1. Be imhan ha sabọ kuẹlo da beji mhan ha rẹ ha tẹmhọn Osẹnobulua? Be imhan ha sabọ ha mhọn bhi ọkhọle?

 BEJI mhan ha rẹ ha tẹmhọn Osẹnobulua, mhan dẹ kuẹlo da ekpokpo. Ọnan bhọ sabọ rẹ manman kaka ọbhọ bhi ẹghe odalo. (Dan. 11:44; 2 Tim. 3:12; Rev. 16:21) Ọrẹyiriọ, mhan dẹ sabọ rẹọbhọ ghe Jehova dẹ rẹkpa mhan. Bezẹle? Ranmhude, Jehova wo rẹkpa eguọmhandia nesọle rẹ lu ebi ọle taman ele nin ele lu—aharẹmiẹn ebi ọ hi ki rẹ kaka sẹ yẹ. Bhi ọsi ijiẹmhin, bha ji mhan zilo nyan emhin eso ne sunu ji Ẹzikiẹ nin akhasẹ nọn wewe uhọnmhunje nọnsi Osẹnobulua man ibhokhan Ju ne ha ribhi imun bhi Babilọn.

2. Be Jehova tale rẹji ẹbho nin Ẹzikiẹ ha wewe ẹmhọn ọlẹn man? Be imhan ha zilo nyan bhi ọne uhọnmhọn-ọta nan? (Ezekiel 2:3-6)

² Unan ẹbho nela Ẹzikiẹ tẹmhọn Osẹnobulua man? Jehova da yọle ghe, ene ẹbho wo bhi uhọnmhọn, ele imhọn itohan, yẹ mhọn akan-ehọ. Inian ele diabe igbẹn ne kuan ọria, yẹ diabe akpin ne si okhẹnan ji ọria. Ọnan zẹle nin Jehova da taman Ẹzikiẹ igba ne bunbun ghe, nin ọle hẹi ji ofẹn mun ọlẹn. (Tie Ezekiel 2:3-6.) Ẹzikiẹ da sabọ wewe uhọnmhunje nọnsi Osẹnobulua ranmhude (1) Jehova je ọle, (2) ẹlinmhin nọn khiale nọnsi Osẹnobulua da re ahu nanlẹn bi (3) ọta nọnsi Osẹnobulua da ziẹn ọlẹn udu. Be ene emhin ea nan rẹ rẹkpa Ẹzikiẹ yẹ? Be ele yẹ rẹ rẹkpa mhan yẹ ẹlẹnan?

3. Ọta nela asabọmiẹn ọ re izebhudu nin Ẹzikiẹ? Be Jehova rẹ rẹman ọlẹn yẹ ghe, ọle dẹ rẹkpa ọle?

³ Jehova da taman Ẹzikiẹ: “Mẹn je uwẹ.” (Ezek. 2:3, 4) Ene ọta nan dẹ wo re izebhudu nin Ẹzikiẹ. Bezẹle? Edandan iribhọ ghe, ọle yere ghe Jehova ka noo ọta ne sẹ inian ẹghe nin ọle rẹ zẹ Mozis bi Ẹzaya nin ele ha yi akhasẹ nọnsọle. (Ex. 3:10; Isa. 6:8) Ẹzikiẹ  yẹ lẹn ebi Jehova rẹ rẹkpa ene akhasẹ eva nan yẹ rẹ sabọ miẹnsọn nan mun nin ele arẹmiẹn ọ bha lẹkhẹ. Bhiriọ, ẹghe nin Jehova rẹ taman Ẹzikiẹ igba eva yọle: “Mẹn je uwẹ,” ọle dẹ ha mhọn emhin bhi ọkhọle nọn re ọle rẹọbhọ ghe, Jehova dẹ rẹkpa ọle. Sẹyẹ, bhi ebe ọsi Ẹzikiẹ, mhan miẹn ene ọta nan bhi igba ne bunbun ne yọle: “Jehova da taman mẹn yọle.” (Ezek. 3:16) Sẹyẹ, bhi igba ne bunbun, ọle da gbẹn yọle: “Jehova da gbo kie taman mẹn yọle.” (Ezek. 6:1) Bhi ọsi ẹmhọanta, Ẹzikiẹ wo rẹọbhọ ghe Jehova je ọle. Yẹ rẹ deba ọnan, ohẹn aba Ẹzikiẹ ha khin. Iriọ a ha da miẹn ọle man Ẹzikiẹ le ghe, Jehova wo taman akhasẹ nesọle ghe, ọle dẹ rẹkpa ele. Bhi ọsi ijiẹmhin, Jehova da taman Aizik, Jekọp bi Jerimaya yọle: “Mẹn nin uwẹ dia.”—Gen. 26:24; 28:15; Jer. 1:8.

