Ẹghe nin Jehova rẹ man mhan, ọle da re unun nin mhan rẹ ha talọ. Ẹsele nọn khua khọnan. Ọkpakinọn, uwedẹ nin mhan rẹ noo ọne ẹsele nan be rẹtẹ ọle? Ehe, ọ wo rẹtẹ ọle! (Tie James 1:26.) Bhiriọ, be imhan ha rẹ ha talọ yẹ bhi uwedẹ nọn yẹẹ iJehova?

1. Unan ọta nela ọkhẹke nin mhan ha ta?

Baibo yọle: “Bha ha re izebhudu nin egbe, yẹ ha bọn egbe okhun.” (1 Thessalonians 5:11) Uwẹ be lẹn ọria soso nọn khẹke nin uwẹ re izebhudu nan? Be uwẹ ha sabọ lu nin uwẹ rẹ rẹkpa ọria nọn sẹriọ? Ọkhẹke nin uwẹ ji ọle lẹn ghe, ẹmhọn ọlẹn manman wo rẹtẹ uwẹ. Uwẹ sabọ rẹ taman ọlẹn emhin nọn re ẹmhọn ọlẹn ha yẹẹ uwẹ. Sẹyẹ, eje bunbun ribhi Baibo, nin uwẹ ha sabọ noo rẹ re izebhudu nin ọria. Yere ghe, ọ iyi ọta nin uwẹ tale ọkpa ha sabọ rẹso ọria, uwedẹ nin uwẹ rẹ tale dẹ yẹ sabọ rẹso ọle. Bhiriọ, dọnmhegbe rẹ ha re ẹkẹ-ẹjẹjẹ bi ifuẹkẹ rẹ talọ.​—Proverbs 15:1.

2. Unan ọta nela ọkhẹke nin mhan rẹban?

Baibo yọle nin mhan ‘hẹi ji ọta ne sankan-sankan dagbare bhi unun nọnsẹmhan.’ (Tie Ephesians 4:29.) Ọnan rẹman ghe, mhan ida ha ghunmhun ihẹn, la ta ẹmhọn nọn ha re ọria dọ ha viẹ egbe. Sẹyẹ, mhan ida ha ta ọta-ike la ha re ohoghe rẹ riia eria elin an.​—Tie Proverbs 16:28.

3. Be ha rẹkpa mhan rẹ ha ta ọta nọn gbale?

Ẹghe ne bunbun, ebi mhan ria bhi ọkhọle, ọle mhan ta dagbare. (Luke 6:45) Bhiriọ, ọkhẹke nin mhan dia ọkhọle nọnsẹmhan nọn ha ria ‘emhin ne khiale, emhin ne mhẹn, emhin nan hoẹmhọnlẹn, bi emhin ne gbale.’ (Philippians 4:8) Nin mhan rẹ sabọ ha ria ẹmhọn emhin ne sẹnian, ọkhẹke nin mhan re ẹwanlẹn ha zẹ emhin nin mhan rẹ re egbe re ahoho bi ẹbho nin mhan ne muobọ. (Proverbs 13:20) Ọ yẹ khẹke nin mhan ha ria ẹmhọn fo, mhan kuẹ tale. Ria ẹmhọn ebi ọta nin uwẹ ho nin uwẹ ta ha rẹ rẹso eria ebhebhe yẹ. Baibo yọle: “Ọta nan bha ria eria nyan fo ọkuẹsẹ a tale, inian ọ diabe ukpọghale nan di ọria bhi egbe. Sokpan, olanmhẹn ọsi ọria nọn wanlan re egbe danlan.”​—Proverbs 12:18.

 MANMAN LẸN OTỌLE NỌNSẸN

4. Hẹi wo ha mun unun fia beji uwẹ sabọ

Ẹgheso, mhan sabọ dunun ta ọta nọn bha gba. (James 3:2) Tie Galatians 5:22, 23, bha ha zilo nyan ene inọnta nan:

• Bhi ẹwẹ ene ikpẹ nan tẹmhọnlẹn, enela uwẹ ha bhii Jehova nọn rẹkpa uwẹ ha mhọnlẹn, beji uwẹ ha da sabọ ha dia olanmhẹn nọnsẹ? Be ene ikpẹ nan ha rẹ rẹkpa uwẹ yẹ?

Tie 1 Corinthians 15:33, bha ha zilo nyan ọne inọnta nan:

• Be ẹbho nin uwẹ ne muobọ, bi emhin nin uwẹ rẹ re egbe re ahoho ha rẹ sabọ rẹso uwedẹ nin uwẹ rẹ talọ yẹ?

Tie Ecclesiastes 3:1, 7, bha ha zilo nyan ọne inọnta nan:

• Ẹghela ọ ha rẹ khẹke nin uwẹ huẹan, la nin uwẹ guanọ ẹghe ọbhebhe rẹ ta ebi uwẹ ho nin uwẹ ta?

 5. Hẹi ha re unun riia eria ebhebhe a

6. Ha re ekpẹn ne ene ribhi azagba-uwa nọnsẹ talọ

 EBI MHAN LUẸLE

Ọta nin mhan ta dẹ sabọ re ẹbho ha ghọnghọn la si ọbalọ ji ele. Ọkhẹke nin mhan ha ria ẹmhọn fo mhan kuẹ tale. Ọ yẹ khẹke nin mhan lẹn ẹghe nọn mhẹn nẹ nin mhan ha rẹ tale, bi ebi mhan ha rẹ tale yẹ.

Uwẹ Be Yẹ Yere?

• Sounun bhi uwedẹ eso nin mhan ha rẹ sabọ re ọta nin mhan ta rẹkpa ẹbho.

• Unan ọta nela ọkhẹke nin mhan rẹban?

• Be ha rẹkpa mhan rẹ ha ta ọta ne gbale ẹghe rebhe?