UHỌNMHỌN-ỌTA NỌNZI 14
Uwẹ Be Lu Iwẹnna Oga Nọnsẹn?
“Ha wewe ọta nọn mhẹn, uwẹ a ha lu iwẹnna oga nọnsẹn.”—2 TIM. 4:5, ftn.
ILLO 57 Tẹmhọn Osẹnobulua Man Ọrebhe
EBI MHAN DA LUẸ *
Jesu ki riọ kpanọ bhi idin fo, ọle da bu edibo nesọle re. Ọle da taman ele ghe nin ele ha khian dọ re ẹbho kiẹn edibo (Fẹ uduọle 1 ghe)
1. Be ọrebhe ne ga Osẹnobulua guanọ nin ele lu? Bezẹle? (Fẹ adudu nọn ribhi odalo ọne ebe nan ghe.)
JESU KRISTI da taman ene rẹkhan ọlẹn yọle: “Bha ha khian dọ re ẹbho bhi agbaẹbho rebhe kiẹn edibo.” (Matt. 28:19) Ọrebhe ne ga Osẹnobulua guanọ nin ele luẹ ebi ele ha rẹ sabọ manman ha lu ọne iwẹnna oga nan nin Jesu mun nin ele nọnsẹn. (2 Tim. 4:5) Ọne iwẹnna nan, ọle iwẹnna nọn kokhun nẹ bhi ọne otọ nan. Iwẹnna nan ha yẹ re ẹjẹje lu nọn. Ọkpakinọn, ọ sabọ ha nọghọ mhan rẹ miẹn ẹghe rẹ manman ha lu ọle beji mhan guanọ.
2. Emhin nela ha sabọ re ọle nọghọ mhan rẹ manman ha lu iwẹnna oga?
2 Iwẹnna kpataki ebhebhe yẹ ribhọ nin mhan noo ahu bi ẹghe nọnsẹmhan rẹ lu. Asabọmiẹn uriagogo nọn tanlẹn mhan rẹ wẹnna kaka ọkuẹsẹ mhan miẹn ebi mhan ha rẹ sabọ gbẹloghe egbe bi azagba-uwa nọnsẹmhan. Rẹ deba ọnan, asabọmiẹn mhan mhọn ọnọghọ ebhebhe bhi azagba-uwa, emhianmhẹn, la ọbalọ nin idọmanlẹn sire. Be imhan ha rẹ sẹyẹ manman ha lu iwẹnna oga yẹ aharẹmiẹn mhan mhọn ene ọnọghọ nan?
3. Be imhan miẹn luẹ bhi ọta nọnsi Jesu nan gbẹn ọbhi Matthew 13:23?
3 Ọ bha khẹke nin mhan ji ọle ha ba mhan bhi egbe ghe, eka nin mhan lu bhi oga nọnsi Jehova bha bun ranmhude idia nin mhan ye. Jesu lẹn sẹbhọ ghe, eka nin ọdeọde ha sabọ lu bhi iwẹnna oga ida ha yi ọkpa. (Tie Matthew 13:23.) Eka nọn irẹ khin nin mhan sabọ lu bhi oga dẹ ha ti Jehova bhọ sade ọkhọle rebhe mhan rẹ lu ọle. (Heb. 6:10-12) Sẹyẹ, asabọmiẹn idia nin mhan ye dẹ ji mhan da lu gbera eka nin mhan sabọ lu nian. Bhiriọ, bha ji mhan zilo nyan ebi mhan ha rẹ mun iwẹnna oga kalo bhi iẹnlẹn yẹ, ebi mhan ha rẹ de obọ re yẹ bhi iẹnlẹn, bi ebi mhan ha re manman guẹ ebi a rẹ lu iwẹnna itẹmhọn Osẹnobulua yẹ. Bha ji mhan ka tẹmhọn ebi a re ọle ta nan rẹ ha lu iwẹnna oga nọnsẹn.