4. Ọta izebhudu nela re ahu nin Ẹzikiẹ rẹ sabọ miẹnsọn nin Osẹnobulua mun nanlẹn?

⁴ Be ibhokhan Izrẹl eso ha rẹ lu emhin yẹ rẹji uhọnmhunje nin Ẹzikiẹ ha wewe man ele? Jehova da taman ọlẹn ghe, uwa ọsi ibhokhan Izrẹl ida ka uwẹ ehọ, ranmhude ele bha guanọ nin ele ka mẹn ehọ. (Ezek. 3:7) Beji a miẹn ene ẹbho bha ka Ẹzikiẹ ehọ, ele bha yẹ re iriọ ka Jehova ehọ. Ene ọta nan da rẹkpa Ẹzikiẹ rẹ lẹn ghe, arẹmiẹn ene ẹbho bha ka ọle ehọ, ọ bha rẹman ghe, ọle bha miẹnsọn ọsi akhasẹ nan mun nanlẹn nọnsẹn. Jehova da yẹ ji Ẹzikiẹ lẹn ghe, ẹmhọn ọta ibhohiẹn nin ọle wewe ha munsẹ, ene ẹbho ki dọ “lẹn ghe akhasẹ ha ribhi ẹwẹ ele.” (Ezek. 2:5; 33:33) Edandan iribhọ ghe, ene ọta izebhudu nan re ahu nin Ẹzikiẹ rẹ sabọ miẹnsọn nin Osẹnobulua mun nanlẹn.

5. Họla Isaiah 44:8 yọle ghe ọ dẹ re izebhudu nin mhan?

⁵ Mhan yẹ miẹn izebhudu ẹlẹnan ranmhude mhan lẹnmhin ghe Jehova hi ọnọn je mhan nin mhan dọ wewe ẹmhọn ọlẹn. Ọle da re ọne isẹhoa nin mhan rẹ ha yi “esali” nesọle. (Isa. 43:10) Ekpẹn nọn khua khọnan nin ọle mun nin mhan.  Beji Jehova rẹ taman Ẹzikiẹ ghe nin ọle hẹi ji ofẹn mun ọlẹn, Jehova yẹ ha taman mhan ghe nin mhan hẹi ji ofẹn ha mun mhan. Bezẹle nọn bha da khẹke nin mhan ji ofẹn ẹbho ne kpokpo mhan ha mun mhan? Ranmhude bọsi Ẹzikiẹ, Jehova hi ọnọn je mhan. Sẹyẹ, ọle ribhi ikeke mhan.—Tie Isaiah 44:8.

6. (a) Be Jehova rẹ rẹkpa mhan rẹ lẹn yẹ ghe ọle dẹ ha rẹkpa mhan? (b) Be re ikoudure bi ahu nin mhan?

