MHAN rebhe rẹọbhọ ghe, Jehova sun ẹbho nesọle bhi ọne ẹghe ọkike nan yẹ gbega ele. (2 Tim. 3:1) Bhiriọ, ọkhẹke nin mhan rebhe ha hẹnmhọn nanlẹn. Mhan dẹ sabọ yọle ghe idia nin mhan ye diabe ọne ibhokhan Izrẹl ha ye bhi ẹghe nin ele rẹ ha ribhi ojẹgbo. Bhi enin, ẹghe nọn hi ki rẹ khin nin ele rẹ họn ghe a re akala khue, ọkhẹke nin ele muegbe rẹ lu beji a re ọne akala rẹ taman ele nin ele lu.

Jehova da taman iMoses nin ọle re siliva rẹ lu akala eva nan ha rẹ ha si ibhokhan Izrẹl koko yẹ taman ele nin ele muegbe rẹ rọ ihẹ. (Num. 10:2) Uwedẹ kẹkẹ ene ohẹn rẹ khue ene akala nin ele rẹ ji ibhokhan Izrẹl lẹn ebi a guanọ nin ele lu. (Num. 10:​3-8) Ẹlẹnan nian, uwedẹ kẹkẹ Jehova rẹ re adia nin ene ga ọle. Bha ji mhan zilo nyan uwedẹ ea nin Jehova rẹ re adia nin mhan. Mhan ki yẹ re ene uwedẹ ea khọkhọ ebi a rẹ ha noo akala yẹ bhi otọ Izrẹl. Ene uwedẹ ea hi, usikoko ne nẹ nesẹmhan, isiku nin ene ewanlẹn yo, bi ufidenọ kẹkẹ nin agbotu zẹ ọle egbe dagbare.

Ahamiẹn Jehova guanọ nin ibhokhan Izrẹl rebhe si egbe koko bhi obọ ọsi east bhi odalo uwa oga, ene ohẹn ki khue ene akala veva. (Num. 10:3) Ibhokhan Izrẹl rebhe dẹ họn ene akala nan re khue. Ene sikẹ ọne uwa oga, ele ha ka sabọ kẹ sẹbhi eji a da yọle nin ele da sikoko. Ọkpakinọn, eria ne bha sikẹ ọne uwa oga, ele ha kike sẹbhọ. Eje ele hi ki rẹ ha ye, ebi Jehova guanọ hi, nin ọrebhe sikoko dọ kaehọ adia nin ọle ho nọn re nin ele.

Arẹmiẹn mhan isikoko bhi uwa oga bọsi ibhokhan Izrẹl, a sẹyẹ tie mhan nin mhan vae dọ sikoko kaehọ adia nesi Jehova. Ene usikoko nan hi usikoko nọn nẹ bi usikoko nekẹle nin mhan da kaẹhọ adia nin Jehova na bhi obọ agbotu nọnsọle re nin mhan. Emhin ọkpa Esali Jehova bhi otọ agbọn rebhe luẹ bhi ene usikoko nan. Bhiriọ, ọrebhe ne vae bhi ene usikoko wo sọnyẹnmhẹn kugbe. Eji eso da nyẹnlẹn manman sikẹ eji a da do ene usikoko, sokpan eji enekẹle da nyẹnlẹn manman ree. Ọrẹyiriọ, eji ọ hi ki rẹ khin nin mhan na vae, mhan manman miẹn elele bhi ene usikoko.

Ibhio mhan ne nyẹnlẹn bhi eje manman ree ne isabọ deba usun nọn bun sikoko kii? Ranmhude emhin nin ekhẹn azemhinre zẹ ọle egbe dagbare ẹlẹnan, ene ibhio mhan nan sabọ deba luẹ emhin nin mhan luẹ bhi usikoko ne kpọnọ, ọ bhọ ki wo diabe ọne usikoko ele ye. Bhi ọsi ijiẹmhin, ẹghe nin Otu Nọn Sun Oga rẹ je ọria ha khian iBẹtẹ nọn ribhi Benin, nin ọle dọ re ẹnẹ ji ele, ọne Bẹtẹ da lu ọle nin ibhio mhan ne ribhi agọ natiọle Arlit bhi Niger, nọn ribhi Sahara Desert da sabọ họn ọne ọta nan rẹman. Bhi enin, ibhio mhan bi ẹbho  nin ele tie vae ne sikoko da ha yi itue 21. Arẹmiẹn eji ele ye manman ree, ele da sabọ yẹ deba ene itue 44,131 sọnyẹnmhẹn. Ọkpa bhi ene ibhio mhan da gbẹn yọle: “Mhan re ọkhọle rebhe rẹ yi bha obulu nin bha rẹ lu ọle nin mhan da sabọ deba bhi ọne iluẹmhin nan. Ọnan wo rẹkpa mhan lẹn ghe ẹmhọn mhan ti bha bhọ.”

Ahamiẹn akala ukpọkpa ene ohẹn re khue, ene ekhaẹmhọn bi ene mun ọkalo kẹkẹ bhi otọ Izrẹl, ele ọkpa ha vae dọ sikoko bhi uwa oga. (Num. 10:4) Bhi enin, Moses ki man ele emhin yẹ ji ele lẹn ebi Jehova guanọ nin ele lu. Ọnan ki rẹkpa ele rẹ sabọ gbẹloghe ẹbho ne ribhi ulin-uwa nin ele gbẹloghe. Sade ọkpa bhi ene ekhaẹmhọn uwẹ khin, uwẹ ida be dọnmhegbe rẹ yo ọne ikolo nan nin uwẹ da miẹn elele bhọ?