4. Be a re ọle ta nan rẹ ha lu iwẹnna oga nọnsẹn?
4 Ahamiẹn mhan dọnmhegbe rẹ lu eka nin mhan ha sabọ lu rebhe bhi iwẹnna itẹmhọn Osẹnobulua, ọnan ki rẹman ghe mhan lu iwẹnna oga nọnsẹn. * Gbera ẹghe nin mhan noo rẹ lu ọne iwẹnna nan, Jehova yẹ gbẹlokotọ daghe ebezẹle mhan da deba lu ọle. Oyẹẹ nin mhan mhọn da iJehova bi ẹbho, ọle zẹle nin mhan da re egbe rebhe deba lu ọne iwẹnna nan. (Mark 12:30, 31; Col. 3:23) Ebi a re ọle ta nin mhan rẹ re egbe rebhe ga iJehova hi, mhan ki ha noo ahu nọnsẹmhan rẹ lu eka nin mhan ha sabọ lu bhi oga nọnsọle. Ahamiẹn ọ ti mhan bhọ rẹ ha tẹmhọn Osẹnobulua mhan ẹbho, mhan ki ha dọnmhegbe nin mhan ha tale man ẹbho ne bunbun.
5-6. Be ọria nọn imanman mhọn ẹghe ha rẹ sabọ ha mun iwẹnna oga kalo yẹ? Re ijiẹmhin man.
5 Ji a man yọle ghe usẹn obhokhan ọkpa ribhọ nọn wo sabọ so illo. Eghọnghọn ọle rẹ wo so illo sade ọle miẹn isẹhoa rẹ so illo. Akizẹbue, ọria da tie ọle nin ọle dọ ha so illo ẹdẹ iSaturday bi iSunday bhi eji ọle da khiẹn ebale. Ọkpakinọn, igho nin ọle miẹn bhi enin bha sẹ nanlẹn rẹ ha gbẹloghe egbe. Bhiriọ, ọle da ha lu iwẹnna akọwe bhi ije bhebhe. Ẹdẹ iMonday rẹ sẹbhi Friday ọle rẹ ha lu ọne iwẹnna akọwe. Arẹmiẹn ọne iwẹnna nan ọle noo ẹghe rẹ lu nẹ, illo nin ọle so ọkhọle nọnsọle ye. Ọle da ha khu ọbhọ nin ọle manman guẹ ebi a rẹ so illo yẹ, nin ọle da sabọ re iẹnlẹn nọnsọle rebhe rẹ ha so illo. Arẹmiẹn ọle bha manman miẹn ẹghe rẹ ha so illo, isẹhoa nin ọle iki rẹ miẹn nin ọle rẹ so illo wo tie ọle bhọ, aharẹmiẹn ẹghe khere nọn.
6 Iriọ yẹ nọn rẹji mhan. Asabọmiẹn, mhan imiẹn ẹghe rẹ ha deba lu iwenna itẹmhọn Osẹnobulua beji mhan gene guanọ. Ọrẹyiriọ, ọnan iwẹnna nọn ti mhan bhọ nẹ. Mhan dọnmhegbe nin mhan manman guẹ ebi a rẹ lu ọne iwẹnna nan yẹ, nin ebi mhan taman ẹbho da sabọ sẹ ele otọ ẹkẹ. Ọkpakinọn, ranmhude emhin ne bunbun ribhọ nin uwẹ noo ẹghe nọnsẹ rẹ lu, uwẹ sabọ rẹ ha nọọn egbe ẹ yọle: ‘Be imẹn ha rẹ sabọ mun iwẹnna itẹmhọn Osẹnobulua kalo yẹ?’
EBI MHAN HA RẸ SABỌ MUN IWẸNNA OGA KALO YẸ BHI IẸNLẸN
7-8. Be imhan ha rẹ sabọ re egbe khọkhọ iJesu yẹ bhi uwedẹ nin ọle rẹ ha tẹmhọn Osẹnobulua?