⁶ Jehova ve ghe ọle dẹ rẹkpa mhan. Bhi ọsi ijiẹmhin, ọkuẹsẹ Jehova yọle esali nesọle mhan khin, ọle da yọle: “Ahamiẹn uwẹ na ẹkẹ amẹn gbera, imẹn dẹ ne uwẹ dia, uwẹ ha rẹ ha na bhi ẹkẹ ẹdẹ, ọ ida ruẹ ẹ. Ahamiẹn uwẹ na ẹkẹ eranlẹn gbera, ọ ida to uwẹ a, la nin oranmhẹn eranlẹn nọnsọle ria-ria uwẹ egbe hiehie.” (Isa. 43:2) Beji mhan rẹ tẹmhọn Osẹnobulua, ẹgheso, mhan kuẹlo da idobolo ne diabe ologho amẹn, yẹ kuẹlo da ọnọghọ nin mhan ha rẹ sabọ khọkhọ eranlẹn. Ọrẹyiriọ, Jehova dẹ rẹkpa mhan rẹ sẹyẹ ha wewe ẹmhọn ọlẹn man ẹbho. (Isa. 41:13) Beji ẹbho bhi ẹghe ọsi Ẹzikiẹ lu, ẹbho ne bunbun ẹlẹnan ire ehọ ọbhi uhọnmhunje nin mhan wewe. Ranmhude ele bha ka mhan ehọ bha rẹman ghe, mhan bha lu iwẹnna itẹmhọn Osẹnobulua nin mhan lu nọnsẹn. Mhan miẹn ikoudure bi ahu nin mhan rẹ lẹn sẹbhọ ghe, ọ ti Jehova bhọ sade mhan wo re ọkhọle rebhe rẹ ha wewe ẹmhọn ọlẹn man ẹbho. Pọl nin odibo yọle: “Ọdeọde dẹ miẹn ihaosa nọnsọle beji ọle rẹ wẹnna.” (1 Cor. 3:8; 4:1, 2) Obhio mhan nin okhuo nọn ki ree nọn mọn da lu iwẹnna ọkanẹfan da yọle: “Ọ re imẹn ghọnghọn nin mẹn rẹ lẹn ghe Jehova dẹ re ihaosa nin mhan bhi ẹsọn nin mhan miẹn.”

7. Be ọ ha rẹ rẹso Ẹzikiẹ yẹ ẹghe nọn hi ki rẹ khin nin ọle rẹ ria ẹmhọn imianlo nin ọle miẹn? (Fẹ adudu nọn ribhi odalo ọle ghe.)

⁷ Ẹzikiẹ da daghe ebi ẹlinmhin nọn khiale nọnsi Osẹnobulua rẹ manman mhọn ahu yẹ. Ebi Ẹzikiẹ daghe bhi imianlo da rẹkpa ọle rẹ lẹn sẹbhọ ghe, ẹlinmhin nọn khiale nọnsi Osẹnobulua rẹkpa ene ẹhi ne mhọn ahu, yẹ rẹkpa ene iwili ne manman kpọnọ ọsi ọne awenẹwenẹ nọn ribhi okhun ha khian. (Ezek. 1:20, 21) Be Ẹzikiẹ ki lu yẹ? Ọle da gbẹn ebe sunu. Ọle da yọle: “Ẹghe nin mẹn rẹ daghe ọle, i da mun ẹlo ru bhi otọ.” Ọ da manman han Ẹzikiẹ ilo sẹbhọ ghe, ọle da de ọbhi otọ. (Ezek. 1:28) Ẹghe nọn hi ki rẹ khin nin Ẹzikiẹ rẹ ria ẹmhọn ọne imianlo nan nin ọle miẹn beji a ki zẹbue, ọ dẹ wo ziẹn urẹọbhọ nin ọle mhọn ghe, ẹlinmhin nọnsi Osẹnobulua dẹ rẹkpa ọle rẹ sabọ lu iwẹnna itẹmhọn Osẹnobulua nin ọle lu sotọ.

8-9. (a) Be sunu ji Ẹzikiẹ ẹghe nin Jehova rẹ taman ọlẹn nin ọle kpanọ mundia? (b) Be Jehova rẹ kie re ahu nin Ẹzikiẹ yẹ, beji ọle ha da sabọ tẹmhọn ọlẹn man ẹbho arẹmiẹn ọ ida lẹkhẹ nanlẹn?

