ILUẸMHIN 60

Sẹyẹ Ha Lu Re Alo

Khue

Sẹyẹ Ha Lu Re Alo

Rẹ na bhi ẹghe nin uwẹ rẹ munhẹn ha re ọne ebe nan luẹ Baibo, rẹ dọ sẹ ọne ẹghe nan, uwẹ wo manman dọ luẹ emhin ne bunbun rẹji Jehova. Emhin nin uwẹ luẹle da rẹkpa uwẹ rẹ manman dọ hoẹmhọn iJehova, rẹ sẹbhọ ghe, uwẹ da zẹ nin uwẹ rẹ re egbe guẹ nanlẹn yẹ mianmẹn. Aharẹmiẹn uwẹ bha sẹ mianmẹn, mhan lẹnmhin ghe, uwẹ mhọn ọlen bhi ọkhọle nin uwẹ rẹ mianmẹn bhi ẹghe nọn bha yẹ ree gbe. Ọkpakinọn, lẹn sẹbhọ ghe, uwẹ ha rẹ mianmẹn fo, uwẹ dẹ sẹyẹ ha dọnmhegbe nin uwẹ rẹ ha ziẹn ikolu nin uwẹ bi Jehova ko mhọnlẹn rẹ sẹbhi ighegheghe. Be uwẹ ha rẹ lu ọnan yẹ?

1. Be uwẹ ha lu nin uwẹ rẹ ha ziẹn ikolu nin uwẹ bi Jehova ko mhọnlẹn?

Ọkhẹke nin mhan wẹnna kaka nin mhan rẹ ha ziẹn ikolu nin mhan bi Jehova ko mhọnlẹn. Bezẹle? Ranmhude mhan bha guanọ nin ‘mhan sibhi’ ibo nọnsi Jehova re. (Hebrews 2:1) Be ha sabọ rẹkpa mhan rẹ ha ga iJehova nọnsẹn? Ọkhẹke nin mhan ha sasa bhi iwẹnna itẹmhọn Osẹnobulua, sẹyẹ ha guanọ uwedẹ ebhebhe nin mhan rẹ lu iwẹnna kẹkẹ bhi ẹkẹ oga. (Tie Philippians 3:16.) A bha miẹn emhin nọn mhẹn gbera nin mhan rẹ re iẹnlẹn nọnsẹmhan ga iJehova!—Psalm 84:10.

2. Emhin ọbhebhe nela ọkhẹke nin uwẹ sẹyẹ ha lu?

Arẹmiẹn uwẹ dẹ kẹ luẹ ọne ebe nan fo, lẹn sẹbhọ ghe, rẹ ha khian, uwẹ dẹ sẹyẹ ha luẹ emhin ne ha rẹkpa uwẹ rẹ ha nyẹnlẹn bọsi Kristiẹn ọsaje. Baibo yọle nin mhan “mun akpa ọsọgbọn yọ.” (Ephesians 4:23, 24) Beji uwẹ ha rẹ sẹyẹ ha luẹ iBaibo yẹ yo ikolo oga, uwẹ ki ha luẹ emhin ọgbọn ne bunbun rẹji Jehova bi ikpẹ esili nesọle. Ha gbẹlokotọ bhi uwedẹ kẹkẹ nin uwẹ ha rẹ manman ha re egbe khọkhọ iJehova bhi iẹnlẹn nọnsẹ. Ahamiẹn eje soso ribhọ nin uwẹ ha da fi uwedẹ iẹnlẹn nọnsẹ denọ, lu ọle nin uwẹ rẹ re iJehova ha ghọnghọn.

3. Be iJehova ha rẹ rẹkpa uwẹ yẹ rẹ ha lu re alo?

Baibo yọle: “Osẹnobulua . . . dẹ tobọle man uwẹ emhin sotọ. Ọle dẹ mun uwẹ deziẹn, ọle dẹ yẹ mun uwẹ zeze, ọle dẹ mun uwẹ mundia nọnsẹn.” (1 Peter 5:10) Ẹghe-ẹghe mhan rebhe rẹ miẹn edọnmhẹn. Ọkpakinọn, Jehova hi ọnọn re ahu nin mhan rẹ khọn ene edọnmhẹn miotọ. (Psalm 139:23, 24) Ọle vele ghe, ọle dẹ re ahu nin mhan, yẹ rẹkpa mhan ha mhọn ọtibhọ nin mhan rẹ ga ọle nọnsẹn.—Tie Philippians 2:13.

MANMAN LẸN OTỌLE NỌNSẸN

Luẹ ebi uwẹ ha lu, nin uwẹ rẹ sẹyẹ ha ziẹn ikolu nin uwẹ bi Jehova ko mhọnlẹn, bi erọnmhọn nin uwẹ ha miẹn bhọ.

4. Ha ne Jehova talọ, uwẹ ha yẹ ha ka ọle ehọ

Baibo nin uwẹ luẹ bi erọnmhọn nin uwẹ nan, ele rẹkpa uwẹ rẹ ha yi ọmọẹ iJehova. Be ene emhin nan ha rẹ sabọ rẹkpa uwẹ rẹ sẹyẹ ha sikẹ ọle yẹ?