7 Mhan dẹ miẹn emhin luẹ bhi uwedẹ nin Jesu rẹ wo ha lu iwẹnna oga bhi ọne otọ nan. Ẹmhọn Agbejele nọnsi Osẹnobulua ọle mun kalo ha taman ẹbho. (John 4:34, 35) Ọle khian diọbhi eje manman ree beji ọle ha da miẹn ẹbho ne bunbun ne talọ. Ọle wo ha noo isẹhoa rebhe rẹ ne ẹbho talọ bhi ogbakha bi bhi uwa nọnsele. Ilọnmhọn oga Jesu wo ha re iẹnlẹn nọnsọle lu.
8 Beji Jesu lu, ọkhẹke nin mhan yẹ ha noo isẹhoa rebhe rẹ tẹmhọn Agbejele nọnsi Osẹnobulua man ẹbho bhi eje ele iki rẹ ha ye. Mhan muegbe nin mhan rẹ fi ikeke gbe emhin eso bhi iẹnlẹn nin mhan da sabọ ha lu ọne iwẹnna nan. (Mark 6:31-34; 1 Pet. 2:21) Eso bhi ẹkẹ agbotu lu iwẹnna ọkanẹfan ọsi ẹghe eso. Esọ yẹ lu iwẹnna ọkanẹfan ọsi ẹghe rebhe, la ọkanẹfan kpataki. Eso luẹ urolo ọbhebhe nin ele rẹ ha tẹmhọn Osẹnobulua, la ele diọbhi eji a da guanọ urẹkpa bhi itẹmhọn Osẹnobulua. Ọkpakinọn, ibhio mhan ne isabọ ga bhi ene ihe nan soso, ele bun nẹ bhi ẹwẹ ene lu ọne iwẹnna nan. Ele wo dọnmhegbe nin ele rẹ lu eka nin ele ha sabọ lu bhi iwẹnna itẹmhọn Osẹnobulua. Aharẹmiẹn mhan sabọ lu iwẹnna ọkanẹfan, la mhan bha sabọ lu ọle, Jehova iguanọ nin mhan lu gbera eka nin mhan ha sabọ lu. Ọle guanọ nin mhan rebhe ha sọnyẹnmhẹn bhi oga nọnsọle, bi bhi iwẹnna nin mhan rẹ wewe ẹmhọn ọlẹn man ẹbho.—1 Tim. 1:11; Deut. 30:11.
9. (a) Be iPaul rẹ mun iwẹnna itẹmhọn Osẹnobulua kalo yẹ, arẹmiẹn ọle lu iwẹnna ọbhebhe? (b) Beji Acts 28:16, 30, 31 tale, uwedẹ nela Paul rẹ ha tẹmhọn Osẹnobulua arẹmiẹn ghe a mun ọlẹn khue?
9 Paul nin odibo yẹ re ijiẹmhin esili man bhi uwedẹ nin ọle rẹ mun iwẹnna oga kalo bhi iẹnlẹn. Ẹghe nin ọle rẹ ha lu iwẹnna imisiọnari ọsi ugba-ọzeva, ọle da sẹbhi Corinth. Bhi enin, igho nin ọle mhọnlẹn da ha fo. Bhiriọ, ọle da re ẹghe eso ọbhi otọ rẹ ha lu ibọkpọ nin ẹbho. Ọkpakinọn, ọ iyi iwẹnna ibọkpọ nin ọle ha lu ọle mun kalo. Ọle bha ha guanọ nin ọle kiẹn ihẹ rẹji ibhokhan Corinth nin ọle dọ tẹmhọn Osẹnobulua man. Ọle guanọ nin ọle miẹn ebe ọle ha rẹ sabọ tobọle ha gbẹloghe