“Ọ iyi ẹbho ọkpa ene Esali Jehova mhọn ẹkẹ-ẹjẹjẹ da, sokpan, ele da yẹ mhọn ẹkẹ-ẹjẹjẹ da awa nesẹmhẹn. Ẹdẹ ọkpa, Elaine nọn mundia sikẹ ebi ele rẹ ne ebe waa, da ne bisikiti nin awa eva nesẹmhẹn. Bhiriọ, ẹghe nọn hi ki rẹ khin nin mhan rẹ sikẹ eji ene Esali Jehova da ne ebe waa, ene awa ki ha guanọ nin ele bu ele, beji ele ha da yẹ ne bisikiti nin ele.

“Uki eso da gbera. Ene awa da wo ha ghọnghọn bhi bisikiti nin ele ha ne nin ele. Sẹyẹ, mẹn da yẹ ha sọnyẹnmhẹn bhi ebi mẹn re obhi ẹghe khere rẹ deba ene Esali Jehova ha zilo ọle. Sokpan, mẹn bha guanọ nin mẹn manman sikẹ ele. Mẹn gbera ikpe 70. Sẹyẹ, mẹn bha rẹọbhi emhin nin ene Esali Jehova rẹọ ọi. Ranmhude uwedẹ nọn bha yẹẹ mẹn nin otuẹ ne bunbun rẹ ha lu emhin, mẹn da riale ghe ọ dẹ ha mhẹn nin mẹn rẹ tobọmhẹn ha luẹ Baibo.

“Bhi ọne ẹghe nan, mẹn da yẹ ha daghe Esali Jehova nekẹle bhi eje kẹkẹ bhi ọne agbaẹbho, mundia sikẹ ebi ele rẹ re ebe waa. Ele yẹ wo miẹn ẹbho ọbhi egbe. Ele wo noo Baibo rẹ wanniẹn inọnta nesẹmhẹn. Ọnan da re imẹn manman rẹọbhi ebi ele ta.

“Ẹdẹ ọkpa, Elaine da nọọn mẹn yọle, ‘Uwẹ be rẹọbhọ ghe, Osẹnobulua re elanmhẹn rẹ lu ẹsele nin mhan?’ Mẹn da wanniẹn ọlẹn yọle, ‘Ehe, mẹn lẹnmhin!’ Bhiriọ, Elaine da tie Isaiah 11:​6-9 man mẹn. Rẹ na ẹdẹ nin ha khian, mẹn da ha guanọ nin mẹn ha luẹ Baibo. Ọkpakinọn, mẹn bha sẹyẹ muegbe rẹ re ebe ọsi Esali Jehova ha tie.

“Bhi ikpẹdẹ ne rẹkhan ọlẹn, ọ da wo ha yẹẹ mẹn rẹ deba Elaine bi ọdọ ọle nin Brent, rẹ ko ha re obhi ẹghe khere rẹ zilo kugbe bhi Baibo. Ele da taman mẹn nin mẹn tie Matthew rẹ sẹbhi Acts, beji mẹn ha da lẹn ebi a re ọle ta nan rẹ ha yi Kristiẹn ọsaje. Bhiriọ, mẹn da lu beji ele tale. Ọ bha sẹ bue egbe, bhi adesẹ ukpe 2016, mẹn da ka nin Brent bi Elaine dọ ha man mẹn Baibo.

“Baibo nin mẹn ha luẹ uzana-uzana, bi ikolo oga nin mẹn yo da wo ha yẹẹ mẹn. Mẹn da wo manman ha ghọnghọn rẹ ha luẹ ẹmhọanta ne ribhi Baibo. Ukpe ọkpa ki gbera khere, mẹn da mianmẹn. Ikpe 79 mẹn ki khin nian. Ọ wo manman ti mẹn bhọ ghe, mẹn miẹn oga ẹmhọanta. Jehova wo nan erọnmhọn nin mẹn nin ọle rẹ ji mẹn da deba azagba-uwa nọnsọle.”