Tie Psalm 62:8, bha ha zilo nyan ọne inọnta nan:

Be uwẹ ha fidenọ bhi uwedẹ nin uwẹ rẹ nan erọnmhọn, beji uwẹ ha da sabọ manman sikẹ iJehova?

Tie Psalm 1:2, bha ha zilo nyan ọne inọnta nan:

Be uwẹ ha lu sade uwẹ tie iBaibo, nọn ha rẹkpa uwẹ rẹ manman ha miẹn elele bhọ, yẹ ha sikẹ iJehova?

Be ha rẹkpa uwẹ rẹ manman ha miẹn elele bhi Baibo nin uwẹ luẹ? Nin uwẹ rẹ miẹn emhin eso ne ha rẹkpa uwẹ, ghe ọne IVIDIO, bha ha zilo nyan inọnta ne rẹkhan ọlẹn.

VIDIO: Manman Ha Luẹ IBaibo Nọnsẹn (5:22)

Be hi emhin eso nan rẹman bhi ọne ividio, nin uwẹ guanọ nin uwẹ yẹ ha lu?
Uhọnmhọn-ọta nela uwẹ guanọ nin uwẹ manman luẹ emhọn ọlẹn bhi Baibo?

5. Mhanmhan emhin nin uwẹ ha khu ọi bhi oga nọnsi Jehova

Ahamiẹn uwẹ mhanmhan emhin nin uwẹ ha khu ọi bhi oga nọnsi Jehova, ọ dẹ rẹkpa uwẹ rẹ ha lu re alo. Ghe ọne IVIDIO, bha ha zilo nyan inọnta nọn rẹkhan ọlẹn.

VIDIO: Uwedẹ Iẹnlẹn Nọn Mhẹn Nẹ (3:31)

Beji a rẹman bhi ọne ividio, elele nela Cameron miẹn ranmhude ọle mhọn emhin nin ọle ha khu ọi bhi ẹkẹ oga?

Ọ iyi ẹbho rebhe ha sabọ diọbhi agbaẹbho ọbhebhe dọ ha lu iwẹnna itẹmhọn Osẹnobulua. Ọrẹyiriọ, ọdeọde bhi ẹwẹ imhan dẹ sabọ mhanmhan emhin nin ọle ha sabọ khu ọi bhi ẹkẹ oga. Tie Proverbs 21:5, bha ha zilo nyan emhin eso nin uwẹ ha sabọ khu ọi . . .

bhi ẹkẹ agbotu.
bhi iwẹnna itẹmhọn Osẹnobulua.

Be adia nọn ribhi ọne Baibo nan ha rẹ sabọ rẹkpa uwẹ rẹ mun ene emhanmhan nan sẹ yẹ?

Emhin eso nin uwẹ ha sabọ khu ọi

Manman guẹ ebi a rẹ nan erọnmhọn yẹ.
Tie Baibo rebhe fo.
Lẹn ọrebhe bhi ẹkẹ agbotu.
Munhẹn ha man ọria Baibo.
Lu iwẹnna ọkanẹfan ọsi ẹghe eso la ọsi ẹghe rebhe.
Ahamiẹn okpea uwẹ khin, zegbere nin uwẹ rẹ kiẹn ọkpa bhi ene zẹ sikẹ ene ewanlẹn.

6. Sọnyẹnmhẹn bhi ighegheghe!

Tie Psalm 22:26, bha ha zilo nyan ọne inọnta nan:

Be uwẹ ha lu nin uwẹ rẹ sabọ ha sọnyẹnmhẹn bhi ejayenan nian rẹ sẹbhi ighegheghe?

EBI MHAN LUẸLE

Sẹyẹ ha ziẹn ikolu nin uwẹ bi Jehova ko mhọnlẹn, uwẹ ha mhanmhan emhin nin uwẹ ha khu ọi bhi ẹkẹ oga. Uwẹ ha lu ọnan, uwẹ dẹ sabọ ha sọnyẹnmhẹn bhi ejayenan nian rẹ sẹbhi ighegheghe.

Uwẹ Be Yẹ Yere?

Be re uwẹ rẹọbhọ ghe, Jehova dẹ rẹkpa uwẹ rẹ ha ga ọle nọnsẹn?
Be uwẹ ha lu nin uwẹ rẹ ha ziẹn ikolu nin uwẹ bi Jehova ko mhọn?
Ahamiẹn uwẹ mhanmhan emhin nin uwẹ ho nin uwẹ khu ọi bhi ẹkẹ oga, be ọnan ha rẹ rẹkpa uwẹ ha lu re alo yẹ?

Gbẹn ẹdẹ nin uwẹ luẹ ọne ebe nan fo ọbhi enan:

Bhi ẹkẹ ukpe nọn vade

Dọnmhegbe rẹ tie ene ebe nan veva: Draw Close to Jehovah bi “Come Be My Follower.” Emhin nin uwẹ ha luẹ bhi ene ebe nan dẹ rẹkpa uwẹ rẹ manman ha sikẹ Jehova bi ọmọn nọnsọle.