egbe, beji ọle rẹ lu iwẹnna itẹmhọn Osẹnobulua. (2 Cor. 11:7) Arẹmiẹn Paul rẹ ẹghe eso rẹ ha lu iwẹnna nin ọle ha rẹ gbẹloghe egbe, iwẹnna oga ọle wo ha mun kalo. Ọle da wo ha tẹmhọn Osẹnobulua ẹdẹ iSabbath rebhe. Iẹnlẹn ki ha mhẹn ọbhọ nanlẹn, ọle da kiẹ re ba ẹghe nin ọle rẹ ha lu iwẹnna oga. Ọle da wo manman ha zegbere tẹmhọn iJesu man ibhokhan Jew, ghe Jesu hi Kristi. (Acts 18:3-5; 2 Cor. 11:9) Akizẹbue, a da mun ọlẹn khuẹ bhi uwa nin ọle ha ye bhi Rome rẹ na bhi ikpe eva. Ọrẹyiriọ, ọle da ha tẹmhọn Osẹnobulua man ẹbho ne ha re ẹnẹ ji ọle. Ọle da yẹ ha gbẹn ilẹta bhi enin. (Tie Acts 28:16, 30, 31.) Paul bha ji emhin soso da si ọle obọ re ikeke bhi iwẹnna itẹmhọn Osẹnobulua. Ọle da tale ghe, ọ bha khẹke nin mhan ji egbe lọ mhan bhi iwẹnna oga nan mun nin mhan. (2 Cor. 4:1) Bọsi Paul, aharẹmiẹn mhan lu iwẹnna ọbhebhe, mhan dẹ yẹ sabọ mun iwẹnna Agbejele kalo bhi iẹnlẹn.
Uwedẹ ne bunbun ribhọ nin mhan ha rẹ sabọ manman ha lu iwẹnna oga (Fẹ uduọle 10 bi 11 ghe)
10-11. Aharẹmiẹn egbe bha manman daan mhan, be imhan ha rẹ sẹyẹ sabọ ha tẹmhọn Osẹnobulua man ẹbho yẹ?
10 Ahamiẹn mhan iyẹ manman sabọ deba tẹmhọn Osẹnobulua na bhi uwa rẹ sẹbhi uwa ranmhude idọmanlẹn, la ranmhude ekhọnmhọn, mhan dẹ sabọ ha noo uwedẹ ebhebhe rẹ tale. Kristiẹn bhi ore nin ọhẹnhẹn wo ha tẹmhọn Osẹnobulua man ẹbho bhi eji ele iki rẹ ha ye. Ele wo ha noo isẹhoa rebhe rẹ tẹmhọn oga ẹmhọanta man ẹbho. Ele tale rẹ na bhi uwa rẹ sẹbhi uwa, bhi ogbakha, bi sade ele lu ilọnmhọn ukpẹdẹ ukpẹdẹ. (Acts 17:17; 20:20) Ahamiẹn mhan isabọ khian na bhi eje ree le, mhan sabọ re guanọ eji mhan ha da dotua bhi eji ẹbho manman ye, nin mhan da sabọ ha tẹmhọn Osẹnobulua mhan ene gbera. Sẹyẹ, mhan sabọ rẹ ha gbẹn ilẹta, la noo ifoni rẹ tale. Mhan dẹ yẹ sabọ ha tale mhan ẹbho nin mhan miẹn sade mhan lu ilọnmhọn ukpẹdẹ ukpẹdẹ. Ibhio mhan ne isabọ na bhi uwa rẹ sẹbhi uwa ranmhude emianmhẹn la idọmanlẹn, wo miẹn eghọnghọn bhi ene uwedẹ nan kẹkẹ nin ele rẹ sabọ tẹmhọn Osẹnonbulua.
