ILUẸMHIN 47

Uwẹ Be Sẹ Muegbe Nin Uwẹ Rẹ Mianmẹn?

Khue

Rẹ na bhi ẹghe nin uwẹ rẹ munhẹn ha luẹ iBaibo, uwẹ wo dọ luẹ emhin ne bunbun rẹji Jehova. Asabọmiẹn uwẹ yẹ fi emhin eso denọ bhi iẹnlẹn nọnsẹ. Ọrẹyiriọ, asabọmiẹn emhin sẹyẹ ribhọ nọn re uwẹ riale ghe uwẹ bha sẹ muegbe nin uwẹ rẹ re egbe guẹ nin Jehova yẹ mianmẹn. Bhi ọne iluẹmhin nan, uwẹ dẹ luẹ emhin eso ne zẹle nin ẹbho eso bha da sẹ sabọ mianmẹn bi ebi uwẹ ha rẹ khọn emhin ne sẹriọ miotọ yẹ.

1. Be ọkhẹke nin uwẹ lẹn iBaibo sẹ yẹ uwẹ kuẹ mianmẹn?

Ọkuẹsẹ uwẹ mianmẹn, ọkhẹke nin uwẹ ha mhọn “ilẹnmhin nọn gbale ọsi ẹmhọanta.” (1 Timothy 2:4) Ọnan bha rẹman ghe uwẹ dẹ lẹn emhin rebhe ne ribhi Baibo. Esali Jehova nọn ki ree ne mianmẹn bhọ sẹyẹ luẹ iBaibo. (Colossians 1:9, 10) Ọrẹyiriọ, iman-emhin kpataki eso ribhọ ne khẹke nin uwẹ lẹn ọkuẹsẹ uwẹ mianmẹn. Ene ewanlẹn bhi agbotu dẹ rẹkpa uwẹ rẹ fẹghe si uwẹ lẹn ene iman-emhin nan.

2. Be hi emhin eso ne khẹke nin uwẹ lu uwẹ kuẹ sabọ mianmẹn?

Ọkuẹsẹ uwẹ mianmẹn, uwẹ dẹ ‘kiẹ oya bhi olukhọ nọnsẹ, yẹ fidenọ.’ (Tie Acts 3:19.) Uwẹ ki rẹman iJehova ghe emhin ebe nin uwẹ lu bhi ẹghe nọn gbera manman ba uwẹ bhi egbe. Uwẹ ki yẹ bhii ọle nin ọle rẹhunmhan uwẹ. Sẹyẹ, uwẹ ki muegbe nin uwẹ rẹ ha rẹban emhin ne imhẹn, yẹ ha nyẹnlẹn bhi uwedẹ nọn yẹẹ iJehova. Rẹ deba ọnan, uwẹ ki ha yo ikolo oga ẹghe rebhe, yẹ deba agbotu ha yo iwẹnna itẹmhọn Osẹnobulua.

3. Bezẹle nọn bha da khẹke nin ofẹn ha mun uwẹ nin uwẹ rẹ mianmẹn?

Ofẹn mun ẹbho eso nin ele rẹ mianmẹn, ranmhude, ele riale ghe ele ida sabọ lu emhin rebhe nin Jehova guanọ bhi obọ ele. Bọsi ẹbho ne ga iJehova nọnsẹn bhi ẹghe ẹdẹlẹ, uwẹ sabọ dobọ ẹgheso. Ọkpakinọn, lẹn sẹbhọ ghe Jehova lẹnmhin ghe ọ bha gba nin mhan fo. (Tie Psalm 103:13, 14.) Ebi ọle guanọ hi, nin uwẹ dọnmhegbe rẹ lu eka nin uwẹ ha sabọ lu. Ọle bhọ dẹ rẹkpa ẹ. Jehova ji mhan lẹn ghe emhin soso iribhọ nọn ha ‘sabọ ne mhan sibhi oyẹẹ nọnsọle re.’—Tie Romans 8:38, 39.

MANMAN LẸN OTỌLE NỌNSẸN

Luẹ ebi ilẹnmhin nọnsi Jehova bi iruduba nin uwẹ mhọn da ọle ha rẹ rẹkpa uwẹ yẹ, nin uwẹ rẹ khọn emhin nọn ki rẹ khin nọn de uwẹ idobolo nin uwẹ rẹ mianmẹn.

