Anagbera nin Jesu ha lu kike dẹ ha yi emhin kpataki. Ranmhude ọle lẹnmhin ghe ọle dẹ kẹ yu, ọle da mhanmhanlẹn nin ọle deba edibo nesọle le ebale ọsi Anagbera yẹ mun Ayere ọsi Uyumhin Nọnsọle gbọ nan ha lu ukpe-ukpe. Bhiriọ, ọle da je iPeter bi John nin ele dọ mhanmhan ọne ugha nin ele ha rẹ lu ọne iluemhin ọbhi otọ. (Lu 22:​7-13; fẹ ifoto nọn ribhi odalo ọne ebe nan ghe.) Ọnan rẹman mhan ghe, ọkhẹke nin mhan muegbe ọbhi otọ khẹ Ayere ọsi Uyumhin Nọnsi Jesu nan ha lu bhi March 27. Asabọmiẹn agbotu kẹkẹ mhanmhan ọria nọn ha re ọne ọta man ọbhi otọ, ekala bi anyọn nan ha noo, bi emhin ebhebhe. Ọkpakinọn, be bhọ ọdeọde bhi ẹwẹ mhan ha lu nin ọle rẹ muegbe khẹ ọne Ayere?

Ha bọn ọtibhọ nin uwẹ mhọn da uyumhin nọnsi Jesu okhun. Tie iBaibo nan yọle nan tie bhi ẹghe Ayere, uwẹ ha yẹ ria eria nyan ọlẹn. Uwẹ dẹ miẹn emhanmhan nan rẹ tie ọle bhi ebe natiọle, Ha Luẹ IBaibo Ukpẹdẹ-ukpẹdẹ. Uwẹ dẹ yẹ miẹn emhanmhan ọbhebhe bhi Appendix B12A, Appendix B12B bhi ẹkẹ iNew World Translation of the Holy Scriptures nọn la dagbare. (Sẹyẹ fẹ Ebe Ọsi Ikolo​—Unyẹnmhin bi Iwẹnna Oga Nọnsẹmhan ọsi April 2020 ghe.) Azagba-uwa dẹ yẹ sabọ miẹn uhọnmhọn-ọta kẹkẹ bhi ẹkẹ Watch Tower Publications Index la Research Guide for Jehovah’s Witnesses ne tẹmhọn ebezẹle nin uyumhin nọnsi Jesu da yi emhin kpataki. Ele dẹ sabọ noo ene uhọnmhọn-ọta nan bhi oga azagba-uwa nọnsele.

Tie ẹbho vae bhi ọne Ayere. Manman lu eka nin uwẹ ha sabọ lu rẹ tie ẹbho vae bhi ọne Ayere. Ria ẹmhọn ẹbho nin uwẹ ha sabọ tie vae. Ẹbho bọsi afikie yo nesẹ, ẹbho nin uwẹ ka rẹ ha man ele iBaibo, imọẹ nesẹ, bi ene ibha ko ribhi azagba-uwa. Ene ewanlẹn dẹ yẹ sabọ mhanmhanlẹn nin ele tie ẹbho ne iyẹ sasa bhi oga vae bhi ọne Ayere. Ahamiẹn ọria nin uwẹ re ebe nan iribhi idunmhun nin uwẹ da nyẹnlẹn, uwẹ dẹ sabọ nabhi wẹbsait nọnsẹmhan guanọ ẹghe bi eji a ha da lu ọne Ayere nọn sikẹ ọle nẹ. Piẹn ẸMHỌN MHAN bhi eji a ka sẹ bhi jw.org, uwẹ ha diọbhi “Ayere.”

Emhin ọbhebhe nela mhan ha sabọ lu nin mhan rẹ muegbe khẹ ọne Ayere?