Bezẹle nin Jesu da ta ọta nin David ta bhi Psalm 22:1 ọkuẹsẹ ọle yu?

Ọta nọn ribhi Matthew 27:46 deba ọta nin Jesu ta kike ọkuẹsẹ ọle yu. Enin yọle: “Osẹnobulua nọnsẹmhẹn, Osẹnobulua nọnsẹmhẹn, bezẹle nin uwẹ da mun mẹn fia?” Ẹghe nin Jesu rẹ ta ọne ọta nan, ọle da mun ọta nin David ta bhi Psalm 22:1 sẹ. (Mark 15:34) Ọ ida ha mhẹn sade mhan yọle ghe, ranmhude Jehova fikeke gbe iJesu, la ranmhude urẹọbhọ nọnsọle wẹghẹ bhi ọne ẹghe nan zẹle nin ọle da ta ọne ọta nan. Jesu tobọle bhọ lẹn ebezẹle nọn da khẹke nin ọle yu nin mhan. Sẹyẹ, ọle tobọle zegbere dọ yu nin mhan. (Matt. 16:21; 20:28) Jesu bhọ lẹn ghe, Jehova ida gbega ọle nin ọle hẹi yu. (Job 1:10) Jehova da re inian re isẹhoa nin Jesu rẹ rẹman ghe, ọle dẹ sẹyẹ sun rẹkhan ọlẹn aharẹmiẹn ọle dẹ yu.​—Mark 14:​35, 36.

Bhiriọ, be ki zẹ nin Jesu da ta ọne ọta nọn ribhi Psalm 22:1? Arẹmiẹn mhan bha wo lẹn ebezẹle nin ọle da ta ọne ọta nan, bha ji mhan fẹ emhin eso ghe ne ha sabọ zẹ nin ọle da tale. *

Asabọmiẹn Jesu re ọne ọta nan rẹman ghe, Jehova ida gbega ọle nin ọle hẹi yu. Jesu lẹnmhin ghe, ọkhẹke nin ọle re iẹnlẹn nọnsọle rẹ zọese nin mhan. Bhiriọ, ọkhẹke nin ọle yu beji ọrebhe ha da sabọ miẹn iẹnlẹn.​—Heb. 2:9.

Emhin rebhe ne ribhi Psalm 22 Jesu be ha guanọ nan yere, ẹghe nin ọle rẹ ta ọta nin ọle tale? Ẹghe nin Jesu rẹ ha ribhi ọne otọ nan, ọ wo yẹẹ ibhokhan iJew rẹ ha lẹn ije kẹkẹ bhi ebe  nọnsi Psalms ọbhi uhọnmhọn. Bhiriọ, ọria ha sounun bhi ijian ọkpa bhi ebe nọnsi Psalms, ele ki wo lẹn ebi a gbẹn ọbhi ọne uhọnmhọnlẹn rebhe. Sade ọnan Jesu ha guanọ nin ọle lu, ọle ha rẹ wo sabọ rẹkpa ibhokhian iJew ne rẹkhan ọlẹn yere, akhasẹ kẹkẹ nan tale bhi ọne psalm 22 nan rẹji ebi ọle ha rẹ yu yẹ. (Ps. 22:​7, 8, 15, 16, 18, 24) Sẹyẹ, ulọnlẹn ne kike bhi psalm 22, tẹmhọn ugbẹloghe nọnsi Jehova bi ebi ọne ugbẹloghe rẹ gba ije rebhe yẹ.​—Ps. 22:​27-31.

Asabọmiẹn Jesu ta ọne ọta nan nin David ta rẹ rẹman ghe ọle bha lu ọkpa lu eva. Ọkuẹsẹ Jesu yu, a da bhu ohiẹn eku gbe ọle ghe, ọle re unun ji Osẹnobulua. (Matt. 26:​65, 66) Ene bhu iJesu ohiẹn da wo re ẹjẹje re ọsasọn rẹ bhu ọne ohiẹn. Ele bha re obọ rẹkhan uwedẹ nọn khẹke nin ele rẹ bhu ohiẹn. (Matt. 26:59; Mark 14:​56-59) Asabọmiẹn ebi Jesu re ọne ọta nan ta hi, ọ bha khẹke nin ene ẹbho re oya nanlẹn, ranmhude ọle bha lu ọkpa lu eva.

