1-2. Be bhọ eso bhi “iwẹnna esili” nin ene ewanlẹn lu?

 AHAMIẸN uwẹ ki ka ga bhi ihe ọsi ene zẹ sikẹ ene ewanlẹn fo, asabọmiẹn uwẹ ki dọnmhegbe rẹ ha mhọn ene ikpẹ ne khẹkẹ nin ọria ha mhọn rẹ sabọ ha ga bhi ihe ọsi ọwanlẹn. Ọ dẹ yẹẹ uwẹ rẹ zegbere rẹ ha lu ọne “iwẹnna esili” nan?—1 Tim. 3:1.

² Ẹsọn nela ene ewanlẹn miẹn? Ele mun ọkalo bhi iwẹnna itẹmhọn Osẹnobulua. Ele wẹnna kaka rẹ ha man emhin, ele re Baibo ko ibhio mhan udu re, yẹ re ọta bi ijiẹmhin esili nọnsele rẹ bọn ibhio mhan bhi agbotu okhun. Mhan daghe ebezẹle nin Baibo da tie ene ewanlẹn ikpea ne wẹnna kaka nan “rẹ lu ẹsele.”—Ẹfẹ. 4:8.

3. Be obhio mhan nin okpea ha lu rẹ sabọ dọ kiẹn ọwanlẹn? (1 Timoti 3:​1-7; Taitọs 1:​5-9)

³ Be uwẹ ha lu rẹ sabọ dọ kiẹn ọwanlẹn bhi agbotu? Uwedẹ nan rẹ re ọria fiọbhi ihe ọsi ọwanlẹn wo dikẹ bhi uwedẹ nin iwẹnna rẹ sẹ ọria obọ bhi ọne agbọn nan ẹlẹnan. Ahamiẹn ọria nọn guanọ iwẹnna mhọn emhin nin ọria nọn nyan ọne iwẹnna guanọ, ọne iwẹnna dẹ kẹ wo sẹ ọle bhi obọ. Ọkpakinọn, ọ i yi iriọ bhi ihe ọsi ọwanlẹn bhi agbotu. Nin uwẹ rẹ sabọ dọ kiẹn ọwanlẹn, ọkhẹke nin uwẹ lu gbera nin uwẹ rẹ gheghe guẹ rẹ ha tẹmhọn Osẹnobulua, yẹ man emhin nọnsẹn. Ọkhẹke nin uwẹ ha mhọn ene ikpẹ nin Baibo yọle nin ene ewanlẹn ha mhọn nan tẹmhọnlẹn bhi 1 Timoti 3:​1-7 bi Taitọs 1:​5-9. (Tie ọle.) Bhi ọne uhọnmhọn-ọta nan, mhan dẹ zilo nyan emhin ea kpataki nan guanọ bhi obọ ọsi ene ewanlẹn. Ọhẹnhẹn, a dẹ ha tẹmhọn ele nọnsẹn bhi ẹkẹ agbotu bi olele. Ọzeva, ele dẹ ha re azagba-uwa nọnsele khian nọnsẹn. Ọzea, ele dẹ muegbe rẹ ha rẹkpa ibhio mhan bhi agbotu.

HA YI ỌRIA NAN TẸMHỌNLẸN NỌNSẸN

4. Be a re ọle ta nan rẹ “ha yi ọria nin okan ine?”

⁴ Nin uwẹ rẹ sabọ dọ kiẹn ọwanlẹn, ọkhẹke nin uwẹ “ha yi ọria  nin okan ine.” Ọnin hi, ọrebhe bhi agbotu dẹ ha tẹmhọn uwẹ nọnsẹn ranmhude uwedẹ esili nin uwẹ rẹ nyẹnlẹn. Sẹyẹ, ele i da ha tẹmhọn uwẹ khọlọ ranmhude uwedẹ nin uwẹ rẹ nyẹnlẹn. Rẹ deba ọnin, ọkhẹke nin uwẹ “ha yi ọria nin ẹbho tẹmhọnlẹn nọnsẹn bhi ughe.” Ẹbho ne i ga Osẹnobulua sabọ rẹ ha re unun riia uwẹ a ranmhude emhin nin uwẹ rẹọ i, ọkpakinọn ọ bha khẹke nin ele ha mhọn emhin nin ele ha gene mun mhọn rẹ ha yọle ghe uwẹ i nyẹnlẹn nọnsẹn, la ọria eku uwẹ khin. (Dan. 6:​4, 5) Nọọn egbe ẹ, ‘Ibhio mhan bhi agbotu bi ẹbho bhi olele be tẹmhọn mẹn nọnsẹn?’

