ILUẸMHIN 48

Zẹ Imọẹ Ne Mhẹn

Khue

Zẹ Imọẹ Ne Mhẹn

Emhin eghọnghọn nọn nin mhan rẹ ha mhọn imọẹ ne deba mhan sọnyẹnmhẹn, ne yẹ rẹkpa mhan bhi ẹghe ọnọghọ. Ọkpakinọn, Baibo taman mhan ghe, ọ iyi ẹbho rebhe mhan ha sabọ ne lu ọmọẹ. Be uwẹ ha rẹ sabọ zẹ imọẹ ne mhẹn yẹ? Inọnta eva nin mhan ha zilo nyan dẹ sabọ rẹkpa uwẹ.

1. Be imọẹ nin uwẹ zẹle ha rẹ rẹso uwẹ yẹ?

A yọle ghe, a ha ne ẹbhe khian, a ki ha le iku. Ọnan rẹman ghe uwedẹ nin ẹbho nin mhan ne muobọ rẹ lu emhin dẹ sabọ rẹso mhan. Aharẹmiẹn intanẹti mhan da ne ele muobọ, ele dẹ sabọ rẹso mhan bhi uwedẹ nọn mhẹn la uwedẹ nọn imhẹn. Baibo yọle ghe, “ọnọn rẹkhan ọria nọn mhọn ẹwanlẹn khian ki yẹ ha mhọn ẹwanlẹn, ọkpakinọn, ọnọn rẹkhan uhuki [ẹbho ne bha hoẹmhọn iJehova] khian ki miẹn ikuan-egbe.” (Proverbs 13:20) Mhan ha deba ẹbho ne hoẹmhọn iJehova ha lu ọmọẹ, ele ki rẹkpa mhan rẹ ha zẹ emhin ne mhẹn, yẹ manman ha sikẹ iJehova. Bhi obọ nọnkẹle, mhan ha zẹ imọẹ ne bha hoẹmhọn iJehova, ele dẹ sabọ rẹ mhan ha lu emhin ne iyẹẹ iJehova. Ọnan zẹle nin Baibo da yọle nin mhan ha zẹ imọẹ ne mhẹn. Mhan ha zẹ imọẹ ne hoẹmhọn iJehova, mhan ki “ha re izebhudu nin egbe yẹ ha bọn egbe okhun.”—1 Thessalonians 5:11.

2. Be ọ dia iJehova bhi egbe yẹ sade mhan zẹ imọẹ ne imhẹn?

Ọ iyi ẹbho rebhe Jehova wo ne muobọ. Baibo taman mhan ghe, ‘ọria nọn khiale, ọle Jehova deba lu ọmọẹ.’ (Proverbs 3:32) Be ọ ha dia iJehova bhi egbe yẹ sade mhan deba ẹbho ne bha hoẹmhọn ọlẹn ha lu ọmọẹ? Ọ dẹ wo manman ba ọle bhi egbe. (Tie James 4:4.) Ọkpakinọn, ọ dẹ wo re ọle ha ghọnghọn sade mhan rẹban ikolu ne imhẹn yẹ deba ẹbho ne hoẹmhọn ọlẹn ha muobọ. Mhan ha lu ọnan, ọle ki rẹ mhan kiẹn imọẹ nesọle.—Psalm 15:1-4.

MANMAN LẸN OTỌLE NỌNSẸN

Luẹ ebezẹle nọn da manman khẹke nin mhan ha zẹ imọẹ ne mhẹn, bi ebe ha rẹkpa mhan rẹ sabọ lu iriọ.

3. Rẹban ikolu ne imhẹn

Ẹbho ne bha hoẹmhọn iJehova bi uhi nesọle, ikolu ne imhẹn ele khin. Ghe ọne IVIDIO, bha ha zilo nyan inọnta nọn rẹkhan ọlẹn.

VIDIO: Luẹ Ebi Uwẹ Ha Rẹ Rẹban Imọẹ Ne Imhẹn Yẹ (6:17)

Ọria dẹ be sabọ ha ne ikolu ne imhẹn muobọ, a ki yẹ miẹn ọle bha lẹn? Be ọnan ha rẹ sabọ sunu yẹ?

Tie 1 Corinthians 15:33, bha ha zilo nyan ene inọnta nan:

Unan ọria nela ha sabọ ha yi ikolu nọn imhẹn rẹji uwẹ? Bezẹle nin uwẹ da ta iriọ?

Tie Psalm 119:63, bha ha zilo nyan ọne inọnta nan:

Emhin nela uwẹ ha guanọ bhi egbe ọria nin uwẹ ho nin uwẹ rẹ kiẹn ọmọẹ?

Emekọnọn ọkpa nọn imhẹn dẹ sabọ riia enekẹle a. Be ọmọẹ nọn imhẹn ha rẹ sabọ riia uwẹ a yẹ?

4. Mhan dẹ sabọ deba ẹbho ne iyi otu mhan la ibo mhan lu ọmọẹ

Baibo tẹmhọn ikpea eva ne ha yi imọẹ ọsaje. Elin nọnsele hi David bi Jonathan. Jonathan wo manman diọn iDavid. Ọle da yẹ ha yi ọmọn nọnsi ojie. Ọrẹyiriọ, ọle bi David da kiẹn imọẹ ne manman sikẹ egbe. Tie 1 Samuel 18:1, bha ha zilo nyan ọne inọnta nan:

Bezẹle nan da miẹn ghe, ọ iyi otu mhan la ibo mhan ọkpa mhan ha sabọ zẹ bhi imọẹ?

Tie Romans 1:11, 12, bha ha zilo nyan ọne inọnta nan:

Be imọẹ ne hoẹmhọn iJehova ha rẹ sabọ ha re izebhudu nin egbe yẹ?

Bhi ọne ividio nan, uwẹ dẹ daghe ebi usẹn-obhokhan ọkpa rẹ miẹn imọẹ esili yẹ bhi eji ọle bha rẹ re ọkhọle ọi. Ghe ọne IVIDIO, bha ha zilo nyan inọnta ne rẹkhan ọlẹn.