ỌSI ELASẸRE
11: Ha Yi Ọria Nọn Wẹnna Kaka
EBI A RE ỌLE TA
Ẹbho ne wẹnna kaka ire egbe nẹ bhi ẹsọn. Ele wẹnna kaka nin ele da sabọ gbẹloghe egbe ele yẹ rẹkpa ẹbho. Ele bhọ muegbe nin ele rẹ miẹnsọn nin ẹbho ne bunbun re ẹlo gbe a.
EBEZẸLE NỌN DA KHẸKE
Bhi ọsi ẹmhọanta, ọria ida sabọ khi-abọ bhi ọne agbọn nan, nan miẹn ghe ọle bha lu emhin soso, ranmhude ebi a ha lu vuọn otọ vuọn okhun. Ahamiẹn uwẹ wo sabọ wẹnna kaka bhi ọne agbọn nan nọn ida yẹẹ ẹbho rẹ wẹnna kaka, ọ ki wọ rẹkpa uwẹ bhi iẹnlẹn.—Ecclesiastes 3:13.
“Mẹn dọ kere ghe ahamiẹn uwẹ wẹnna kaka, uwẹ ki ha ghọnghọn, ẹmhọn egbe ẹ ki ha ti uwẹ bhọ. Ọne eghọnghọn nan zẹle nọn da yẹẹ mẹn rẹ ha wẹnna kaka. Ẹbho ha lẹn uwẹ bii ọria nọn sabọ wẹnna kaka, ọ ki re ele ha mun ekpẹn nin uwẹ.”—Reyon.
ADIA NỌN RIBHI BAIBO: “Elele ribhi iwẹnna nọn kaka rebhe.”—Proverbs 14:23.
EBI UWẸ HA SABỌ LU
Ha re ẹlo esili rẹ ghe iwẹnna. Ene emhin nan ha tẹmhọn ọlẹn bhi otọle nan dẹ rẹkpa uwẹ rẹ ha lu iriọ.
Ji ọ ha ti uwẹ bhọ rẹ ha lu iwẹnna nọnsẹ nọnsẹn. Aharẹmiẹn ẹsọn-uwa uwẹ miẹn, ẹsọn nan mun nin uwẹ lu bhi isiku nọn, la ẹsọn bhi isi iwẹnna nọn, dọnmhegbe nin uwẹ rẹ lu ọle nọnsẹn. Re egbe rebhe miẹn ọne ẹsọn. Uwẹ ha rẹ guẹ ebi a rẹ lu emhin yẹ, sẹyẹ ha guanọ uwedẹ nin uwẹ ha rẹ lu ọle nọnsẹn gbera uwedẹ nin uwẹ ka rẹ lu ọle khẹ. Beji uwẹ ha rẹ manman ha guẹ iwẹnna nọnsẹ nọnsẹn, uwẹ ki manman ha sọnyẹnmhẹn bhọ.
ADIA NỌN RIBHI BAIBO: “Uwẹ be sẹ ka miẹn okpea nọn manman guẹ iwẹnna nọnsọle? Bhi odalo enijie ọle ha da mundia; ọle ida mundia bhi eji ikpea khọnkhan yẹ.”—Proverbs 22:29.
Ria ẹmhọn ẹbho nin uwẹ ha sabọ rẹkpa. Ahamiẹn uwẹ miẹn ẹsọn nọnsẹ nọnsẹn, ẹbho ebhebhe ki miẹn elele bhọ. Bhi ọsi ijiẹmhin, ahamiẹn ghe uwẹ miẹn ẹsọn-uwa nọnsẹn, uwẹ ki re ẹsọn lẹkhẹ nin eria nekẹle bhi azagba-uwa nọnsẹ.
ADIA NỌN RIBHI BAIBO: “A ha re emhin sibhi obọ re, ọle eghọnghọn ye gbera a ha miẹn emhin bhi obọ.”—Acts 20:35.
Lu gbera eka nan yọle nin uwẹ lu. Nin uwẹ rẹ gheghe lu eka nan mun nin uwẹ yẹ nẹgbe, dọnmhegbe lu gbera ọle. Uwẹ ha lu iriọ, uwẹ ki ha ghọnghọn, ranmhude, uwẹ tobuwẹ zẹ nin uwẹ rẹ lu gbera eka nan yọle nin uwẹ lu. Ọ iyi ọria sua uwẹ ọbhọ.—Matthew 5:41.
ADIA NỌN RIBHI BAIBO: “Emhin esili nin uwẹ lu ki ha yi emhin nọn na ọkhọle nọnsẹ vae, ọ iyi emhin nan sua uwẹ rẹ lu.”—Philemon 14.
Ha lu emhin ọbhi oleghe. A ha yọle ghe ọria manman wẹnna kaka, ọnin bha rẹman ghe ọle dẹ ha re ẹsọn gbe egbe. Ọle dẹ ha lu emhin ọbhi oleghe. Ọle ha wẹnna kaka, ọle ki yẹ guanọ ẹghe nin ọle ha rẹ koahua.
ADIA NỌN RIBHI BAIBO: “Nan rẹ koahua khere, ọle mhẹn nẹ nan rẹ re ẹsọn gbe egbe a, bi nan rẹ khu rẹkhan ahoho.”—Ecclesiastes 4:6.
