1. Be imhan rẹ lẹn yẹ Jehova guanọ nin ọle sikẹ mhan.

 JEHOVA guanọ nin mhan sikẹ ọle. (Jas. 4:8) Ọle ho nin ọle ha yi Osẹnobulua nọnsẹmhan, Aba mhan bi Ọmọẹ mhan. Ọle re ewanniẹn ọbhi erọnmhọn nesẹmhan, yẹ rẹkpa mhan bhi ẹghe ọnọghọ. Sẹyẹ, ọle noo agbotu nọnsọle rẹ man mhan emhin yẹ gbega mhan. Ọkpakinọn, be ọkhẹke nin mhan lu nin mhan rẹ ha sikẹ Osẹnobulua?

2. Be imhan ha rẹ sabọ ha sikẹ Jehova yẹ?

² Mhan dẹ sabọ sikẹ Jehova sade mhan nan erọnmhọn ji ọle, tie Baibo yẹ ria eria nyan ọlẹn. Mhan ha lu iriọ, mhan ki manman hoẹmhọn ọlẹn yẹ ha khuẹnmhẹn ọlẹn. Mhan ki yẹ muegbe rẹ ha hẹnmhọn nanlẹn, yẹ re ogẹn nọn khẹke ọle nanlẹn. (Rev. 4:11) Beji mhan ha rẹ manman ha lẹn Jehova nọnsẹn, iriọ mhan ha rẹ manman ha mun udu nyan ọlẹn bi agbotu nin ọle noo rẹ rẹkpa mhan.

3. Be Esu rẹ dọnmhegbe yẹ nin ọle rẹ re imhan zẹ Jehova obọ? Be ha rẹkpa mhan beji a ha da miẹn ghe mhan bha fikeke gbe Osẹnobulua nọnsẹmhan bi agbotu nọnsọle? (Psalm 31:13, 14)

³ Esu dọnmhegbe nin ọle rẹ re imhan zobọ bhọ rẹ ha ga Jehova, manman nọn sade mhan kuẹlo da ọnọghọ. Be ọle rẹ lu ọnan yẹ? Ọle ki ha dọnmhegbe nin ọle rẹ re imhan miẹn ghe mhan bha yẹ ha mun udu nyan Jehova bi agbotu nọnsọle. Sokpan, mhan dẹ sabọ miẹn ghe mhan bha de ọbhi ufi nesọle. Ahamiẹn urẹọbhọ nọnsẹmhan deziẹn nọnsẹn, yẹ wo manman mun udu nyan Jehova, mhan ida fikeke gbe Osẹnobulua nọnsẹmhan bi agbotu nọnsọle.—Tie Psalm 31:13, 14.

4. Be imhan ha zilo nyan bhi ọne uhọnmhọn-ọta nan?

 ⁴ Bhi ọne uhọnmhọn-ọta nan, mhan dẹ zilo nyan ọnọghọ ea nin mhan ha sabọ kuẹlo da. Ọdeọde bhi ẹwẹ ele dẹ sabọ re imhan miẹn ghe mhan bha yẹ mun udu nyan Jehova bi agbotu nọnsọle. Be ene ọnọghọ nan ha rẹ sabọ re imhan zobọ bhọ rẹ ha ga Jehova yẹ? Be imhan ha lu beji a ha da miẹn Esu bha sabọ re ene ọnọghọ nan re imhan zobọ bhi oga nọnsi Jehova?