5. Be uwẹ ha rẹ rẹman yẹ ghe “ọria nin emhin esili yẹẹ” uwẹ khin?

⁵ Ahamiẹn “ọria nin emhin esili yẹẹ” uwẹ khin, uwẹ dẹ ha gbẹlokotọ bhi eji eria da lu nọnsẹn, yẹ khuẹnmhẹn ele bhi ikpẹ esili nin ele rẹman. Sẹyẹ ọ dẹ ha re uwẹ ghọnghọn rẹ ha lu emhin esili nin ẹbho, uwẹ bhọ dẹ lu ọle nin ele gbera beji ọkhẹke. (1 Tẹsẹ. 2:8) Bezẹle nọn da manman lu uhọnmhọn emhin nin ene ewanlẹn rẹ ha mhọn ọne ikpẹ nan? Ranmhude ele manman noo ẹghe nọnsele rẹ gbẹloghe ene ibhio mhan, yẹ rẹ miẹn ẹsọn kẹkẹ nan mun nin ele. (1 Pita 5:​1-3) Arẹmiẹn ọne ẹsọn nan bha lẹkhẹ, eghọnghọn nin ele miẹn bhọ kpọnọ gbera emhin nọn hi ki rẹ khin nin ele fikekegbe nin ele rẹ sabọ miẹn ọne ẹsọn nan.—Iwẹn. 20:35.

6. Uwedẹ eso nela mhan ha rẹ rẹman ghe mhan “miẹn ẹbho ọbhi egbe?” (Hibru 13:​2, 16; yẹ fẹ ifoto ghe.)

⁶ Uwẹ dẹ rẹman ghe, uwẹ “miẹn ẹbho ọbhi egbe” sade uwẹ lu emhin esili nin ẹbho, rẹ dọ sẹbhi eria ne bha manman sikẹ uwẹ. (1 Pita 4:9) Ebe ọkpa da yọle ghe: “Ọria nọn miẹn ẹbho ọbhi egbe mhọn ifuẹkẹ da ẹbho nin ọle bha lẹn, sẹyẹ ọ ti ọle bhọ rẹ tie ele vae bhi uwa nọnsọle.” Nọọn egbe ẹ, ‘A be lẹn mẹn ọbhi ọria nọn miẹn ẹbho ọbhi egbe bhi agbotu?’ (Tie Hibru 13:​2, 16.) Ọria nọn miẹn ẹbho ọbhi egbe gha emhin nin ọle mhọn nin ẹbho ne rẹnẹ ji ọle, ene ibhiogue, eria ne rẹnẹ vae bhi agbotu nọnsọle, bi ene ọfẹotughe, la ibhio mhan ne wẹnna kaka rẹ re izebhudu nin ọrebhe bhi agbotu.—Gen. 18:​2-8; Prov. 3:27; Luk 14:​13, 14; Iwẹn. 16:15; Rom 12:13.

7. Be ọwanlẹn bhi agbotu ha rẹ rẹman yẹ ghe ọle “iyi ọria nọn hoẹmhọn igho?”

⁷ “Ọ iyi ọria nọn hoẹmhọn igho.” Ọnan rẹman ghe, ọ i yi ẹmhọn igho bi ebi igho ha sabọ dẹ hi emhin nọn lu uhọnmhọn emhin rẹji uwẹ. Aharẹmiẹn uwẹ fele, la uwẹ bha fe, ẹmhọn Agbejele uwẹ mun kalo bhi emhin rebhe nin uwẹ lu bhi iẹnlẹn. (Mat. 6:33) Ọkhẹke nin uwẹ noo ẹghe, ahu, bi emhin rebhe nin uwẹ mhọn rẹ ha ga  Jehova, rẹ gbẹloghe azagba-uwa nọnsẹ, yẹ rẹ ha rẹkpa ibhio mhan bhi agbotu. (Mat. 6:24; 1 Jọn. 2:​15-17) Nọọn egbe ẹ: ‘Ẹlo nela mẹn rẹ ghe igho? Mẹn be ji emhin nin mẹn mhọn khọn mẹn? La ebi mẹn ha rẹ manman fe yẹ, bi ebi mẹn ha rẹ manman ha mhọn emhin yẹ hi emhin nin mẹn wo ria ẹmhọnlẹn?’—1 Tim. 6:​6, 17-19.

