Ọ da wo ba bhi egbe a ghe, mẹn ki sẹbhi ikpe 13, ikolu nin mẹn bi Jehova ko mhọnlẹn bha yẹ ziẹn. Ọ da wo diabe ene imhan ko yo isiku wo mhọn isẹhoa rẹ ha lu emhin nọn ghọn ele. Bhiriọ, mẹn da yẹ ha guanọ isẹhoa nọn sẹnian. Ọ da wo diabe uhi nin ene biẹ mẹn gbe bi uhi ne ribhi Baibo wo mun mẹn gba. Bhiriọ, ilọnmhọn oga da wo diabe ihẹ rẹji mẹn. Arẹmiẹn mẹn lẹnmhin ghe Jehova nyẹnlẹnmhin, ọkpakinọn, mẹn bha yẹ sikẹ ọle bii ọmọẹ.

Mẹn bha wo zobọ bhi itẹmhọn Osẹnobulua nan yo. Sokpan, obhi ọkhere mẹn ki ha lu bhi ọne iwẹnna nan. Mẹn imuegbe ọbhi otọ ọkuẹsẹ mẹn dagbare. Bhiriọ, ọ ki ha nọghọ mẹn rẹ tẹmhọn Osẹnobulua man ọria. Ranmhude ọnan, iwẹnna itẹmhọn Osẹnobulua nin mẹn ha lu bha ha lu re alo. Mẹn bha yẹ ha miẹn eghọnghọn bhọ. Ọnan da wo dọ re egbe itẹmhọn Osẹnobulua lọ mẹn. Bhiriọ, mẹn da ha nọọn ẹgbe mẹn yọle: ‘Be imẹn ha rẹ sabọ ha lu ọnan yẹ uzana-uzana?’

Ẹghe nin mẹn ki rẹ sẹbhi ikpe 17, ọ da wo ha yẹẹ mẹn rẹ ha ribhi ọsi mẹn. Bhiriọ, mẹn da koko ihẹ nesẹmhẹn kpanọ sibhi uwa re ha khian Australia. Ọ da wo ba ene biẹ mẹn bhi egbe a ghe mẹn kpanọ. Sokpan, ele da sẹyẹ ha mhọn ọlẹn bhi ọkhọle ghe mẹn dẹ sẹyẹ ha ga iJehova.

 Bhi Australia, ikolu nin mẹn bi Jehova ko mhọnlẹn da wo kie manman wẹghẹa. Mẹn bha yẹ ha yo ikolo oga ẹghe rebhe. Elasẹre bii mẹn ne bha mun oga mhọn nọnsẹn mẹn ki deba ha muobọ. Mhan ha zobọ bhi ikolo oga ẹlẹnan, ẹdẹ ha we mhan ki ha na bhi party kikẹ khian dọ ha da anyọn yẹ gbe ikhẹnlẹn. Mẹn ha ria ẹmhọn ebi iẹnlẹn nọnsẹmhẹn diayẹ ẹghenin, mẹn ki dọ kere ghe, mẹn da re oẹ ọkpa ọbhi oga ẹmhọanta, yẹ re oẹ nọnkẹle ọbhi ẹkẹ ọne agbọn nan. Sokpan, mẹn bha ha ghọnghọn bhi ele soso.

Ebe sẹ ikpe eva ki gbera, mẹn da miẹn obhio mhan nin okhuo nọn rẹkpa mẹn ria eria nyan uwedẹ nin mẹn rẹ ha nyẹnlẹn. Ọne obhio mhan nan bhọ bha lẹn ghe ọle rẹkpa mẹn. Mẹn bi ibhio mhan isẹn ne bha sẹ bọ odọ ko ha nyẹnlẹn kugbe. Mhan da tie ọfẹotughe nọnsẹmhan bi okhuo ọle natiọle Tamara vae bhi isẹmhan nin ele dọ gbe uzana. Beji ọne ọfẹotughe rẹ ha lu ilọnmhọn agbotu, okhuo ọle nin Tamara ki deba mhan ha gbe ido yẹ ne mhan jiẹ. Ọnan da wo ha yẹẹ mẹn. Ọria nọn re ẹwanlẹn lu emhin, nan yẹ sabọ ne talọ ọle wo khin. Ọ da wo han mẹn ilo ghe, ọria nọn wo re inian mun oga mhọn nọnsẹn sẹyẹ wo re inian ne ẹbho zẹ ojiẹ.