5. Be ọkakale ha rẹ sabọ re imhan miẹn ghe mhan bha yẹ mun udu nyan Jehova bi agbotu nọnsọle?

⁵ Ẹgheso, mhan kuẹlo da ọkakale bọsi ahamiẹn ene ribhi azagba-uwa mhan kpokpo mhan, la mhan iyẹ mhọn iwẹnna. Be ọkakale ne sẹ iriọ ha rẹ re imhan miẹn ghe, mhan bha yẹ mun udu nyan agbotu nọnsi Jehova, yẹ zobọ bhọ rẹ ha ga Jehova? Ahamiẹn ọnọghọ ribhọ nin mhan ziẹngbe ọle bhi ẹghe nọn ree nian, mhan sabọ rẹ dọ munhẹn ha riale ghe ọria soso iribhọ nọn ha rẹkpa mhan. Sẹyẹ, egbe sabọ rẹ lọ mhan. Esu noo ẹghe nọn sẹ inian rẹ re imhan riale ghe, Jehova bha hoẹmhọn mhan. Esu guanọ nin ọle re imhan ha riale ghe, Jehova la agbotu nọnsọle si ọnọghọ nin mhan kuẹlo da. Emhin nọn sẹ inian, ọle sunu ji ibhokhan Izrẹl eso bhi otọ Ijipt. Ele da ka rẹọbhọ ghe, Jehova zẹ Mozis bi Erọn rẹ dọ fan ele fia bhi otọ Ijipt. (Ex. 4:29-31) Ọkpakinọn, akizẹbue, ẹghe nin Fero ki rẹ manman re iẹnlẹn ha nọghọ ele, ele da ha yọle Mozis bi Erọn si ọnọghọ nin ele ha ye. Bhiriọ, ele da taman ele yọle: “Bha re ẹkẹ mhan ha khọ Fero bi eguọmhandia nesọle. Sẹyẹ, bha re agbada bhi obọ nọnsele rẹ gbọnọ mhan an.” (Ex. 5:19-21) Ele da ha yọle ene eguọmhandia nesi Osẹnobulua zẹle ele loya. Ebi ele lu nan bha gba. Ahamiẹn ọ ki ree nin uwẹ mọn da ziẹngbe ọkakale, be uwẹ ha rẹ sabọ manman ha mun udu nyan Jehova bi agbotu nọnsọle yẹ?

6. Be imhan miẹn luẹ bhi obọ Habakọk nin akhasẹ rẹji ebi mhan ha rẹ sabọ ha ziẹngbe ọnọghọ nin mhan kuẹlo da yẹ? (Habakkuk 3:17-19)

⁶ Nan erọnmhọn ji Jehova rẹ taman ọlẹn ebe ri uwẹ bhi ọkhọle, yẹ mun udu nyan ọlẹn nin ọle rẹkpa uwẹ. Habakọk nin akhasẹ da kuẹlo da ọkakale ne bunbun. Ẹghe ọkpa ribhọ nọn rẹ diabe ọle da ha mhọn edandan si ẹmhọn ọlẹn rẹtẹ Jehova. Bhiriọ, ọle da nan erọnmhọn rẹ taman Jehova ebi emhin dia ọle yẹ bhi egbe. Ọle da yọle: “Eo Jehova, eka ẹghe mẹn ha viẹ bu uwẹ re sẹ, nin uwẹ rẹkpa mẹn, nin uwẹ bha da kaehọ? . . . Bezẹle nin uwẹ da gbesẹa nin udenyẹnyẹn?” (Hab. 1:2, 3) Jehova da re ewanniẹn ọbhi erọnmhọn nin ọle nan ji ọle. (Hab. 2:2, 3) Habakọk ki ria eria nyan ebi Jehova rẹ miẹn ẹbho nesọle fan yẹ, ọle da kie ha ghọnghọn. Ọle da dọ rẹọbhọ ghe, ẹmhọn ọlẹn rẹtẹ Jehova, ghe ọle dẹ rẹkpa ọle rẹ sabọ ziẹngbe ọnọghọ nọn hi ki rẹ khin. (Tie Habakkuk 3:17-19.) Be imhan miẹn luẹ bhọ? Ahamiẹn uwẹ kuẹlo da ọkakale, nan erọnmhọn ji Jehova rẹ taman ọlẹn ebi emhin dia uwẹ yẹ bhi egbe. Bhiriọ, uwẹ ha mun udu tẹ ọle nin ọle rẹkpa uwẹ. Uwẹ ha lu iriọ, uwẹ ki sabọ ha mhọn ọlẹn bhi ọkhọle ghe Jehova dẹ re ọne ahu nin uwẹ beji uwẹ ha da sabọ ziẹngbe. Sẹyẹ, ahamiẹn uwẹ daghe uwedẹ nin ọle rẹ ha rẹkpa uwẹ, urẹọbhọ nin uwẹ mhọn da ọle ki ha ziẹn ọbhọ.

