ỌSI ELASẸRE
10: Ha Yi Ọria Nan Gbaẹkẹ Ọle
EBI A RE ỌLE TA
Ọria nan gbaẹkẹ ọle, ọle ene biẹ ọle, ikolu nesọle bi ene ribhi eji ọle da wẹnna sabọ mun udu nyan. Ọria nan gbaẹkẹ ọle re obọ rẹkhan uhi, mun ive nesọle sẹ, yẹ ta ẹmhọanta ẹghe rebhe.
EBEZẸLE NỌN DA KHẸKE
Ahamiẹn uwẹ guanọ nin ene biẹ uwẹ manman ha re isẹhoa nin uwẹ, lẹn sẹbhọ ghe uwẹ dẹ ha yi ọria nan gbaẹkẹ ọle.
“Uwedẹ nin uwẹ rẹ re ẹwanlẹn lu emhin aharẹmiẹn uwẹ iribhi eji ene biẹ uwẹ ye, ọle uwẹ ha rẹ rẹman ele ghe, uwẹ iyẹ yi obhokhan. Ọnan hi emhin nọn ha rẹ ele gbaẹkẹ uwẹ.”—Sarahi.
ADIA NỌN RIBHI BAIBO: “Bha ha rẹman unan ọria nin bha khin.”—2 Corinthians 13:5.
EBI UWẸ HA SABỌ LU
Ebi a gbẹn ọbhi otọle nan dẹ rẹkpa uwẹ sade uwẹ guanọ nan manman gbaẹkẹ uwẹ, la sadẹ uwẹ guanọ nin eria ne bha yẹ gbaẹkẹ uwẹ kie gbaẹkẹ uwẹ.
Ha ta ẹmhọanta. Uwẹ ha bha ohoghe, ẹbho iyẹ da sabọ gbaẹkẹ uwẹ. Sokpan, ahamiẹn ọria nọn ta emhọanta bhi emhin rebhe uwẹ khin, ẹbho ki sabọ ha gbaẹkẹ uwẹ.
“Emhin rebhe ha dia nọnsẹn, ọ wo lẹkhẹ nan rẹ ta ẹmhọanta. Ọkpakinọn uwẹ ha ta ẹmhọanta bhi idia nọn ha re idobọ nọnsẹ man, ẹbho ki manman ha gbaẹkẹ uwẹ.”—Caiman.
ADIA NỌN RIBHI BAIBO: “Beji mhan rẹ guanọ nin mhan ha ta ẹmhọanta bhi emhin rebhe.”—Hebrews 13:18.
Ha yi ọria nan sabọ mun ọkhọle nyan. Ene bunbun bhi ẹbho ne re ọria bhi iwẹnna bhi otọ United States da yọle ghe, unan ọria nin ele guanọ nin ele re iwẹnna nan hi, ọria nan sabọ mun ọkhọle nyan. Bhiriọ, uwẹ ha kiẹn ọria nọn sẹ iriọ nian, uwẹ dẹ miẹn elele bhọ bhi ẹghe odalo.
“Ahamiẹn mẹn bha mundia nin ene biẹ mẹn re unun taman mẹn fo mẹn kuẹ dọ miẹnsọn nọn khẹke mẹn, ọ ki re ele lẹn ghe mẹn ki wo wanlan. Ọnan ki wo re ele manman gbaẹkẹ mẹn.”—Sarah.
ADIA NỌN RIBHI BAIBO: “Mẹn rẹọbhọ ghe uwẹ dẹ lu rẹkhan emhin nin mẹn tale, . . . mẹn lẹnmhin ghe uwẹ bhọ dẹ lu gbera eka nin mẹn tale.”—Philemon 21.
Ha mhọn iziẹngbe. Ọ sabọ lẹkhẹ nin ẹbho rẹ daghe ọle ghe uwẹ wanre bhi egbe, ọkpakinọn ọ dẹ re ẹghe nin ele rẹ lẹn ghe uwẹ ki wanlan. Ọnan zẹle nọn da khẹke nin uwẹ ha mhọn iziẹngbe.
“Ọ iyi okpemhin nin uwẹ lu osukpa ha re ene biẹ uwẹ bi ẹbho nekẹle ha gbaẹkẹ uwẹ. Sokpan, uwẹ dẹ wo ha lu emhin nọn khẹke ẹghe rebhe nin ele da sabọ gbaẹkẹ uwẹ.”—Brandon.
ADIA NỌN RIBHI BAIBO: ‘Bha re iziẹngbe hin egbe bha.’—Colossians 3:12.
