ILUẸMHIN 50
Be Ha Re Azagba-uwa Nọnsẹ Ha Ghọnghọn?—Obọ 2
Ẹsele nọn na obọ iJehova vae, ọle imọn khin. Jehova guanọ nin enebiọmọn ha gbẹloghe ele nọnsẹn. Ọle re adia nin ele bhi Baibo, nọn ha rẹkpa ele rẹ ha lu ọnan. Ọle yẹ re adia nin imọn nọn ha rẹkpa imọn rẹ lẹn ebi ele ha lu nin ele rẹ re ene biẹ ele ha ghọnghọn.
1. Adia nela iJehova re nin enebiọmọn?
Jehova guanọ nin enebiọmọn hoẹmhọn imọn nesele yẹ ha gbe ẹghe a nin ele. Ọle guanọ nin enebiọmọn ha gbega imọn nesele, ele ha yẹ ha re adia ne ribhi Baibo rẹ dia imọn nesele. (Proverbs 1:8) Jehova taman ene aba yọle: “Bha ha re adia bi ibhude nọnsi Jehova rẹ bẹẹ [imọn nesẹbha] wanre.” (Tie Ephesians 6:4.) Enebiọmọn, ele Jehova mun ọne ẹsọn nan ne rẹ ha gbẹloghe imọn. Ahamiẹn enebiọmọn tobele ha miẹn ọne ẹsọn nan, yẹ ha re obọ rẹkhan adia nọnsi Jehova beji ele rẹ lu ọle, ele ki re iJehova ha ghọnghọn.
2. Adia nela iJehova re nin imọn?
Jehova taman imọn yọle: “Bha ha hẹnmhọn nin ene biẹ bha.” (Tie Colossians 3:20.) Ahamiẹn imọn hẹnmhọn nin ene biẹ ele yẹ mun ekpẹn nin ele, ele ki re ene biẹ ele bi Jehova ha ghọnghọn. (Proverbs 23:22-25) Jesu wo re ijiẹmhin esili ọbhi otọ nin ibhokhan ha rẹkhan. Arẹmiẹn ghe ene biẹ ọle bha ha yi eria ne gbale bii ọle, ọle da sẹyẹ wo ha hẹnmhọn nin ele yẹ mun ekpẹn nin ele.—Luke 2:51, 52.
3. Be ha rẹkpa azagba-uwa nọnsẹ rẹ manman sikẹ iJehova?
Ahamiẹn uwẹ mhọn imọn, uwẹ dẹ wo ha guanọ nin imọn nesẹ hoẹmhọn iJehova beji uwẹ rẹ hoẹmhọn ọlẹn. Be uwẹ ha rẹ rẹkpa ele rẹ hoẹmhọn iJehova yẹ? Uwẹ dẹ sabọ rẹkpa ele rẹ hoẹmhọn iJehova sade uwẹ lu emhin nin Baibo tale. Baibo yọle: “Kọ [ọta nesi Jehova] ọbhi ẹkẹ ọkhọle ọsi imọn nesẹ. Ha tẹmhọn ọlẹn man ele sade uwẹ dotua bhi uwa nọnsẹ, bi sade uwẹ khian bhi uwedẹ.” (Deuteronomy 6:7) Ukpọta natiọle “kọ” bhi ọne iBaibo nin, rẹman ghe uwẹ dẹ ha ta emhin nin uwẹ ka ta igba ne bunbun beji imọn nesẹ ha da sabọ yere. Bhiriọ, uwẹ dẹ ha guanọ isẹhoa nin uwẹ rẹ ha man imọn nesẹ ẹmhọn iJehova ẹghe rebhe. Ọ dẹ wo ha mhẹn nin bha rẹ mhanmhan ẹghe nin bha rebhe rẹ kugbe ha luẹ iBaibo uzana-uzana bọsi azagba-uwa. Aharẹmiẹn uwẹ imhọn imọn, uwẹ dẹ yẹ miẹn elele bhọ sade uwẹ mhanmhan ẹghe nin uwẹ rẹ ha luẹ iBaibo uzana-uzana.
MANMAN LẸN OTỌLE NỌNSẸN
Luẹ emhin eso ne ha re eghọnghọn re bhi azagba-uwa.