7. Be bhọ ọria bhi azagba-uwa nọnsi Shirley rẹ ha ho nin ọle re ọle rẹọ ọi? Be rẹkpa ọle rẹ sẹyẹ sun rẹkhan Jehova?

⁷ Wo ha lu emhin ne ha rẹkpa uwẹ ha sikẹ Jehova. Ọnan hi ebe rẹkpa obhio mhan nin okhuo natiọle Shirley, nọn ribhi Papua New Guinea ẹghe nin ọle rẹ kuẹlo da ọnọghọ. b Azagba-uwa ọsi Shirley bha fe. Ẹgheso, ọ nọghọ ele rẹ miẹn ebale nọn ha sẹ ele le. Ọria ọkpa nọn na azagba-uwa nọnsele vae da ha ho nin ọle re ọle miẹn ghe ọle bha yẹ mun udu nyan Jehova. Ọle da taman ọlẹn yọle: “Uwẹ yọle ghe, ẹlinmhin nọn  khiale nọnsi Osẹnobulua rẹkpa uwẹ. Sokpan, ọne urẹkpa ki bho nian? Azagba-uwa nọnsẹ imhọn igho. Uwẹ riia ẹghe nọnsẹ a rẹ tẹmhọn Osẹnobulua khian.” Shirley da yọle: “Mẹn da nọọn egbe mẹn: ‘Ẹmhọn mhan be gene rẹtẹ Osẹnobulua hiehie?’ Bhiriọ, mẹn da wo re ẹjẹje nan erọnmhọn ji Jehova rẹ taman ọlẹn emhin rebhe ne ribhi ọkhọle mẹn. Mẹn da wo ha tie Baibo bi ebe nesẹmhan, wo ha dagbare bhi inẹbho, yẹ yo ikolo oga.” Ọle da munhẹn dọ lẹn sẹbhọ ghe, Jehova wo ha gbẹloghe azagba-uwa nọnsọle. Ohanmhẹn bha gbe azagba-uwa nọnsọle. Sẹyẹ, ele da wo ha ghọnghọn. Shirley da yọle: “Ọ da wo dia mẹn bhi egbe ghe, Jehova wo wanniẹn erọnmhọn nesẹmhẹn.” (1 Tim. 6:6-8) Ahamiẹn uwẹ wo ha lu emhin ne ha re uwẹ sikẹ Jehova, uwẹ ida ji ọkakale, la edandan re uwẹ zobọ bhi oga nọnsi Jehova.

8. Be ha sabọ sunu ji ibhio mhan ne mun ọkalo bhi agbotu nọnsi Jehova?

⁸ Eghian mhan noo intanẹti rẹ bha ibhio mhan ne mun ọkalo bhi agbotu nọnsi Jehova ohoghe, la ha ka edandan mhan bhi ọkhọle rẹji ele. (Ps. 31:13) A muno ibhio mhan eso khue bhi ighan, yẹ yọle ghe ele lu emhin ne bha gba. Idia nọn sẹ inian Kristiẹn bhi ore nin ọhẹnhẹn ha ye ẹghe nan rẹ mun Pọl nin odibo khue bhi ebi ọle bha lu. Be ele rẹ lu emhin yẹ?

9. Be Kristiẹn eso rẹ lu emhin yẹ ẹghe nan rẹ mun Pọl nin odibo khue?

⁹ Kristiẹn eso bhi ore nin ọhẹnhẹn da zobọ bhọ rẹ ha re iyobọ nin Pọl nin odibo ẹghe nan rẹ mun ọlẹn khue bhi ighan bhi Romu. (2 Tim. 1:8, 15) Bezẹle? Ẹkhọ Pọl be ha lo ele ranmhude nin ẹbho rẹ ha re ẹlo oyi ghe ọle? (2 Tim. 2:8, 9) La ranmhude ofẹn be ha mun ele ghe a dẹ yẹ kpokpo ele be zẹ? Emhin nọn hi ki rẹ zẹ ele lu ebi ele lu, riale ebi emhin ha dia Pọl bhi egbe yẹ. Ọle wo ziẹngbe ọnọghọ ne bunbun, yẹ bhọ mun iẹnlẹn nọnsọle ọbhi okhẹnan ranmhude ele. (Acts 20:18-21; 2 Cor. 1:8) Mhan hẹi diabe ẹbho ne bha rẹkpa Pọl ẹghe nin ọle rẹ wo ha guanọ urẹkpa. Be ọkhẹke nin mhan ha mhọn bhi ọkhọle sade a kpokpo ibhio mhan ne mun ọkalo bhi agbotu?

