EBEZẸLE NỌN DA YI EMHIN NỌN KHẸKE: Ẹbho nin mhan man ele iBaibo ha muegbe khẹ iluẹmhin Baibo nọnsele, ọ ki lẹkhẹ nin ele rẹ ha lẹn otọ emhin nin mhan man ele le, ele ki yẹ ha ye emhin nin ele luẹle re. Bhiriọ ọ ki ha rẹkpa ele rẹ ha lu re alo. Ele ha rẹ gbegberuẹ bhi amẹn fo, ele dẹ sẹyẹ ha muegbe khẹ ikolo oga bi itẹmhọn Osẹnobulua nin ele da sabọ “ha babegbe” nọnsẹn. (Mt 25:13) Bhiriọ, ele ha lẹn ebi a rẹ luẹ iBaibo yẹ, nin ele yẹ guẹ ebi arẹ re ẹghe ọbhi otọ rẹ lu ọle yẹ, ọ ki rẹkpa ele bhi ẹdagbọn nọnsele. Rẹ nanbhi ẹghe nin mhan rẹ munhẹn ha man ọria iBaibo, ọkhẹke nin mhan ha man ọlẹn ebi a rẹ muegbe khẹ iluẹmhin Baibo yẹ.

EBI A RẸ LU ỌLE YẸ:

• Ha yi ijiẹmhin ọsi esili. (Ro 2:21) Ha ria ẹmhọn ọne uwẹ man ọle iBaibo sade uwẹ muegbe iman-emhin iBaibo. (km 11/15 3) Ji ọne ọria daghe ebi uwẹ rẹ re iyaman ọbhi ewanniẹn yẹ bhi ẹkẹ ebe nọnsẹ

• Rẹkpa ọne ọria rẹ muegbe. Bha ha munhẹn ko ha luẹ iBaibo, ji ọne ọria lẹn ghe nanrẹ ha muegbe khẹ iluẹmhin Baibo, deba iluẹmhin Baibo nin mhan nanlẹn lu. Yẹ ji ọne ọria lẹn elele nin ọle ha miẹn bhọ. Nin ọne ọria zilo ebi ọle ha rẹ ha miẹn ẹghe rẹ ha muegbe yẹ. Ibhio mhan eso ki mun ebe nọnsele nin ele yaman ọi nin ọne ọria nọn luẹ iBaibo sade ele ko luẹ iBaibo. Bhiriọ, ọne ọria ki daghe ebezẹle nọn da khẹke nin ọle yẹ rẹ ha muegbe ọbhi otọ. Khuẹmhẹn ọne ọria sade ọle muegbe ọbhi otọ

• Man ọne ọria ebi a rẹ muegbe ọbhi otọ yẹ. Ele a la munhẹn, ọle ibhio mhan eso rẹ noo ẹghe iluẹmhin iBaibo rẹ man ọne ọria ebi a rẹ muegbe khẹ iluẹmhin Baibo yẹ