⁸ Jehova da taman Ẹzikiẹ yọle: “Ọmọn nọnsi okpea, kpanọ mundia beji mẹn ha da ne uwẹ talọ.” Ọne ebi Jehova taman Ẹzikiẹ nan, bi ẹlinmhin nọn khiale nọnsọle da re ọne ahu nanlẹn nọn ha rẹkpa ọle rẹ sabọ kpanọ mundia. Ẹzikiẹ da gbẹn yọle: “Ẹlinmhin da na mẹn bhi egbe, yẹ rẹkpa mẹn rẹ kpanọ mundia.” (Ezek. 2:1, 2) Akizẹbue, bi rẹ na ọne ẹghe rebhe nin Ẹzikiẹ rẹ lu iwẹnna akhasẹ, “obọ” nọnsi Osẹnobulua, nọn mundia nin ẹlinmhin nọn khiale nọnsọle, da wo ha dia ọle. (Ezek. 3:22; 8:1; 33:22; 37:1; 40:1) Ẹlinmhin nọn khiale nọnsi Osẹnobulua da re ọne ahu nin Ẹzikiẹ rẹ sabọ miẹnsọn nan mun nanlẹn. Ọne ẹsọn hi nin ọle rẹ dọ wewe uhọnmhunje nọnsi Osẹnobulua man ẹbho ne wo bhi uhọnmhọn, bi ne imhọn itohan. (Ezek. 3:7) Jehova da taman Ẹzikiẹ yọle: “Mẹn re ẹlo nọnsẹ zeze a bii ẹlo nọnsele, yẹ re ukẹhae nọnsẹ zeze a bii ukẹhae nọnsele. Mẹn re ukẹhae nọnsẹ diabe diaamọnd, nọn kaka gbera udo. Hẹi ha mun ofẹn ele, la ji ẹlo nọnsele re uwẹ ha guọ.” (Ezek. 3:8, 9) Inian ọ diabe Jehova taman Ẹzikiẹ yọle: ‘Hẹi ji egbe lọ uwẹ ranmhude uwedẹ nin ene ẹbho rẹ wo bhi uhọnmhọn, mẹn dẹ re ahu nin uwẹ.’

 ⁹ Rẹ na ọne ẹghe nin ha khian, ẹlinmhin nọn khiale nọnsi Osẹnobulua da ha rẹkpa Ẹzikiẹ rẹ lu iwẹnna itẹmhọn Osẹnobulua nin ọle ha lu. Ẹzikiẹ da yọle ghe, obọ nọnsi Jehova da ha ribhi egbe ọle. Ọne akhasẹ da noo uzana ọkpa rẹ luẹ, yẹ manman lẹn otọ ọne uhọnmhunje nin ọle ha dọ wewe man ẹbho, beji ọle ha da sabọ re ọkhọle rebhe rẹ wewe ọle. (Ezek. 3:14, 15) Sẹyẹ, Jehova da taman ọlẹn nin ọle ha khian iyala ọkpa bhi eji ẹlinmhin nọnsọle da na ọle bhi egbe. (Ezek. 3:23, 24) Bhiriọ, Ẹzikiẹ da muegbe nin ọle rẹ munhẹn lu iwẹnna nin Osẹnobulua mun nanlẹn.

10. Be ha sabọ rẹkpa mhan rẹ ha tẹmhọn Osẹnobulua? Bezẹle?

¹⁰ Be ha sabọ rẹkpa mhan rẹ ha tẹmhọn Osẹnobulua man ẹbho? Nin mhan rẹ re ewanniẹn ọbhọ, ria ẹmhọn ebe sunu ji Ẹzikiẹ. Ọkuẹsẹ ọle munhẹn ha tẹmhọn Osẹnobulua, ẹlinmhin nọnsi Osẹnobulua da re ọne ahu nanlẹn rẹ sabọ lu ọle. Bọsi Ẹzikiẹ mhan dẹ sabọ ha tẹmhọn Osẹnobulua ẹlẹnan sade ẹlinmhin nọnsi Osẹnobulua rẹkpa mhan. Bezẹle? Ranmhude Esu kpokpo mhan ẹlẹnan beji ọle ha da de mhan obọ ọi nin mhan hẹi yẹ tẹmhọn Osẹnobulua. (Rev. 12:17) Ẹbho ne bunbun riale ghe, Esu wo manman mhọn ahu, ghe mhan ida sabọ nanlẹn dan. Sokpan, mhan re iwẹnna itẹmhọn Osẹnobulua nin mhan lu rẹ ha khọn ọlẹn miotọ. (Rev. 12:9-11) Uwedẹ nela? Ahamiẹn mhan tẹmhọn Osẹnobulua, mhan ki rẹman ghe, mhan bha mun ofẹn ekpokpo nesi Esu. Ẹghe nọn hi ki rẹ khin nin mhan rẹ tẹmhọn Osẹnobulua, mhan ki khọn Esu miotọ. Bhiriọ, be imhan ha sabọ ta beji a miẹn ghe mhan sabọ tẹmhọn Osẹnobulua, aharẹmiẹn eghian mhan kpokpo mhan? Mhan dẹ sabọ yọle ghe, ẹlinmhin nọn khiale nọnsi Osẹnobulua rẹkpa mhan. Sẹyẹ, Jehova wo re ẹlo esili ha ghe mhan.—Matt. 5:10-12; 1 Pet. 4:14.