10. Be ọkhẹke nin mhan yere sade a kpokpo ibhio mhan ne mun ọkalo bhi ẹwẹ mhan? Bezẹle?

 ¹⁰ Ye ebezẹle nan da ha kpokpo mhan re, bi ọnọn si ọle. 2 Timothy 3:12 yọle: “Ọrebhe ne guanọ nin ele re iẹnlẹn nọnsele rẹ ha ga Osẹnobulua beji Jesu Kristi lu, dẹ yẹ miẹn ekpokpo.” Bhiriọ, mhan hẹi ji ọ han mhan ilo ghe, ibhio mhan ne mun ọkalo bhi ẹwẹ mhan Esu kẹ wo kpokpo. Ọle guanọ nin ene ibhio mhan hẹi yẹ sun rẹkhan Jehova, yẹ gbe ofẹn mhan bhi ẹkẹ.—1 Pet. 5:8.

11. Be imhan miẹn luẹ bhi obọ Onẹsiforọs? (2 Timothy 1:16-18)

¹¹ Wo ha re iyobọ nin ibhio ẹ, yẹ wo sun rẹkhan ele. (Tie 2 Timothy 1:16-18.) Kristiẹn ọkpa bhi ore nin ọhẹnhẹn natiọle Onẹsiforọs da wo rẹkpa Pọl ẹghe nan rẹ mun ọle khue. “Ẹkhọle [Pọl] bha ha lo ọle ranmhude onighan [Pol] khin.” Sokpan, Onẹsiforọs da guanọ Pọl. Ẹghe nin ọle ki rẹ miẹn ọlẹn, ọle da guanọ uwedẹ kẹkẹ nin ọle ha rẹ rẹkpa ọle. Nin Onẹsiforọs rẹ lu ọnan, ọle da mun iẹnlẹn nọnsọle ọbhi okhẹnan. Be imhan miẹn luẹ bhọ? Mhan hẹi ji ofẹn eria re imhan miẹn ghe mhan bha rẹkpa ibhio mhan nan kpokpo. Sokpan, bha ji mhan lu ebi mhan ha sabọ lu rẹ rẹkpa ele. (Prov. 17:17) Ele guanọ nin mhan re oyẹẹ man ele, yẹ re iyobọ nin ele.

12. Be imhan miẹn luẹ bhi obọ ibhio mhan ne ribhi Russia?

¹² Bha ji mhan fẹ ebi ibhio mhan bhi Russia rẹ rẹkpa ibhio ele nan muno ọbhi ighan yẹ. Ẹghe nan rẹ muno eso ha khian ikotu, ibhio mhan ne bunbun da vae dọ re iyobọ nin ele. Be imhan miẹn luẹ bhọ? Ahamiẹn a mun ohoghe gbe ibhio mhan ne mun ọkalo bhi ẹwẹ mhan, a mun ele khue, la kpokpo ele, mhan hẹi ji ofẹn ha mun mhan. Nan erọnmhọn ji ele, gbẹloghe ene ribhi azagba-uwa nọnsele, yẹ guanọ uwedẹ kẹkẹ nin uwẹ ha rẹ re iyobọ nin ele.—Acts 12:5; 2 Cor. 1:10, 11.

13. Be ezuọzuọ ha rẹ sabọ re imhan miẹn ghe mhan bha yẹ mun udu nyan Jehova bi agbotu nọnsọle?

¹³ Ene ribhi azagba-uwa mhan ne iga Jehova, ene imhan ko wẹnna, la ene imhan ko yo isiku sabọ rẹ ha zuọzuọ mhan ranmhude mhan tẹmhọn Osẹnobulua, la ranmhude mhan re obọ rẹkhan uhi nesi Jehova. (1 Pet. 4:4) Ele sabọ rẹ yọle: “Ẹmhọn uwẹ yẹẹ mẹn, sokpan emhin nin otuẹ nọnsẹbha nẹ bun gbe. Sẹyẹ, ene emhin nin bha man ki dọnmhanlẹn.” Ẹbho eso sabọ yẹ rẹ re unun ha riia mhan an, ranmhude uwedẹ nin mhan rẹ ha ne ọria nan khu bhi agbotu lu emhin. Ele ki yọle: “Be uwẹ ha rẹ sabọ yọle ọria nọn mhọn oyẹẹ uwẹ khin?” Ọta ne sẹ inian dẹ sabọ re imhan ha mhọn edandan rẹji uhi nesi Jehova. Mhan sabọ rẹ dọ munhẹn ha riale: ‘Jehova be gene guanọ nin mẹn lu ebi ahu mẹn ida gbe? Agbotu nọnsọle ibe ji mhan da zẹ-obọ zẹ-oẹ?’ Ahamiẹn uwẹ kuẹlo da idia nọn sẹ inian, be uwẹ ha rẹ sabọ sikẹ Jehova bi agbotu nọnsọle yẹ?