8. Uwedẹ eso nela uwẹ ha rẹ rẹman ghe “ọria nọn lu emhin ọbhi oleghe” bi “ọria nọn mun egbe ọbhi ibẹẹ” uwẹ khin?

⁸ Ahamiẹn “ọria nọn lu emhin ọbhi oleghe” bi “ọria nọn mun egbe ọbhi ibẹẹ” uwẹ khin, uwẹ ki ha re ẹwanlẹn lu emhin rebhe nin uwẹ lu. Bhi ọsi ijiẹmhin, uwẹ i da ha le ebale gbe, la da anyọn gbe. Uwẹ dẹ ha noo ẹwanlẹn bhi uwedẹ nin uwẹ rẹ muegbe, bi unan eto nin uwẹ mun, sẹyẹ uwẹ dẹ gbẹlokotọ bhi emhin nin uwẹ rẹ re egbe re ahoho. Uwẹ i da ha lu ene emhin nin ẹbho ne i ga Jehova lu bhi ọne agbọn nan. (Luk 21:34; Jem. 4:4) Uwẹ i da kẹ wo ha miẹn ohu ahamiẹn a bha lu uwẹ nọnsẹn. Uwẹ i da ha yi “ọria nọn da anyọn gbe egbe,” la ọria nan lẹn ọbhi ọria nọn manman da anyọn. Nọọn egbe ẹ, ‘Uwedẹ nin mẹn rẹ nyẹnlẹn be rẹman ghe, ọria nọn lu emhin ọbhi oleghe bi ọria nọn mun egbe ọbhi ibẹẹ mẹn khin?’

9. Be a re ọle ta nan rẹ ha yi “ọria nọn re ẹwanlẹn lu emhin” bi “ọria nọn lu emhin rẹkhan emhanmhan”?

⁹ Ahamiẹn “ọria nọn re ẹwanlẹn lu emhin” uwẹ khin, uwẹ ki manman ha ria eria nyan adia ne ribhi Baibo bhi emhin rebhe nin uwẹ lu. Ranmhude ọnan, uwẹ ki sabọ dọ lẹn otọ emhin kẹkẹ nọnsẹn, yẹ ha zẹ emhin nọn mhẹn rẹ lu. Bhiriọ, uwẹ i wo re otua-otua zẹ ebi uwẹ ha lu, sokpan uwẹ ki re ẹghe ọbhi otọ rẹ fẹ otọ emhin rebhe ghe nọnsẹn. (Prov. 18:13) Ranmhude ọnan, uwẹ ki sabọ dọ zẹ emhin nọn gba rẹ lu bhi ẹlo nọnsi Jehova. Ahamiẹn “ọria nọn lu emhin rẹkhan emhanmhan” uwẹ khin, uwẹ i da ha lu emhin zughu-zughu, sẹyẹ uwẹ ki ha lu emhin bhi ẹghe. A ki lẹn uwẹ ọbhi ọria nọn re obọ rẹkhan adia, bi ọria nan sabọ mun udu nyan. Uwẹ da ha re ene ikpẹ nan man, ọ ki re ẹbho ha tẹmhọn uwẹ nọnsẹn. Bhi ejayenan nian, bha ji mhan zilo nyan ikpẹ eso nin Baibo yọle ghe ọkhẹke nin ọwanlẹn ha mhọn, ọkpa bhọ hi, nin ọle ha yi ijiẹmhin esili rẹji ọrebhe bhi azagba-uwa nọnsọle.

HA YI ỌDAFẸN-UWA NỌN MHẸN

10. Be okpea rẹ “re azagba-uwa nọnsọle khian nọnsẹn” yẹ?

¹⁰ Ahamiẹn ọdọ uwẹ khin, sẹyẹ uwẹ ho nin uwẹ ha ga bhi ihe ọsi ọwanlẹn, ọkhẹke nin ọrebhe bhi azagba-uwa nọnsẹ ha nyẹnlẹn nọnsẹn. Bhiriọ, ọkhẹke nin uwẹ ha yi “okpea nọn re azagba-uwa nọnsọle khian nọnsẹn.” Ọkhẹke nin uwẹ ha gbẹloghe azagba-uwa nọnsẹ nọnsẹn. Uwedẹ ọkpa nin uwẹ ha rẹ rẹman ghe uwẹ gbẹloghe ele nọnsẹn hi, nin uwẹ rẹ rẹkpa ele rẹ ha lu ene emhin rebhe nin mhan lu rẹ ga Jehova. Bezẹle nọn da manman lu uhọnmhọn emhin? Pọl nin odibo da yọle: “Be okpea nọn bha sabọ re azagba-uwa nọnsọle khian, ha rẹ re agbotu nọnsi Osẹnobulua khian yẹ?”—1 Tim. 3:5.