11. Be ẹlinmhin nọnsi Osẹnobulua ha sabọ rẹkpa mhan rẹ lu? Be imhan ha lu beji Osẹnobulua ha da ha re nin mhan?

¹¹ Emhin ọbhebhe nela mhan luẹle, sade mhan ria ẹmhọn ebi Jehova rẹ rẹkpa Ẹzikiẹ rẹ sabọ  wewe ẹmhọn ọlẹn yẹ? Ẹlinmhin nọnsi Osẹnobulua dẹ sabọ rẹkpa mhan rẹ khọn ọnọghọ nọn hi ki rẹ khin nin mhan miẹn bhi iwẹnna itẹmhọn Osẹnobulua nin mhan lu. (2 Cor. 4:7-9) Bhiriọ, be bhọ mhan ha lu beji a ha da miẹn ghe Osẹnobulua ki ha re ẹlinmhin nọnsọle nin mhan? Ọkhẹke nin mhan ha bhii Osẹnobulua ẹghe rebhe nin ọle re nin mhan, yẹ rẹọbhọ ghe ọle dẹ họn erọnmhọn nọnsẹmhan. Jesu da taman edibo nesọle yọle: “Ha nọọn, . . . bha ha guanọ, . . . bha ha so obọ bhi odẹ.” Bhiriọ, Jehova ki “re ẹlinmhin nọn khiale nin ene bhii ọle le.”—Luke 11:9, 13; Acts 1:14; 2:4.

12. Beji a rẹman bhi Ezekiel 2:9–3:3, ejela ọne ebe nan khili na vae? Be a gbẹn ọbhi ẹkẹ ọle?

¹² Ọ iyi ẹlinmhin nọnsi Osẹnobulua ọkpa rẹkpa Ẹzikiẹ, sokpan ọta nesọle da yẹ rẹkpa ọle. Bhi imianlo nin Ẹzikiẹ miẹn, ọle da daghe obọ nọn mun ebe nan khili mhọn. (Tie Ezekiel 2:9–3:3.) Ji ọne ebe nan khili na vae? Be a gbẹn ọbhi ẹkẹ ọle? Be ọ rẹ rẹkpa Ẹzikiẹ yẹ? Bha ji mhan fẹ ewanniẹn rẹji ele ghe. Ojukhuo nọnsi Osẹnobulua ọne ebe nan khili na vae. Iriọ a ha da miẹn Jehova da noo ọkpa bhi ene ẹhi enẹn nin Ẹzikiẹ ka daghe rẹ re ọne ebe nan khili nanlẹn. (Ezek. 1:8; 10:7, 20) Ọta nesi Osẹnobulua, ele ribhi ọne ebe nan khili—uhọnmhunje ọsi ibhohiẹn nin Ẹzikiẹ ha noo ẹghe nọn tanlẹn rẹ wewe man ibhokhan Izrẹl ne wo bhi uhọnmhọn ne ribhi imun. (Ezek. 2:7) A da gbẹn ọne uhọnmhunje nan ọbhi obọ veva ọsi ọne ebe nan khili.

