ỌSI ELASẸRE
9: Unan Ọria Nin Uwẹ Khin
EBI A RE ỌLE TA
Ọ igheghe yi elin ẹn bi ebi uwẹ diayẹ bhi ẹlo a rẹ lẹn unan ọria nin uwẹ khin. Uwedẹ nin uwẹ rẹ lu emhin, ebi uwẹ rẹọ i bi ikpẹ esili nin uwẹ mhọnlẹn deba emhin nan rẹ lẹn unan ọria nin uwẹ khin. Bhi ọsi ẹmhọanta, unan ọria nin uwẹ khin, ọle hi uwedẹ nin uwẹ rẹ lu emhin bi ọria nin uwẹ khin bhi ọkhọle.
EBEZẸLE NỌN DA KHẸKE
Ahamiẹn uwẹ lẹn unan ọria nin uwẹ gene khin, uwẹ ki ha lu rẹkhan ebi uwẹ rẹọ i. Uwẹ ida ji ibo ẹ ha taman uwẹ ebi uwẹ ha lu.
“Ẹbho ne bunbun ẹlẹnan diabe ọmọn-alaba nan rẹ re ukpọn wa. Ọ iyi ele tobele zẹ ukpọn nan ha ne yọ ele.”—Adrian.
“Mẹn wo dọnmhegbe rẹ lu rẹkhan emhin nin mẹn reọ i, aharẹmiẹn ọ bha lẹkhẹ nin mẹn ẹgheso. Uwedẹ nin imọẹ mẹn rẹ lu emhin bi uwedẹ nin mẹn rẹ lu emhin sade mẹn ribhi ẹwẹ ele, ọle mẹn rẹ lẹn si imọẹ ọsaje ele gene khin.”—Courtney
ADIA NỌN RIBHI BAIBO: “Bha hẹi yẹ ha re egbe khọkhọ uwedẹ nin ọne agbọn nan rẹ lu emhin. Ọkpakinọn, bha fi ọkhọle denọ.”—Romans 12:2.
EBI UWẸ HA SABỌ LU
Ria eria nyan emhin nin uwẹ sabọ lu nọnsẹn, eji uwẹ da wẹghẹ, bi emhin nin uwẹ rẹọ i. Ọnan ki rẹkpa uwẹ rẹ lẹn unan ọria nin uwẹ khin nian, bi unan ọria nin uwẹ ho nin uwẹ kiẹn. Ene inọnta ne ribhi otọle nan dẹ rẹkpa uwẹ rẹ sabọ lu ene emhin nan.
Emhin nin uwẹ sabọ lu nọnsẹn: Emhin nela mẹn guẹ rẹ lu? Ikpẹ esili nela mẹn mhọn? (Bhi ọsi ijiẹmhin, mẹn be kẹ miẹnsọn nan mun nin mẹn? mẹn be mun egbe ọbhi ibẹẹ? mẹn be wẹnna kaka? mẹn be ze emhin bhi obọ?) Emhin esili nela mẹn sabọ lu?
EMHIN NỌN HA RẸKPA UWẸ: Ahamiẹn ọ nọghọ uwẹ rẹ lẹn emhin esili nin uwẹ guẹle, nọọn ene biẹ uwẹ la ọmọẹ nọnsẹ nọn ọle taman uwẹ emhin esili nin ọle daghe uwẹ sabọ lu.
ADIA NỌN RIBHI BAIBO: “Ọkpakinọn, ji ọdeọde gbẹlokotọ bhi uwedẹ nin ọle rẹ lu emhin, bhiriọ, ọle ki miẹn emhin nọn ha re ọle tobọle ọkpa ha ghọnghọn, ọ iyi nin ọle rẹ dọ ha re ọria ọbhebhe rẹ khọkhọ egbe ọle.”—Galatians 6:4.
Eji uwẹ da wẹghẹ: Emhin nela ọkhẹke nin mẹn fidenọ bhi iẹnlẹn nọnsẹmhẹn? Ẹghela ọ rẹ manman nọghọ mẹn rẹ khọn edọnmhẹn? Idia nela ọ da khẹke nin mẹn ha mun egbe ọbhi ibẹẹ gbera ọnikhẹ?
ADIA NỌN RIBHI BAIBO: “Mhan ha yọle, ‘Mhan imhọn olukhọ bhi egbe,’ mhan gheghe hiẹ egbe mhan.”—1 John 1:8.
Ebi uwẹ rẹọ i: Uhi nela mẹn nyẹnlẹn rẹkhan bhi iẹnlẹn nọnsẹmhẹn? Bezẹle? Mẹn be rẹọ bhi Osẹnobulua? Be bhọ rẹ mẹn rẹọbhọ ghe Osẹnobulua gene ribhọ? Emhin nela bha gba bhi ẹlo nọnsẹmhẹn? Emhin nela mẹn rẹọ rẹji ẹghe odalo?
ADIA NỌN RIBHI BAIBO: “Iria-eria nọnsẹn ki gbega uwẹ, ilẹn-otọ-emhin ki yẹ gbega uwẹ.”—Proverbs 2:11.