Ọria nọn wo re ọyaya lu ilọnmhọm oga Tamara wo khin. Oyẹẹ nin ọle mhọn da ẹmhọanta ne ribhi Baibo, bi iwẹnna itẹmhọn Osẹnobulua, sabọ rẹ re ọle ha ghọn ọria rẹ re egbe khọkhọ ọle. Ọle da wo ha ghọnghọn ranmhude ọkhọle rebhe ọle wo rẹ ha ga iJehova. Ọkpakinọn, mẹn bha ha ghọnghọn ranmhude, ọ iyi ọkhọle rebhe mẹn rẹ ha ga iJehova. Uwedẹ nin ọle rẹ lu emhin bi eghọnghọn ọsaje nin ọle ha mhọnlẹn da wo rẹso mẹn. Ijiẹmhin nọnsọle da dọ rẹ mẹn ha ria ẹmhọn ẹmhọanta nọn ribhi Baibọ nọn yọle ghe Jehova guanọ nin mhan ha re eghọnghọn ga ọle.​—Ps. 100:2.

Mẹn da wo ha ho nin mẹn ha ghọnghọn bii Tamara. Ọkpakinọn, nin ọnan rẹ sunu, ọ da khẹke nin mẹn fi emhin eso denọ bhi iẹnlẹn nọnsẹmhẹn. Ọ iyi osukpa ọnan wo rẹ sunu. Khere-khere mẹn rẹ ha fi emhin eso denọ. Mẹn da munhẹn ha muegbe ọbhi otọ ọkuẹsẹ mẹn khian inẹbho. Mẹn da yẹ dọ ha lu iwẹnna ọkanẹfan ọsi ẹghe eso. Ọnan da rẹkpa mẹn ha mhọn  izebhudu sade mẹn ne ẹbho talọ. Beji mẹn ki wo rẹ ha noo iBaibo bhi inẹbho, iwẹnna itẹmhọn Osẹnobulua nan lu da wo kie dọ ha yẹẹ mẹn. Bhiriọ, mẹn da munhẹn ha lu iwẹnna ọkanẹfan ọsi ẹghe eso uki-uki.

Mẹn da dọ deba ibhio mhan ne yẹ sọnyẹnmhẹn bhi oga nọnsi Jehova ha muobọ, ne yẹ re ọkhọle rebhe ha ga ọle. Ijiẹmhin esili nọnsele da rẹkpa mẹn rẹ ria eria nyan emhin nọn lu uhọnmhọn emhin nẹ bhi iẹnlẹn nọnsẹmhẹn. Ọ da yẹ rẹkpa mẹn yẹ ha mhọn ọne ọkhọle nin mẹn rẹ ha tie iBaibo ẹdẹdẹ. Iwẹnna itẹmhọn Osẹnobulua da wo ha ti mẹn bhọ rẹ sẹbhọ ghe, mẹn da dọ munhẹn ha lu iwẹnna ọkanẹfan ọsi ẹghe rebhe. Bhi ọsi ọhẹnhẹn bhi ikpe ne bunbun, mẹn da dọ ha ghọnghọn yẹ mhọn ọkhọle nọn fu bhi ẹkẹ agbotu nọnsi Jehova.

Ukpe ọkpa ki gbera, mẹn da miẹn Alex. Ọria nọn wo hoẹmhọn iJehova bi iwẹnna itẹmhọn Osẹnobulua ọle khin. Ọkpa bhi ene zẹ sikẹ ene ewanlẹn ọle khin. Ọle sẹ gbe ikpe ehan bhi iwẹnna ọkanẹfan ọsi ẹghe rebhe. Ẹghe ribhọ nin ọle rẹ dọ ga bhi Malawi bhi eji a bha sẹ da manman tẹmhọn Osẹnobulua. Ẹghe nin ọle rẹ ha ribhi enin, ọle da deba ibhio mhan ne lu iwẹnna imisiọnari bhi enin ha muobọ. Ijiẹmhin ọsi ene ibhio mhan nan da wo rẹso ọle. Ọ da yẹ rẹkpa ọle ha mun ilọnmhọn oga kalo bhi iẹnlẹn nọnsọle.