11-12. Ahamiẹn okpea lu re alo rẹ dọ kiẹn ọwanlẹn, be uwedẹ nin azagba-uwa nọnsọle rẹ nyẹnlẹn ha rẹ sabọ rẹso ọle yẹ? (Yẹ fẹ ifoto ghe.)

¹¹ Ahamiẹn aba uwẹ khin, ọkhẹke nin uwẹ rẹkpa imọn nesẹ ne bha sẹ wanre rẹ ‘ha hẹnmhọn nin uwẹ, yẹ mun uhọnmhọn bhi odẹ.’ Ọkhẹke nin uwẹ re uwedẹ oyẹẹ rẹ ha man ele emhin. Bhi ọsi ẹmhọanta, beji ibhokhan rebhe lu, ọ dẹ yẹẹ imọn nesẹ rẹ ha khiẹn. Ọkpakinọn, ọkhẹke nin uwẹ yẹ man ele emhin nọnsẹn, nin ele da ha hẹnmhọn nin uwẹ, ha mun ekpẹn nin ẹbho, yẹ ha lu emhin nọnsẹn. Rẹ deba ọnin, ọkhẹke nin uwẹ dọnmhegbe rẹ rẹkpa imọn nesẹ rẹ deba Jehova ha mhọn ikolu nọn ziẹnlẹn, ha re obọ rẹkhan adia ne ribhi Baibo, yẹ lu re alo dọ mianmẹn.

¹² “Nin imọn [nesọle ha] ribhi oga. Ene imọn ki ha yi imọn ne mun uhọnmhọn bhi odẹ, ne yẹ hẹnmhọn.” Ahamiẹn obhokhan nọn sẹyẹ deba ene biẹ ọle nyẹnlẹn bhi uwa dọ lu emhin ebe nọn kaka, be ọ ha rẹ rẹso aba ọle yẹ? Ahamiẹn ọne  aba ọle re otọ nanlẹn rẹ ha lu ebe ghọn ọlẹn, ghe ọ bha re adia nọn khẹke nanlẹn, asabọmiẹn ọle i da sabọ dọ ha ga bhi ihe ọsi ọwanlẹn.—Fẹ Watchtower ọsi Ọtoba 15, 1996 ghe, apapale nọnzi 21, uduọle nọnzi 6 bi 7.

HA MIẸN ẸSỌN BHI AGBOTU

13. Be uwẹ ha rẹ rẹman yẹ ghe uwẹ i yi “ọria nin unun ọsi ọria i sẹ ọsọle,” bi “ọria nọn lu ebe ghọn ọlẹn”?

¹³ Ibhio mhan nin ikpea ne re ikpẹ ne khẹke Kristiẹn man, manman wo rẹkpa bhi agbotu. Ọria nọn ho nin ọle dọ ha ga bhi ihe ọsi ọwanlẹn, i da ha yi “ọria nin unun ọsi ọria i sẹ ọsọle,” ranmhude a i miẹn ọfure bhi eji ọria nọn sẹnian ye. Ahamiẹn uwẹ bha ho nin uwẹ ha yi ọria nọn sẹriọ, ha ka ẹbho ehọ, uwẹ ha yẹ dọnmhegbe ha ria ẹmhọn ebi ele ghe emhin yẹ. Ahamiẹn bha ribhi ikolo ọsi ene ewanlẹn, uwẹ dẹ be ka re obọ ọbhi ebi ene bunbun zẹle ahamiẹn ebi ele zẹ bha ra uhi soso bhi Baibo? “Ọle ida ha yi ọria nọn lu ebe ghọn ọlẹn.” Ọnin rẹman ghe, uwẹ i da ha yi ọria nan miẹn ghe, a bha lu rẹkhan ebi ọle ta uhọnmhọn ribhi otọ. Ọkhẹke nọn ha yẹẹ uwẹ rẹ ha re ehọ ọbhi ebi ẹbho ebhebhe tale. (Gen. 13:​8, 9; Prov. 15:22) Uwẹ i da ha yi “ọria nọn van ovan-ovan,” la “ọria nọn kẹ re ohu.” Nin uwẹ rẹ dọ ha lu iriọ, uwẹ ki ha re ekpẹn bi ifuẹkẹ rẹ lu emhin. Ranmhude uwẹ hoẹmhọn ọfure, uwẹ ki dọnmhegbe rẹ ha khu ọbhọ aharẹmiẹn idia nin uwẹ ye mhọn ebi ọ diayẹ. (Jem. 3:​17, 18) Ọta ifuẹkẹ nesẹ dẹ sabọ re ọkhọle ọsi eria dere rẹ dọ sẹbhi eria ne kpokpo mhan.—Judg. 8:​1-3; Prov. 20:3; 25:15; Mat. 5:​23, 24.