Ẹlẹnan nian, ewanlẹn ne ribhi agbotu iyi ekhaẹmhọn la ebeanlẹn ọsi ene ga iJehova. (1 Pet. 5:​1-3) Ọrẹyiriọ, ele dọnmhegbe rẹ lu eka nin ele ha sabọ lu rẹ gbẹloghe ihuan nesi Jehova. Ranmhude ọnan, ele wo dọnmhegbe rẹ yo eji Jehova da man ele emhin, bọsi Isiku Nan Mhanmhan Nin Ene Ewanlẹn bi Ene Zẹ Sikẹ Ele. Bhi ọne isiku nan, a man ene ewanlẹn ebi ele ha rẹ ha gbẹloghe agbotu nọnsẹn yẹ. Ebi ene ewanlẹn luẹle rẹkpa ele bi ọrebhe nin ele gbẹloghe rẹ manman ha sikẹ iJehova. Aharẹmiẹn uwẹ bha sẹ yo ọne isiku nan, uwẹ wo miẹn elele bhi obọ ẹbho ne sẹ yo.

Ahamiẹn Jehova guanọ nin ibhokhan Izrẹl sibhi ọne agọ nin ele yẹ re, uwedẹ ribhọ nin ene ohẹn ha rẹ khue ọne akala. Ibhokhan Izrẹl ha họn, ele ki lẹn ghe ẹghe sẹle nin ele ha rẹ rọ ihẹ. (Num. 10:​5, 6) Ahamiẹn ele khian kpanọ, uwedẹ nan mhanmhanlẹn nin ele rẹ kpanọ, ọle ele rẹ kpanọ. Ọrẹyiriọ, udede ẹsọn ọnan khin rẹji ele. Eso bhi ẹwẹ ele sabọ rẹ ha si egbe re ikeke rẹ kẹ kpanọ. Bezẹle?

Eso sabọ ha riale ghe, ele bha sẹ wọn amẹn re ukpu ọbhi otọ, a wo je taman ele nin ele kpanọ. Ele re inian ria eria ranmhude ẹgheso, ukpasọn ọkpa, ọle ele gbe ọkuẹsẹ Jehova rẹman ele ghe, ẹghe sẹle nin ele ha rẹ gbo kpanọ. Ẹgheso, ele ki gbe ikpẹdẹ eva, uki ọkpa, la ebe gbera iriọ ọkuẹsẹ ele kpanọ. (Num. 9:​21, 22) Ekigba ibhokhan Izrẹl re inian kpanọ? Numbers uhọnmhọnlẹn nọnzi 33 taman mhan ghe, ọ sẹ ije 40 kẹkẹ nin ibhokhan Izrẹl da mun agọ.

Ẹgheso, ele ki mun agọ bhi eji ele da miẹn ọfu. Eje dia iriọ dẹ wo ti ele bhọ, ranmhude ojẹgbo nọn wo manman gboriri, ọle ele ha ye. (Deut. 1:19) Bhiriọ, ele sabọ rẹ ha riale ghe, ele ha sibhi eji ele da miẹn ọfu re, ele ida yẹ miẹn eje mhẹn sẹ iriọ.

Ẹghe ha sẹ nin ibhokhan Izrẹl rẹ kpanọ, ọkhẹke nin ulin-uwa eso mhọn iziẹngbe ọkuẹsẹ ọ sẹ ele egbe re kpanọ, ranmhude ọ iwo yi osukpa ele rebhe ha rẹ kpanọ. Arẹmiẹn ibhokhan Izrẹl rebhe họn ọne akala nan re khue, ele rebhe ida sabọ re osukpa kpanọ. Ene ohẹn ha ka khue akala bhi ọsi ọhẹnhẹn, ulin-uwa ọsi Judah, Issachar, bi Zebulun ne ribhi obọ ọsi east, ki ka kpanọ. (Num. 2:​3-7; 10:​5, 6) Ele ha ki khue ọle bhi ọsi ugbazeva, ulin-uwa ea ne ribhi obọ ọsi south ki kpanọ. Inian ene ohẹn ha rẹ khue ọle ọkuẹsẹ ọrebhe kpanọ fo.

Asabọmiẹn ọ wo nọghọ uwẹ rẹ miẹn emhin eso nin agbotu fidenọ ọbhi egbe. Asabọmiẹn ene ufidenọ wo manman bun zẹle nọn da nọghọ uwẹ. La asabọmiẹn emhanmhan ne ka ribhọ otọ khẹ wo manman fu uwẹ bhi egbe, bhiriọ, uwẹ bha guanọ nan fi ọle denọ. Ebe hi ki rẹ zẹ, ọ bha lẹkhẹ nin uwẹ rẹ miẹn ene ufidenọ nan ọbhi egbe. Ọrẹyiriọ, uwẹ ha dọnmhegbe miẹn ene ufidenọ ọbhi egbe beji Jehova guanọ nin mhan lu, mhan ki miẹn erọnmhọn bhi obọ iJehova.

Bhi ẹghe iMoses, Jehova da sun ẹbho ne bunbun gbera ojẹgbo. Ikpea, ikhuo, bi ibhokhan ha ribhi ọne usun nan. Sade ọ iyi Jehova nọn ha sun ele nọn, ele irẹ sabọ miuhọnmhọn. Iriọ Jehova yẹ rẹ gbega mhan ẹlẹnan bhi ọne ẹghe ọkike nin mhan da nyẹnlẹn nan. Ọle rẹkpa mhan rẹ manman sikẹ ọle nọnsẹn yẹ ha mhọn urẹọbhọ nọn ziẹnlẹn. Bhiriọ, bha ji mhan rebhe dọnmhegbe rẹ re egbe khọkhọ ibhokhan Izrẹl beji ele rẹ ha lu rẹkhan akala kẹkẹ nan ha khue nin ele!