14. Be imhan ha rẹ lu emhin yẹ sade ẹbho zuọzuọ mhan nin mhan rẹ re obọ rẹkhan uhi nesi Jehova? (Psalm 119:50-52)

¹⁴ Muegbe rẹ ha re obọ rẹkhan uhi nesi Jehova. Jobu da re obọ rẹkhan uhi nesi Jehova arẹmiẹn a zuọzuọ ọle ranmhude nin ọle rẹ lu iriọ. Ọkpa bhi ikpea ne yọle imọẹ Jobu ele khin da dọnmhegbe nin ọle rẹ re Jobu rẹọbhọ ghe, ọ bha rẹtẹ Osẹnobulua sade Jobu re obọ rẹkhan uhi nesọle, la ọle bha re obọ rẹkhan ọlẹn. (Job 4:17, 18; 22:3) Ọkpakinọn, Jobu bha rẹọbhi ọne ohoghe nan. Ọle lẹnmhin ghe uhi nesi Jehova gbale. Bhiriọ, ọle da muegbe nin ọle rẹ re obọ rẹkhan ele. Ọle bha ji ẹbho da re ọle miẹn ghe ọle bha yẹ sun rẹkhan Osẹnobulua. (Job 27:5, 6) Be imhan miẹn luẹ bhọ? Hẹi ha mhọn edandan da uhi nesi Jehova ranmhude ẹbho zuọzuọ uwẹ. Ria ẹmhọn ebe sunu bhi iẹnlẹn nọnsẹ. Uwẹ bha be daghe ghe iẹnlẹn nọnsẹ wo mhẹn ọbhọ ranmhude nin uwẹ rẹ re obọ rẹkhan  uhi nesi Jehova? Muegbe nin uwẹ rẹ ha ribhi ọne agbotu nọn re obọ rẹkhan uhi nesi Jehova. Bhiriọ, ebi ẹbho hi ki rẹ zuọzuọ uwẹ sẹ yẹ, uwẹ ida zobọ bhọ rẹ ha ga Jehova.—Tie Psalm 119:50-52.

15. Bezẹle nan da ha zuọzuọ Brizit?

¹⁵ Bha ji mhan fẹ ebe sunu ji obhio mhan nin okhuo natiọle Brizit ghe nọn nyẹnlẹn bhi India. Ene ribhi azagba-uwa nọnsọle da ha zuọzuọ ọle ranmhude nin ọle rẹ yi ọkpa bhi Esali Jehova. Ọ bha sẹ bue gbe nin ọle mianmẹn bhi ukpe 1997, ọdọ ọle nọn iyi Ọsali Jehova bha yẹ ha mhọn iwẹnna. Bhiriọ, ọle da zẹ nin ọle bi okhuo ọle nin Brizit, bi imọn ikhuo nesele dọ deba ene biẹ ọle ne ribhi agbaẹbho ọbhebhe dọ ha nyẹnlẹn. Ọkpakinọn, Brizit dẹ kuẹlo da ọnọghọ ne kaka gbera ọnọn ọle sẹ kuẹlo da. Ranmhude ọdọ ọle imhọn iwẹnna, ọle dẹ noo ẹghe nọnsọle rebhe rẹ ha wẹnna beji ọle ha da sabọ rẹkpa azagba-uwa nọnsọle. Yẹ rẹ deba ọnin, agbotu nọn sikẹ ele nẹ da ree sẹbhi ebe sẹ ikpọwala 220. Ọ da wo ba bhi egbe a ghe, ene ribhi azagba-uwa ọsi ọdọ ọle da wo ha kpokpo ọle ranmhude nin ọle rẹ yi ọkpa bhi Esali Jehova. Ọne ekpokpo da kaka sẹbhọ ghe, azagba-uwa ọsi Brizit da kpanọ bhi enin ha khian ije ebhebhe. Sẹyẹ, ọdọ ọle da yu bhi ẹghe nin ele bha re ẹlo ọi. Akizẹbue, ọkpa bhi imọn ikhuo nọnsọle nọn ribhi ikpe 12 da yu ranmhude nin ọle rẹ ha khọnmhọn emianmhẹn ikansa. Ebe kie wo re emhin khọ ọbhọ hi, ibhio Brizit da yọle ghe, ọle si ene emhin nan ne ruan ọlẹn. Ele da yẹ yọle ghe, sade ọle iyi ọkpa bhi Esali Jehova nọn, ene emhin nan rebhe irẹ sunu ji ọle. Ọrẹyiriọ, ọle da wo ha mun udu nyan Jehova, yẹ wo manman sikẹ agbotu nọnsọle.