14. Be a re ọle ta beji a yọle ghe ọle “ida ha yi ọria nọn la nabhi oga”, sẹyẹ ọle dẹ ha yi “ọria nọn mhọn asun-rẹkhan”?

¹⁴ Ọne obhio mhan “ida ha yi ọria nọn la nabhi oga.” Arẹmiẹn ọ i yi oko ghe ikpe ne bunbun dẹ gbera sade ọle mianmẹn fo ọkuẹsẹ a re ọle kiẹn ọwanlẹn, ọ dẹ khẹke nin ọle ka re ẹghe eso rẹ ha ziẹn ikolu nin ọle bi Jehova ko mhọn beji ọle ha da sabọ dọ kiẹn Kristiẹn nọn deziẹn. Ọkuẹsẹ a re ọle kiẹn ọwanlẹn, ọkhẹke nin ọle rẹman ghe ọle mhọn idegbere beji Jesu yẹ rẹ mhọnlẹn, sẹyẹ ọle muegbe rẹ mundia khẹ ẹghe nọn hi ki rẹ khin nan ha rẹ mun ẹsọn nanlẹn bhi agbotu. (Mat. 20:23; Fil. 2:​5-8) Uwẹ dẹ rẹman ghe “ọria nọn mhọn asun-rẹkhan” uwẹ khin sade uwẹ wo ha sun rẹkhan Jehova, ha re obọ rẹkhan uhi ne gbale nesọle, yẹ ha re obọ  rẹkhan adia nin ọle noo agbotu nọnsọle rẹ re nin mhan.—1 Tim. 4:15.

15. Oko nọn ghe ọwanlẹn dẹ wo guẹ rẹ ha re ọta man rẹrẹrẹ? Gbotọle fanọn an.

¹⁵ Baibo wo yọle ghe, ọkhẹke nin ene ewanlẹn ha yi “ọria nọn guẹ rẹ man emhin.” Ọnin ki rẹman ghe ele rebhe dẹ wo guẹ ebi a rẹ re ọta man yẹ rẹrẹrẹ? Eye. Arẹmiẹn ewanlẹn eso i sabọ rẹ inian guẹ rẹ man emhin, ele wo sabọ man emhin nọnsẹn bhi iwẹnna itẹmhọn Osẹnobulua, yẹ guẹ rẹ re Baibo re ikoudure nin ibhio mhan. (Fẹ 1 Kọrint 12:​28, 29 bi Ẹfẹsọs 4:11 ghe.) Ọrẹyiriọ, ọkhẹke nin uwẹ ha man egbe ẹ emhin ẹghe rebhe, beji uwẹ ha da sabọ ha re ọta man nọnsẹn. Be ha rẹkpa uwẹ rẹ sabọ manman ha man emhin nọnsẹn?

