UWẸ be sọnyẹnmhẹn bhi iluẹmhin Baibo nọnsẹ, la ọ be nọghọ uwẹ rẹ ha lu ọle ẹghe rebhe? Asabọmiẹn iriọ ọ dia rẹji mhan rebhe ẹgheso. Ọkpakinọn, ria ẹmhọn emhin eso nin mhan lu ẹghe rebhe, bọsi nin mhan rẹ khọa. Ọ i yi emhin nọn lẹkhẹ nin ọria rẹ sabọ kpanọ dọ khọa, sokpan mhan ha sabọ lu iriọ, egbe ki wo fu mhan re. Iriọ yẹ nọn. Iluẹmhin Baibo dẹ sabọ re egbe fu mhan re. (Ẹfẹ. 5:26) Fẹ emhin eso ghe ne ha sabọ rẹkpa uwẹ:

• Re ẹghe yi nin uwẹ ha rẹ ha lu iluẹmhin Baibo nọnsẹ. Ọkpa bhi “emhin ne lu uhọnmhọn-emhin nẹ”, nọn bha khẹke nin Kristiẹn re obọ-ikpẹgẹdẹ ha mun Baibo nin ọria tobọle luẹ khin. (Fil. 1:10) Nin uwẹ rẹ sabọ ha ye ẹghe nin uwẹ rẹyi re, gbẹn ọne ẹghe bi ukpẹdẹ nin uwẹ rẹyi nin uwẹ rẹ ha lu ọle ọbhi ebe, uwẹ ha yẹ re ọle bhi eji uwẹ ha da kẹ ha daghe ọle. La uwẹ sabọ rẹ lu ọle nin ifoni nọnsẹ ha ye uwẹ re sade ọ bu ọne ẹghe nin uwẹ rẹyi.

• Lu ọle bhi uwedẹ nin uwẹ lẹn ọ dẹ rẹ mhẹn uwẹ bhi egbe. Uwedẹ nela yẹẹ uwẹ rẹ luẹ emhin? Bhi ọsi ijiẹmhin, ọ be lẹkhẹ nin uwẹ rẹ mun ọkhọle ọbhi ebi uwẹ luẹ sade uwẹ lu ọle na bhi ebe sẹbhi uriagogo ọkpa? La, uwẹ da ha luẹ ọle khere-khere be mhẹn uwẹ bhi egbe nẹ? Uwẹ lẹn ọnọn ha mhẹn uwẹ bhi egbe nẹ, bhiriọ re obọ rẹkhan ọlẹn. Ahamiẹn ọ i ribhi uwẹ bhi ọkhọle rẹ luẹ emhin sade ẹghe nin uwẹ rẹyi sẹ, ọ dẹ ha mhẹn nin uwẹ rẹ lu ọle khere aharẹmiẹn ihuẹnlo igbe ọkpa uwẹ rẹ lu ọle. Uwẹ noo ihuẹnlo igbe rẹ luẹ emhin mhẹn gbera uwẹ bha zẹwẹ lu hiehie. Ahamiẹn uwẹ dọnmhegbe rẹ munhẹn, asabọmiẹn ọ dẹ ha ghọn uwẹ rẹ noo ẹghe nọn tanlẹn rẹ lu ọle.—Fil. 2:13.

• Mhanmhan ebi uwẹ ha luẹ ọbhi otọ. Asabọmiẹn uwẹ i ‘da ha noo ẹghe nọnsẹ nọnsẹn’ sade ẹghe nin uwẹ ha rẹ luẹ emhin uwẹ rẹ dọ ha ria ẹmhọn ebi uwẹ ha luẹ. (Ẹfẹ. 5:16) Dọnmhegbe gbẹn uhọnmhọn-ọta kẹkẹ nin uwẹ ho nin uwẹ luẹ ọbhi otọ. Ahamiẹn emhin ribhọ nọn bha mun uwẹ ẹlo kore, gbẹn ọlẹn ba emhin nin uwẹ ho nin uwẹ luẹ. Ẹghe-ẹghe nin uwẹ rẹ lu iluẹmhin Baibo nọnsẹ fo, uwẹ sabọ rẹ gbẹn emhin ebhebhe ba ene uwẹ ka mhọn bhi otọ.

• Ha fi emhin denọ sade ọkhẹke. Muegbe rẹ ha fi ẹghe nin uwẹ rẹyi nin uwẹ rẹ ha lu iluẹmhin Baibo nọnsẹ, bi emhin nin uwẹ luẹ bhọ denọ sade ọkhẹke. Ọ i yi eka ẹghe nin uwẹ noo, ebi uwẹ luẹ bhọ, la ẹghe nin uwẹ rẹ luẹ ọle hi ebe manman lu uhọnmhọn emhin, sokpan ebe manman lu uhọnmhọn emhin hi, nin uwẹ rẹ ha lu ọle ẹghe rebhe.

Mhan manman miẹn elele bhọ sade mhan lu iluẹmhin Baibo nọnsẹmhan ẹghe rebhe. Ọ rẹkpa mhan rẹ manman sikẹ Jehova, ọ rẹkpa mhan rẹ ha zẹ emhin ne mhẹn rẹ lu, sẹyẹ, ọ re egbe fu mhan re.—Josh. 1:8.