Ranmhude ghe mhan ihian igho bhi ebe bi emhin nekẹle nesẹmhan nọn tẹmhọn iBaibo, ẹbho eso riale ghe, emhin nọn gbale nọn nin ele rẹ ne ele bhi wẹbsaiti nọnsele, la bhi wẹbsaiti nin ẹbho rẹ lu ukolu bhi intanẹt. Ọkpakinọn, ọria nọn lu iriọ bha yẹ re obọ rẹkhan uwedẹ nin a gbẹn ọbhi otọ yọle nin a rẹ ha noo wẹbsaiti nọnsẹmhan. * Ọnan sẹ ka si ọnọghọ ne kaka re khẹ. Uwedẹ nan gbẹn ọbhi otọ nan rẹ ha noo ọne websaiti nan yọle ghe, a bha ka nin ọria soso mun adudu nọn ki rẹ khin sibhi ọne wẹbsaiti nan re diọ bhi wẹbsaiti ọbhebhe bhi intanẹt (wẹbsaiti nọn ki rẹ khin, rẹ sẹbhi ene gha emhin bhi intanẹt, ene gha ividio, bi ene lu ukolu), rẹ sẹbhi ebe nan tie bhi intanẹt, iyaman, illo, iphoto, ividio, bi ebe nọn ki rẹ khin. Bezẹle nin a da gbe ọne uhi ọbhi otọ?

Ebe bi emhin nekẹle nesẹmhan rebhe, ọria imhọn ahu nọn kie re gbẹn ọlẹn re dagbare. Ẹbho ne dere bhi oga, ne ki kiẹn ene ga oga ohoghe, bi ẹbho ne nin mhan ha suan guanọ uwedẹ nin ele ha rẹ noo ebe nesẹmhan bhi wẹbsaiti nọnsele, beji ele ha da sabọ hiẹ Esali Jehova bi ẹbho ne guanọ ẹmhọanta. Bhi ene wẹbsaiti nọnsele nan, a ne emhin ọbhi enin, nọn ha kọ edandan ọbhi ọkhọle nọnsi eria ne tie ọle. (Ps. 26:4; Prov. 22:5) Ẹbho eso ne emhin bhi ebe nesẹmhan, la bhi iyaman ọsi jw.org rẹ dọ ha do ẹki. Beji uhi tale, ranmhude ghe imhan lu ene ebe nan bi emhin nekẹle yẹ ne ele dagbare, ọnin zẹle mhan mhọn ọne ahu nin mhan re gbega uwedẹ nin ẹbho rẹ noo ọle. (Prov. 27:12) Ọkpakinọn, mhan ha taan ẹlo a ji ẹbho da ha ne emhin nesẹmhan ọbhi wẹbsaiti nọnsele, la  mhan ji ele da ha noo iyaman ọsi jw.org rẹ do ẹki, aharẹmiẹn ibhio mhan ele khin, ikọtu sabọ re obọ si mhan bhi ikeke re, beji mhan rẹ ha dọnmhegbe nin ẹbho ne nin mhan ha suan bi ẹbho ne ho nin ele re ọle ha do ẹki hẹi yẹ lu iriọ.

Okhẹnan ribhọ sade mhan danlod ebe nesẹmhan bhi ije ọbhebhe gbera jw.org. Ọguọmhandia nọn wanlan nan gba ẹkẹ ọle, ọle ọkpa iJehova mun ọne ẹsọn nan, nin ọle rẹ ha re ebale oriọn re. (Matt. 24:45) www.pr418.com, tv.pr418.com, bi wol.pr418.com, ele ọkpa hi wẹbsaiti nin ọne oguọmhandia nan noo rẹ re ebale oriọn re. JW Language^®, JW Library^®, bi JW Library Sign Language^®, ele ọkpa hi app nin mhan mhọn bhi fone ne khua. Mhan dẹ sabọ re okhọ ọbhọ ghe, mhan ida miẹn emhin ọsi ene do eki bi esankan nọn ribhi agbọn nọnsi Esu bhi ene ije kẹkẹ nin mhan sounun nan. Ahamiẹn ọne ebale oriọn nan nanbhi ije ọbhebhe vae, itọn dẹ sabọ nanbhọ.—Ps. 18:26; 19:8.

Sẹyẹ, mhan ha je ẹbho ha ne ebe nesẹmhan bhi wẹbsaiti nọnsele, ẹbho ne bha hoẹmhọn agbotu nọnsi Esali Jehova bi ẹbho nesọle ki nanbhi enin ha re unun ji ọne agbotu yẹ ta emhin nọn imhẹn rẹ da ene eria ne ribhi ọne agbotu. Ẹbho sẹ ka re ibhio mhan eso deba ele ha gbugan bhi intanẹt khẹ. Ọnan da re itọn ha deba itọn nin ẹbho re bhi elin nọnsi Jehova. Intanẹt iyi eji mhan ha da ha “re ọkhọle nọn fu man ẹbhọ emhin, ene bha de taan ẹlo a nọnsẹn.” (2 Tim. 2:23-25; 1 Tim. 6:3-5) Mhan dọ len ghe, eria eku noo elin ọsi agbotu mhan, elin ọsi Otu Nọn Sun Oga, bi elin ọsi ọdeọde bhi ẹwẹ Otu Nọn Sun Oga rẹ ha mun wẹbsaiti kẹkẹ gbọ bhi intanẹt. Ọkpakinọn, ọria soso iribhi ẹwẹ Otu Nọn Sun Oga nọn mhọn wẹbsaiti nọnsọle, la nọn ribhi wẹbsaiti nan rẹ lu ukolu bhi intanẹt.

Mhan da ha rẹkpa ẹbho rẹ diọ bhi jw.org, ọnan ki manman rẹkpa mhan re wewe ẹmhọn “ọta nọn mhẹn ọsi Agbejele.” (Matt. 24:14) Emhin iwẹnna nesẹmhan ne ribhi kọmputa, ne rẹkpa mhan bhi iwẹnna itẹmhọn Osẹnobulua manman wo mhẹn ọbhọ. Mhan guanọ nin ọrebhe ha noo ele. Bhiriọ, mhan sabo rẹ je ebe, ividio la emhin ne dia iriọ je ọria bhi intanẹt, la mhan je emhin (link) je ọne ọria, nọn ha man ọle uwedẹ ha khian eji ọle ha da miẹn emhin nin uwẹ ho nin ọle miẹn bhi jw.org. Mhan da ha rẹkpa ẹbho rẹ diọ bhi jw.org, uwedẹ ọkpa sẹsẹ nin ele ha re miẹn ebale oriọn, ọle mhan man ele le riọ—ọne “ọguọmhandia nọn wanlan nan gba ẹkẹ ọle.”