Uwẹ be gbẹlokotọ tie ene ebe Ọkhẹughe nọn bha sẹ buẹ gbe nan ne dagbare? Fẹghe si uwẹ dẹ sabọ re ewanniẹn ọbhi ene inọnta nan:

Be iBaibo rẹ rẹman yẹ ghe Osẹnobulua mhọn ẹkẹ ẹjẹjẹ da mhan?

Ọ da ha ba Osẹnobulua bhi egbe ghe ibhokhan Izrẹl loya bhi Egypt. (Ex. 3:7; Isa. 63:9) Ẹkẹ ẹjẹjẹ nin mhan nin eria mhọnlẹn reman ghe Osẹnobulua mhọn ọne ikpẹ nan, ranmhude amazẹ nọnsọle ọle rẹ man mhan. Ọle sẹyẹ mhọn ẹkẹ ẹjẹje da mhan aharẹmiẹn mhan riale ghe mhan bha sẹ ọria nin ọle ha hoẹmhọnlẹn.—wp18.3, pp. 8-9.

Be iman-emhin nesi Jesu rẹ rẹkpa edibo nesọle khọn izọn-egbe yẹ?

Ẹghe nin Jesu rẹ ha ribhi ọne otọ nan, ibhokhan iJew ne bunbun wo ha zọn ẹbho. Bhiriọ, Jesu da wo ji ẹbho lẹn ghe, ọkhẹke nin ele ha mhọn idegbere. Ọ da yẹ ji ele lẹn ghe obha dia nin ele rẹ ha re agbaẹbho nọnsele hio. Ọ da taman ene rẹkhan ọlẹn ghe nin ele ha ghe egbe bọsi ibhio.—w18.06, pp. 9-10.

Be imhan miẹn luẹ bhi okha nọnsi Moses, ẹghe nin Osẹnobulua bha rẹ ji ọle da nabhi otọ nin ọle ve nin ibhokhan Izrẹl?

Ikolu nọn dinmhin Moses wo deba iJehova ha mhọnlẹn. (Deut. 34:10) Ikpe 40 nin ele rẹ ha na bhi ẹkẹ ẹgbo ki khian dọ sotọ, ene ẹbho da gbo kie ha van ghe ele bha miẹn amẹn. Osẹnobulua da taman iMoses ghe nin ọle ne ọne udo talọ. Ọkpakinọn, Moses da re ukpokpo gbe ọne udo. Asabọ miẹn ẹkẹ iMoses da ha khọ Osẹnobulua ranmhude Moses bha re obọ rẹkhan ebi ọle taman ọlẹn, la ranmhude Moses bha re ọne emhin ọhan-ili rẹ re ogẹn ji ọle. (Num. 20:6-12) Be imhan miẹn luẹ bhi ọnan? Mhan miẹn luẹ ghe, emhin kpataki nọn nan rẹ ha hẹnmhọn nin Jehova yẹ re ogẹn ji ọle.—w18.07, pp. 13-14.

Bezẹle nin mhan ha da fiobọdọn sade ebi ẹlo mhan daghe ọkpa mhan rẹ bhu ẹbho ohiẹn?

Emhin ea nin eria kẹ ghe rẹ bhu ẹbho ohiẹn ẹlẹnan hi: eji ọria nan vae, ebi ọria fe sẹ yẹ, bi eka ikpe nin ọria khin. Ọkhẹke nin mhan ha ghe ẹbho beji Jehova nọn izọn ọria soso rẹ ghe ele. (Acts 10:34, 35)—w18.08, pp. 8-12.

Uwedẹ eso nela iKristiẹn ne dọmanlẹn ha rẹ sabọ ha rẹkpa?

Osẹnobulua sẹyẹ wo hoẹmhọn ene dọmanlẹn aharẹmiẹn a re ele sibhi ihe nin ele ye re. Ele sẹyẹ wo mhọn eka nin ele ha lu, nin ele rẹ ha rẹkpa ẹbho. Ẹle dẹ sabọ ha rẹkpa ene iyẹ manman sasa bhi oga, ele dẹ sẹyẹ sabọ ha man ẹbho iBaibo. Ele guanọ uwedẹ kẹkẹ nin ele ha rẹ tẹmhọn Osẹnobulua.—w18.09, pp. 8-11.

Emhin kpataki nela a ne nin mhan ha noo bhi itẹmhọn Osẹnobulua?

Ene emhin hi, kadi nan rẹ taman ẹbho ẹmhọn jw.org, ebe nan rẹ tie ẹbho, trati elẹnlẹn, ebe Ọkhẹughe bi Awake! Emhin ebhebhe hi, brokiọ, What Can the Bible Teach Us? bi How to Remain in God’s Love. A yẹ ne vidio enẹn nin mhan ha noo, ọkpa bhi ene ividio hi Bezẹle Nọn Da Khẹke Nin Mhan Luẹ IBaibo?—w18.10, p. 16.

Be iKristiẹn ha rẹ “dẹ ẹmhọanta” yẹ beji Proverbs 23:23 tale?

Ọiyi igho mhan ha rẹ dẹ ẹmhọanta ne ribhi Baibo. Ọkpakinọn, idọnmhegbe mhan ha dọnmhegbe, yẹ noo ẹghe nọnsẹmhan nin mhan da sabọ miẹn ene ẹmhọanta nan.—w18.11, p. 4.

Be imhan ha miẹn luẹ bhi uwedẹ nin Hosea rẹ ne okhuo ọle nin Gomer lu emhin?

Okhuo iHosea rẹ gboghẹ igba ne bunbun, ọle da rẹhunmhan ọlẹn. Ọle bha khu ọle fia. Ahamiẹn okhuo la ọdọ ọria nọn ga iJehova dọ gboghẹ, ọnọn bha gboghẹ sabọ rẹhunmhan ọnọn gboghẹ. Ahamiẹn ọne okpea kie munhẹn ha nin okhuo ọle nọn gboghẹ nowẹ la ọne okhuo kie munhẹn ha nin ọdọ ọle nọn gboghẹ nowẹ, ele iyẹ da sabọ sọebea.—w18.12, p. 13.