ọne IVIDIO.

VIDIO: Re Ekpẹn bi Ẹwanlẹn Ha Taman Eria Emhin Nin Uwẹ Rẹọ i (2:01)

Tie Matthew 7:12, bha ha zilo nyan ene inọnta nan:

Beji ọne iBaibo nan rẹman, ọ be khẹke nin uwẹ ha taman ibhio ẹ ne iga iJehova nin ele hẹi lu iluemhin nin uwẹ ilu?
Be uwẹ ha lu nin uwẹ rẹ rẹman ene ribhi azagba-uwa nọnsẹ ghe, uwẹ sẹyẹ hoẹmhọn ele aharẹmiẹn uwẹ ideba ele lu iluemhin nin ele lu?

6. Jehova guanọ nin mhan ha ghọnghọn

Jehova guanọ nin mhan deba imọẹ mhan bi ene ribhi azagba-uwa nọnsẹmhan ha sọnyẹnmhẹn. Tie Ecclesiastes 8:15, bha ha zilo nyan ọne inọnta nan:

Be ọne iBaibo nan rẹ rẹman yẹ ghe, Jehova guanọ nin mhan ha ghọnghọn?

Jehova guanọ nin ẹbho nesọle ha sọnyẹnmhẹn kugbe. Ghe ọne IVIDIO nan, nin uwẹ daghe ebi mhan rẹ deba ibhio mhan sọnyẹnmhẹn yẹ sade mhan yo usikoko ne nẹ nesẹmhan.

VIDIO: Ha Miẹn Ẹbho Ọbhi Egbe Sade a Ribhi Usikoko Nọn Nẹ Nin Esali Jehova bhi Agbaẹbho Kẹkẹ Kugbe Do (5:40)

Tie Galatians 6:10, bha ha zilo nyan ene inọnta nan:

Ẹghe iluemhin ọkpa ọ be rẹ khẹke nin mhan rẹ ha lu emhin esili nin ẹbho?
Ọnela ha re eghọnghọn nin uwẹ nẹ, nin uwẹ rẹ re emhin nin ọria bhi ẹghe iluemhin ranmhude oko nọn, la nin uwẹ rẹ re ọkhọ ẹ re emhin nanlẹn bhi ẹghe nọn hi ki rẹ khin nọn yẹẹ uwẹ?
Ẹghe rẹ sẹ ẹghe, Esali Jehova ne bunbun dẹ emhin nin imọn nesele la lu emhin ọbhebhe nin ele, rẹ rẹman ele ghe ele hoẹmhọn ele. Ahamiẹn uwẹ mhọn imọn, be hi emhin eso nin uwẹ ha sabọ lu nin ele?

ẸBHO ESO SABỌ YỌLE: “Ebi iluemhin rẹ munhẹn yẹ iyi emhin soso. Isẹhoa gheghe nọn nin mhan rẹ deba imọẹ mhan bi ene ribhi azagba-uwa nọnsẹmhan sọnyẹnmhẹn.”

Be uwẹ ha taman ọne ọria yẹ?

EBI MHAN LUẸLE

Jehova guanọ nin mhan deba imọẹ mhan bi ene ribhi azagba-uwa nọnsẹmhan ha sọnyẹnmhẹn. Ọkpakinọn, ọle guanọ nin mhan rẹban iluemhin ne sọnnọn ọlẹn.

Uwẹ Be Yẹ Yere?

Be hi inọnta eso ne ha rẹkpa mhan lẹn iluemhin ne sọnnọn iJehova?
Be imhan ha rẹ rẹkpa imọẹ mhan bi ene ribhi azagba-uwa nọnsẹmhan yẹ, nin ele da lẹn ebezẹle nin mhan ida deba ele lu iluemhin eso?
Be uwẹ rẹ lẹn yẹ ghe, Jehova guanọ nin mhan ha ghọnghọn?

Gbẹn ẹdẹ nin uwẹ luẹ ọne iluẹmhin nan fo ọbhi enan:

Lu Ọnan

Re emhin nin uwẹ luẹle bhi ọne iluẹmhin nan rẹ fẹghe si iluemhin nin ẹbho lu bhi eji uwẹ da nyẹnlẹn ti Jehova bhọ.

Ọbhebhe:

Your other goal