ILUẸMHIN 53
Ji Emhin Nin Uwẹ Rẹ Re Egbe Re Ahoho Ha Yi Emhin Ne Ti Jehova Bhọ
“Osẹnobulua ọsi eghọnghọn,” ọle Jehova khin. (1 Timothy 1:11) Ọle guanọ nin mhan ha sọnyẹnmhẹn bhi iẹnlẹn. Ọ manman ti ọle bhọ sade mhan guanọ ẹghe rẹ koahu a. Bhi ọne iluẹmhin nan, mhan dẹ luẹ ebi mhan ha rẹ ha noo ẹghe nọnsẹmhan rẹ re egbe re ahoho yẹ, bhi uwedẹ nọn ha ti Jehova bhọ, yẹ re eghọnghọn ji mhan.
1. Be ọkhẹke nin mhan ria ẹmhọnlẹn sade mhan zẹ emhin nin mhan ha rẹ re egbe re ahoho?
Be yẹẹ uwẹ rẹ lu sade uwẹ koahu a? Ẹbho eso re ọne ẹghe nan rẹ tie ebe, kaehọ illo, ghe ifinmu, la fẹ emhin ghe bhi intanẹt. Ẹbho ebhebhe re ọne ẹghe rẹ deba imọẹ ele khiẹnlẹn. Ele sabọ dọ gua ẹdẹ la gbe igemu. Ọnọn hi ki rẹ khin nọn yẹẹ mhan, ọkhẹke nin mhan fẹghe si “emhin ne ha ti Ebeanlẹn mhan bhọ” nọn. (Ephesians 5:10) Ọkhẹke nin mhan gbẹlokotọ bhi emhin nin mhan rẹ re egbe re ahoho, ranmhude, emhin ne sọnnọn iJehova, ele bun nẹ bhi emhin nin ẹbho rẹ re egbe re ahoho ẹlẹnan—emhin bọsi ugbele, oghẹ, bi ikpẹbo. (Tie Psalm 11:5.) Be ha sabọ rẹkpa mhan rẹ zẹ iregbe-re-ahoho nọn mhẹn?
Ahamiẹn mhan mhọn imọẹ ne hoẹmhọn Jehova, ele dẹ sabọ rẹkpa mhan rẹ ha lu emhin esili, yẹ ha re emhin ne mhẹn rẹ re egbe re ahoho. Beji mhan ka luẹ bhi Iluẹmhin nọnzi 48, ‘mhan ha rẹkhan ọria nọn mhọn ẹwanlẹn khian, mhan ki yẹ ha mhọn ẹwanlẹn.’ Bhi obọ nọnkẹle, mhan ha deba eria ne bha hoẹmhọn Jehova ha muobọ, mhan “ki miẹn ikuan-egbe.”—Proverbs 13:20.
2. Bezẹle nọn da khẹke nin mhan mhọn ẹwanlẹn bhi eka ẹghe nin mhan noo rẹ re egbe re ahoho?
Aharẹmiẹn ọ iyi emhin nin Jehova hele mhan rẹ re egbe re ahoho, ọ sẹyẹ khẹke nin mhan mhọn ẹwanlẹn bhi eka ẹghe nin mhan noo rẹ re egbe re ahoho. Sade mhan bha lu iriọ, mhan ki kere ghe, ẹghe bha yẹ sẹ mhan rẹ lu emhin ne lu uhọnmhọn-emhin nẹ. Baibo yọle: “Bha ha noo ẹghe nọnsẹbha nọnsẹn.”—Tie Ephesians 5:15, 16.
MANMAN LẸN OTỌLE NỌNSẸN
Luẹ ebi mhan ha rẹ sabọ ha zẹ emhin ne mhẹn yẹ sade mhan ho nin mhan re egbe re ahoho.
3. Rẹban iregbe-re-ahoho ne sọnnọn iJehova
Bezẹle nọn da khẹke nin mhan re ẹwanlẹn zẹ emhin nin mhan ha rẹ re egbe re ahoho? Ghe ọne IVIDIO, bha ha zilo nyan ene inọnta nan:
-
Be igemu eso nin ẹbho gbe ẹlẹnan rẹ diabe igemu eso nin ibhokhan iRome ha gbe bhi ẹghe ẹdẹlẹ?
-
Bhi ọne ividio, be iDaniel luẹle rẹji emhin ne khẹke nin mhan rẹ ha re egbe re ahoho?
Tie Romans 12:9, bha ha zilo nyan ọne inọnta nan:
-
Be ẹmhọn nọn ribhi ọne ulọnlẹn nan ha rẹ sabọ rẹkpa mhan rẹ zẹ iregbe-re-ahoho nọn mhẹn yẹ?
Be hi emhin eso nin Jehova hele? Tie Proverbs 6:16, 17 bi Galatians 5:19-21. Bha ha tie ene Baibo fo, re ọne inọnta nan rẹ zilo nyan ene iBaibo kẹkẹ:
-
Bhi ẹwẹ emhin nan sounun ọlẹn bhi ene ulọnlẹn nan, ọnela uwẹ ha miẹn bhi emhin nin ẹbho rẹ re egbe re ahoho ẹlẹnan?