16. Be ha rẹkpa uwẹ rẹ sabọ ha lu re alo bhi uwedẹ nin uwẹ rẹ man emhin? (Yẹ fẹ ifoto ghe.)

¹⁶ “Ọle ki wo ha noo ọta ẹmhọanta.” Nin uwẹ rẹ sabọ manman ha man emhin nọnsẹn, ọkhẹke nin uwẹ ji iman-emhin nọnsẹ, bi adia nin uwẹ re nin ẹbho diẹn mun ebe ribhi Baibo. Nin uwẹ rẹ sabọ lu ọnan, ọkhẹke nin uwẹ ha tie Baibo bi ebe nesẹmhan. (Prov. 15:28) Beji uwẹ rẹ luẹ emhin, gbẹlokotọ bhi ebi a rẹ gbe otọ Baibo fanọn an yẹ bhi ebe nesẹmhan, beji uwẹ ha da yẹ sabọ lu iriọ sade uwẹ man emhin. Ahamiẹn uwẹ man emhin, dọnmhegbe ha lu ọle nọnsẹn beji ọ ha da ha sẹ ọkhọle ọsi eria ne ka uwẹ ehọ. Uwẹ dẹ sabọ ha lu re alo bhi uwedẹ nin uwẹ rẹ man emhin sade uwẹ dọ guanọ adia bhi obọ ewanlẹn ne fuẹlo ọle, yẹ re obọ rẹkhan ebi ele taman uwẹ. (1 Tim. 5:17) Ọkhẹke nin ene ewanlẹn ‘sabọ ha . . . re izebhudu’ nin ibhio ele; sẹyẹ, ẹgheso ọ dẹ khẹke nin ene ewanlẹn “re adia” nin ele. Ọnọn hi ki rẹ khin bhi ẹwẹ ele, ọkhẹke nin ele re ifuẹkẹ rẹ lu ọle. Ahamiẹn uwẹ re oyẹẹ bi ifuẹkẹ man, yẹ ji emhin nin uwẹ man da diẹn mun Ọta nọnsi Osẹnobulua, emhin nin uwẹ man ki ha rẹso ẹbho bhi ọkhọle, ranmhude uwẹ re egbe khọkhọ Jesu nọn yi Ọman-emhin Nọn Khua.—Mat. 11:​28-30; 2 Tim. 2:24.

SẸYẸ WO HA ZEGBERE

17. (a) Be ha rẹkpa ene zẹ sikẹ ene ewanlẹn rẹ sẹyẹ ha zegbere? (b) Be ọkhẹke nin ene ewanlẹn ha mhọn bhi ọkhọle sade ele zilo ẹmhọn ibhio mhan nin ele ho nin ele re ọbhi ihe ọsi ewanlẹn? (Fẹ ọne ẹkpẹti ghe nọn yọle, “ Bha Re Ẹwanlẹn Lu Emhin Sade Bha Fẹghe Si Obhio Mhan Dẹ Sabọ Ga Bhi Ihe Ọsi Ọwanlẹn.”)

¹⁷ Beji mhan ki zilo nyan ene ikpẹ nọn khẹke  nin ọria ha mhọn rẹ sabọ ha ga bhi ihe ọsi ọwanlẹn, eso bhi ene zẹ sikẹ ene ewanlẹn sabọ rẹ ha riale ghe ọne ihe nan i da sẹ ele bhi obọ ghẹdẹ. Ọkpakinọn, yere ghe Jehova la agbotu nọnsọle bha re ẹlo ọbhọ ghe, uwẹ dẹ wo sabọ ha re ene ikpẹ nan rebhe man sẹsẹsẹ. (1 Pita 2:21) Ẹlinmhin nọn khiale nọnsi Jehova ha sabọ rẹkpa uwẹ rẹ ha mhọn ene ikpẹ nan. (Fil. 2:13) Ọkpa be ribhi ene ikpẹ nin uwẹ ho nin uwẹ manman wẹnna i? Ọ ha yi iriọ, bhii Jehova nin ọle rẹkpa uwẹ. Dọ gua otọ ẹmhọn ọne ikpẹ, uwẹ ha yẹ taman ọkpa bhi ene ewanlẹn nọn rẹkpa uwẹ rẹ lẹn ebi uwẹ ha rẹ sabọ manman ha re ọne ikpẹ man yẹ.

18. Be ọkhẹke nin ene zẹ sikẹ ene ewanlẹn rebhe dọnmhegbe rẹ ha lu?

¹⁸ Bha ji mhan rebhe, rẹ dọ sẹbhi ene ka ga bhi ihe ọsi ene ewanlẹn fo, dọnmhegbe ha re ene ikpẹ nan zilo ọle bhi ọne uhọnmhọn-ọta nan man. (Fil. 3:16) Ọkpa bhi ene zẹ sikẹ ene ewanlẹn uwẹ be khin? Ọ ha yi iriọ, ha lu re alo rẹ sabọ dọ kiẹn ọkpa bhi ene ewanlẹn! Bhii Jehova nọn man uwẹ emhin beji uwẹ ha da sabọ manman ha ga ọle, yẹ manman ha rẹkpa ibhio mhan bhi agbotu. (Isa. 64:8) Mhan bhii nin Jehova nan erọnmhọn nin uwẹ beji uwẹ rẹ dọnmhegbe rẹ ha re ene ikpẹ nan man, ne ha re uwẹ sẹ ọria nọn ha ga bhi ihe ọsi ọwanlẹn.