Ibhio mhan bhi agbotu dẹ ghe ọne ibọdọ bi ireokhuo nin ọle ka ha ye bii emhin nọn kpẹnlẹn, sade ọne okpea kie dọ re okhuo ọbhebhe, yẹ ha ghe ọne ibọdọ bi ireokhuo nin ọle ki ye nian bii ọne a re obọ ọi. Nin mhan rẹ lẹn ebezẹle nin mhan da ta inian, bha ji mhan zilo nyan ebi Jesu tale rẹji isọebea, bi nin ọria rẹ kie bọ ọdọ, la re okhuo.

Bhi Matthew 19:​9, Jesu da rẹman emhin nọn ha sabọ re ọria re ọkpẹnlẹn ọbhi ibọdọ bi ireokhuo nọnsọle. Ọle da yọle: “Ọria nọn hi ki rẹ khin, nọn khu okhuo ọle fia, ghe ọ iyi ranmhude ọne okhuo gboghẹ, ọle da dọ re okhuo ọbhebhe, oghẹ ọle gbele.” Bhi ebi Jesu tale, mhan luẹ ghe (1) ọkpea la okhuo ha gboghẹ ọkpa Baibo re obọ ọi nin ele da sọebea rẹ kpẹn ibọdọ bi ireokhuo nọnsele, bi (2) okpea nọn khu okhuo ọle fia arẹmiẹn ọle bha gbe ọne uhi nin nọn ribhi Baibo a, dọ re okhuo ọbhebhe, gboghẹ. *

Ọta nin Jesu ta be rẹman ghe, Baibo re obọ ọbhọ nin okpea nọn gboghẹ yẹ khu okhuo ọle fia, re okhuo ọbhebhe? Ọ iwo yi iriọ fo. Ahamiẹn okpea gboghẹ, okhuo ọle sabọ rẹ zẹ nin ọle rẹhunmhan ọlẹn, la nin ọle hẹi rẹhunmhan ọlẹn. Ahamiẹn ọle bha ka rẹhunmhan ọdọ ọle, ele da dọ sọebea bhi ikotu, ele dẹ sabọ lọnmhọn ọria ọbhebhe sade ele sọebea fo.

Bhi obọ nọnkẹle, ọne okhuo sabọ rẹ yọle ghe, ọle dẹ rẹhunmhan ọdọ ọle beji ọle bi ọdọ ọle ha da sẹyẹ ha yi okhuo bi ọdọ. Ọkpakinọn, ahakimiẹn ọne okpea nọn gboghẹ bha guanọ nin okhuo ọle rẹhunmhan ọlẹn, yẹ ha khian ikotu dọ sọebea kii? Baibo bha re obọ ọbhọ nin ọne okpea rẹ re okhuo ọbhebhe, ranmhude, okhuo ọle muegbe nin ọle rẹ rẹhunmhan ọlẹn, beji ele ha da sẹyẹ ko ha ribhọ. Ahamiẹn ọle dọ re okhuo ọbhebhe arẹmiẹn Baibo bha re obọ ọbhọ, ọle kie gboghẹ. Bhiriọ, ene ewanlẹn bhi agbotu ki zẹ ewanlẹn bhi ẹwẹ ele nin ele talọ ọbhi ọne ẹmhọn.​—1 Cor. 5:​1, 2; 6:​9, 10.

Ahamiẹn okpea dọ re okhuo ọbhebhe arẹmiẹn Baibo bha re obọ ọbhọ, ẹlo nela ibhio mhan bhi agbotu ha rẹ ghe ibọdọ bi ireokhuo nin ọle ka ye, bi ọne ọle ki ye nian? Beji Baibo rẹman, okhuo nin ọle zọbọ, okhuo ọle be sẹyẹ nọn? Ọne okhuo dẹ be yẹ sabọ zẹ nin ọle rẹ rẹhunmhan ọdọ ọle, la zẹ ọle ọbọ? A dẹ be ha ghe ọne okpea bi ọne okhuo nin ọle la re bhi amhẹn, bii ene gboghẹ?

Bhi ẹghe nọn gbera, ibhio mhan bhi agbotu ghe ọne okpea bi ọne okhuo nin ọle la re bii ene gboghẹ, ahamiẹn okhuo nin ọle ka re sẹyẹ ribhi agbọn, ọle bha bọ ọdọ ọbhebhe, ọle bha yẹ gboghẹ. Ọrẹyiriọ, Jesu bha tẹmhọn ọne okhuo nọn bha gboghẹ ẹghe nin ọle rẹ ha zilo nyan ẹmhọn isọebea, bi nan rẹ kie bọ ọdọ la re okhuo. Ọkpakinọn, ọle da rẹman ghe, okpea nọn khu okhuo ọle fia arẹmiẹn ọle bha gboghẹ dọ re okhuo ọbhebhe, gboghẹ. Bhi ọne idia nan, ọne isọebea bi okhuo nin ọle kie re, nin Jesu yọle ghe oghẹ nọn, ki re ọkpẹnlẹn ọbhi ibọdọ bi ireokhuo nin ọle ka ha ye.