16. Be Brizit rẹ miẹn elele yẹ ranmhude nin ọle rẹ sun rẹkhan Jehova bi agbotu nọnsọle?

¹⁶ Ranmhude eji Brizit da nyẹnlẹn wo manman ree bhi eji Kindọn Họọ ye, ọfẹotughe da taman ọlẹn nin ọle ha tẹmhọn Osẹnobulua bhi eji ọle da nyẹnlẹn, yẹ ha do ikolo oga bhi uwa nọnsọle. Bhi ọsi ọhẹnhẹn, ọ da dia ọle bhi egbe ghe ọne ẹsọn nan kpọnọ nanlẹn gbe. Sokpan, ọle da re obọ rẹkhan ọne adia nin obhio mhan re nanlẹn. Ọle da ha tẹmhọn Osẹnobulua man ẹbho, ha do ikolo oga bhi uwa nọnsọle yẹ deba imọn ikhuo nesọle ha lu oga azagba-uwa ẹghe  rebhe. Be ki nabhọre? Ọle da dọ munhẹn ha man ẹbho ne bunbun Baibo. Sẹyẹ, ene bunbun bhi ene ẹbho nin ọle ha man ele Baibo da mianmẹn. Bhi 2005, ọle da munhẹn ha lu iwẹnna ọkanẹfan ọsi ẹghe rebhe. Ọle da miẹn elele nin ọle rẹ mun udu nyan Jehova, yẹ sun rẹkhan agbotu nọnsọle. Imọn ikhuo nesọle wo ha ga Jehova. Sẹyẹ, agbotu eva ki ribhi ọne agọ nin ọle ye. Brizit rẹọbhọ ghe, Jehova hi ọnọn re ọne ahu nanlẹn rẹ sabọ ziẹngbe ọnọghọ nin ọle kuẹlo da, yẹ ziẹngbe ezuọzuọ nin ọle miẹn bhi obọ azagba-uwa nọnsọle.

17. Be ọkhẹke nin mhan muegbe rẹ lu?

¹⁷ Esu guanọ nin ọle re imhan rẹọbhọ ghe Jehova ida rẹkpa mhan sade mhan kuẹlo da ọnọghọ. Sẹyẹ, mhan ha sun rẹkhan agbotu nọnsi Jehova, iẹnlẹn nọnsẹmhan ki kaka bhọ. Esu guanọ nin ofẹn ha mun mhan sade a mun ohoghe gbe ibhio mhan ne mun ọkalo bhi ẹwẹ mhan, a kpokpo ele, la a mun ele ọbhi ighan. Sẹyẹ, ọle noo ẹbho rẹ zuọzuọ mhan beji a ha da miẹn ghe, mhan bha yẹ ha gbaẹkẹ uhi nesi Jehova bi agbotu nọnsọle. Ọrẹyiriọ, mhan lẹn ufi nesi Esu. Bhiriọ, ọle ida sabọ re ele mun mhan. (2 Cor. 2:11) Muegbe nin uwẹ hẹi rẹọbhi ohoghe nin Esu bha, yẹ wo muegbe rẹ ha sun rẹkhan Jehova bi agbotu nọnsọle. Yere ghe, Jehova ida fikeke gbe uwẹ ghẹdẹ. (Ps. 28:7) Bhiriọ, hẹi ji emhin soso re uwẹ miẹn ghe uwẹ bha yẹ ga Jehova.—Rom. 8:35-39.

18. Be imhan ha zilo nyan bhi uhọnmhọn-ọta nọn ki sẹ ọle bhi egbe?

¹⁸ Bhi ọne uhọnmhọn-ọta nan, mhan zilo nyan ọnọghọ eso nin mhan ha sabọ kuẹlo da. Ọkpakinọn, ọnọghọ nin mhan miẹn bhi ẹkẹ agbotu dẹ yẹ sabọ re imhan miẹn ghe mhan bha yẹ mun udu nyan Jehova bi agbotu nọnsọle. Be imhan ha rẹ sabọ khọn ene ọnọghọ nan yẹ? Mhan dẹ zilo nyan ọnan bhi uhọnmhọn-ọta nọn ki sẹ ọle bhi egbe.