11 Aharẹmiẹn egbe bha manman daan mhan, mhan dẹ sẹyẹ sabọ ha lu iwẹnna oga nọnsẹn. Bha ji mhan sẹyẹ zilo nyan ijiẹmhin ọsi Paul. Ọle da gbẹn yọle: “Bhi emhin rebhe, mẹn miẹn ahu bhi obọ ọnọn re ahu nin mẹn.” (Phil. 4:13) Ẹghe ọkpa ribhọ nin Paul rẹ ha khọnmhọn ẹghe nin ọle rẹ ha lu iwẹnna imissiọnari. Bhiriọ, ọle da wo ha guanọ ahu nin Osẹnobulua re nin ọria. Ọle da taman ibhokhan iGalatia yọle: “Emianmhẹn nin mẹn ha ye zẹle nin mẹn da miẹn isẹhoa ọhẹnhẹn rẹ tẹmhọn Osẹnobulua man bha.” (Gal. 4:13) Bọsi Paul, ahamiẹn mhan khọnmhọn, mhan dẹ sabọ miẹn isẹhoa rẹ tẹmhọn Osẹnobulua man ẹbho bii dọkitọ, nurse, bi ẹbho ebhebhe ne wẹnna bhi eji a da gbẹloghe egbe. Isi iwẹnna ene bunbun bhi ene ẹbho nan ye ẹghe nin ibhio mhan rẹ sẹbhi uwa nọnsele.
EBI UWẸ HA RẸ DE OBỌ RE YẸ BHI IẸNLẸN
12. Be a re ọle ta nan rẹ ha denọ ẹlo ọbhi iwẹnna oga?
12 Jesu da yọle: “Ẹlo hi ukpa ọsi egbe. Bhiriọ, ahamiẹn ijan ọkpa uwẹ denọ ẹlo ọi, egbe nọnsẹ rebhe ki ha yi ẹfua.” (Matt. 6:22) Be ọle re ọnan ta? Ọle re ọnan tale ghe, emhin ọkpa ọkhẹke nin mhan denọ ẹlo ọi bhi iẹnlẹn, ghe, nin mhan hẹi ji emhin soso denọ mhan ẹlo sibhi ọne emhin re. Jesu re ijiẹmhin esili man mhan, ranmhude ẹmhọn oga ọle wo mun kalo bhi iẹnlẹn nọnsọle. Ọle da yẹ taman edibo nesọle ghe, nin ele denọ ẹlo ọbhi oga nọnsi Jehova bi Agbejele nọnsọle. Mhan dẹ sabọ re egbe khọkhọ iJesu sade mhan rẹ iẹnlẹn nọnsẹmhan rebhe “khu ọbhi ẹmhọn Agbejele bi ikhiakhiale [nọnsi Osẹnobulua].”—Matt. 6:33.
13. Be ha rẹkpa mhan rẹ sabọ denọ ẹlo ọbhi iwẹnna oga?
13 Uwedẹ ọkpa nin mhan ha rẹ denọ ẹlo ọbhi iwẹnna oga hi, mhan ki de obọ re bhi iẹnlẹn. Bhiriọ, mhan ki miẹn ẹghe nọn bunbun ha noo rẹ rẹkpa ẹbho nin ele dọ lẹn iJehova yẹ hoẹmhọn ọlẹn. * Bhi ọsi ijiẹmhin, mhan sabọ rẹ mhanmhan ẹghe nin mhan rẹ lu iwẹnna nọnsẹmhan nọnsẹn, nin mhan da sabọ miẹn ẹghe rẹ deba tẹmhọn Osẹnobulua bhi ẹkẹ uzana. Sẹyẹ, mhan sabọ rẹ rẹban iregbe re ahoho eso ne manman gbe mhan ẹghe.
14. Be okhuo bi ọdọ ọkpa rẹ fi emhin denọ yẹ nin ele da sabọ ha deba tẹmhọn Osẹnobulua gbera ọnin khẹ?
14 Bha ji mhan tẹmhọn ebi Elias nin ọwanlẹn bhi ẹkẹ agbotu bi okhuo ọle lu. Ọle da yọle: “Arẹmiẹn mhan bha sabọ wo munhẹn ha lu iwẹnna ọkanẹfan, mhan da daghe emhin eso nin mhan ha lu, nin mhan da kie miẹn ẹghe ha noo bhi itẹmhọn Osẹnobulua gbera ọnin khẹ. Bhi ọsi ijiẹmhin, mhan bha yẹ ha noo igho gbe, mhan da rẹban iregbe re ahoho ne gbe ọria ẹghe, mhan da taman ene imhan wẹnna nan ghe, nin ele mhanmhan iwẹnna nọnsẹmhan beji mhan ha da sabọ ha miẹn ẹghe. Bhiriọ, mhan da sabọ ha deba tẹmhọn Osẹnobulua ọsemuan. Ẹbho nin mhan man ele iBaibo da dọ ha bun, sẹyẹ, ejayenan nian, ọ iyi ẹdẹ iSaturday bi Sunday ọkpa mhan rẹ deba tẹmhọn Osẹnobulua. Ẹghọnghọn nọn khua ọnan si ji mhan!”
EBI MHAN HA RẸ SABỌ HA LU RE ALO YẸ BHI IWẸNNA ITẸMHỌN OSẸNOBULUA
Ahamiẹn mhan re obọ rẹkhan ebi mhan luẹle bhi ikolo ọsi Unyẹnmhin bi Iwẹnna Oga Nọnsẹmhan, mhan ki sabọ ha lu re alo bhi iwẹnna itẹmhọn Osẹnobulua (Fẹ uduọle 15 bi 16 ghe) *
15-16. Beji 1 Timothy 4:13, 15, tale, be imhan ha rẹ sabọ ha lu re alo yẹ bhi iwẹnna itẹmhọn Osẹnobulua? (Yẹ fẹ ẹkpẹti ghe nọn yọle “ Emhanmhan ne ha Rẹkpa Mẹn Rẹ Sabọ ha Tẹmhọn Osẹnobulua Nọnsẹn.”)
15 Uwedẹ ọbhebhe nin mhan ha rẹ sabọ ha lu nọnsẹn bhi iwẹnna oga hi, mhan ki ha dọnmhegbe nin mhan manman guẹ ebi a rẹ tẹmhọn Osẹnobulua yẹ. Bhi isi iwẹnna eso, a man ẹbho emhin ba emhin nin ele ka lẹn khẹ, beji ele ha da sabọ guẹ iwẹnna nin ele lu nọnsẹn. Iriọ yẹ nọn rẹji eria ne tẹmhọn Osẹnobulua. Ọkhẹke nin mhan ha luẹ ebi mhan ha rẹ ha lu nọnsẹn bhi iwẹnna itẹmhọn Osẹnobulua yẹ.—Prov. 1:5; tie 1 Timothy 4:13, 15.
16 Be imhan ha rẹ sabọ ha lu re alo yẹ bhi iwẹnna oga? Mhan ki ha gbehọkotọ nọnsẹn bhi Ikolo ọsi Unyẹnmhin bi Iwẹnna Oga Nọnsẹmhan. Bhi ọne ikolo nan, mhan luẹ ebi mhan ha rẹ ha lu re alo bhi iwẹnna itẹmhọn Osẹnobulua yẹ. Bhi ọsi ijiẹmhin, ahamiẹn obhio mhan nọn sun ọne ikolo re adia nin ene re ọta man, ọkhẹke nin mhan yẹ ne ene adia ọbhi ọkhọle. Bhiriọ, mhan ha dagbare bhi itẹmhọn Osẹnobulua, mhan sabọ rẹ noo ene adia nin mhan luẹle. Sẹyẹ, mhan sabọ rẹ taman ọne sun ẹbho dagbare bhi itẹmhọn Osẹnobulua nin ọle rẹkpa mhan sade mhan guanọ urẹkpa bhi iwẹnna itẹmhọn Osẹnobulua. Mhan sabọ rẹ deba ọle wẹnna bhi itẹmhọn Osẹnobulua, la mhan sabọ rẹ deba ọkanẹfan wẹnna, ọfẹotughe, la ọria nọn iki rẹ khin nọn guẹ ebi a rẹ tẹmhọn Osẹnobulua yẹ. Ọkhẹke nin mhan manman guẹ ebi a rẹ noo ene emhin nin agbotu ne nin mhan rẹ ha tẹmhọn Osẹnobulua. Bhiriọ, ọ ki ha ti mhan bhọ rẹ ha tẹmhọn Osẹnobulua man ẹbho, yẹ man ele iBaibo.
17. Be uwẹ ha miẹn sade uwẹ dọnmhegbe rẹ ha lu nọnsẹn bhi iwẹnna oga?
17 Ekpẹn nọn khua nọn rẹji mhan ghe, Jehova ji mhan da deba ọle ha wẹnna! (1 Cor. 3:9) Ahamiẹn ghe uwẹ “lẹn emhin ne kiẹn okpemhin nẹ” bhi iẹnlẹn nọnsẹ, uwẹ da yẹ denọ ẹlo ọbhi iwẹnna oga, uwẹ ki ha sọnyẹnmhẹn bhi oga nọnsi iJehova. (Phil. 1:10; Ps. 100:2) Ranmhude ọkpa bhi ene ga iJehova uwẹ khin, ha mhọn ọlẹn bhi ọkhọle ghe, Jehova dẹ re ahu nin uwẹ rẹ sabọ ha lu iwẹnna oga nọnsọle nọnsẹn, aharẹmiẹn ghe uwẹ ribhi ọnọghọ, la egbe bha manman daan uwẹ. (2 Cor. 4:1, 7; 6:4) Aharẹmiẹn uwẹ sabọ lu eka ne bunbun bhi iwẹnna oga, la uwẹ isabọ lu eka ne bunbun, uwẹ dẹ miẹn eghọnghọn sade ọkhọle rebhe uwẹ rẹ lu ọle. (Gal. 6:4) Ahamiẹn ghe uwẹ manman dọnmhegbe rẹ ha lu nọnsẹn bhi iwẹnna oga, ọ ki rẹman ghe uwẹ hoẹmhọn iJehova bi ene nyẹnlẹn sikẹ uwẹ. Bhiriọ, “uwẹ ki miẹn egbe ẹ fan bi ene ka uwẹ ehọ.”—1 Tim. 4:16.
ILLO 58 Guanọ Ẹbho Ne Hoẹmhọn IJehova
^ udu ọle 5 Osẹnobulua taman mhan nin mhan dọ tẹmhọn Agbejele nọnsọle man ẹbho yẹ ha man ele iBaibo. Bhi ọne uhọnmhọn-ọta nan, mhan dẹ zilo nyan ebi mhan ha rẹ sabọ manman ha lu iwẹnna oga yẹ aharẹmiẹn mhan ribhi idia nọn kakale. Mhan ki yẹ tẹmhọn ebi mhan ha lu nin mhan da manman guẹ ebi a rẹ tẹmhọn Osẹnobulua yẹ, nin mhan da ha miẹn elele bhọ.
^ udu ọle 4 ỌTA NAN RE OTỌLE MAN NỌNSẸN: Iwẹnna kẹkẹ ne yi iwẹnna oga hi: iwẹnna itẹmhọn Osẹnobulua, nan rẹ ha mhan ẹbho iBaibo, nan rẹ ha deba bọn uwa oga, bi nan rẹ ha rẹkpa ẹbho nin emhin idumhunre sunu je.—2 Cor. 5:18, 19; 8:4.
^ udu ọle 13 Fẹ ene uwedẹ ihinlọn ghe nan gbẹn ọbhi ẹkpẹti nọn yọle “How to Simplify Your Life” bhi Watchtower ọsi July 2016, apapale 10.
^ udu ọle 62 EBI A RẸMAN BHI FOTO: Bhi ikolo ọsi Unyẹnmhin bi Iwẹnna Oga Nọnsẹmhan, obhio mhan nin okhuo rẹman ebi a rẹ lu afikie yo yẹ. Beji ọnọn sun ọne ikolo ki rẹ ha re adia nanlẹn, ọle da ha gbẹn ene adia ọbhi ẹkẹ ebe natiọle Manman Gue Ebe Nan Tie bi Iman-Emhin. Ọle ki dagbare nin ọle dọ tẹmhọn Osẹnobulua, ọle da ha noo ebi ọle luẹle bhi ikolo.