13. Be Jehova taman Ẹzikiẹ nin ọle lu rẹji ọne ebe nan khili? Bezẹle nọn da ha mhẹn bhi unun?

¹³ Jehova da taman akhasẹ nọnsọle nin ọle le ọne ebe nan khili yẹ ji ọle vuọn ẹkẹ nọnsọle. Ẹzikiẹ da lu ebi Jehova taman ọlẹn tee. Ọle da le ọne ebe nan khili rebhe. Be ọne obọ ọle nan mundia nan bhi imianlo nin Ẹzikiẹ miẹn? Ọ da khẹke nin Ẹzikiẹ manman lẹn otọ uhọnmhunje nin ọle ha dọ wewe. Ọkhẹke nin ọle manman rẹọbhọ ọne uhọnmhunje, beji ọle ha da sabọ ha mhọn ọne ọhubhudu rẹ dọ wewe ọle man ẹbho. Sokpan, emhin ọhan-ilo da sunu. Ẹzikiẹ da kere ghe ọne ebe nan khili wo ha “mhẹn bhi unun bii amẹn-ẹlọn.” (Ezek.3:3) Bezẹle? Ranmhude rẹji Ẹzikiẹ, ọne isẹhoa nin ọle mhọn nin ọle rẹ dọ wewe uhọnmhunje nọnsi Jehova man ẹbho wo manman ha ti ọle bhọ. (Ps. 19:8-11) Ọ da wo manman ha ti ọle bhọ ghe Jehova zẹ ọle nin ọle ha yi akhasẹ nọnsọle.

14. Be rẹkpa Ẹzikiẹ rẹ muegbe rẹ miẹnsọn nan mun nanlẹn?

¹⁴ Akizẹbue, Jehova da taman Ẹzikiẹ yọle: “Kaehọ ọta nesẹmhẹn rebhe nin mẹn taman uwẹ, yẹ ne ele bhi ọkhọle.” (Ezek. 3:10) Jehova da re ene ọta nan rẹ ji Ẹzikiẹ lẹn ghe, ọkhẹke nin ọle dọnmhegbe rẹ ye ene ọta nan gbẹn ọbhi ọne ebe nan khili re, yẹ ha ria eria nyan ele. Ẹghe nin Ẹzikiẹ ki rẹ lu iriọ, urẹọbhọ nọnsọle da wo ha ziẹn ọbhọ. Sẹyẹ, ọ da rẹkpa ọle rẹ lẹn ọne uhọnmhunje nin ọle ha dọ wewe man ẹbho. (Ezek. 3:11) Ẹghe nin Ẹzikiẹ ki rẹ manman lẹn otọ uhọnmhunje nọnsi Osẹnobulua yẹ rẹọbhọ, ọle da muegbe nin ọle rẹ munhẹn dọ ha wewe ọne uhọnmhunje man ẹbho, yẹ ha lu ọle rẹ sẹbhi ẹghe nin ọle ha rẹ miẹn ọne ẹsọn fo.—Yẹ fẹ Psalm 19:14 ghe.

15. Nin mhan da sabọ ha lu iwẹnna itẹmhọn Osẹnobulua nin mhan lu, be ọkhẹke nin mhan ha ne ọbhi ọkhọle?

¹⁵ Ọkhẹke nin mhan yẹ ji Ọta nesi Osẹnobulua ha ziẹn urẹọbhọ nọnsẹmhan beji mhan ha da sabọ ha lu iwẹnna itẹmhọn Osẹnobulua nin mhan lu. Ọkhẹke nin mhan ha ne emhin rebhe nin Jehova taman mhan bhi ọkhọle. Jehova noo Baibo rẹ ne imhan talọ ẹlẹnan. Be imhan ha rẹ sabọ ji Ọta nọnsi Osẹnobulua ha rẹso uwedẹ nin mhan rẹ ria eria, ebi emhin dia mhan yẹ bhi egbe bi emhin nin mhan lu?