Mẹn bi Alex da bọ egbe bhi 2003. Rẹ na bhi ọne ẹghe nin ha vade, mhan da wo ha re ẹghe nọnsẹmhan rebhe rẹ lu ilọnmhọn oga. Mhan wo dọ luẹ emhin ne bunbun. Jehova yẹ wo dọ nan erọnmhọn nin mhan bhi uwedẹ kẹkẹ.

Bhi 2009, a da tie mhan nin mhan dọ lu iwẹnna imisiọnari bhi agọ nọn bha manman kpọnọ gbe natiọle Timor-Leste, bhi Indonesian archipelago. Ọ da wo han mhan ilo ghe a tie mhan nin mhan dọ lu iwẹnna imisiọnari bhi ọne agbaẹbho nan. Mhan da wo ha ghọnghọn, ọkpakinọn ofẹn da yẹ ha mun mhan. Uki isẹn ki gbera, mhan da vae bhi eji a tiọle Dili bhi ọne agbaẹbho.

Ọ da khẹke nin mhan fi uwedẹ nin mhan rẹ nyẹnlẹn denọ ranmhude uwedẹ ikẹ a rẹ nyẹnlẹn bhi enan. Ebale nan le bhi enan bi urolo nan zẹ bhi enan yẹ  dikẹ. Sẹyẹ, ẹbho ne ribhi enan bha fe. Ahamiẹn mhan ribhi inẹbho, mhan wo daghe ẹbho ne loya ranmhude ele bha miẹn rẹ lu, ẹbho ne bha manman yo isiku, bi ẹbho nan yẹ denyẹnyẹn. Mhan yẹ wo daghe ẹbho ne kuanlẹn ranmhude okhọn bi ugbele nọn sunu bhi enan. *

Ẹbho wo miẹn ẹmhọn Osẹnobulua ọbhi egbe bhi enan. Bhi ọsi ijiẹmhin, mẹn da miẹn obhokhan ọkpa natiọle Maria. * Ikpe 13 ọle khin. Ọle bha zẹwẹ ha ghọnghọn. Ikpe eso gbera nian nin inẹn ọlẹn yu. Sẹyẹ, ọle ikẹ miẹn aba ọle. Maria bi ibhokhan ne bunbun ne diabe ọle bha lẹn ebi ele ha re iẹnlẹn nọnsele lu. Ẹghe ọkpa ribhọ nin ọle rẹ ha viẹ beji ọle rẹ ha ta ebe ribhi ọkhọle nọnsọle man mẹn. Ọkpakinọn, mẹn bha lẹn ebi ọle ha ta ranmhude mẹn bha sẹ guẹ ebi a rẹ zẹ urolo nọnsele yẹ. Mẹn da nan erọnmhọn ji Jehova nin ọle rẹkpa mẹn beji mẹn ha da sabọ re izebhudu nanlẹn. Mẹn da ha tie ije kẹkẹ bhi Baibo man ọlẹn nọn ha sabọ re ikoudure nanlẹn. Ikpe eso ki gbera, ẹmhọanta nin Maria ha luẹ da fi iẹnlẹn nọnsọle denọ, rẹ sẹbhi ikpọn nin ọle ha ne yọ. Ọle da yẹ mianmẹn. Ejayenan nian, ọle yẹ mhọn ẹbho eso nin ọle man ele iBaibo. Ẹlẹnan nian, Maria wo ghọnghọn, ranmhude, ene ele ko ga rebhe dọ ha yi azagba-uwa nọnsọle.