4. Re oyẹẹ ha dia imọn nesẹ
Ọ iyi emhin nọn lẹkhẹ nan rẹ bẹẹ imọn wanre. Be iBaibo ha rẹ rẹkpa uwẹ yẹ? Tie James 1:19, 20, bha ha zilo nyan ene inọnta nan:
-
Be enebiọmọn ha rẹ re oyẹẹ man imọn nesele yẹ bhi uwedẹ nin ele rẹ ne ele zilo?
-
Bezẹle nọn ida mhẹn nin enebiọmọn rẹ re ohu re adia nin imọn nesele? a
5. Gbega imọn nesẹ
Nin uwẹ rẹ gbega imọn nesẹ, ọkhẹke nin uwẹ taman ele ẹmhọn inegbenowẹ. Ọnan sabọ ha yi ẹmhọn nọn khua uwẹ bhi unun nin uwẹ rẹ ta. Ghe ọne IVIDIO, bha ha zilo nyan ene inọnta nan:
-
Bezẹle nọn da nọghọ ẹbho ne bunbun rẹ tẹmhọn inegbenowẹ man imọn nesele?
-
Be enebiọmọn eso rẹ tẹmhọn inegbenowẹ man imọn nesele yẹ?
Beji Baibo ka ta, ọne agbọn Esu nan gene wo ha khọ ọbhọ. Tie 2 Timothy 3:1, 13, bha ha zilo nyan ọne inọnta nan:
-
Ẹbho ne mun ibhokhan riia deba eria ne imhẹn nan sounun ọlẹn bhi ulọnlẹn nọnzi 13. Bhiriọ, bezẹle nọn da manman khẹke nin enebiọmọn taman imọn nesele ẹmhọn inegbenowẹ, bi ebi ele ha rẹ gbega egbe yẹ bhi obọ eria ne mun ibhokhan riia?
Uwẹ be rẹ lẹn?
Esali Jehova mhọn ebe bi vidio ne bunbun ne ha rẹkpa enebiọmọn rẹ man imọn nesele ẹmhọn inegbenowẹ yẹ gbega ele bhi obọ eria ne mun ibhokhan riia. Bhi ọsi ijiẹmhin, fẹ ene ebe bi ividio nan ghe:
-
Gbega Imọn Nesẹ (vidio)
-
“Ebi Uwẹ Ha Rẹ Man Imọn Nesẹ Ẹmhọn Inegbenowẹ Yẹ” (Awake! No. 5 2016)
6. Ha mun ekpẹn nin ene biẹ uwẹ
Uwedẹ nin imọn rẹ ne ene biẹ ele talọ dẹ sabọ rẹman ghe ele mun ekpẹn nin ele. Ghe ọne IVIDIO, bha ha zilo nyan inọnta ne rẹkhan ọlẹn.
-
Bezẹle nọn da yi emhin esili nin ọmọn rẹ ha re ekpẹn ne ene biẹ ọle talọ?
-
Be ọmọn ha rẹ ne ene biẹ ọle talọ yẹ bhi uwedẹ nọn ha rẹman ghe ọle mun ekpẹn nin ele?
Tie Proverbs 1:8, bha ha zilo nyan ọne inọnta nan:
-
Be ọkhẹke nin ọmọn lu sade ene biẹ ọle gbuhi nanlẹn?
7. Bha kugbe ha ga iJehova bọsi azagba-uwa
Esali Jehova ne bunbun mhọn ẹghe nin ele mhanmhan ọbhi otọ uzana-uzana nin ele rẹ luẹ Baibo bhi ẹkẹ azagba-uwa. Ọnan hi ebi a tiọle Oga Azagba-uwa. Be ele rẹ lu ọne oga azagba-uwa yẹ? Ghe ọne IVIDIO bha ha zilo nyan ene inọnta nan:
-
Be azagba-uwa ha lu nin ele da sabọ ha lu Oga Azagba-uwa uzana-uzana?
-
Be enebiọmọn ha sabọ lu nin ele rẹ re oga azagba-uwa ha ti ọrebhe bhọ?—Fẹ ifoto nọn ribhi eji ọne iluẹmhin nan da munhẹn ghe.