16. Be imhan ha lu rẹji Ọta nọnsi Osẹnobulua? Be imhan ha lu beji mhan ha da manman lẹn otọle nọnsẹn?

 ¹⁶ Beji mhan rẹ mhọn egbe nọn danlẹn sade mhan le ebale, nọn da yẹ wẹnna bhi egbe mhan, iriọ urẹọbhọ nọnsẹmhan yẹ rẹ ziẹn ọbhọ sade mhan tie Ọta nọnsi Osẹnobulua yẹ ria eria nyan ọlẹn. Ọkhẹke nin mhan ha mhọnlẹn bhi ọkhọle ebi mhan luẹle rẹ ji ọne ebe nan khili. Jehova ho nin mhan ji Ọta nọnsọle da vuọn mhan ẹkẹ. Ọnin hi, nin mhan rẹ manman lẹn otọ Ọta nọnsọle nọnsẹn. Mhan dẹ sabọ lu iriọ, sade mhan nan erọnmhọn, tie Baibo yẹ ria eria nyan ọlẹn. Mhan ka nan erọnmhọn nin mhan rẹ muegbe ọkhọle nọnsẹmhan ọbhi otọ ọkuẹsẹ mhan tie Baibo. Sẹyẹ, mhan ki mundia, beji mhan ha da sabọ manman ria eria nyan ebi mhan tiele. Be ha ki sunu? Beji mhan ha rẹ manman ha ria eria nyan ebi mhan tiele, mhan ki manman ha lẹn Ọta nọnsi Osẹnobulua nọnsẹn. Bhiriọ, urẹọbhọ nọnsẹmhan ki ha ziẹn ọbhọ.

17. Bezẹle nọn da khẹke nin mhan ha ria eria nyan ebi mhan tie bhi Baibo?

¹⁷ Bezẹle nọn da khẹke nin mhan ha tie Baibo yẹ ria eria nyan ọlẹn? Ranmhude mhan ha lu iriọ, ọ ki re ọne ahu nin mhan rẹ ha tẹmhọn Osẹnobulua nian, yẹ rẹ sabọ wewe uhọnmhunje ọsi ibhohiẹn nin mhan ha wewe bhi ẹghe odalo. Sẹyẹ, ahamiẹn mhan ria eria nyan ikpẹ nesi Jehova, ikolu nin mhan bi ọle ko mhọnlẹn ki ha ziẹn ọbhọ. Bhiriọ, mhan ki ha mhọn ọfure bi ọkhọnlẹn bhi iẹnlẹn.—Ps. 119:103.

18. Be ẹbho nin mhan tẹmhọn Osẹnobulua man ha dọ lẹn?

¹⁸ Akhasẹ Ẹzikiẹ ha khin. Sokpan, mhan iyi akhasẹ. Ọrẹyiriọ, mhan wo muegbe nin mhan rẹ ha wewe uhọnmhunje nọnsi Jehova man ẹbho ọkuẹsẹ ẹghe nin ọle ha rẹ re ọkpẹnlẹn ọbhọ. Ẹghe ibhohiẹn ha ki sẹ, ẹbho nin mhan tẹmhọn Osẹnobulua man ida ha mhọn emhin nọn ha re ele yọle ghe ele bha hẹnmhọn uhọnmhunje nọnsi Osẹnobulua, ghe, ọle re ẹlo gbe ele a. (Ezek. 3:19; 18:23) Sokpan, ele ki dọ lẹn sẹbhọ ghe, uhọnmhunje nin mhan wewe, obọ Osẹnobulua ọ na vae.

19. Be ha re ọne ahu nin mhan rẹ sabọ lu iwẹnna itẹmhọn Osẹnobulua nin mhan lu sotọ?

¹⁹ Be ha re ọne ahu nin mhan rẹ sabọ lu iwẹnna itẹmhọn Osẹnobulua nin mhan lu sotọ? Ene emhin ea ne rẹkpa Ẹzikiẹ. Mhan tẹmhọn Osẹnobulua ranmhude mhan lẹnmhin ghe Jehova hi ọnọn je mhan. Ẹlinmhin nọn khiale nọnsi Osẹnobulua re ahu nin mhan. Urẹọbhọ nọnsẹmhan yẹ ziẹn ọbhọ sade mhan tie Ọta nọnsi Osẹnobulua. Jehova dẹ rẹkpa mhan rẹ sabọ lu iwẹnna itẹmhọn Osẹnobulua nin mhan lu, yẹ sabọ ‘ziẹngbe sẹbhi ọkpẹnlẹn’.—Matt. 24:13.