Jehova wo ha nan erọnmhọn ọbhi iwẹnna oga nan lu bhi Timor-Leste. Arẹmiẹn ikpe igbe ki nọn nian nin ibhio mhan ne bunbun ne ribhi enin mianmẹn, ene bunbun bhi ẹwẹ ele lu iwẹnna ọkanẹfan, eso bhi ẹwẹ ele kiẹn ewanlẹn bhi agbotu. Eso yẹ zẹ sikẹ ene ewanlẹn. Eso rẹkpa zedu ebale oriọn diọbhi urolo nọnsele. Ọ wo ti mẹn bhọ rẹ daghe uwedẹ nin ele rẹ so illo bhi ikolo oga, ebi ele rẹ ghọnghọn yẹ, bi ebi ele rẹ ha lu re alo bhi oga.

Arẹmiẹn uwedẹ nan rẹ nyẹnlẹn bhi Timor-Leste wo dikẹ bhi uwedẹ nan rẹ nyẹnlẹn bhi Australia, mhan da sẹyẹ wo ha ghọnghọn. Ẹgheso mhan bi ẹbho ne bunbun ki wo re osukpa na ọbhi obhi bus khere yẹ piẹnpiẹn egbe ze bhọ. Ele ki muno ehẹn nan kale bi ẹfọ nin ele dẹ bhi ẹki ọbhọ. Ẹgheso, obhi uwa nan re ekẹn ra, ọle mhan da man eria iBaibo. Ẹkẹ ọne ugha ki wo ha ghan. Ekhọkhọ ki yẹ wo ha vẹ nẹga. Arẹmiẹn mhan miẹn ọnọghọ kikẹ, ẹgheso, mẹn ki ha taman egbe mẹn ghe, ‘Ọne agbaẹbho nan wo mhẹn an!’

Mẹn ha ria ẹmhọn emhin ne sunu bhi ẹghe nọn gbera, mẹn ki wo ha khuẹnmhẹn ene biẹ mẹn ne wo dọnmhegbe rẹ man mẹn uwedẹ nọnsi Jehova yẹ rẹkpa mẹn, arẹmiẹn ẹghe ribhọ nin mẹn bha rẹ ha lu nọnsẹn bhi oga nọnsi Jehova. Proverbs 22:6 wo munsẹ bhi egbe mẹn. Ẹmhọn mẹn bi ọdọ mẹn wo ha ti ene biẹ mẹn bhọ. Ele wo ha ghọnghọn rẹ daghe ebi Jehova rẹ ha noo mhan yẹ bhi oga nọnsọle. Rẹ na bhi ukpe 2016 ha vade, iwẹnna ọfẹotughe mhan ki lu bhi agbaẹbho kẹkẹ nin Bẹtẹ nọn ribhi Australia ki gbẹloghe.

Ọ nọghọ mẹn rẹ rẹọbhọ ghe, ẹghe ka ha ribhọ nin iwẹnna itẹmhọn Osẹnobulua bha rẹ ha ti mẹn bhọ. Ejayenan nian, iwẹnna oga ki wo manman ti mẹn bhọ. Mẹn dọ lẹn sẹbhọ ghe, ahamiẹn ọria re ọkhọle rebhe ha ga Osẹnobulua, ọle dẹ sabọ miẹn eghọnghọn ọsaje, aharẹmiẹn ọle miẹn ọnọghọ bhi iẹnlẹn. Bhi ọsi ẹmhọanta, ikpe 18 nin mẹn bi ọdọ mẹn sẹ rẹ nyẹnlẹn kugbe, ọle mẹn sẹ rẹ ghọnghọn nẹ bhi iẹnlẹn. Bhi ejayenan nian, mẹn ki dọ lẹn otọ ọta nin David taman iJehova ẹghe nin ọle rẹ yọle: “Ọkpakinọn, ene re uwẹ kiẹn ugue nọnsele dẹ ha ghọnghọn; Ẹghe rebhe ele ha rẹ ha re eghọnghọn so dagbare. . . . Ene hoẹmhọn elin nọnsẹ dẹ ha ghọnghọn ranmhude uwẹ.”​—Ps. 5:11.