-
Be ha sabọ re ọle ha nọghọ azagba-uwa nọnsẹ rẹ kugbe ha luẹ iBaibo?
Ẹghe nin Jehova rẹ ha re ibhokhan Izrẹl khian, ọle da taman ele nin ene biẹ imọn bi imọn nesele kugbe ha zilo nyan Ebenọnkhiale ẹghe rẹ sẹ ẹghe. Tie Deuteronomy 6:6, 7, bha ha zilo nyan ọne inọnta nan:
-
Be uwẹ ha rẹ re obọ rẹkhan adia nọn ribhi ọne iBaibo nan yẹ?
Emhin eso nin bha ha sabọ lu sade bha lu oga azagba-uwa:
-
Bha kugbe muegbe ikolo oga.
-
Bha tie okha ọkpa nọn manman yẹẹ bha bhi Baibo, yẹ zilo nyan ọlẹn.
-
Ahamiẹn uwẹ mhọn imọn ne sẹyẹ dia khere-khere, noo ọkpa bhi emhin nan mhanmhan nin ibhokhan bhi jw.org rẹ man ele emhin.
-
Ahamiẹn uwẹ mhọn elasẹre, re ọkpa bhi ebe ne tẹmhọn elasẹre bhi jw.org rẹ ne ele zilo.
-
Bha sabọ kugbe lu arẹman ọsi okha ọkpa bhi Baibo.
-
Bha sabọ ghe ividio bhi jw.org yẹ zilo nyan ọlẹn.
ẸBHO ESO SABỌ YỌLE: “Ẹmhọn ne ribhi Baibo nọghọ gbe. Ibhokhan ida sabọ lẹn otọ ọle.”
-
Be uwẹ ha tayẹ?
EBI MHAN LUẸLE
Jehova guanọ nin enebiọmọn hoẹmhọn imọn nesele, gbega ele, yẹ ha man ele emhin. Ọle guanọ nin imọn ha hẹnmhọn nin ene biẹ ele yẹ ha mun ekpẹn nin ele. Ọle yẹ guanọ nin azagba-uwa kugbe ha ga ọle.
Uwẹ Be Yẹ Yere?
-
Be enebiọmọn ha rẹ ha man imọn nesele emhin yẹ, sẹyẹ ha gbega ele?
-
Be imọn ha rẹ rẹman yẹ ghe ele mun ekpẹn nin ene biẹ ele?
-
Elele nela mhan ha miẹn bhọ sade mhan mhanmhan ẹghe ọbhi otọ rẹ ha luẹ iBaibo uzana-uzana bọsi azagba-uwa?
FẸ ENE EMHIN NAN GHE
Be hi emhin eso nọn khẹke nin uwẹ man imọn nesẹ le, nin ele da wanre kiẹn imọn ne guẹ emhin?
Luẹ adia eso bhi Baibo ne ha rẹkpa uwẹ rẹ ha gbẹloghe ene biẹ uwẹ ne ki dọmanlẹn.
Fẹ ebe rẹkpa okpea ọkpa rẹ bẹẹ imọn nesọle nọnsẹn, arẹmiẹn ọle bha rẹ lẹn ebi a rẹ bẹẹ imọn yẹ.
Luẹ emhin nọn ha rẹkpa aba rẹ manman sikẹ imọn ikpea nesọle.
“Be Aba Ha Lu Nin Ọle Rẹ Manman Sikẹ Imọn Ikpea Nesọle?” (The Watchtower, November 1, 2011)
a Beji Baibo rẹman, nan rẹ re “adia” nin ọria iyi nan rẹ wo ha gbe ọle ugbe-ugbe la nan rẹ ha re obọ oya mun ọlẹn. Ebi ọ mundia nan hi, nan rẹ man ọria emhin yẹ rẹkpa ọle fidenọ bhi emhin nọn imhẹn nin ọle lu.—Proverbs 4:1.
Emhin Ebhebhe Ne Ha Yẹ Ti Uwẹ Bhọ
INỌNTA NIN ẸBHO KẸ NỌỌN
Bebhọ Iluẹmhin IBaibo?
Min ewanniẹn rẹji inọnta rẹji iluẹmhin iBaibo nin man nẹn ẹbho luẹ ọsọhẹ.
