ỌSI OKHUO BI ỌDỌ
1: Asun-rẹkhan
EBI A RE ỌLE TA
Okhuo bi ọdọ ne sun rẹkhan egbe lẹnmhin ghe uu ọkpa ha sabọ wa ele a. Ranmhude ọnan, ofẹn imun ele ghe emhin ọbhebhe dẹ sabọ wa ele a. Ọne okhuo bi ọdọ wo rẹọbhọ ghe ọzeva ọle ida ze ọle obọ aharẹmiẹn emhin kaka.
Okhuo bi ọdọ eso wo gheghe kpaka bhi ibọdọ bi ireokhuo nọnsele, ranmhude azagba-uwa nọnsele la imọẹ ele ida re obọ bhọ nin ele rẹ sọebea. Ọkpakinọn, nin okhuo bi ọdọ rẹ sun rẹkhan egbe ranmhude oyẹẹ bi ekpẹn nin ele mhọn da egbe, ọle mhẹn nẹ.
ADIA NỌN RIBHI BAIBO: “Ọdọ hẹi zẹ amhẹn ọle obọ.”—1 Corinthians 7:11.
“Uwẹ ha muegbe nin uwẹ rẹ sun rẹkhan okhuo ẹ la ọdọ uwẹ, uwẹ ida ji ebi ọle lu kẹ ha re ẹkẹ khọ uwẹ. Uwẹ ki jẹje ha rẹhunmhan ọlẹn, yẹ jẹje ha bhii nin ọle rẹhunmhan uwẹ. Uwẹ ki ha ghe ọnọghọ ne zegbere bọsi emhin nin bha ha koko khọn, ọ iyi bọsi emhin nọn ha re ibha veva wa-egbea.”—Micah
EBEZẸLE NỌN DA KHẸKE
Ahamiẹn ọnọghọ zegbere, okhuo bi ọdọ ne imhọn asun-rẹkhan ki ha riale, ‘Ọ iyi ọne okhuo nan mẹn ha rẹ re, la ọ iyi ọne okpea nan mẹn ha rẹ bo.’ Ele ki ha guanọ uwedẹ nin ele ha rẹ sibhi ọne ibọdọ bi ireokhuo re.
“Ọbhọ kuẹ sẹ ẹbho eso bọ ọdọ la re okhuo, ele mhọn ọlẹn bhi ọkhọle fo ghe ahamiẹn emhin bha khian nọnsẹn bhi ibọdọ bi ireokhuo nọnsele, ele ki sọebea. Ahamiẹn ọria mhọn ọkhọle nọn sẹ inian, ọ rẹman ghe ọle bha ka muegbe khẹ nin ọle rẹ sun rẹkhan ọdọ ọle la okhuo ọle.”—Jean
EBI UWẸ HA SABỌ LU
FẸ EGBE Ẹ GHE
Sade uwẹ bi ọdọ ẹ la okhuo ẹ ko van . . .
-
Uwẹ be yọle sade uwẹ lẹnmhin nọn, uwẹ hẹi rẹ bọ ọle la re ọle?
-
Uwẹ be re ọkhọle nọnsẹ riale ghe uwẹ bi okhuo ọbhebhe la okpea ọbhebhe ko sọnyẹnmhẹn?
-
Uwẹ be taman ọdọ uwẹ la okhuo ẹ, “Mẹn dẹ kpanọ zẹ uwẹ obọ” la “Mẹn dẹ dọ guanọ ọria ọbhebhe nọn hoẹmhọn mẹn”?
Ahamiẹn ehe hi ewanniẹn nọnsẹ rẹji ọsoso bhi ene inọnta nan, ọkhẹke nin uwẹ ziẹn asun-rẹkhan nọnsẹ nian.
DEBA OKHUO Ẹ LA ỌDỌ Ẹ ZILO NYAN ENE INỌNTA NAN
-
Asun-rẹkhan nin mhan mhọn da egbe be yẹ ziẹn? Ahamiẹn ọ bha yẹ ziẹn, bezẹle?
-
Be imhan ha lu nin mhan rẹ ziẹn asun-rẹkhan nin mhan mhọn da egbe?
EMHIN NE HA RẸKPA UWẸ
-
Ẹghe rẹ sẹ ẹghe, gbẹn obhi ebe ji okhuo ẹ la ọdọ rẹ taman ọlẹn ghe uwẹ hoẹmhọn ọlẹn
-
Mun ifoto ọsi okhuo ẹ la ọdọ ẹ ọbhi uke itebu bhi isi iwẹnna nọnsẹ nin uwẹ rẹ rẹman ghe uwẹ muegbe nin uwẹ rẹ sun rẹkhan ọlẹn
-
Ha re ifoni rẹ tie okhuo ẹ la ọdọ ẹ sade ibha iko ribhi ijanlẹn ọkpa
ADIA NỌN RIBHI BAIBO: “Ebi Osẹnobulua diẹn kugbe, oria soso hẹi waa ọle a.”—Matthew 19:6.