 Ahamiẹn okpea khu okhuo ọle fia yẹ dọ re okhuo ọbhebhe, ọne okhuo nin ọle ka re ida yẹ sabọ bu ọle re, la yọle ghe ọle bha yẹ guanọ ọne okpea. Bhiriọ, ọle ida yẹ ha kpokpo egbe si nin ọle rẹhunmhan ọdọ nin ọle ka bọ, la nin ọle hẹi rẹhunmhan ọlẹn. Sẹyẹ, aharẹmiẹn ọne okhuo nọn bha gboghẹ yu, kie bọ ọdọ, la dọ gboghẹ, ọnan ida rẹso uwedẹ nin ibhio mhan bhi agbotu ha rẹ ha ghe ibọdọ bi ireokhuo nin ọne okpea ki ye. *

Bhi ijiẹmhin nin mhan zilo nyan bhi okhun ọlẹn, ọne okpea gboghẹ, bhiriọ, ele da sọebea. Ọkpakinọn, ahakimiẹn ọne okpea bha gboghẹ, sokpan, ọle da dọ sọebea, yẹ dọ re okhuo ọbhebhe kii? La, ahakimiẹn ọne okpea bha gboghẹ ọkuẹsẹ ọle dọ sọebea, sokpan, ọle da dọ gboghẹ beji ọle sọebea fo, yẹ dọ re okhuo ọbhebhe arẹmiẹn okhuo nin ọle ka re muegbe nin ọle rẹ rẹhunmhan ọlẹn kii? Bhi ene ijiẹmhin nan, ebe nin ọne okpea sọ a, bi okhuo nin ọle kie dọ re, nin ọle rẹ dọ gboghẹ ki re ọkpẹnlẹn ọbhi ibọdọ bi ireokhuo nin ọle ka rẹ ha ye. Ibọdọ bi ireokhuo nin ọle kie lu nian bha gbe uhi ọsi agbaẹbho nọnsele a. Watchtower ọsi November 15, 1979, apapale 32 yọle ghe, “beji a miẹn ọne okpea re okhuo ọbhebhe, ọle ida sabọ zẹ ọne okhuo obọ dọ bu okhuo nin ọle ka re; ranmhude, ibọdọ bi ireokhuo nin ọle ka ye kpẹnlẹn ranmhude nin ọle rẹ dọ sọebea, gboghẹ yẹ dọ re okhuo ọbhebhe.”

Ọne uwedẹ nin mhan kie rẹ lẹn otọ ọne ẹmhọn nan bha rẹman ghe, ibọdọ bi ireokhuo iyẹ yi emhin nin mhan ha re ẹlo nọn ghanlẹn ghe, la ha ghe igboghẹ bii emhin nọn bha kaka gbe. Oghẹ okpea gbele sade ọle khu okhuo ọle fia, yẹ dọ re okhuo ọbhebhe arẹmiẹn ọne okhuo bha gbe uhi nọn ribhi Baibo a. Bhiriọ, ene ewanlẹn ki talọ ọbhi ọne ẹmhọn. (Ahamiẹn Ọsali Jehova ọle kie re bhi amhẹn, ene ewanlẹn ki yẹ nanlẹn talọ ranmhude ọle yẹ gboghẹ.) Arẹmiẹn a ida ha ghe ọne okpea bi ọne okhuo nin ọle kie re bii ene gboghẹ, sokpan, ihe ida sẹ ọne okpea obọ bhi agbotu bhi ikpe ne bunbun, rẹ dọ sẹbhi ẹghe nin ẹkẹ ọle ida yẹ ha khọ ẹbho bhi emhin ebe nin ọle lu, la ẹghe nin ele ida yẹ ha riale ghe, ọle bha sẹ ọria nan ha mun ekpẹn nan. Sẹyẹ, ọkuẹsẹ ihe sẹ ọle obọ bhi agbotu, ene ewanlẹn ki yẹ zilo nyan ebi emhin ki dia okhuo nin ọle khu fia bhi egbe yẹ nian, bi imọn nesele ne bha sẹ wanre nin ọle zẹ ele obọ.​—Mal. 2:​14-16.

Ranmhude emhin ne imhẹn ne nabhọre sade okpea dọ sọebea bhi uwedẹ nin Baibo bha re obọ ọi, yẹ dọ re okhuo ọbhebhe, ọ dẹ ha mhẹn nin Kristiẹn re egbe khọkhọ Jehova, yẹ re ẹlo nọn ghanlẹn ha ghe ibọdọ bi ireokhuo.​—Eccl. 5:​4, 5; Heb. 13:4.