Inọnta ne ha rẹkpa uwẹ rẹ zẹ iregbe-re-ahoho nọn mhẹn
Nọọn egbe ẹ:
-
Emhin nọn sọnnọn iJehova be ribhi ọne emhin nin mẹn ho nin mẹn rẹ re egbe re ahoho?
-
Ẹghe nin mẹn ha noo bhọ dẹ be re ẹghe nọn khẹke nin mẹn rẹ lu emhin kpataki?
-
Ọ dẹ be rẹ mẹn deba ẹbho ne bha hoẹmhọn iJehova ha muobọ?
Ọria ha miẹn emhin nọn ha si ikuan-egbe ji ọle, ọle ki re egbe nẹ. Ọ yẹ khẹke nin mhan re egbe nẹ bhi iregbe-re-ahoho nọn hi ki rẹ khin, nin mhan riale ghe, ọ ida mhẹn mhan bhi egbe
4. Ha noo ẹghe nọnsẹ nọnsẹn
Ghe ọne IVIDIO, bha ha zilo nyan ọne inọnta nan:
-
Arẹmiẹn ọne obhio mhan nan rẹman bhi ọne ividio bha ha ghe emhin ne bha gba, be uwedẹ nin ọle rẹ ha noo ẹghe nọnsọle rẹ kiẹn idobolo rẹji ọle yẹ?
Tie Philippians 1:10, bha ha zilo nyan ọne inọnta nan:
-
Be ọne ulọnlẹn nan ha rẹ rẹkpa uwẹ yẹ, rẹ lẹn eka ẹghe nọn khẹke nin uwẹ ha rẹ ha re egbe re ahoho?
5. Zẹ iregbe-re-ahoho nọn mhẹn
Arẹmiẹn emhin eso nin ẹbho rẹ re egbe re ahoho iyẹẹ Jehova, emhin ne bunbun ribhọ ne yẹẹ ọle nin mhan ha sabọ rẹ re egbe re ahoho. Tie Ecclesiastes 8:15 bi Philippians 4:8, bha ha zilo nyan ọne inọnta nan:
-
Be hi emhin esili eso nin uwẹ rẹ re egbe re ahoho?
Uwẹ dẹ sabọ re egbe re ahoho bhi uwedẹ nọn yẹẹ iJehova
ẸBHO ESO SABỌ YỌLE: “Aharẹmiẹn ghe ugbele, oghẹ, la ilọnmhọn ikpẹbo ribhi emhin nin mẹn rẹ re egbe re ahoho, ọ iyi emhin ebe, ranmhude, mẹn ilu ene emhin.”
-
Be uwẹ ha taman ọria nọn sẹriọ?
EBI MHAN LUẸLE
Jehova guanọ nin mhan ha re emhin ne mhẹn rẹ re egbe re ahoho.
Uwẹ Be Yẹ Yere?
-
Unan iregbe-re-ahoho nela ọkhẹke nin Kristiẹn rẹban?
-
Bezẹle nọn da khẹke nin mhan mhọn ẹwanlẹn bhi eka ẹghe nin mhan noo rẹ re egbe re ahoho?
-
Bezẹle nin uwẹ da guanọ nin uwẹ re emhin ne yẹẹ iJehova ha re egbe re ahoho?
FẸ ENE EMHIN NAN GHE
Họla ọkhẹke nọn rẹkpa uwẹ rẹ zẹ emhin nin uwẹ ha rẹ ha re egbe re ahoho?
Fẹ ebe ha rẹkpa uwẹ rẹ zẹ emhin ne mhẹn nin uwẹ ha rẹ ha re egbe re ahoho.
“Ebi Uwẹ Rẹ Re Egbe Re Ahoho Be Mhẹn Uwẹ bhi Egbe?” (The Watchtower, October 15, 2011)
Bhi okha nọn yọle “Mẹn Bha Yẹ Ha Zọn Eria,” fẹghe ebezẹle nin okpea ọkpa da fi emhin nin ọle rẹ re egbe re ahoho denọ.
“Ẹmhọanta Nọn Ribhi Baibo Fi Iẹnlẹn ọsi Eria Denọ” (The Watchtower, February 1, 2010)
Ghe ọne ividio nan, nin uwẹ daghe ebe rẹkpa okhuo ọkpa rẹ rẹban ifinmu nan da tẹmhọn azẹn bi oso.
Emhin Ebhebhe Ne Ha Yẹ Ti Uwẹ Bhọ
INỌNTA NIN ẸBHO KẸ NỌỌN
Bebhọ Iluẹmhin IBaibo?
Min ewanniẹn rẹji inọnta rẹji iluẹmhin iBaibo nin man nẹn ẹbho luẹ ọsọhẹ.