4. Manman lẹn iJehova nọnsẹn

Be ọkhẹke nin uwẹ lẹn iJehova sẹ yẹ ọkuẹsẹ uwẹ mianmẹn? Ọkhẹke nin uwẹ lẹn ọlẹn nọnsẹn, rẹ sẹbhọ ghe uwẹ ki hoẹmhọn ọlẹn yẹ ha guanọ nin uwẹ lu emhin ne ti ọle bhọ. Ghe ọne IVIDIO, nin uwẹ daghe ebi ẹbho ne bunbun bhi otọ agbọn rebhe rẹ ha lu ọnan yẹ. Bha ha ghe ọle fo, bha ha yẹ zilo nyan inọnta nọn rẹkhan ọlẹn.

VIDIO: Ebi Uwẹ Ha Sabọ Lu Uwẹ Kuẹ Mianmẹn (3:56)

Be bhọ rẹkpa ẹbho nan rẹman bhi ọne ividio nan rẹ zẹ nin ele rẹ mianmẹn?

Tie Romans 12:2, bha ha zilo nyan ene inọnta nan:

Iman-emhin soso be ribhi Baibo, nọn bha mun uwẹ ẹlo kore? La uwẹ be mhọn edandan si oga ọsi ẹmhọanta oga ọsi Esali Jehova khin?
Ahamiẹn iriọ, be ọkhẹke nin uwẹ lu yẹ?

5. Hẹi ji emhin soso de uwẹ idobolo nin uwẹ rẹ mianmẹn

Ọria ha zẹ nin ọle rẹ re egbe guẹ nin Jehova yẹ mianmẹn, ọle dẹ miẹn ọnọghọ kẹkẹ. Nin uwẹ rẹ daghe ijiẹmhin ọkpa nọn sẹriọ, ghe ọne IVIDIO, bha ha zilo nyan inọnta ne rẹkhan ọlẹn.

VIDIO: Oyẹẹ Nin Uwẹ Mhọn Da IJehova Dẹ Rẹkpa Uwẹ Rẹ Khọn Ọnọghọ Nọn Hi Ki Rẹ Khin (5:22)

Beji a rẹman bhi ọne ividio, be hi emhin ne re ọle ha nọghọ iNarangerel rẹ zẹ nin ọle rẹ ga iJehova?
Be oyẹẹ nin ọle ha mhọn da iJehova rẹ rẹkpa ọle rẹ khọn ene ọnọghọ yẹ?

Tie Proverbs 29:25 bi 2 Timothy 1:7, bha ha zilo nyan ọne inọnta nan:

Be bhọ re izebhudu nin mhan rẹ khọn ọnọghọ?

6. Mun udu nyan iJehova

Jehova dẹ rẹkpa uwẹ rẹ lu iho nọnsọle. Ghe ọne IVIDIO, bha ha zilo nyan inọnta ne rẹkhan ọlẹn.

VIDIO: Osẹnobulua Nin Jehova Dẹ Rẹkpa Uwẹ (2:50)

Be bhọ re okpea nan rẹman bhi ọne ividio ha si egbe re ikeke nin ọle rẹ mianmẹn?
Emhin nela ọle luẹle nọn rẹkpa ọle rẹ manman mun udu nyan iJehova?

Tie Isaiah 41:10, 13, bha ha zilo nyan ọne inọnta nan:

Bezẹle nin uwẹ ha da sabọ ha mhọn ọne iruduba ghe, uwẹ ha re egbe guẹ nin Jehova, uwẹ dẹ sabọ mun ọne ive sẹ?

7. Ji oyẹẹ nin Jehova mhọn da uwẹ manman ti uwẹ bhọ

Beji uwẹ ha rẹ manman ha ria ẹmhọn ebi Jehova hoẹmhọn uwẹ sẹ yẹ, iriọ ọ ha rẹ manman ha hu uwẹ bhi udu nin uwẹ rẹ rẹman ọlẹn ghe emhin rebhe nin ọle lu nin uwẹ ti uwẹ bhọ. Uwẹ ki ha guanọ nin uwẹ re ẹdagbọn nọnsẹ rebhe rẹ ha ga ọle. Tie Psalm 40:5, bha ha zilo nyan ọne inọnta nan:

Emhin nela iJehova sẹ lu nin uwẹ nọn manman ti uwẹ bhọ?

Jeremiah nin akhasẹ wo manman hoẹmhọn iJehova. Ọle da yẹ hoẹmhọn ọta nọnsi Jehova. Ọ da yẹ manman ha ti ọle bhọ ghe, a tie elin nọnsi Jehova mun ọlẹn. Ọle da taman iJehova yọle: “Ọta nọnsẹ da kiẹn emhin nọn re ọkhọle nọnsẹmhẹn ha ghọnghọn, ranmhude a tie elin nọnsẹ mun mẹn.” (Jeremiah 15:16) Re ewanniẹn ọbhi ene inọnta nan: