Mhan rebhe imanman miẹn ẹghe nọn tanlẹn rẹ luẹ emhin. Ọkpakinọn, be imhan ha rẹ sabọ manman ha noo obhi ẹghe nin mhan mhọn yẹ sade mhan luẹ emhin? Ọhẹnhẹn, hẹi re otua-otua rẹ ha lu ọle. Uwẹ ha re obhi ẹghe khere nin uwẹ mhọn rẹ luẹ obhi emhin khere, ọle uwẹ ha da manman miẹn elele gbera uwẹ dọ re otua-otua ha luẹ emhin ne bunbun.

Ọzeva, mhanmhan emhin eso ọbhi otọ nin uwẹ họ nin uwẹ ka lu. (Eph. 5:15, 16) Fẹ ene emhin nan ghe ne ha sabọ rẹkpa uwẹ:

• Ha tie Baibo ukpẹdẹ-ukpẹdẹ. (Ps. 1:2) Uwẹ sabọ rẹ re Baibo nan tie bhi ikolo oga nan do bhi ẹkẹ uzana rẹ munhẹn.

• Ha muegbe ebe Ọkhẹughe ọbhi otọ, uwẹ ha yẹ ha muegbe ikolo nan do bhi ẹkẹ uzana ọbhi otọ. Sẹyẹ, muegbe ewanniẹn nin uwẹ ha re ọbhi inọnta ọbhi otọ.—Ps. 22:22.

• Dọnmhegbe rẹ ha tiẹ ebe nesẹmhan yẹ ghe vidio ne dagbare bhi jw.org.

• Gua otọ ẹmhọn ne yẹẹ uwẹ feghẹ. Uwẹ sabọ rẹ dọ gua otọ ẹmhọn ọnọghọ nin uwẹ kuẹlo da, inọnta nin uwẹ ria ẹmhọn ọlẹn, la ẹmhọn eso bhi Baibo ne bha manman mun uwẹ ẹlo kore. Nin uwẹ rẹ lẹn emhin eso nin uwẹ ha sabọ dọ gua otọle fẹghe, huẹan dọ fẹ obọle natiọle “Bible Study Activities” ghe bhi jw.org.