Asabọmiẹn Jesu re ọne ọta nan rẹ rẹman ghe, arẹmiẹn Jehova ji David da loya, ọle sẹyẹ ha re ẹlo esili ghe ọle. David bha rẹman ghe urẹọbhọ nọnsọle wẹghẹa ẹghe nin ọle rẹ ta ọne ọta nan. David ki nọọn ọne inọnta nin fo, ọle da tale ghe, ọle mun udu nyan iJehova, ghe Jehova dẹ ha gbega ẹbho nesọle. Sẹyẹ, Jehova da wo ha nan erọnmhọn nanlẹn. (Ps. 22:​23, 24, 27) Bọsi David, arẹmiẹn Jesu wo manman loya bhi okhun oran nan khan ọlẹn ọi, ọnan bha rẹman ghe Jehova bha ha re ẹlo esili ghe ọle.​—Matt. 21:9.

A sabọ yẹ miẹn ọne ọta nan rẹman ghe, Jesu wo manman ha kioya ghe, Jehova bha gbega ọle bhi ọne ẹghe nan, beji ọle ha da sabọ rẹman ghe ọkhọle rebhe ọle rẹ sun rẹkhan Ọlẹn. Bhi ọsi ọhẹnhẹn, ọ bha ha yi iho nọnsi Jehova nin Ọmọn nọnsọle rẹ loya yẹ yu. Ẹghe nin Adam bi Eve ki rẹ mhọn akan-ehọ da iJehova, ẹghenin ọle ki rẹ mhanmhanlẹn ghe, Jesu dẹ vae dọ yu nin mhan. Jesu bha miẹn emhin ọbe soso nin ọle lu, sokpan ọle da loya yẹ yu nin ọle rẹ re ewanniẹn ọbhi odan nin Esu so Jehova le. Sẹyẹ, ọle da re iẹnlẹn nọnsọle rẹ zọese beji mhan ha da sabọ miẹn iẹnlẹn nin Adam mun fia. (Mark 8:31; 1 Pet. 2:​21-24) Ọnan irẹ sabọ sunu sade Jehova bha ji Jesu da re inian loya yẹ yu.

Asabọmiẹn Jesu ta ọne ọta nan nin ọle rẹ rẹkpa edibo nesọle rẹ denọ ọkhọle ọbhi ebezẹle nin Jehova da ji ọle da re inian yu. * Jesu lẹnmhin ghe, uwedẹ nan rẹ re inian gbe ọle a bhi okhun oran bii ọria nọn lu emhin ebe, dẹ sabọ dua ẹbho ne bunbun oẹ. (1 Cor. 1:23) Ahamiẹn ene rẹkhan ọlẹn denọ ẹlo ọbhi ebezẹle nin ọle da dọ yu, ọnan ki rẹkpa ele rẹ sabọ lẹn ebi uyumhin nọnsọle ha sabọ lu nin mhan. (Gal. 3:​13, 14) Bhiriọ, ele ida ha ghe Jesu bii ọria ọbe, sokpan, ele ki ha ghe ọle bii ọria nọn dọ miẹn mhan fan.

Emhin nọn hi ki rẹ khin nọn zẹle nin Jesu da ta ọne ọta nin ọle tale, ọle lẹnmhin ghe, beji ọle rẹ yu ọbhi okhun oran, iho nọnsi Jehova ọle ha munsẹ. Ọ bha sẹ bue nin ọle ta ọne ọta nin ọle ta bhi Psalm 22:1 fo, ọle da yọle: “A lu ọle fo!” (John 19:30; Luke 22:37) Ranmhude Jehova bha gbega iJesu bhi ọne ẹghe nan, Jesu da miẹn isẹhoa rẹ lu emhin rebhe nọn zẹle nan da je ọle re bhi ọne otọ nan. Ọnan da yẹ re isẹhoa nanlẹn rẹ mun ọta rebhe nan tale rẹji ọle sẹ.​—Luke 24:44.